Read Daani'eelikaa Raaga 4

Daani'eelikaa Raaga4

Naabukedenetsoor Oojjoti Uudeeka Haqichcho

¹Naabukedenetsoori'i moyanji, buttate'n hedheeke arda, gosa gosuwwa'anna gargarika laagada haaso'a'neeke manni duuchhci'a nage'i ha'no'a bira sa'owwaali!

²Lumok Magen ani'a asseeka mambe'a beessisuwwanna maso yaanuwwa gammada'nee ha'no'n kulaanne.³Isik Beessisuwwi hittatta lummoke!Isixxi maso yaannuwwa hittatta jabaxxe!Mootumma isixxi duuchchi woddixxen;galcha isixxinna ila ila'n saxxaaxxe.

⁴Ani Naabukedenetsoor, anke mi'ne'n qununa'e anke moottumatike mine'ninna danqaashsha hedheennan.⁵Ane'e sodaachchissexxa mitte oojjo oojjotenne; dhiiphennexxe taqe'n hedhe'na'a anxe sammo'n daggeexxi misilenna waleella ane'e alalshite.⁶Tennexxe Baabiloonixxi beekkole duuchchi anibaa daggeexxi oojjo anxa ani'a tinko'a ajajenne.⁷Morammakir, gojammakir, diginte daggamammakirnna urje laakko'ammakir dagee wodda oojjo anxa insa'ne'n kulenne yaane kinni tika dandeenneba'a.⁸Ookkonneechchi uduma moyanjiinke magenuwwike summinni Bilxasoor hiyyeme ye'emeekinna woyyichchi magenuwwika hafuura afeeki Daani'eeli anibaa dage; aninna oojjo anxa iso'ni kulenneni.⁹Aninna iso'ni hiyyeene qici, «Beekkoletike sooresa kaddeetteke koo Bilxasoor, woyyichchi magenuwwik hafuur ate'ni hedheexxa ege'nenne; hiini buqo yaanenna ate'e rakkisaban; ate'ni kulaannexxe oojjoxxa tika ani'a tiki.¹⁰Anxe taqe'ni dhiiphennexxa yanna uudeennaxxi waleella: ani edi darre kunnise buttatixxe oddo'n ejjuma yo'oshsha qeeredheeki heqqichchi uurree'na uudenneni.¹¹Haqichchikinna yo'oshsha nophphe; jabaate; qacce isixxinna iima gelteexxi buttatike kasi qico'n leella'nemman.¹²Isinna dancha shafikenna gumma unkuruure'ekemma'a; duuchchinge kaddaaxxi itanna iso'n hexxemma'a; biniichikinna isike gaaddis hunda gaaddilseedhe'emma'a; isixxe damuwwa hananna ci'a ofolda'emman; dada duuchchinna konne haqichchonaa'n la'ata'nemman.

¹³«Anxe taqete'n diiphe uudennexxe waleella'n mitti woyyichchi iimik erganji iimi'n dagaa'naa uudenneni.¹⁴Isinna hafuura gikki asseexxi ane ye'e hiyyee qici: ‹Haqichcho konne karre; damuwwatanna cirre; shafuwwakanna harcaasse; gummatanna xeerre; biniichikinna isi hundii'n ci'atinna isixxe damuwwanaa'n baajjuun.¹⁵Yaane kinni isika tutunjonna hiddi isik badda'a giddo sibiljikininna sageettoti usureme buttin giddo turowwaal.
«‹Iimi'ni coccobaake wojinni lashshi hiyyowwaal; badda'a giddonna biiniinchik hedhuun.¹⁶Sammo isixxinna manjinxenaa'n jijjiirende'na'a biniinchinxi sammo torbaane wogga qici'a isi'a uwwenduun.

¹⁷«‹Murtettinna erganjuwwi darree'n kulende; seerakanna woyyoole haasote; kuninna, Lumoki Mageni buttatixxe moottumma duuchcha'n moyaaxxa tenne moottumuwwa eeyyeeke uwwaaxxanna manni giddi'n tuffatemekara baalonsaxxa hedho afeek duuchchi tenne ege'naashaten.›

¹⁸«Tinni ani moyaanji Nabukedenetsoor oojjotenaxxe oojjoman; yoona ta'a koo, Bilxasoor anxe moottuma giddo hexxeexxe beekkolenaa'n mittikinna ise'e tika dande'a gophedheen, ate'ni kinni magenuwwiinki woyyichchi hafuur hedhemmaxxe ati tika dandeettatton.»

Daani'eel Moyaanjiinxa Oojjo Tike

¹⁹Eettene yanna Bilxasoor hiyyemeek Daani'eeli heenoxxe yanna'a lumoshsha raankeme yaadikinna isoo alalshe; tennexxe moyanji, «Koo Bilxasoor eetene oojjonna kadi tika isexxi ate'e alalshitoqqe'e» hiyye.
Bilxasoorinna hiyye haaso'ee qici, «Koo moyaanjoo! Iitti oojjo atee gibaakixxe kaddo tika isexxinna atike naaphi'a kaddo.²⁰Iikk oojjoti uuddettek haqichchi, nophphe jabaate qacce isixxinna iima geltee'na'a butta duuchcha'ninna leelleeke,²¹danchallamma shafuwwikinna unkuruura gummake, ardi duuchchi'ana itate kadeeke, biniinchuwwi isi hunda gaadifata'neekenna ci'aa isi hana mine ijaadhdhite hexxaamakeman.²²Koo moyanjoo! Lumokenna jabake kadeeki iikki haqichchi ateten; atinna lummexxe'e iimi qico'n gelteetten; galcha atixxinna buttatixxe gabala qico'niten.

