Issayaasikaa Raaga2

Duuchchi Woddika Nage'a

1Amootsiki belti Issayaasi Yihudakeenna Iyyerusaalemike qachchi'a haaso'eek Mageniink hiyyichchi konneechchi butta hedheeken.
2Bariinxi muda geltaa woddaDuuchchi Woddike Goottika woyyichcha galma ijaremaaxxi koobawele koobuwwa duuchchanaa'n saxxe leellitaan;Koobuwwa duuchchanaa'ninna lumooshsha saxxaan;lumooki ardi isiba'a yaa'aan.
3Tennexxee lumoki ardi,«Amme Duuchchi Woddike Goottixxe koobaba'a me'ino;Ya'iqoobike Magenike woyyichchi galmiba'a me'ino;Isi eeyyaaxxa hunjannoshsha no'oo barsiisaan;no'onna isike ora'n me'inannonSeeri Tsiyoonii'ni,Duuchchi Woddike Goottixxi kulanna Iyyerusaalemi afendammaxxe» hiyyaan.
4Isi lumooke moyanjuwwixxe oddo'n murte uwwaa'nweli gonphe balleessaan;Tennexxee wolaantichcha insa'neeka qottote,bagedo insa'neeka haantote giissinsaan;Mitti moyanji mitte moyanjo'n lola ke'issabaan;ookkoneechchi uduma loliinxa baranno barataaki hedhebaan.
5Ha'no Isra'elke arda!Amme! Duuchchi Woddike Goottike ifi giddo mammaremmo!

Fuggaalleeyyetixxa Ba'ne

6Mageno! Arda atika Ya'iqoobixxasanne wocci assite waaldetten;Bogi duuchchi boroti darrekennaFilisixemike mannike morotike adabinni wo'meen;ardikinna dharichcha mageno magenoofatammake ardinni welti guddee'en.7Boga insa'neeke'n birretiki sibljinnaa worqe wo'mitemmaxxee,karra insa'neexxa qixxe egenneba'a;Bogi insa'neeke fadhadi callike kademmaxxeefadhadiinxi gaaruwwa yo'oshsha bira saxxeen.8Boga insa'neeki giddo duuchcha magenoofattaneexxi fakkuwwa wo'mitee'en;insa'ne anga ifixxe'n giissinemmachchuwwaInsa'neexxe angaxxe huje'a saganda'neen.9Tennenaa'n kexxeexxa duuchchiingi shookesalphateen;Duuchchi Woodike Gootta! Balleessa insa'neexxa gattowwaali hitoxxe!
10Duuchchi Woddike Goottixxe mufenaa'ninna sodaachchiisaake isike gaachchanninaa'n baaji;wolo'o giddo me'i;kinjuwwiinxe oddo'ninna bale giddo sho'omme!11Hollaameeyye salphataan;caaqalleeyye ibbaani;Eettene yanna'n Duuchchi Woddiki Gootti calli ulfaataan.
12Dada Duuchcha Ajajaak Duuchchi Woddiki Goottiifii dukaakannaa caaqaaleeyye duuchchaHollaameeyye duuchchasalphataaxxa barra mureen.13Isi lumollamma Libaanoosixxa haqqe duuchchaBaasanke bogixxa lumolla haqquwwa duuchchanna salphisaan14Lumollamma koobuwwa duuchchatulluwwa duuchcha dirrise'e dirrete assaan.15Qeeraaramma qachchixxa heqqatixxa xeelephuwwa duuchchakinjiinka dalla'uwwa duuchchanna hojoggi assaan.16Terseesixxa lumolla hoboluwwa duuchchaYo'oshsha biifaaka mi'yuwwa duuchcha midde lixaashsha assaan.17Manniinxi holla baxxan;ifi saadatinna gattaan;Eettene yanna Duuchchi Woddiki Gootti calli ulfaataan.18Fakkuwwa duuchchanna hara baxxaan.
19Duuchchi Woddiki Gootti butta daassebiro'a dagaaxxa yannaisixxe mufenaa'ninnaSodaachchisaake isike gaachchanninaa'n gatateemanni wolo'o giddokinuwwatixxe oddo'n yookaan bale qoltine'e sho'omo'a wo'laannaan.20Eettene barra mannimagenoofato'a anga ifixxenni giissedhemmaxxaBirretike sibljixxannaa worqetixxa fakkuwwatuquwwakeennaa cirrichchuwwakee wala'n me'aan.21Duuchchi Woddiki Gootti butta daassaaxxa yannaardi isixxe mufenaa'ninnaSodaachchiisaake isike gaachchanninaa'n gato'awolo'o giddonnaakinotike baqaqi giddo sho'omaan.22Yoona reyaaka manjo addatinoqqe;isi mittechchonna woyi fulabaan.

The Word for the World International

https://app.library.bible/content/2b894378475c6aea