Hiziqi'eelikaa Raaga26
Xiroosi'n Kulendeexxa Wabeekumma
1Boji'emmennexxe tommenna mitteesoxxe woggaxxe, sirtixxe barra'n, Duuchchi Woddike Goottik hiyyichchi ane'n dageexxi:2«Koo manjiinke beltoo, Xiroosi Iyyerusaalemi'i, ‹Baganni! Gosa gosak ardixxi huddumme enqende; isek cufanuwwinna ani'a baneme'een, yoona ise diigendemmaxxee ani'a wo'mitaan› hitemmaxxee,3tennexxee Lumok Duuchchi Woddik Goottinna tee Xiroosi, ani ate'n ke'eenne; abbaaya danbala'a dukke ke'issitammashsha, aninna heddo gosa gosaka arda ate'n ke'issannon.4Insa'nenna Xiroosika dalla'uwwa diingaan; isexxa xeleephphuwwa findigaan; ani buttina iseka fiye aadhennexxi isee rassa duwwixxe assannon.5Ani Lumok Duuchchi Woddik Gootti haaso'ennaxxee, abbaayyatixxe giddichcho'n ise qulxumetixxe marabexxe fayenshatixxe bakka kaddaan; gosa gosak ardi'a saamematixxe kaddaan;6Abayatike kasike qarqarik olla'uwwik isek manni walaantichik shiyemaan. Eettene yaana ani Duuchchi Woddike Gootta kadennexxa egennaan» hiyye.7«Dada Duuchchik Duuchchi Woddik Goottinna ani moyanjuwwinka moyanjo kade'eka, Baabiloonika moyanjo Naabukadanatsoori'i, fadhadikinninna fadhadinxe gaaruwwanni, fadhado gulufeekeerinninna heddo loliinke manninni welti middii'n Xiroosi'n idagannon.8Abbayyatike kasike qarqarik olla'uwwik iseka manna walaantichchik shiyaan; qarqara atike'ninna qoqoba giissaan; atike dalla'ixxe xungo qico'n buttina tulubeexxi ate'n wonte qeefata.9Dalla'a diigatika ifika lumoka haqichchike gubbuwwinni atike dalla'a gawwisaan; miya ifikenninna atixxa xellephuwwa diigaan.10Fadhado isikixxe bira sa'nenaa'n kexxeexxa ke'isexxi buko atee'e buqqaan; dalla'i diigemeeke qachcha'n manni e'yamma woddishsha isi atixxe hulaanaa'n e'yaa wodda, loliinke fadhadixxe, gaaruwwatixxenna fadhadiinxe gaaruwaxxe kakaweettena'n kexxeexxa dalla'uwwi atik sheke sheke hiyyaan.11Ifike fadhadixxe kottenni oruwwa atika duuchcha hirbeessaan; arda atikanna wolaantichchik shiyaan; jajjabbi atik utuphuwwinna butti'a ibaan.12Qabeenna atika duuchcha samaan; atika daddalatika miyanna boojinaan, dalla'uwwa atikanna diingaan, elolla atika minnuwwanna findigaan, kino atixxanna, atixxa maluwwanna kinjinka minuwwixxa ole abbaayyate'n hunnaan.13Atike sirbika hoga sammi assannon; ta'inni edi'a atike kiraaruwwik hafuur laqemabaan.14Atee rassa duwwixxe assannon; qulxu'metixxi marabe fayendaaxe bakka kaddatton; haranga langaxxa qammachchendabexxon; ani Duuchchi Woddik Gootti tennee haaso'ennen hiyyeexxi Lumok Duuchchi Woddik Gootti haaso'een.15«Lumok Duuchchi Woddik Gootti Xiroosi'i hiyya'nee qici, ‹Mado'eek aada woddanna ati giddo weli bira hexxaa wodda, atixxixxe ibake luuljinaa'n kexxeexxa giddichchuwwa lele'mitabaata?16Abbaayyatike kasixxi hayyoole duuchchi ifixxe mootenaa'n dirritaan; fugantemmaxxa seemmuwwa ifinaa'n hunnaa; seesuwwi gobemeexxa seemmuwwa fulche'naan; culphinseexxi butta ofo'liyyoti ate'n gelteexxe yaanuwwanaa'n kexxeexxa duuchchi wodda weekemma'n he'naan.17Ati'a boochchisa boochchinsa'n hinaa qici,« ‹Abbaayyate'n manni giddo hedhammakee,koo gura fuldeetteke qachcha! Hittatta baxxette!Ati giddo hedhammake manninni welti,ati abbaayyuwwati hana hunnaameessakemman;Abbaayyatike kasa'n hedhammakaa duuchchaarannaculphiissisattakemman.18Ta'a atixxe ibbaxxe barra'n,giddichchuwwa lele'mite;Atixxe digenshanaa'n kexxeexxa,giddichchuwwa giddo hedhammak manninna gilgile.›19«Lumok Duuchchi Woddik Goottinna manji giddo hedhabaake ona qachcha atee assanno wodda, lumoxxe abbayyaka dhi'mooti wode'e ati hana idage'naa atee liqiinsaa wodda,20olimik ardi e'yemmaxxe bale'n butti'a e'yemmakeerinni welti butti'a e'yittattoshsha atee assanno; bale giddi'a e'yammakeerinni welti olmixxe ole'n, hundike wiidda boga'n hexxattoshsha assanno. Ookkoneechchi uduma hedhot hedhaak manni hedhaaxxe buttaba'a illee iima higgabexxo.21Alayyiinke atee assannon; ta'inni eldi'anna hexxabexxo; hasendatton haranganna afendabexxo» hiyya'neen Lumok Duuchchi Woddik Gootti.The Word for the World International