Eermiyaasikaa Raaga41
1Moyanjiinke mini hado kadeek moyanjiinke ja'laabuwwi giddii'n mitti, Elishaama'ike beltik belti Naataaniyak belti Isima'eeli torbake agenjo'n, tomme manninni welti Mitsipha'a Ahiqaamika belto Godoliyaasibaa dage; ookkonna mittenba offolleexxi ita inda'neenge'n,2Naataaniyak belti Isimaa'eelinna tommi isinni welti hedhemmak manni ke'eexxi Baabiloonik moyanji boga galchaashsha hariiremmaka Saafaanika aka'o Ahiqaamika belto Godoliyaasi'i wolaantichchik shinne.3Isima'eeli Mitsiphaa Godoliyaasin welti hedhemmaka Ayihudiinka manna duuchcha, ookkonna hedhemmaka Baabiloonika loliinka manna shiye.4Godoliyaasi shiyemeexxa gorsa ayyinna ege'nebaang,5saddeeti tommi manni areeda haaxxeexxi yaade'xxa ege'nishatee seemma ifi ifixxa dadarexxi biso ifi hoqe'neexxi, midhatika tolchanna hixaana abixxineexxi Sekemii'n, Seelo'ninna Semaariyaanaa'n Duuchchi Woddike Goottike miniba'a dange.6Naataaniyak belti Isimaa'eeli insa'nee qophedha Mitsiphaa'n fule oodha'n me'a'n afemeexxi insa'ne'e, «Ahiqaamika belto Godoliyaasiba'a amme» hiyye.7Insa'ne qachchi giddi'a e'yinee wodda, Yonataanik belti Isimaa'eelinna isinni welti hedhemmaki manni insa'ne'e shiyeexxi wode'e cammammaxxe bale giddo hunne.8Ookkone shiyemeeke saddeeti tommi manninni welti hedhemmaki tommi manni kinni Isima'eeli'i, «No'ooke fichchi giddo sho'neennexxi dinnenna so'i, ejersiinxi zayitenna malebi hedhemmaxxee ballo'o no'o'o shiltoxxe'e!» hiyye; isinna insa'nee wele manninni shiyebaang waale.9Isima'eeli shiyeeke mannika rensha giddo hunemmaxxinna Godoliyaasinna shiyemmake mannika rensha giddo hunemmaxxi itti wode'e cammamaxxi bale moyanji Aasa Isira'eelika moyanjo Ba'isha sodaatemmaxxe'e isoo ifi iimii'ni hoyyedhate hujisa'emaxxeman; tenne bale'n Yonataank belti Isima'eel rensha wonshe.10Isima'el Mitsiphaa gateeka arda duuchcha booji'e; insa'nenna moyanjik meyyaxxa oosenna weli ooko'o gateki manni duuchchi Nabuzerdaan moyanjo Baabiloonike looliinke mannik ajajalli Ahiqaamika belto Godoliyaasi'i hariire'e insa'ne galcho'a asse'emman; Naataaniyak belti Isimaa'eel konne manna duuchcha booji'eexxi Amoonike mannike bogiba'a foofo'a ke'e.11Qaareehak belti Yohaanaaninna isin welti hedhemak loliinke mannika ja'laabuwwi duuchchi Yohanaaniki belti Isima'eeli assexxa fuggo duuchcha lanqeexxi,12Yohanaanika belto Isima'eeli'i lollo'a insa'neeka loliinka manna duuchcha adhdhine me'ine'e Gaba'oon hedheeke lumoke baleessi bira dhaqanbe.13Isimaa'eeli abide adhdhe me'emak manni duuchchi, Qaareehaka belto Yohaanaaninna isinne welti hedhemmaka loliinka ja'laabuwwa unde wodda gamande.14Isimaa'eeli Mitsiphaa'n booji'e adhemak manni duuchchi angii'n fulchedhe Qareyake belto Yohanaanba'a me'e.15Naataaniyak belti Isima'eeli kinni welti hedhemake saddeeta manni welti Yohaanaanixxe anganaa'n fulchedhe; Amoonike mannibaa baaje.16Qareyank belti Yohaanaaninna isin welti hedhemak looliink jaa'laabuwwi duuchhi Naataaniyak belti Isimaa'eel, Ahiqaamika belto Gadaliyaasi'i shiyeechchi uduma Mitsiphaa'n boji'eena'a gatemaka manna hissineexxi adhdhine me'ine; kunni manni loliinke manna, melaalle oosetaanna Gaba'ooni'n aadhe dagemake mootomatike moinike ja'labuwwaman.17Insa'nemenna ooko'n ke'neexxi Gibtse'e me'ine Beeteliheem bira hedheeke Kimihaami hiyyemake booncho'n offolle.18Insa'ne'e Gibtse'a me'inemalchi Baabiloonike manninaa'ni baanje fullo'ateman. Insa'ne Baabiloonika manna soda'ante'emalchi Naataaniyak belti Isima'eeli Baabiloonik moyanji boga galcho'a haariire moyaashsha asseeka Ahiqaamika belto Godoliyaasi'i shiyemaxxeten.
The Word for the World International