Ibritotee11
Amanatika Lumollamma Fakkeenuwwa
1Amanate hiyya addantennexxi yaane muuxxendaaxxa konkannoxxe uundaabe'noxxi yaanenna dhugaate kaddeexxa egennannoxxen.2Edik manninna galateefatemeemmak tennennideemman.3Dada duuchchanna Mageniinke hiyyichchinni dadendeexxa amanat qalbeeffantannon; tennexxee leellitaaxxi yaane dadendeek leellitaaxxenaa'nite kaddebaaxxa egennanno.4Aabeeli Qayeelikenaa'n caalaaka tolcha Magenokee amanat shiqishe; Mageni isika tolcha uuddaaxxenni haaso'ee wodda, isi manat qullichcha kadeexxa isi'a dhugaa kulende; Abeeli reyeenni hedheexxi midde amana ifixxi darree'n ta'i qico'n haaso'ate'ni hedheen.5Henook iso'n reyo geltabaashsha tennee buttaanaa'n amanat adhdheme; Mageni isoo adhdheemmaxxee afemebaan; adhdhemebaa edi darre is Mageno gammachchiiseexxa isixxee dhugaa kulende'een.6Amanat belo Mageno gammachchiisa dandeessissaba'a; tinninna kaddaachchi Mageniinbaa shiqaak duuchchi Mageni hedheexxanna isoo qalbeti halsaakeeri'aanna hira uwwaaxxa amana hassissan.7Nohi leellitebaaniinxe yaanexxee Mageni isoo xexxe'achchiisee wodda Mageno sodaateexxi ifika mini hado anjiratee markaba amanat giisse; Nohixxe amananni butta duuchcha cubbitete kadeexxa egenendeexxi murte ise'n murende; Nohinna amanat afendaaxxa qullumma dhaalaake kade.8Abirihaami uduma qadaadi ifike assedheexxi adhaalaaxxe eettene bakkabaa mea'aashsha ye'emee wodda amanat ajajeme; isi haba'aa me'aaxxa ege'na gopheexxe kaddoolenna ishshi hiyyeexxi me'e.9Annafee boga'n hedheeke keessuntichchishsha ookkone addachchiisat uwweemmemake boga'n amanat offo'le; ookkone addachchiisatika hiyyichcho isinni welti dhaalaake Yisaaqishshanna Ya'iqoobishsha duunkaan giddo ofo'le.10Tenneennna asseechchi ookkonee jabaxxe boosoka Mageni qixxeseekanna ijareeka qachcha heqedhaammaxxeeten.11Saaranna addachchiisa isi'a uwweek Mageni xuurameessake kadeexxa egendemmaxxee cimatenaa'n kexxeexxa ila dandeetabaaxxe kaddeenni hexxeexxi midde siila'watixxa hunna alfiteek amanatiten.12Tennexxee reyeeke manjishsha uudeema'neeke Abirhaamii konne mittenaa'n iimixxe urjeshsha bira saxeexxinna abbayyaatike maanchishsha laakkossakee dandeessissabaaxxi horte afende.13Kunni manni duuchchi insa'ne'a uuwwendeemmaxxa addachchiisa alfebaang amana ifixxa abixeeshshanni reye; kaddo malee addachchiisati eettenee uwwendeemmaxxa yaanuwwa bayii'ninni anfeexxi alfineeshsha assine gammashshoti adhdhine; insa'ne buttate'n keessummatenna ifike boginaa'n shoremeeke manna kandeexxanna egenne.14Iitta hiyyaak manni ifike kadeeka boga heqqedha'neexxa ege'nishaan.15Ookkone waale fulleemmaka boga silaa hendeechcho kaddeele ookko'a ille iima higa dandeennamman.16Ta'a kinni ookkone caalaaka iima hedheeka boga halchinaan; Mageni insa'ne'a qachcha giisseemmaxxee insa'neke Mageno hiyyeme ye'ema shookeba'a.17Abirihaami Mageni isoo hega uudee wodda Yisaaqii'i tolchake asseexxi amanat shiqishe; iikki addachchiisatika hiyyichcho adhdheemmak Abirhaami ifika mitte belto tolcho'aatemman.18Kunninna Mageni Abirhaamii'i, «Horte atixxi Yisaaqi darree'n ye'endaan» hiyye'eemmakemman.19Abirihaami