Langassatikaa Maaafa24
1Mitti manji mitte manjichcho aadheechchi uduma, isoo gammachchiissa'nebaaxxa yaane ise'n afe'e giboole, isee'e waaleexxa ege'nishshaaxxa borro ise'a uwweexxi ifike minenaa'n ise'e shorrowwaal.2Isike minenaa'ni fuldeechi uduma wele aro'o'n heerundoole,3langak isek aro'inna iittanni ise'e gibeexxi waale'exxa borro ise'n uwweexxi ifike minenaa'n shorroole yookaan isi reyoole,4okkonechchi uduma ise'e waalemmak siretik isek aro'i, ise battoottemmaxxe'e higgeenni lebe'e ise'e aadha dande'abaan. Iitta hexxeexxi yaane Duuchchi Woddike Gootti edo jibbemeechon. Duuchchi Woddik Gootti atik Mageni geego atike asse uwwa'neeke boga'n cubbo idaggoxxe'e.5Reefi aadheek manji bagedo duuloqqe'e, isi wele huje hujoqqe'e. Mitte wogga'a hujebelo tolanga mine ifike'ni aadhemmaxxa ifixxa are gammachchisowaal.6Daamma yookaani isika suussuqanjo liqeeffattetteke maallaqixxe'e hite'e abidishsha adhdhittoxxe'e, tennee assa manjiinxa lubbo maallaqake'e abixxatishshaten.7Mitti manji Isira'eelito kadeek ifike dayyuwwi giddii'n hunnati aadheexxi garba assedhee'naa yookaan gurguraa'naa afemoole, isoo'o fulcheek manjichchi shiyemuun. Konneqicinni fuggoxxa yaane ati giddi'n fugussitatton.8Soomiinke dhukkubixxe'e leewwito, qeesole, ati'aa uuta'neeka toggichcha seera muuxate'e ifi heqqedhi. Ani insa'ne'a uwweennka ajaja xonxoommatat hordofi.9Ha'no Gibtsee'ni fuldineechchi uduma orange'n hexxinee'na'a Duuchchi Woddik Gootti atik Magni Maaryaami'n asseexxa yaane qaabbati.10Fedheenxa yaane jaalo atike'e liqeessitatto wodda maallaqiinxa abidishsha, ati'a uwwa'neexxa adhdhate'e isike mini giddo e'iytoxxe'e.11Ati gadho hexxe'e heqqi: ikk liqeessitetak manjichchi anga abidisaachcho minii'ni ati'a aadhe dagowwaal.12Manjichchi hiyyeessak kadoole, anga abidiseemmalcho atiba galchexxoxxe'e.13Buyyedhe galaashsha arishsho e'itebaang isi'a hiissi. Ookkonechchi uduma isinna atee'e galateeffataan, Duuchchi Woddike Gootta atike Mageni edonna qullitte huje kadde'e ati'a laakko'endaan.14Atiba maallaqake'e huja'neeke hiyyeessakenna rakkichcha Isira'eelichcho dayyo atike kado, ati hexxaateke qachchuwwi giddii'n mitteke'n hedha'neek wele bogika manjo miiccoxxe'e.15Hujemmaxxa barratixxe hujeka maallaqa arishsho e'yitebaangi isi'a uwwi, hiyyeesake kademmaxxe'e haanonna haano anga geyu hiyya'nee yoraan. Uwwa gophphottole Duuchchi woddike Goottibaa oodhee'na'a cubbote ati'a kaddaan.16Hadiinxe ballessa'a oose insa'neexxi shiyendoqqe'e, oosetinna hujjeexxe ballessaxxe'e hadi shiyemoqqe'e: mitti mittinig ifi ifixxe cubbonni shiyemowaal.17Wele bogike manji'a yookaan anna afebaake belti'aa dhuga dassittoxxe'e, aro'o shi'witeexxe manjichoxxa seemma anga abidishsha adhdhitoxxe'e.18Atinna Gibtseke boga'n garbake kaddeettexxanna Duuchchi woddiki Gootti atik Mageni ookko'o'ni ate'e wode'eexxa qalliyyi. Aninna konne'e ajaja uwwenechchi tenne'e assitottaaten.19Fichchi giddii'n midha haa'mitatto wodda, deetee'naa gatteexxi deegge hexxoole, higge'e marte aaxxoxxe'e. Duuchchi Woddik Gootti atik Mageni huccittetechcho duuchcha eebiso'a ladde, wele bogike manji'a, annanna ama afebaakeenna aro'o shi'witeexxe manjichcho'a waal.20Atinna ejerisiinke haqichchonaa'n gumma harcaassatto wodda, dame damete'ni gataaka qocexxotta'a higge martoxxe'e. Wele bogike manji'a, annanna ama affebaakenna aro'o shi'witeexxe manjichcho'a waali.21Atinna woyinetike hiddichchixxa rodde qocexxatto wodda gatteexxa deegge higge'e qocexxoxxe'e, gatteexxa wele bogike manji, annanna ama afebaake, aro'o shi'witeexxe manjichcho'a waal.22Atinna Gibtseke boga'n garbake kaddeettaxxa qaabbat. Aninna konne'e ajaja uwwennechchi tenne'e assitottaaten.
The Word for the World International