²³«Koo moyanjoo! Atinna uuddaa'naann mitti woyyichchi iimik erganji dirre dageexxi ‹Haqichcho konne karre; tutunjo kinni sibiljikinna sageettotike usurri, hiddichchikinna buttini giddo hedhuun. Iimi'ni coccobaak woji iso'o lashshi assowwaal; isinna torbaane wogga biniinchuwwik welti hedhowwaal.›

²⁴«Koo moyanjoo! Lumok Magen ate'e gootta anke moyanjo'n iyyedageeke ajajixxi tika konneechchinni butti'a hexxeeshshaten:²⁵Atinna ardi giddii'n adhdhendeettexxi biniinchik welti hexxattoni; torbaane wogga saxxaa qico'n horiinsha badda'a dheeda'na'a iimii'n woji ate coo'mi assaan; tinn duuchchi ate'n geltaachchi Lumoki Magen manjiinxe moottummuwwa duuchcha'n hunna affeexxanna moottumma duuchcha eeyyeekee uwwaaxxa egendatto qico'nteni.²⁶Haqichchink tutunji buttini giddo hiddik gataashsha ajajaamma Magen butta duuchcha'n hunna affeexxa egendetechchi uduma higgeena mootatoxxa leellisha.²⁷Tennexxe koo moyanjoo! Ani ate gorsaanneka gorsa gammadik adhdhi; cubbo huja waaldetexxi eloxxa yaane assi; fuggoxxa assa waalde miicemeeke manni'a marari; tennexxe qeerraka baro nage'ik hexxatton.»

Iitti Oojjo Muuxende

²⁸Tinni duuchchi moyanjo Naabukedenetsoor'n kadde.²⁹Tommena langa agenji uduma moyanji Naabukedenetsoor Baabiloonike moottummatike iimi darreke mine'n mammarema'n³⁰Moyanji hiyyee qici, «Tinni moyanjuwwiinke galduma kado'aa anxe jabaxxe hunnanni anke lumoke gurri'aa ijaarennexxe lumoxxe Baabiloonitebaataa?»

³¹Haaso'a afo'ii'ni birebaang hafuur iimi'n dageexxi hiyyee qici, «Koo moyanjo Naabukedenetsoor! Ati'a ajaji fuleek: moyanjummatixxi atixxi baalle atenaa'n adhdhende'een;³²Ati ardi gidii'n adhdhendettexxi biniinchik welti hexxattoni; horinshanna badda'a dheeddatto; Lumok Magen manjixxe mottummuwwa duuchcha'n hunna afeexxanna tenne mottummuwwa eeyyekee uwwaaxxa egendatto qico'n torbaane wogga saxxaan.»

³³Iikki woddi kulendemmaxxi Nabukedenetsoor'n kaddee'na'a manji giddii'n adhdhemeexxi horinsha badda'a dheede; biso iskixxi orda sinbiriinke keelishsha qeerrexxaa qici'aanna qe'yi isik ci'atikishsha nophphaa qici'a iimike wojinni corco hiyye.

Naabukedenetsoori Magenoke Shiqisheeka Galata

³⁴Bari iikkinna muuxemechchi uduma ani Naabukedenetsoori toggi hiyye iimi'a uudenne; kiidotinna ane'n higge; Lumoka Magenonna saadenne; duuchchi woddi'a hedhaakanna ulfeessenne jajenne.Galcha isixxi duuchchi woddiixxeni;moottumma isixxinna ilatenaa'n ilati qico'n hexxaani.³⁵Buttate'n hedheek ardi duuchchimitteelchishanna laakko'emabaan;iimike sannachuwwanna kado'obuttate'n hedheeke ardi eeyyeexxa assaan;iso'o hoyya dande'aak yookaaniso'o, «Maassitette?» hiyyaak ayyinna hedhaba'a.

³⁶Iitti kiido ane'ni higgeexxa yanna anxe mootummake ulfinni'a gaachannikinna lumminni duuchchi ane'n hige; ank gorsalluwwinna ja'laabuwwi ane hanse; anxe moote'ninna higennexxi edi caalanna ulfeessemenne.

³⁷Iimik Magen assaaxxi duuchchi eloxxe kaddeemmaxxee ori isik duuchchinna qullichakenna dhugaate kademmaxxe ta'a ani Naabukedenetsoor iso'o sadaanne, lummisaanne, ulfessaanne; isi ifi dukaakaranna salphisa dande'aaken.

The Word for the World International

https://app.library.bible/content/2b894378475c6aea