Mageni reyeeka ke'issa dande'aaxxa hedeemman; Yisaaqiinna reyotenaa'n ke'eeke manjike fakkeenishsha haaroba alfe.20Yisaaqinna edi'a kaddaaxxa yaane hedeexxi Ya'iqoobinna Eesawuu'u amanat eebbise.21Ya'iqoobi reyo'a shiqeexxa yanna mitte mittenda Yooseefixxa oose amanat eebbise; ifixxe siqqichchoxxe qacce hananna hirkateexxi magenooffate.22Yooseefi reya shiqeexxa yanna Isira'eelike ardixxa Gibtsee'n fula amanat haaso'e; ifixxe miqexxeenna ajaja uwwe.23Muuse ilemeechchi uduma isik hadi isi dancha anno kadeexxa uundeemmaxxee amanat sase agenjo isoo sho'ye; moyanjiinka ajajanna sodaanteba'a.24Muuse nophpheechchi uduma, «Feri'oonixxe beltoke belto» hiyyema amanat gibe.25Heenoxxe yanna'a cubboti afemaake gammadi mannii'n Mageniinke ardinni welti rakko adhdha fi'le.26Edi'a alfaaka hira uudeemmaxxee Gibtseexxe karra mannii'n Kiristoosixxee rakko adhdha hara caaldaaxxe karra kaddeexxa qalbeeffate.27Isi moyanjiinxa mufe sodaatebaang Gibtseeka boga waaleexxi amanat fule; ookkonee leella'nebaaka Mageno uude'eeshsha asseexxi ifike me'injo'n jabaate.28Angafa oose shiyammak iikki iimik erganji Isira'eelotixxa angafa oose shiyabaashsha Muuse sa'atike ayyaanixxe mundexxa fiffixxa asseek amanatiteemman.29Ardi bago boga'n lekkati me'a'neeshsha diimoxxa abbaayya amanat foofe. Gibtsito kinni iitta assatee wo'laanda'n liqiinsende.30Isira'eelto Iyyarkoka dalla'a torbaane barra dooteechchi uduma iikki dalla'i ibeek amanatiten.31Iitti yabaabbulleti galda'eemmaxxi Re'aabi ookkonee dooyyammaka manna nage'ik adhdhitemmaxxee ookkonee ajajemebaake manninni welti shiyyendebaak gatteechchi amanatiten.32Yoona konnechchi caala maa hiyyanota? Gedewoonixxee, Baaraaqixxee, Somisoonixxee, Yofitaheexxee Daawwitixxee, Saamu'eelixxee, iittanni wabeekotixxee ha'no'n xingabe'noshsha yanna afebe'no?33Kunni manni amanat moottumuwwa injifante; qullummati galchine; ookkonee uwwemeeka addachchiisatika hiyyichchonna adhdhine; neequwwiinka afo'uwwanna cunfe.34Giiratixxa hunna xolsine; wolaantichchiinke qaranaa'ni gantee, ifi ifixxe ifi gophanaa'ni jabeenna alfine; bagedik worba manna kande; alagiinka loliinka mannanna shorrine.35Melaalle reyeemmaka ifi ifika ifiruwwa ke'e'naa adhdhite; weli kinni caaldaaxxa reyotenaa'n ke'a alfatee hiyyeexxi reyaate geesisaake gagr gargar hedheeke abari'a ifi uwwe; usurakenaa'ninna fulo'a hanseba'a.36Weli wel gacifachchotike kade, ganeme; wel kinni usuremeexxi useriinke mine'n huneme.37Kinoti cancaqqemme, magaazeti lameba darremme; wolaantichchik otemmeexxi renne; re'etikanna gedhebiinka goga oddo'wineexxi doonsakiyya hine; hiyyeeyyetenna rakkiyyete kandeexxi wixxixi hine.38Tinni butta insa'ne'a eloxxe kada gophemmaxxee qiilla gammoojje'ninna kooba kooba'n, wolo'o wolo'ninna bale bale'n jeekki hine.39Kunni manni duuchchi insa'nexxe amanaxxee dhugaa kulendee'naa'n insa'ne giddii'n ayyinna ookkonee addachchiisatika hiyyichcho adhdheek hedheba'a.40Mageni no'aa caaldaaxxa yaane qixxeesseemmaxxee insa'ne no'onni weltite malee qofit wo'make kada dandeenaba'a.The Word for the World International