Daani'eelikaa Raaga6
Daani'eeli Neenquwwinxe Bale Giddo Huneme
1Mootumma isixxe duuchcha'n moonaashsha Daaryoosi dhibbanna lame tomme jalqaabuwwa baalloonsa eeyye.2Insa'ne'ninna sase manna umoke asse; kone manninaa'ninna mitti Daani'eelitemman; insa'ne moyanjokee'e mitte yaanenna xe'itabaashsha konne galchalluwwa towantaashsha assende.3Galchalluwwakenaa'ninna jalqaabuwwakenaa'n Daani'eeli gargar hexxeexxa dande'a afeemmaxxee moyanji isoo ifixxe mootumma hana baalloonso'a yore.4Tennexxee iikki umiink galchalluwwinna ja'laabuwwi Daani'eeli mootummatike mine'ni hujaammaxxe hujexxe buuto'a manni isoo ku'lino'a hase; yaane kinni Daani'eel xuurameessake, xexe'allokenna hujete'n mitte xe'yanna gugurto afa gophemmaxxee iso'n mitte dedhanna balleessa afa dandeenneba'a.5Tennexxee insa'ne weli'ani weli, «Isike Magenka seera uudaaxxe yaane darre'nite kaddoole malee konne manjichcho ku'linannoxxa mitte balleessa iso'n afa dandennebo'n» hine.6Ookkoneechchi uduma iikki galchalluwwikinna iikki jalqabuwwi bukki hine marreexxi moyanjo, «Koo Moyanjo Daariyoosii! Qeerra baro hedhi!7Sase tomme barra qici'a ati gadhi darre ayyinna manjo yookaan wele mageno soodatabaashsha lallaba fulchitotta'a, konne lallabanna sa'eek neenqinxe bale'n hunemaashsha umiink mootummatik galchalluwwi, ja'laabuwwi, hayyoole, gorsalluwwinna bogiink galchalluwwi duuchchi weli aage'een.8Tennexxee moyanjoo! Konne lallaba fulchitettexxi Medoonikenna Faarsike seerishsha jijjiiremabaaka seera borreesite offo'lish.»9Tennexxe Moyanji Daaryoosi ookkonee lallaba borroti ofo'lshe.10Daani'eelinna iikki lallabi borreessemeexxa laqee wodda hedhammaxxe fooqebaa qabata; isi hedha'emmaxxi fooqexxi masikotenna Iyyerusaalemi darre'n bandeexxe masikootuwwa affe'eemman; edi wodda assa'emmashshanni guluffateexxi barrate'n sasele soodate; ifika Magenonna galateeffate.11Iikki manni mitteba bukki hiyye mareexxi Daani'eeli, soodata'n Mageno gargaarsa laqedhaa'naa afe.12Insa'nenna moyanjiinba marreexxi, «Moyanjoo sase tomme barra qici'a ati gadhi darre ayyinna manjo yookaan wele mageno soodatoole neenqiinxe bale'n huneemaaxxa ajaja fulchiteettabaa?» hina'n fulcheemmake lallabixxee isoo qorre; moyanjikinna, «Iikk lallab Medoonikenna Faarsike jijjiiremabaake seerishsha jijjiiremaakeba'a» hiyye hiisse haaso'e.13Insa'nenna moyanjoke'n, «Moyanjoo Yihudakenaa'n booji'emeeke manninaa'n Daani'eeli hiyyemaak ati fulchitteteka ajaja ulfeesa'nebaan; ta'anna barrate'n sasele guluffate soodata'neen.» hine.14Moyanji tenne laqeexxa yanna lumoo qica yaade; Daani'eeli gatiso'anna mudhdheexxi arishsho aaggaa qici'anna dandeessiseexxa duuchcha asse.15Ookkoneechchi uduma manni mitteba moyanjinba shiqeexxi, «Moyanjoo! Medoonikena Faarisike seerishsha moyanji fulcheek lallabinna kad ajaji jijjiiremabaaxxa ege'n!» hine.16Tennexxee Moyanji Daani'eel iyyedangeexxi neenquwwiinxe bale'n hunnaashsha ajaje; moyanjikina Daani'eelii'i, «Duuchchi wodda isi'a ergatendaatek Magen atee gatiso'o» hiyye.17Kinjokanna iyyedandeexxi eettene neenqinxe baleke afo'n cunfe; moyanjikinna Daani'eeli'n assendeexxi yaane jijjiirendaaxxe kaddabaaxxa ege'nishatee ifixxe qubekanna ifike ja'laabuwwixxe qubeka maxxansa itti maxxanse.18Moyanjikinna ifike mootummatike minibaa ille iima hige; eettene hashsha itebaang, iso'o fenxe assitaaxxi yaanenna isi'a daggaashsha assendebaang gale; diiphikinna isinaa'n ba'e.19Bariisa reefi boro haachchabbamma wodda moyanj ke'eexxi wiinamik eettene neenquwwiinxe balebaa me'e.20Eettene baleba'aanna shiqeexxi yaadotike hafuurinni Daani'eeli'i, «Ookkone hadhaake Magenike garbichcho Dani'eelii! Iikki duuchchi wodda isi'a ergatendattak atik Magen ate'e neenquwwakenaa'n gatisa dande'edhee?» hiyya'n ye'e.21Daani'eelinna hiisse hiyye haaso'ee qici, «Moyanjoo! Qeerra baro moyii!22Moyanjo ani isi edo balleessa belo hedhannaxxee ati edonna fuggoxxa huje ege'na gophennaxxee anki Magen ifika iimika erganjo ergeexxi ookkone neenquwwiinka ofo'o cufeen; neenquwwikinna anee'e midhebaan.»23Moyanjikinna lumoshsha gammadeexxi Daani'eelii'i bale giddii'n fulchinaashsha ajaje; Daani'eelinna bale giddii'n fulchemee wodda Magenoke'n addateemmaxxee mitte miidhenshanna iso'n gelteemmaba'a.24Moyanjiinke ajajinni ookkonee dhariki Daani'eelii'i ku'lemmaka manna, insa'nexxe aruwwanninna insa'nexxe oosenni welti iyyedangeexxi eettene neenquwwiinxe bale giddo darbine; bale giddo hunda gennebaang iikki neenquwwi insa'nee ninnifeexxi miqe insa'nexxanna duuchchanna buttuchche.25Ookkoneechchi uduma moyanji Daariyoosi butta duuchcha'n hedheeke arduwwa'n mootummuwwa'ninna gargar gargar hedheeka laagad haaso'aake manni duuchchibaa erga hiyya'n boreessee qici: «Nage'i ha'no'aa kadowwaal!26«Anxe mootummaxxe galcha giddo duuchcha'n hedheek manji duuchchi Daani'eelika Mageno sodataashshanna ulfeesaashsha konnee lallaba fulcheennen.«Isi duuchchi woddi'a hedhaake Mageno kademmaxxee,isixxi mootumma baxxaba'a;isixxi galchanna muuxama affeba'a.27Isi wodaan anjiraan;iimate'ninna buttate'n beesissuwwakanna maso assaan;Daani'eelinna neenquwwiinke afo'inaa'n gatise'een.»28Tennexxee Daani'eeli'a Daaryoosixxe mootummake baro'ninna Farisichcho Qiroosixxe mootummake baro duuchcha'n yaane isi'a qajeelde.The Word for the World International