Izirakaa Maxaafa8
Iziranni Welti Illee Iima Higeeke Mini Minike Akeekisanjuwwika Summa
1Moyanji Arixxeekisiissixxe mootummatike baro'n Baabilooninnaa'ni aninni welti fuleeke mini mini hadike akeekisanjuwwi konnechchi butta hedheekeran.2Finhaasixxe hortenaa'n Geersooni, Itamaarixxe hortenaa'ni Daani'eli, Daawwitixxe hortenaa'n Haxuushi,3Isinna Seekeeniyaxxe hortenaa'niten. Faaroosixxe hortenaa'n Zekkariyasinna isinni welti borreeseme'emmak 150 labballi.4Fehaati Mo'aabixxe hortenaa'n Zerahiyyaki belti Eliyeho'enaayinna isinni welti 200 labballi;5Zaatuxxe hortenaa'n Yahazi'eelik belti Sekeeniyanna isinni welti 300 labballi;6Adiinixxe hortenaa'n Yoonaattaaniki belti Eebidinna isinn welti 50 labballi;7Eelaamixxe hortenaa'n Gotooliyaki belti Yeeshayanna isinn welti 70 labballi;8Sefaxiyaasixxe hortenaa'n, Mika'eeliki belti Zibadiyanna, isinni welti 80 labballi;9Iyyo'aabixxe hortenaa'n Yihi'eeliki belti Abidiyunna isinni welti 218 labballi;10Baanixxe hortenaa'n Yoosefiyaki belti Selomiitinna isinni welti 160 labbali;11Bebaayixxe hortenaa'n Bebaayiki belti Zekkariyasinna isinni welti 28 labballi;12Azigaadixxe hortenaa'n Hakataaniki belti Yohananinna isinni welti 110 labbaalli;13Adooniqaamixxe hortenaa'n udu'meemakeeri summuwwi, Elifaalaati, Iy'u'eelinna Shemaya, Shemaya insa'nenni welti 60 labballi;14Bigiwwayixxe hortenaa'n Utayinna Zakuri insa'nenninni welti 70 labballi. Iyyerusaalemi'a Illee iima Higa15Aninna Aahawwa'a yaa'ammake galaani bira manna bukki assenne; ookkonna sase barra turrenne; ardakanna qeese uuddanno wodda, mitte Leewwitonna ookko afebe'no.16Tennexxee Eli'eezer, Ari'eeli'i, Shemayaa'a, Elinataani'i, Yaaribi'i, Elinaata'a Nataani'i, Zekkariyasinna Mesulaamii, ittanni barsiisanjuwwa Yoyaaribinna Elinataani'i ye'isenne.17Insa'nenna Kaasifiyaa hiyyemaake booncho'ni akeekisanjoke kadeeke Idobaa ergennexxi, Idonna isik fir, Kaasifiyake galmik erganjuwwi, Mageno no'okike mini giddo ergatemaaka manna iyyedango'a kullaashsha insa'ne'n kulene.18No'oke Magenixxi hunna no'oni hexxemmaxxee, Mahilixxe hortenaa'n ege'na'a afe'eeka Isira'eelika belto Leewwito Seeraabiya hiyyemaka manjichchonna isinni welti tommena saddeeta isixxa labbaxxa oosenna isika dayyuwwa idange.19Ittanni Hashabiyaani'i, Meraarixxe hortenaa'ninna Yeshaayya'a, dayyuwwa isikanna isixxe dayyuwwaka lame tomme labballo iyyedange.20Insa'nenna lenbeexxi Daawwitinna isiki ja'laabuwwi Leewwito gargaaro'a qophpheessinemmaka 220 galmiinka erganjuwwa idange; kunni duuchchingi summi summik borreesemme.21Mageni no'oki edo ifi salphisate'e, orikinna no'o'a no'oxxe oose'aanna, no'oxxe karra duuchchi'a qajeelo'a ookko, Aahawwake wodi'i bira agabo goddo lallabenne.22«Mageni no'okixxi hunna isoo'o harsaake duuchcha'ni hexxaani, mufe isixxi kinni iso'o waalaake