Langassatikaa Maaafa29
Duuchchi woddik Gootti Mo'aabike Boga'n Isira'eelike Ardin Aageexxa kako
1Duuchchi woddiki Gootti Siinax kooba'n kakateemmaxxe kako'n higgeen Mo'aabike boga'n Isira'eelike ardin welt kako aagaashsha Muuse'e ajajeemmak weli kakotik hiyyichchuwwi konnechchin butti'a hedheeken.2Muusenna Isira'eelika arda ye'eexxi Duuchchi woddiki Gootti Gibtseke moyanjo'n; mootoleeyyete'ninna konne boga'n asseexa duuchcha;3Insa'ne'n geessiseexxa cinifachchiissaaxxa bala, muuxeeka manbe'inka beessisuwwanna lumollamma yaane duuchcha illendinni uuddine'en.4Duuchchi woddiki Gootti kinn telchixxe barra qico'n kaddin saxxinna qico hubatine uuddinaaxa ille, mansha, qalbe ha'no'a uwweeban.5Shoole tomme wogga duuchcha gammoojje qiilli bogi giddo ha'no'o akeekaamma wodda seemma ha'nooxxi muddeba'a; lekka ha'nooxxixxi kophetinna muddeemmabaan.6Duuchchi woddiki Gootti ha'nook Mageno kadeexxa egendinaashsha ita ittinebaan woyine yookaan machcheessaaka ha'wo ha'witinebaan.7Ookkone boonniba shiqqinee wodda; Haseebonika moyanjo Sewooninna Baasaanika moyanjo Oogi shinnoo'aa dangeemman: yaane kinn no'o insa'ne'e bululoke assineennen:8Boga insa'neekanna dhaale Roobeli'aanna Gaadike mini hadi'a ittan gamisa Minaaseke minke hadi'a geegoke assine qoqqoonde uuneenen:9Tennexxee huccitinelchi duuchchi ha'no'a kadaashsha tenne kakoka seera duuchcha xexxe'achchot muuxxe.10Ha'no duuchchiingiki gosa gosak akeekisanjuwwinna sooreessuwwi ha'nok, geedhuwwa ha'nooxxinna ha'noo ajajaamakiir; iittanni weli Isira'eelik ardi duuchchi telcho ha'nook Duuchchi Woddik Gootti Mageni edo uurtine'een.11Oosse ha'noxxinna aruwwa ha'nooxxi haqqe ati'a bonca'n wode'e ikkilda'n atike olla'n hedheek keessuntichchinna atinni welti uurre'een.12Uuritneechchinna Duuchchi woddike Gootti ha'nooki Mageninni welt kako aaggoteeten: tinni kakonna Duuchchi woddiki Gootti ha'nook Mageni telcho ha'no'a kakoti ege'nishee'exxen.13Duuchchi woddiki Gootti tenne'e asse'eki ha'no uutineeke yaadinninna annuwa ha'nook Abirihaami'a, Yissaaqi'a, Ya'iqoobi'a afo'o sa'e kakateemmashshann ha'noona ifike arda asse abixxo'aa haseeten.14Duuchchi Woddiki Gootti tennee duuchcha kakot kokeesedhe kakata'neechchinna ha'noonni callabaan.15Isi tenne kako aaga'neek telcho tenne bakka'n isi edo he'nenneke no'o duuchchiingeninna telcho no'on welt kaba hedha gopheekeerinni weltiteni.16Gibtseke boga'n he'nenne wodda hitta he'nennexxanna hitta hedheeke ardi giddii'n hitta kande sa'nennexxa egendine'en.17Oddo insa'neexe'n diqachchiisaachcho; haqqeti giissineex; kinjo bonce giissineek, birretinna worqeti giissineexa fakkuwwa uuddine'en.18Okkone gosa gosake arduwwika magenuwwa magenoofatatee qalbe ifixxa Duuchchi Woddike Gootta no'oke Magenonaa'n udumi'a higaak techcho ha'no giddii'n fedheeki labbak yookaan meyyaki; mini hadi yookaan gosa gosak mini hadi hedhebaaxxa kokke; oddo ha'nooxe'n iitta hexxeexxa bushaxxanna qaraartaaxxa huje hujaaki ha'nooxe oddo'ni hexxoqqe:19Iitta hedheek manji konnee kakataaka hiyyichcho laqqaaxxa yanna qalbe ifixxi giddo ifi eebbisa'n «Anxe qalbeke yaadishshanna hedhennexxenna nage'i ani'a hedheen» hiyye hedaan; tinni kinni elokenna fuggoke manna'n ba'ne iyyedaga.20Duuchchi Woddik Gootti iitta hedheeke manji'a hara gattowaal hiyyaba'a; mufe isixxinna hinaaffe isixxi iso'n bubbaan; konne maxaafa'n borreesendeexxi badino duuchcha iso'n dirritaan; Duuchchi Woddik Goottinna Isira'eelike gosatike munuwwinaa'n iso'o ballessaan.21Konne seeriinke maxaafa'n borreesndeexxe kakotixxe badinoqicishsha Duuchchi Woddik Gootti iso'o Isira'eelike gosatike minuwinaa'n iso'o ba'neti foyaan.22Hegerixxe ila'n; sanne ha'nooxxanna bayyi boganaa'n dageeka baari widika manna Duuchchi woddiki Gootti ha'nooke boga'n ibiseeke dhukuba insa'nenna uundan.23Bogi duuchchi boosi qarqarike buttinanna maxine calla kadee luggaan. Mitteechchonna ise'ni kaansabaan: mitteechchonna fulchabaan: Duuchchi woddiki Gootti jabaxxe mufe isixxinni balleessemmaxxe Sedoominna Gomorik, Adaamakenna Tsibaayoke bogishsha kadde gattaan.24Eettene yanna'n bogi duuchchik ardi hiyye laqaa qic; «Duuchchi Woddik Gootti konne boga'n maye'e tennee yaane duuchcha asse? Jabaxxe mufe'a Iso'o geessisseexxi yaane maachcho?» Hine qorraan.25Hiissichchikinna, «Duuchchi Woddik Gootti Mageni edike annuwwi insa'nekinn Gibtseke boganaa'n fulchee wodda aageemmaxxa kako diingeemmaxxeeten.26Insa'ne ookkonechchi edo magenooffante egennebaakanna Duuchchi Woddik Goottinna magenooffantabaashsha hoyyeeka dharichcha magenuwwa magenoofante sagande.27Tennexxe Duuchchi Woddik Gootti ardake'n mufate konne maxaafi giddo borreesendeexa tennee bala duuchcha boga insa'neke'n ibisse.28Duuchchi Woddik Goottinna jabaqicin mufate: jabaxe mufenaa'n kexxeexxa boga insa'neekenaa'n aadhe fulche wele egennebaake bogibaa baanjashsha asse. Tennexxee telchonna ookkonni he'neen» hiyye.29«Duuchchi woddiki Gootti no'oki Mageni maqo waale'exi heddo yaanuwa hexxeen: leelliteexxi yaanuwwa kinn no'onna oose no'oxxi heqqe'nonnaa hasissaaxe yaane seeri isikixxe hiyyuwa duuchchan.The Word for the World International