Hiziqi'eelikaa Raaga7
Ba'ne Shiqeexxa
1Duuchchi Woddike Goottik hiyyichchi ane'n dagee hiyyee qici:2«Koo manjiinke beltoo! Lumoki Duuchchi Woddik Gootti Isira'eelike bogixxee: Ba'ne! Shoolinge boginke kasa'n kunnise ba'ne dage'een.3Koo Isira'eelike ardaa ba'ne ta'a kunni ha'no'n dagge'een; mufe anxa ha'no'n dhangalaasannon; ha'nooxxe me'ashshanni ha'no'n murannon; ha'nooxxe diqachchiisaxxe magenoonfachcho duuchchixxee geyaaka xixichcho ha'noo xixannon.4O'wiinxe illenni ha'noo uudabe'non; ha'no'anna gattowaal hiyyabo'non; ha'noxxe me'ashshanni ha'no'n murannon; ha'no giddo hexxeexxa diqachchiissaxxa magenoonfachcho leellishannon; eettene yanna ani Duuchchi Woddike Gootta kadennexxa egendinaan.5«Lumoki Duuchchi Woddiki Gootti hiyya'nee qici: Bala! Kadde egendebaaxxi bala kunnise daggaan.6Muuxami dage'een! Muuxami dage'een ha'no'n qophphi hiyye'een; kunse dage'een.7Koo ha'no bogake'n hexxineekee ba'netixxi murte ha'no'n dagge'een; yanna gelte'een; tulluwwate'n ililleette kaddebaak weekkensha laqendaaxxi barra shiqe'een.8Kunnise ani aare anxa shiqoxxe barra'n ha'no'n bidhannon; mufe anxanna ha'no'n dhanigalaasannon; me'injo ha'nokishshanna ha'no'n murannon; ha'nooxxe diqachchiissaaxxe magenoonfachcho duuchchi'anna geyaaka xixichcho ha'no'o xixannon.9O'witaaxxe ille iima ha'noo uudabe'non; ha'no'anna gattowaal hiyyabe'non; ha'nooxxe me'a'ashshanna ha'no'n muranno; ha'no giddo hexxeexxe diqachchiisaxxa magenoonfachcho leellishannon; eettene yanna ha'noo xixaannek ante Duuchchi Woddike Gootta kadennexxa egendinaan.10«Kunnise barra kunnise dage'een! Ha'nooxxi ba'ne shiqe'een; xaqaro luphphise'een; siqqotinna luphphise'een; ifi dukatinna daraarte'een.11Xaqaro nophphite'e fuggo xixatixxe siqichcho kadde; ardakenaa'n karra insa'nexxenaa'ninna insa'ne ulfantashsha assamalchonaa'n mittilchinna gatabaan.12Kunni yanna dage'een; barratinna shiqe'een! Aare anxi arda duuchcha'n dage'emaxxee hedhaak gammadoqe'e; gurgudhaakinna yaadoqe'e.13Lamiingi lubboti he'nee qico gurgudheeki gurgudhemalchibaa illee iima higoqe'e; iittanni Isira'eelike arda duuchcha'n kulendeexxi tinni leelisha jijirendabaan; cubbo insa'nexxenaa'n kexxeexxa lubbo ifixxa dande'e gatilsaak mittikinna afemabaan.14Aare anxi arda duuchcha'n dagemmaxxee malagata ufuunfoole, duuchchiinxa yaane qopheesinoolenna lolakee me'aak mittikinna midde afemabaan.15«Gadhii'n wolaantichchi, giddo kinni dhukkubinna solo'i hedheen; qachchii gadhi darre hedheekiir wolaantchoke'n ibaan; qachchi giddo hedheekir solo'ikinna dhukkubik mudaan.16Lubbo gateekiir dhooqa gidd'n baajee tullichchi hana hexxe gungundamaxxe guugenjoshsha tullichi hana he'neexxi cubbo ifixxee gunguma'ni oo'naan.17Insa'nexxi anga duuchchi lo'otaan; soda'ati gulubi giligilee'naa ifi iima shi'ninaan.18Insa'ne yaadotixxa seemma oddo'winaan; weekenshatinna insa'ne'ni daggaan; duuchchiingik albi salphinnik xiledhe; duuchchiing umokanna haxxaan.19Ifika birretika sibilijo ora ora'inni hunnaan; worqe ifixxinna battitte yaaneshsha udendaan. Insa'ne'ek birretik sibilijinna insa'nexxi worqe insa'nee Duuchchi Woddike Goottixxe jabaxxe mufexxa barra baro insa'nee anjirtabaan; cubbote'n insa'ne'e ibbisatee buutote kaddeek insa'nek biretik sibiljonna worqe godoba goddatee yookaan godoba wonshedhatee isee indabaan.20Insa'ne ifike ifi danchosatike miyinni ifi saandeexxi konnelchiwwixxa diqachchisa'nexxa magenoonfachchonna shookishshaaxxa fakkuwwaxxa misile ifi'a giise'ne; tennexxee ani konne ifi danchoosatik miyi insa'ne'n batto'aashsha assannon.21Insa'neka worqetika sibiljonna worqe alagi mulqedhaashsha, buttatixxi fuggaaleyyenna sandaashsha sa'isse uwwannon; insa'nenna isoo battosinaan.22Aninna alba weleba wirri hiyyannon; insa'nena e'yineexxi ulfate'eke anka galma battossinaan.23«Dhugaatixxi murte bogake'n hedha gophatenaa'n kexxeexxa munde duna, qachchake'ninna xaqaro wo'mitemaxxee usuriinka haachchaba qophpheessi.24Gosa gosake ardika hara fuggichchuwwa manna iyyedagennexxi insa'neka minuwwa adhaashsha assannon; jajjabiinxa ifi dukanna balleessannon; galmuwwa insa'nekanna battossinaan.25Weekemaa wodda nage'a halsinaan yaane kinni alfinabaan.26Ba'nende'n ba'ne, odonde'n odo daggaan; insa'nee waleella wabeekakenaa'n alfino'a halchinaan; barachcho seerii qeesichokenaa'n gorsikinna geerchokenaa'n ba'aan.27Moyanji oodhaan; hayyichchikinna alayyee hophpholaan; bogiinke ardixxi anganna soda'ati gilgildaan; me'injo insa'nekishshanni insa'nee ganannon; insa'ne weleke'n murrammake seerishshanni aninna insa'ne'n murannon; eettene yanna ani Duuchchi Woddike Gootta kadennexxa egenaan.»The Word for the World International