duuchcha'niten» hinennexxi moyanjoke'n haasonne'ennaxxee'e orake'n no'o'o naaphakenaa'n heqqaaka looliinka mannanna, fadhadiinka manna no'o'a uwwo'a moyanjo laqedha shoonkenn.23Tennexxee agabo goddo honsenne, tenne yaanexxee no'oka Mageno soodantenne; isinna soodachcho no'oxxa laqe.24Aninna akeekisanote kaddeexxe qeesenaa'ni tommenna lame manna, insa'nenni mitteba Seeraabiyanna Hashabiya insa'neeke dayyuwwi giddi'ni tomme manna gargar foyenne.25Moyanji, isik mari'etik manni, isik ja'laabuwwinna ookko hedheek Isira'eeliki ardi duuchchi no'oke Magenike mini'a uwweeka birretika sibljo, worqetanna wele miya duuchcha killote'n kiille insa'ne'n uwwenne.2622,000 kiilo birretika sibiljo, 70 kiilo birretike sibiljika mi'uwwa, 3,400 kiilo worqe,278 kiilonna 400 giraamixxa 20 worqetixxa qoruwwanna worqetishsha baqisendeexxi cala cala hitaaxxe sageettoke sibiljika lame miya killennexxi anga insa'neexxe'n uwwenne.28Aninna insa'ne'e, «Ha'nonna kunni miyuwwi Duuchchi Woddike Gootti'a woyyoondine'een; kunni birretiki sibiljinna worqe Duuchchi Woddika Gootta ha'nooke annuwwike Mageni'a eeyuntet shiqe'eeke tolchani.29Konnelchuwwa Iyyerusaalemi hedheeke Duuchchi Woddike Goottike minixxe kuttuwwa giddo akeekisano qeese, Leewwitotanna Isira'eelike mannike mini minike akeekisanjuwwi edo kiildinaa qico'n xexxe'achchoti heqqe» hiyyenne.30Ookkoneechchi uduma qeesetinna Leewwito Iyyerusaalemi hedheeke no'oke Magenike mine'n iyyemaro'a kiilemeeka birreti sibiljo, worqetanna woyyichcha miyuwwa aa'ne.31No'onna taakake agenjixxe tommenna langaxxe barra'n Iyyerusaalemi'a me'inonna'a Aahawwake wodiibaa'n ke'nenne; No'oke Magenixxi hunna no'o'n hexxeman; isinna no'oke naaphuwwanaa'ninna ora sho'ome no'o'o gaadaammakenaa'n no'o'o gatise.32No'onna Iyyerusaalemi gennennexxi sase barra hafuura adhdhinenne.33Shoolgaxxe barra'n birretika sibiljo, worqetanna woyyichcha mi'uwwa no'oke Magenke mini giddo kiillennexxi Uuriyake belto'ni qeesichcho Meeriimoti'ni uunenne; isinni welti Finihaasik belti Ali'aazaar, Leewwichchi Iyyaasuki belti Yozaabaatinna Biiniwik belti Na'oodi welti he'nemman.34Duuchchingelcho laakkonne kiille; kiilleechcho duuchchanna eettene yanna'ninni borreessine.35Ookkoneechchi uduma booji'otenaa'n higeeke Isra'eelike manni duuchchi'a tommenna lame jiboota, sallane tommenna jaane gedhebiinxa korbeeyye, torbaane tommenna torbaane gedhebiinka buruusa, ittanni cubbotike tolchi'a kinni tommenna lamme re'etixxa korbeeyye Isira'eelike Mageni'a shiqinshe; kunni duuchchi Duuchchi Woddike Gootti'a shiqeeke ciincatike tolchaammani.36Moyanjiinka ajajanna ja'laabuwwake'ninna Efiraaxisi wido hedheke bogiinke galchalluwwa'ni uune; insa'nenna ardakanna Mageniinke galmixxa huje gargaarre. Bukki assona'a hunna alfenne.The Word for the World International