Gelaatiyake Manni'a2
Ergemmallumma Phawuloosixxi Wele Ergameyye'n Ege'nende
1Tommenna shoole wogganni udumi'a Bernabaasinni welti Iyyerusaalemi'a illeema hingennexxi marrennen; Titonna aninninni welti adhdhe me'ennen.2Me'ennechchinna marannoshsha Mageni ane'n ifisemma qicishshatemman. Konneechchi edi darree hujennexxinna ta'anna hujennexxi huje elo calla kadde gattabaashsha Isira'elotakee kadebaake manni'a lallabenexxa wengeele, umo insa'nenge'ni akeekisanjuwwake'n kulenne.3Aninni welti hedhemmak Tito fedhee qiconna midde Girkiikichchoke kadoolenna jila ofo'laashsha hunnantemmabaan.4Mitti mitti dharichchi dayyuwwi no'oxxe oddo'ni sho'ome ee'yeechchi jila ofollonna'a hanseetemman. Kunni manni dooyyatee no'oxxe oddo'n sho'ome dageechchi Yessuusi Kirsitoosinni anfeennexxa no'oxxa leexa fula mucunqeexxi no'oo bribbumatibaa wirri assatee hendeeten.5No'o kinni dhugaa wengeeletixxi ha'no'n tini hiteexxi hexxaashsha hinennexxi shiixxoxxe yanna'a midde insa'ne'a anga uunebe'no.6Konne akeekisano labbeexxi leella'neeke mannixxee kinni Mageni manjiinka alba uudeexxi baassa gophammaxxee edo ayyeerate kadiyyo insa'neexxe ani rakkonda afeebe'non. Kunni akeekisanote hiyyemeedheek manni kinni ani lallabennexxe wengeele'ni mitte haaroxxa yaanenna lebebaan.7Yaane kinni Mageni Pheexiroosii'i Ayihudakee wenegeele kulaashsha assemmashshanni aneenna wenegeele Ayihudootake kadebaake manni'a kulannoshsha asseexxa egenne.8Tennexxee Pheexiroosi Ayihudakee ergemallo kadaashsha assemmak Mageni aneenna Ayihudotiinke ergamallo kadonnoshsha asse'een.9Utuphake kadeexxi leellitammaxxi Ya'iqoobi, Pheexiroosinna Yohaannisi Mageni tennee gargaritti hexxeexxa ergatensha ani'a uwweexxa egenee wodda no'onni welti mittooma insa'neka ege'nishshatee ifi ifixxe middixxa anganni aneenna Bernabaasii'i sha'mi assine. Ookkoneechchi uduma no'o Ayihudake kadebaak mannibaa insa'ne kinni Ayihudibaa me'inaashsha insa'ne wel aange.10Yaane kinni insa'nexxe oddo'ni hexxeexxa hiyyeeyye calla deenabe'noshsha no'oo maganniseen. Tinninna ani si'ik asseennexxe yaanen.Phawuloosi Antsookiyake qachcha'n Pheexxiroosii Xaa'neexxa
11Pheexirosi Antsookiya'a dagee wodda addanda dedheemmaxxee uudanaa'n isoo gareerenne.12Ya'iqoobi Antsookiyi'a ergeek mitti mitti manni dagebaa edi darre Phexiroosi Ayihudotake kadebaake manninni welti ita'emman; kunni manni dageechchi uduma kinni Ayohudootake kadebaak manni jila ofo'liyyote hassissaan hiyyammaka manna sodaateexxi udumi'a higeexxi Ayihudootake kadebaake manninaa'ni gargar hige.13Wele gatteexxi Ayihudiinxi kirsitosito Phexiroosixxa ifi uggudhdha hordofee. Bernabaasi midde gatebangi bushiyyo insa'neexiba'a jijjiiremeen.14Huje insa'nexxi dhugaa wengeeletixxen welti mitteba aaga gonpheexxa uudene wodda, duuchchiingi edo Pheexiroosi'i hiyyennee qici, «Ati Ayihudichchoke kaddettexxi Ayihudake seera'nite kaddeebang Ayihudotake kadebaake mannike seera'ni hexxetten. Iitta kaddeexxenni Ayihudootake kadebaaka manna Ayihudotinke seera'n hedhaashsha insa'ne'n mayaate hunnatete? Hiyyennexxi duuchchingi edo gareerennen.Ayihudootakenna Kadi Ayihudootake Manni Anjiremaak Amanatite kaddeexxa
15«Eeti no'oxxi ilensha Ayihudakenaa'niten, ‹Ayihudota kadebake mannishanna no'o cubbaaleeyyetebaan›16Yaane kinni manji qulloomaachchi Yessuusi Kiristoosi'n amanatite malee'e Muuseke seera heqqedhat kaddebaaxxa ege'neennen; no'onna seera heqqedhate kaddebaangi amanati qullommannoshsha Yessuusi Kiristoosi'i amaneenne; fedheeki manjinna Muuseka seera heqqedhiyyoti qulloomabaan.17«No'o Kiristoosi'n amanat qulloomate hansaannen; no'o umo no'ongenninni cubbaaleeyyete kandennexxi afemmonnole yoona no'o cubbo hujisa'neeki Kiristoosite hiyyotee? Haranga waawwo!18Ani diigenneka seera kinni illeema hiissennexxi hujannoki anende kadennexxenni ani umi anigenninni seera diigeenneke kadeennexxa ege'nishaa'nenni hiyyoten.19Ani Magenokee hedhonaa seera uuddaaxxenni seerakee reyeennen.20Ani Kiristoosinni welti fannisemeeneshsha asse ifi laakko'ennaxxee; ta'ani edi'a ani hedhot hedhabenon; Kiristoosi kinni ane'n hedha; Ta'a ani maalik hedhaannexxi hedho anee eeyyekenna umo ifika ani'a sa'isse uwweeke Mageniike belto'ni amanati hedhannoxxe hedhon.21Mageniika badhaadha butta shollishabe'no; yoona manji qulloomaachchi Muuseka seera heqqedhiyyotite kaddoole Kiristoosi reyeechchi tolange hiyyotebaata?»The Word for the World International