Langassatikaa Maaafa16
Sa'atika Ayyaana
1Duuchchi woddiki Gootti Abiibite hiyyemaa agenjo'ni Gibtseke boganaa'n hashsha ate'e fulcheemmaxxe Abiibite hiyyemaaka agenjo heqqexxe Duuchchi woddika Gootta atika Mageno ulfeessi.2Duuchchi woddike Gootta atike Mageniki summi ye'emaashsha fi'leeke booncho'n isi'a horattetteke lalo, gedhebonna re'e, giddii'n mitte mitte filde tolch.3Isoonna gamami e'yyeexe kebbonni ittoxe; Gibtsee'ni wiinamik fuldettaxxee Gibtsee'ni fuldettexxa yanna hedhotike baro duuchcha'n deetebexxongi tennee ita rakkoti woddixxe kebboon hita'n iti.4Boga atike duuchcha'n ati birra torbaane bara'a gamami afemoqeq'e; siretixxe barraxe hashsha'n tolchitattok huuni maalinna gorsiqico'n turaashsha assitoxxe'e.5Duuchchi woddiki Gootti atik Mageni ati'a uwwa'neeke hoone qachcha'ninna kadi sa'atike ayyaani'a tolcha shiqishsha hassissabaan.6Yaane kinni summa ifikee galdumake kadaashsha Duuchchi woddiki Gootti atik Mageni fi'laneeke boncho'n arishsho e'yitaa wodda hashshunte Gibtsee'ni fuldettaxxee yanna'n woggatixxe qaabbachcho'a ookko sa'atike ayyaanika tolcha tolchi.7Maalakanna gaffettexxi Duuchchi woddiki Gootti atik Mageni fi'leeke booncho'n iti: bogi sooda wodda atike duunkaanibaa hig.8Jaane barra gamami e'yebaaka xalta it; torbaxxe barra'n Duuchchi woddika Gootta atike Magenixxa woyyitte bukki assi; eettenee barra hujetanna hujjoxxe.Torbaane Torbaka Ayaana
9Midha haama safendeexxe barranaa'n ke'issite torbaane torba laakko'i.10Okkonechchi uduma Duuchchi woddiki Gootti atik Mageni atee eebisemmashshanni fedhe atixxe'n uutattoxxa uwwa shiqishati Duuchchi woddike Gootta atike Mageni'a Suba'etika ayyaana ulfeessi.11Atixxe atixxi labbaaxinna meyyaxxi oose, atia'a ergatemammaki labbakinna meyaki atik erganjuwwi, atike qacha'n hexxa'neexxi Leewwitonna wele bogiki manni annakanna ama affebaaxxi hiyyeeyye oossenna aro'o shi'witeexxi hiyyeeyye melaalle Duuchchi Woddik Gootti atik Mageni summa ifike galduma kadaashsha fi'leeke booncho'n, Duuchchi woddike Gootta atike Mageni edo gammadi.12Atinna Gibtseke boga'n garba kaddeettaxxa deetoxxe; konnee seeranna xexxe'achchoti heqqedhi.Seemmati Giissenneka Fooqiinka Ayyaana
13«Maye isexxe'n midha bukki assitottolenna woyinetixxa gumma miiccettechchi uduma torbaane barraqico'n fooqiinka ayyaana ulfeessitatton:14Isoonna labbaxenna meyyaxxe oose atixxenni, mine atiba hujja'ni ergatenda'neexxe labbaxxenna meyyaxxe oosenninni, qachchi giddo hexxa'neexxe Leewwitoninna wele boganaa'n keessummumma dage'e ofo'leekenni iittanni annakanna ama afebaake hiyyeessinninna aro'i reyexe melaallenni welti mitteba gammadde.15Duuchchi woddiki Gootti atik Mageni fi'lee booncho'n torbaane barra ulfeesi: Duuchchi woddiki Gootti atik Mageni midhatinna huccitettechchi duuchchinni eebbisaammaxxe'e gammadinginni ulfeessitatton.16«Woggate'n sasele labablli duuchchi kebbotike ayyaana'ni midha bukki assecatike ayyaana'ninna fooqinke ayyana'ni Duuchchi woddiki Gootti fi'laake booncho'ni atike Duuchchi Woddike Gotti Mageni edo shinqowwaal; huuni manjinna Mageni edo anga duwwixenni shiqoqqe'e.17Mitti mittiniig manji horateexxe karrana'n Duuchchi woddike Gootti'a hunna isixxishshann idagowaal.Dhugaatixxa Murte Uwwa
18«Duuchchi woddiki Gootti atik Mageni gosa gosa atixxike mini mini'a uwwa'nee boga'n hedheeke mitti mttinige qachcha'n murratanna akeekisanuwa fili; inisa'nenna ardake'n dhugaatixxa murte uunowaal.19Murte uutatto wodda dassitoxxe; gamisoxxe; matti beek mannixxa ille affebaashsha assammaxxeenna qulliyye daba murtaashhsa assammaxxa matta adhdhitoxxe.20Hedhoti hexxotta'anna Duuchchi Woddik Gootti atik Mageni ati'a uwwaaka boga dhaldota'a qajeelakenna toggichchake kadi.21«Duuchchi woddike Gootta atike Mageni'a tolchiimmalcho giissitattoba magenooffantaaka Atseedi hinaaka haqichcho calla kaassoxxe.22Higgeenni Duuchchi Woddik Gootti atik Mageni giba'neeke kinjiinka tolchinka utupha dhaaboxxe.The Word for the World International