Efesoonike Manni'a2
Kiristoosinni Reyotenaa'n Hedhotibaa Foofa
1Ha'noo balleessa ha'nooxxenaa'ninna cubbo ha'nooxxenaa'ni kexxeexxa rertineemmani.2Ookkoone wodda tennee buttixxa fuggitte me'aa hordoffina'emman; iittanni iima ayyarete'ni hexxeexxa fuggoke hafuurixxa hunnuwwa galchaammake ookkone'a ajajendina'nemman; isi Magenokee ajajemabaake manna'ni huccaake fuggichcha hafuuran.3No'oo duuchchiingi konneechchi edi darre insa'nexxe oddo'n fedhii no'oxxanna no'oke wodanika yaada hordonfa'ni maaliinxe gaabbenni he'naannan. No'onna weliinshanni daduma no'okenni Mageniinxe aare hunda he'nennan.4Yaane kinni Mageniinxi mararte bira saxxeexxenna isi no'aa afe'eexxi jaalala lumoxxe kadatenaa'ni kexxeexxa,5balleessa no'oxxenni renneenneke kandoonnolenna midde Mageni Kiristoosinni welti hedho no'aa uwweeni; ha'noonna anjirendineek isike badhaadhinniteni.6Mageni Kiristoosinni welti reyotenaa'n no'oo ke'isseexxi Yessuusi Kiristoosinni iimike booncho'ni isinni welti no'oo ofo'lishe.7Tenneenna asseechchi Yessuusi Kiristoosi ga'mii'n no'aa ifiseexxa arjummanna konnete hiyyemabaaka isike badhaadhixxa durumma dagaake baruwwa'ni no'aa leelishateeten.8Ha'noo anjirendineek amanati darree'ni isike badhaadhinniten; tinninna Mageniinxe uwwa malee'e ha'nooxxe hujennitebaan.9Ayyinna holloqqe kunni anjirematik badhaadhi afemeek hujetitebaan.10No'oo Mageni ediseexxi qophpheesseexxa eloxxa huje hunjannoshsha Kiristoosi Yessuusi darree'ni haaroba dademmeennexxe Mageniinxe dadani.Kiristoosinni Afemaaka Mittooma
11Tennexxee ha'noo ilenshati Ayihudake kaddineemmabaaki, Ayihudiinke manjiinxe anganni jila ofo'leexxe ifi saada'ni ha'noo jila ofoldinebaakeraa hiyya'ni ha'noo yowwa'neemmaxxa qalli hiyye.12Ookkone baro'ni ha'noo Isira'eelike ardinni mittooma affinebaakir, kakotike addachchiisatike hiyyichchi'a keessumma kaddineek, kaba butta addebelo hexxineemmak, iittanni Mageni belo hexxinaammak, ha'no Kiristoosinaa'n gargar higginne hexxineemmaxxa qaabatte.13Ha'noo konneechchi edi darre bayyattineexxi hexxineemmaki ta'a kinni Yessuusi Kiristoosixxe mundenni shiqqine'een.14No'oo gargaritti footeemmaxxa naaphphiinxa gimo digeekinna Ayihudakanna Ayihudake kandebbo'noka mitteke asseeki nage'i no'oki Kiristoositeni.15Mittooma isikenni lamiinga arda araarseexxi mitte haaroke arda asse. Isinna iitta mitteke asse dado'aa Muusek seerika ajajuwwanna galdumuwwa reyo isixxenni mannakenaa'ni hoyyeen.16Isi fannote'ni hana reyiyyoti naaphunte fugusseexxi lamiinga mitte biso assee Mageniki welti insa'nee araarseeni.17Kirisitoosinna dageexxi ha'noo bayyatine hexxineemmakeenna shiqo hedheemmakee Ayihudootiinke manni'aa nage'iinka gammashshotik hiyyichcho lallabe.18Isi ga'mii'ni no'oo duuchciingi mitte Hafuurinni Aabibaa shinqannon.19Tennexxe ha'noo qulliyyeti welti mitte bogike mannanna Mageniinke mannike mini hado malee konneechchinni edi'a keessummatenna wele bogike alagaa mannabaani.20Ergameeyyete'ninna wabeekotixxe booso hana ijaarendineen; shoolge kasiki dhaaddoti kinjinna Yessuusi Kiristoositeni.21Mini iikki iso'ni abidema'ni Goottiinke woyyichcha galma kadatee lumedhdha'n nophphaan.22Ha'noonna gattinebaangi Mageni ifike hafuurinni galaake mine kaddino'a Kiristoosinni mitteba ijaarendinaani.The Word for the World International