Hiziqi'eelikaa Raaga3

1Isinna ane'n «Koo manjiinke beltoo! Ati edo hedheeka iti; konnee mirqisanjo Maxaafa ittee martettexxi Isira'eelike arda'n haaso'i» hiyye.2Tennexxee afo'o haanni hiyyenne; isinna mirqisanjo Maxaafa itonnaa'a uwwe.3Ookkoneechchi uduma isinna anee, «Koo manjiinke beltoo! Ani ati'ni uwwaanneka konne mirqisanjo Maxaafa ittee godoba wonshedhi» hiyye; aninna iso'o itenne; isinna afo'i giddo ane'ni malebiinsha xe'me.4Isinna ookkoneechchi uduma ane'ni hiyyee qici: «Koo manjiinke belto kexxettexxi Isira'eelike ardibaa mari; hiyyichcho ankanna insa'ne'ni kuli.5Ati Isira'eelike ardi baate malee'e haaso'i rakkisaakenna laagada egendebexxoke ardibaa ergende'ebexxon.6Haaso'i insa'nek rakkisaakenna laagada insa'neka egendabexxoke, hiyyichchi insa'nekinna ate'n aagabaake hedi ardibaa atee ergebo'non. Insa'nebaaat atee ergene'enele dhugaaten insa'nee ati hitattoxxa lanqamman.7Yaane kinni Isira'eeliki ardi duuchchi alba gudunfeekkenna hiyyendeexxa laqabaake kadeemmaxxee ani hiyyeennexxa lanqo'a gammandebaan; tennexxee Isira'eelik ardi ati hitattoxxa laqabaan.8Yaane kinni ani atee insa'neshshyanni rifattabexxokenna alba gudunfiteeteke assannon.9Ani atee rifataboxxoke, cabbetike kinji caala jabake assannoni. Insa'ne jallaameessa arda kandoolenna midde insa'nee mee sodaati; yookaan insa'ne'a alalittoxxe'e.»
10Isinna anee «Koo manjiinke belto! Ani ate'ni hiyyaaneka hiyyichcho duuchcha xexxe'achchoti laqi; godobanna galchedhi.11Kexxettexxi booji'emeeke atike bogike manniba'a martettexxi insa'ne'a kuli; lanqoole laqqanna gonphoole ‹Lumok Duuchchi Woddiki Gootti hiyya'nee qici› hite insa'ne'ni kuli»12Ookkoneechchi uduma Mageniink Haafuuri anee'e iimi'a qophphi assee ke'isse; Duuchchi Woddike Goottiki ulfinni galiduma ifikixxe bakkanaa'n ke'ate'ni hedhee'naa ani udumi'n lumoxxa gigi'weete laqenne. Mitte mitte tikuwwa Duuchchi Woddik Gootti gaduma ifikixxe bakka'ni saademowwaal.13Kunninna hedho affeexxe daduwwak keeluww weli'aani weli ganemaa woddanna qarqara insa'neeke'ni hexxemmaxxi moluwwa laqisaammaxxi jabaxxe gigiweettemman.14Mageniink Hafuurinna anee iimi'a qophphi asse aadhe me'e; aninna hifotinna aareti me'enne; Duuchchi Woddike Goottixxi jabaxxi hunna ane'ni hexxemman.15Ookkoneechchi uduma booji'emeexxi Keboorike galaani bira Teeli'abibi giddo hedhammake manniba marenne; alayyik hawwi hiyyeennexxi torbaane bara insa'ne giddo insa'nenni welti ofo'lenne.

Hiziqi'eeli Heqanjummatee Hariremeexxa

16Torbaane barra uduma Duuchchi Woddike Goottiki hiyyichchi ane'n dagee hiyyee qici:17«Koo manjiinke beltoo! Ani atee Isira'eelike ardike heqqanjo asseennen; tennexxee hiyyaannexxa laqi; ate'n kulannoxxa anxa xexxe'achchiisa insa'ne'ni sa'issite kuli.18Ani cubballeessa manjo ‹Dhugaadinni rertaton› hiyyeennexxa yanna ati iso'o xexxe'achiisa gophphottole, lubbo ifixxanna fayyirso'a fuggoxxe hujenaa'n higaashsha iso'ni kula gophphotole, iikki cubbichchi cubbo ifixxenninni reyyaani; isixxe reyo'a atee qorannon.19Yaane kinni cubbichchi manji xexxe'achchiise'naa'n cubbotenaa'ninna fuggoke oranaa'n higa gophphoole, isi cubbo ifinxee reyaani; atinna kinni lubbo atixxa anjidhitatton.
20«Qulchi manji kinni qulumma ifixxenaa'n udumi'a higeexxi cubbo hujoole, aninna isi edo gugguffachcho uggoonnole reyaan; atinna xexxe'achchiisa gophpheettaxxe'e cubbo ifixxenni reyaan; asseemmaxxi qullummanna isi'a hedendabaan; isixxe reyo'a ani atee qorannoni.21Yaane kinni qullichchi manji cubbo hujabaashsha xexxe'achchiise'naa isinna cubbo huja gophphoole, xexxe'achcho adhdheemmaxxee dhugaate'n hedhoti hedhaan; atinna lubbo atixxa anjidhitatton.»

Hiziqi'eelike Ardixxa Abidensha.

22Ookkonna Duuchchi Woddike Goottixxi hunna ane'ni hexxemman; isinna anee, «Kexxettexxi dhooqatibaa mari; ookkoo ate'ni haaso'annon» hiyye.23Aninna ke'ennexxi dhooqatibaa marrenne; tami asse uuddanno wodda Keboorike galaani bira uudeennake ulfinnika ulfinna, Duuchchi Woddike Goottik ulfinni ookko uurreemman; aninna albik edi'a gonbisemenne.
24Mageniink Hafuuri ani giddo e'yeexxi lekkati anee uurrise ane'ni hiyyee qici: «Atiba mini'a e'yitee hula culfi.25Koo manjiinke beltoo! Atee golleenabaa'n fulde ardi giddo mammarendabexxoshsha wodaroti atee usurraan.26Tennexxee jallaameessa arda kandeemmaxxeenna insa'nee xixxaboxxoshsha arrabo atika burqake'ni abidissannon; afo'okanna duuddatton.27Yaane kinni ani ate'ni haaso'anno wodda afo'o atika banannon; atinna, ‹Lumoki Duuchchi Woddiki Gootti hiyya'nee qici› hita'n insa'ne'ni haasottatton. Insa'ne jallaameessa arda kandeemmaxxee laqaaki laqowaali; laqabaakinna laqoqqe'e.

The Word for the World International

https://app.library.bible/content/2b894378475c6aea