Langassatikaa Maaafa22
1Atike dayyixxi qotiyyichchi, yookaan gedhebi ba'ee'naa affottole isiba hissite iyyedagi male'e sammite saxxoxxe.2Dayyi atik atike loola'n hedha gophoole yookaan isi ayyete kaddeexxa ege'na gophphottole anni hase dagaaxxee ookkonee hore atike mine'n aaxxe atiba turaashsha assi; ookkonechchi uduma hiissite isi'a uwwi.3Ittanni dayyo atikixxi harre seemma yookaan isicho ba'eechcho hoonechchonna affottole, isi'aa hissi; gaga'm hite waaldoxxe'e.4Isira'eel dayyo atike kadeekiki harrichchi yookaan qotiyyichchi orake'n ibee'na affottol ke'issi malee uuda'n saxxoxxe.5Duuchchi Woddika Gootta ha'nooka Mageno diqachchiissexxe kaddemmaxxe'e dubarte labballiinxa seemma oddo'witoqqe; labbakinna dubartetixxa seemma oddo'oqqe.6Ora me'ita'n ci'a haqqichoke'n yookaan butta beltanna ifixxe'n yookaan quuphphe'ke'n kabbite hexxeeka iseka mine affottole ama beltannati welti aadhdhitoxxe'e.7Yaane kinni ati'aa eloxxi kaddaashshanna wogga atixxi buttate'n qeerxaashsha beltanna adhdhitettexxi ama me'ito'a wocci assi.8Haaroka mine jaadhdhitatto wodda heellichotenaa'n manji ibe'na'a isixxe munde'a mini atik laqemabaashsha heellichchote'n fawo giissi.9Woyine kaassete fichchi giddo lame bifaxxa sanne rokkoxxe'e; tennee assitottole rokkettexxi sanne calla kaddebaangi woyyinetike hiddicho la'oonfata dandeettabexxon.10Qotiyyichchi harrichiki welti xamadde hujjoxxe'e.11Layinotike shimalinninna gedhebiinxe ordanni ganendeexxa seemma oddo'witoxxe.12Oddo'witattoke seemmake shoolinge kasa'n handaara giissi.
Aadhatixxanna Heerumatixxe Ca'untexxa Heqqecca
13Mitti manji aadhe ke'eexxi aadhemmaxxa are gibeexxi,14summa iseka dharik balleesatee, «Tennee manjichcho adhdhenne wodda ise wo'matebaan» hiyyoole,15Eettene beltok anninna ama duuddo dubarra kada isexxa kokeessatee'e ise'e qachchiinxe huddummexxe geedheba idagowwaal.16Beltotik anninna geedhete'n, «Ani belto anixxa konne manjichchi'a heerunsiseennani; isi kinni isee gibe.17Isinna summa iseka balleessati ane'ni, ‹Belto atixi duuddo dubarrichchobaan› hiyyeemmani, yaane kinni anxi belto duuddo dubarrichcho kaddeexxa kokeessaak beessisi kunnise» hiyya'ni beltotik hadi edo heerumi barixxa mundetixxa seemma qachchiinxe geedhe edo diriirsowwaal.18Ookkonechchi uduma iitti geedhe ookkonee aadhemmaka manjichcho xixxowwaal.19Tinninna kunni manjichchi Isira'eelichcho dubarrichchoka summa balleessemmaxxee dhibba biretika sibljo iso'o uwwinsowaal; konnee birretika siblijonna beltotike anni'a uunowwaal; iitti manjichchotanna duuchchi woddi'a isixxe kadde hexxaan; manjichchi hedhoti hedheeke baro'n ise'e waaliyyo hassissabaan.20Yaane kinni manjichchiinxi ku'la dhugaate kadde'na'a iitti manjichcho duuddo dubarichcho kaddeexxa kokeessaachcho afagophphoole,21ise edonni annike mine'n hexxemma wodda yabaabulde'e Isira'eeli giddo shookishshaaxxa yaane assitemmaxxe'e iseke annike minixxe huddummeba ise'e idangowwaal; ookkonna iseke qachchik manni ise'e rertaaqico'n kinjik cancaqowwaal; konneqicinni tennee fuggoxxa yaane ha'no, ha'noo giddii'n fuggussa hasissaan.22Mitti manji wele manjixxe arenni diiphe'e afemoole, inseni welti diiphemmaki manjichchinna iitti manjichcho shiyyemmowaal; konneqicinni tennee fuggoxxa yaane ha'no Isira'eeli giddii'n fuggussa hasissaan.23Mitti manji uwwendeexxa dubarichcho qachchi giddo afeexxi isenni welti diiphphoole,24ise qachchi giddo hexxee wodda manji dhaqqabaashsha raaragophphemmaxxee, iikki manjichchinna annaffeexxe arenni hunnat welti diiphemmaxxe'e lamiinga insa'ne'e qachchiinxe huddumme'n iyyemartineexxi rennaa qico'ni kinjink cancaqqe; konne qicinni ha'no fuggoxxa ha'noo giddii'n fuggussa hasissaan.25Yaane kinni mitti manji uwwendeexxa dubarichcho qachchi gadhidarre afeexxi hunnat welti dhiiphoole, tennee hujeek manjichchi calli shiyemuun.26Eettene dubarichcho'ni kinni mittechchonna assitoxxe'e; ise reyote'e geessissaaxxa cubbo hujjebaan; iitta hexxeexxi yaane jaalo ifike'n ke'eexxi iso'o shiyammake manjichchixxe yaaneshshaten.27Tinni kaddaachchi iikki manjichchi eettenee uwwendeexxa dubarrichcho qachchi gadhidarre afemmaxxeenna ise manji dhaqabaashsha raartee wodda midde ise'e dhaqqabe gargareek mitti manjinna hedha gophemmaxxeeten.28Mitti manji uwwendebaaxxa dubarrichcho afeexxi hunnat isen welti dhiiphee'na'a manni insa'nee afoole,29iikki manjichchi eettene dubarrichchoke anni'a onde tomme birretika sibljo uwwowwaal; manjichchi eettene dubarrichonni hunnati welti dhiiphemmaxxe'e ise'e aadhiyyo hasisaan; hedhoti hedheeke boro duuchcha'n ise'e waala dande'aba'a.30Mitti manjichchi anna ifikixxa are aadhoqqe'e; anna ifikixxa ma'nanna battoossoqe'e.The Word for the World International