Issayaasikaa Raaga7
Moyanjo Akazi'a Uwwendexxa Erga
1Ooziyaanik belt Iyyo'ataami i'leeki Akaazi Yihuda galchammaka sane, Sooriyaki moyaanji Retsinina Isira'eeliki moyaanji Remaliyaki belt Faquhe lola ke'issino'a hanseexxi Iyyerusaalemi'a dagaani; yaane kinni Iyyerusaalemii'i lolle injifanto'a dandeennebaani.2Sooriyaa Efireeminni welti mitteba hingee lolakee weli aange'eeni hiyyendaaxxa odo Yihudiinki moyanji laqee wodda isinna Yihudiinki ardi alayye diidallo gandemmake haqichchishsha eeriqennaa kayya daaqe.3Duuchchi Woddiki Gootti Issayaasi hiyyee qici, «Belto atika adhdhite Sheeriyashshubi adhdhite seemma borcammake mannike fichchiba me'inammake ori giddo marte moyaanjo Akaazinni afemi.4Isoonna hitato qici, ‹Daaqqoxxe'e, sodaattoxxe'e; giiratenaa'ni gateexxi wiliilaa'neeke konnee lame itisane haqichchuwwa, Sooriyaxxeenna moyaanjo iseke Re'asoonixxee iittanni Remaaliyake beltixxee mufexxe mee weekemi.5Sooriya Efireemik ardinninna iseke moyaanjinni welti mitteba hinge'eni,6«Insa'nenna Yihuda'a lollo'a, ardakanna rakkinse ifixxe gamo assedhat Xaabi'eelika belto moyanjo insa'neeke assate mudhdhine'een.»7Yaane kinni Duuchchi Woddiki Gootti hiyya'nee qici:« ‹Tinn insa'neexxi mari'e qabbabaani;haranga kaddaaxxebaani,8Mayee hiyyendeexxe kadoole, Sooriyaki umi Demaasiqoteni,Demasiqoki uminna Retsinten;Jaane tommanna onde woggaa giddoEfireemik ardi xexxereme luggee'naamootumumati ege'nemiyyo isexxinna gattaan.9Iittanni Efireemik umi Samaariyaate kadaa wodda,Samaariyaaki umi moyanjo Faqu'eteni.Yoona amanate'n jabaata gophphinooleha'noonna haranga uurra dandetinabaani.› »Amanu'eelixxa Daga Leellishaaka Beesisa
10Duuchchi Woddiki Gootti higgeenna Akaazii'i hiyyee qici,11«Buttatixxe dhi'monaa'ninna kadi iimati iimi darree'n mitte beesisa ati'a uwwonna'a anee Duuchchi Woddika Gootta Mageno laqi.»12Akaazinna kinni «Beesisa ani'a uwwi hiyye laqabo'noni; atee Duuchchi Woddika Goottanna hega uudabe'noni» hiyye.13Tennexxee Issayyaasi hiyyee qici, «Ha'no moyanjo Daawwitike mini hado! Laqqe; manjo ko'wisa hanqattamale Magenokanna ko'wisinaa'nee?14Yoona umo isiken Duuchchi Woddiki Gootti ha'no'a beesisa uwwaan; kunse duuddo dubarichcho sila'witaan; labbaka beltonna ildaani; summa isikanna Amanu'eeli hite fulchitaan.15Isinna nophphe elobaaxxa gibe eloxxa melledho'a geessissaxxa ege'na afaa wodda adotanna malebo la'ataan.16Yoona kunni belti eloxxa elobaaxxenaa'n gargar hiisse ege'nebaa edi darre kunni ati sodaataateke lame moyanjuwwiki bogi urumme gataan.17Yaane kinni Efireemi Yihudanaa'n gargari higeexxe yannanaa'n Duuchchi Woddiki Gootti uudende ege'nedebaaxxe jabaxxe rakkoka baro atike annike mootummatike mini hado'n iyyedagaan; tinninna Asoorika moyanjo'ninna ate'n rakko iyyedagaan hiyyaten.»18Iikki bari geyaa wodda Gibtseeki manni tiitichchiinke haagansha, Asoorik manninna ifike boga'ni kinniisiinke sannachchiinsha huursa'ni dago'a Duuchchi Woddiki Gootti beesisa uwwaan.19Insa'nenna bukki hine dangeexxi gammoojexxe dhooquwwa giddonna wolo'uwwa giddo, qosorruwwa giddonna hori bobba'ammaba duuchcha'ni ofollaani.20Iikki bari geyaa wodda Duuchchi Woddiki Gootti umo ha'nooka, areedakanna bisi ha'nookixxa orda duuchcha Asoorika moyanjo Efiraaxisike galaani widii'n aadhe dage haadotishsha ha'noo haadaan.21«Ookkonne baro'n mitti manji mitte goronsanna lame gedhebo callanna afo'oole,22ookkonne horenaa'n alfaaxxe adotixxe bira sa'nenaa'ni kexxeexxa isi hasisaaxxa ita alfaan; tennenaa'ni kexxeexxa ookkone boga'n gataaki weli manninna la'ataachchi malebokenna adote kaddaan.23«Eettene barra'n kuma birre hiraaki eloki kumi woyinetika hiddichcho kanseeke fichcha duuchcha'ni utetixxi haqqenna qu'muudo fuldaan.24Boggi duuchchi utetixxi haqqenna qu'muudo calla kademmaxe'e ardi adamo fulaa wodda gabe abixxe fulaan.25Edi wodda koonne midha ronke'na fulchitammaxxi tulluwwa duuchcha utetixxenna qu'muudo fulchemmaxxee ayyinna okko'a marabaan: yaane kinni lalo, gedhebokanna re'e calla alla'linaaba kadaani» hiyye.The Word for the World International