Daani'eelikaa Raaga1
Daani'eelinna Jaaluwwi Ifiki Baabilooni Mootummatike Mine'ni
1Yihudak moyanji Iyyo'aaqemi moyeexxe sakkaxxe wogga'n Baabiloonik moyanji Nabukedentsoori Dageexxi Iyyerusaalemi buqe.2Dada duuchchiki Goottinna Yihudiinka moyaanjo Iyyo'aaqeminna Mageninke galmi giddo hedheemmaka heenoka miyuwwa Nabukedentsoorixxe anga'ni sa'isse uwwe. Moyajinna konne miyuwwa iyyemareexxi ifike magenike mine'n Babilooni miya massinammake mini giddo ugge.3Ookkoneechchi uduma moyaanji mootummatike minike ja'laabuwwike sooressa kadeeka Ashifenazi Isira'eeltotenaa'n booji'emek manni giddii'ni moyanjuwwinke mini hadonaa'ni ilendeexxe dargageeyye giddii'ni heenoxxa iyyedagaashsha ajaje.4Insa'nenna bisoke'n fafa afebaake danchallamma, heene barachchonna baratatixxa danende'a anfe'ekenna, beekkuma anfe'eka, hirbange'n qalbeeffata dande'aakanna moyanjiinke moyetike mine'n ergatematee'e dandeette affe'eexxa labbaxxe dargageeyyen. Baabiloonitotika laagadanna borrotixxa aada insa'ne barsiisaashsha iso'o ajaje.5Moyanjikinna barra barra'n indaaxxi itana ha'winaaxxi woyinetixxi booka moyanjiinxe qorenaa'n kaddaashsha ajaje; insa'nenna sase wogga baranteechchi uduma moyaanjiinxe ergatensha'n e'yino'aaten.6Insa'ne giddii'ni Yihuda'ni dangeek Daani'eeli, Hanaaniya, Misa'eelinna Azaaryatemman.7Kolaasemeeke mannik sooresi insa'ne'a haaroka summa fulche: Daani'eeli'i Bilxaasoor, Hanaaniya'a Sidiraaqi, Misa'eeli'i Misaaqi, Azaarya'a Abidinaagote hiyye fulche.8Daani'eelinni moyanjiinxa itanna woyinetixxa booka ha'we ifi battoosabaashsha mudhdhe; isinna konne orinni ifi battoosabaashsha kolaasemeeke mannika sooresa eeti'i uwwo'a laqedhe.9Mageninna Daani'eeli'a kolaasemeeke mannike sooressuwwi edo gaachchannakanna elle alfaashsha asse.10Kaddo malee'e kolaasemeeke mannik sooressi Daani'eeli'a «Ita ittineexxi wele dargageeyye caala huqqatine'na'a afoole moyanji ank gootti ane'e shiyaashsha assitineen.»11Ookkonneechchi uduma Daani'eelinna kolaasemeeke mannika sooressanna Hanaaniya'a, Misa'eeli'ninna Azaariyyaa heqqaashsha uggeemaka hiyyee qici,12«Ballo maganneten hiddichchuwwa inda'ninna wode'e ha'wina'n he'nannoshsha assite no'oo erganjuwwa atika tomme barra'a hega uudi.13Ookkonneechchi uduma no'oka albanna moyanjiinxa ita itteexxe dargageeyyeka alba welti qixxeessi; no'o atike erganjuwwa'ni eettetexxa assi»14Kolaasemeeke mannik sooressinna Daani'eeli hiyyeeka yaada aadheexxi tomme barra'a insa'ne hega uude.15Tomme barra uduma moyanjixxa ita ittemmaxxe wele dargageeyye caala insa'ne eloxxe fayyanni he'ne furdante leelline.16Tennexxee heqqanji insa'ne itiyyo hasissammaxxa filendeexxa itanna woyinetixxa booka gatiseexxi isexxa bado hiddichuwwa indo'a uwwe.17Magenkinna tenne shoole dargageeyye'a duuchchinxe borroxxanna barachchoxxa ege'nannna qalbeeffachcho insa'ne'aa uwwe; Daani'eelinna duuchchiinxe waleellaxxanna iittanni oojjo tikatixxa uwwa afe'emman.18Isibaa dangaashsha moyanji muremmaxxi sase wogga muuxxendee wodda kolaasemeeke manniki sooressi insa'nee Nabukedentsoori edo shiqishe.19Moyanjinna insa'ne yaansise wodda insa'ne giddo Daani'eelishsha Hanaaniyashsha, Misa'eelishshanna Azaariyaa hedheekir hara afemebaan; tennexxee insa'ne moyanjokee ergatemate'ni ke'ne.20Moyanji insa'ne qoreexxa duuchcha beekumakanna qalbeefachcho uudaaxxe yaane duuchchanni isi galchammake boga duuchcha'ni afemaake morammakeera'ninna doochchammake duuchchana'ni insa'ne tomme anga caalleexxa afe.21Daani'eelinna moyanji Qiroosi moyeexxe siretixxe wogga qico'n ookkon ture.The Word for the World International