Daani'eelikaa Raaga10
Daani'eeli Waleellati Uudeeka Manjichcho
1Faarsik moyanji Qiroosii moyeexxe sakkaxxe wogga'n Bilxaasoor hiyyemeeka Daani'eeli'n waleella leellitte. Tenne waleellaxxi erganna dhugaate; isenna jabake bagedo uudaaxxe yaanexxemman; tenne erganna qalbeeffataashsha leellat qalbeeffachcho isi'a uuwwende.2Eettene yanna ani, Daani'eeli sase torba oodhenne.3Iitti sase torbuwwa muuxendaa qici'a eloxxa ita itebe'no, maali yookaan woyinetixxi booka afo'o anka maqqeba'a; qibaatetanna issatebe'no.4Taakkake agenjixxe lame tommenna sholgaxxe barra ani lumoke Xegirosike galaan qarqara uurre'enege'n5tami asse uudanno wodda kunse ani edo layinotixxa seemma odo'weexxi yo'oshsha ca'ite worqeke sabbatinni hidha usudhdheeka manjichcho afenne.6Bisi isikinna birle hiyyemeeke fiixe kinjo laba'emman; albi isik banqotishsha, illuwwa isixxi bubbammaxxe giirashsha, isixxi hirruwwanna lekkuwwa holateek sageettotike sibiljishsha cala cala hiyyaak hafuur isikinna heddo mannike hafuurishshatemman.7Tenne leella uuda'ennak ante, Daani'eeli callamman; aninni welt hedhemmak manni isee uudebaani; yaane kinni yo'oshsha alanne'e qexerrii hineemmaxxee baanje shoomme.8Tennexxee tenne waleella uuda'n an calli qof gatenne; hunna anenaa'n xo'o hite'na'aa albi duuchchinni gola'le hunna gophenne.9Aninna ookkone manjichchika hafuura laqenne wodda ifi haake buttinake'n albik gonbisemenneni.10Ookkoneechchi uduma mitte anga ane'e qaqqabbe; aninna roqoonsaa'naa angatinna gulubik anee uurrise.11Iimik Erganjinna anee, «Lumooshsha eeyyendetteke koo Daani'eeli! Ani atiba ergeme dage'ennaxxee ate'n haaso'annexxe yaane laqqotta'a kexxe uurri» hiyye; aninna roqoonsa'n ke'e uurrenne.12Higgeenna anee hiyyee qici, «Koo Daani'eeli! Sodaattooxxe'e! Ege'na alfatee Magen edo ifi salphisatee mudhdhitettexxe siretixxe barranaa'ninni soodachcho atixxi laqende'eeni; aninna atixxe soodachchoka hiisichcho iyyeedageenneni.13Yaane kinni Faarsixxe mootummake sooreessa kadeek hafuuri lame tommenna mitte barra'a ane moromeni. Ookkoneechchi uduma ani ookko Faarsixxe mootumma giddo qofitt gatennaxxee erganatike umiinke sooreessuwwinaa'n kade'eek Mika'eeli anee gargaro'a dage.14Tenne waleellaxxe muuxensha'a heddi bar gata'emmaxxee, heger atike arda'n kaddaaxxa ate'n leellishonnaa ta'a atibaa dage'ennen.»15Isi tenne ane'n haaso'aa wodda albik butta gonbisemennexxi bucuqqi hiyyebe'no.16Ookkoneechchi uduma manjo labaak anga qeerriseexxi sume anxa kise; aninna ofo'i baneme'naa haaso'ate'n ke'enne. Ani edo uurre'emmake'n hiyyeenne qic, «Anke goottaa! Tenne waleellanaa'n kexxeexxa lumoshsha wixixxi hiyye hunna gophenne.17Koo anke goottaa an atik garbichchi hittata atee anke goottinni dande'e haaso'annota? Hunna gophenne, hafuurkinna anenaa'n mudeeni.»18Higgeenna manjo labammak iikki anee kiseexxi jabeesse.19Isina anee, «Koo lumooshsha eeyyende'etteke manjoo, mee Sodaati; nage'i atinni hedhowwaal; jabaat, worbi» hiyye.Isinna ane'n haaso'e wodda hunna jabaatennexxi, «Anke gootta hunna anee jabeessitettexxenni haaso'i» hiyyene.20Isinna anee, «Ani atiba mayee dagenexxa egendeette? Faarsixxe mootumak sooreessa kade'eeka hafuura lolonna'a hirbake'n ille iima higannon; ani me'onnole Girkeexxe mootumak sooreessi kade'eek hafuur dagaan» hiyye.21Yaane kinni Dhugaatike Maxaafi giddo borreessendeexxa edisennexxi ate'n kulannon; konne sooreessa kade'eeke hafuuruwwinni lolemonna'a ha'nooke sooreessa kadeeke Mika'eelii'i malee anee gargarak hedheba'a.
The Word for the World International