2 Saamu'eeli9
Daawwitinna Menfeboosheti
1Daawwitinna, «Yoonataanixxee hiyyee eloxxa isi'a assannoshsha Sa'oolike mini hadinaa'ni hafe gateeki hedhe lati?» Hiyye qore.2Ookkone wodda Sa'oolike mini hadonaa'n Siiba hiyyemaak mitti erganji hedheemmaxxee, Daawwitibaa me'aashsha kulle. Moyanjikinna, «Siibate hina'neeki atetee?» hiyye qore.Isinna, «Eeti ani atike erganjon» hiyye.3Moyanjinna, «Mageni eeyyaxxa eloxxa yaane isi'a assona'a Sa'oolike mini hadonaa'ni gateeki manji hedhebaa?» hiyye laqe.
Siibanna moyanjo, «Lekka naafe'eki mitti Yoonataanik balti hedheen» hiyyee isi'a hiisse.4Moyanjikinna, «Isi habata hedhee?» hiyye qore.
Siibanna, «Lodebaari hiyyendaaxxe bakka'ni Ami'eelik belto Makirike mine'ni hedheen» hiyye hiisse.5Tennexxe moyanji Daawwiti, Menfebosheetee Ami'eelika belto Makirike minenaa'ni Lodebaarii'n manjo ergee iyyedangaashsha asse.6Sa'oolike beltik belti Yoonataanik belti Mefibosheeti Daawwitibaa dageexxi albi buttina tuqa qico'ni heeshshi hiyye ulfeesse.
Daawwitinna, «Menfebosheeti!» hiyye isoo ye'e.
Menfebosheetenna «Hee anke gootta» hiyye.7Daawwitinna, «Meeco'o sodaattoxxee; anni atikixxe Yoonataanixxee hiyyee dhugaandinni eloxxa yaane ati'a assannon; atike akka'ika Sa'oolika boga duuchcha ati'a hiissannon; atinna duuchchi wodda anxe qorenaa'ni ittatton» hiyye.8Menfebosheeti albi buttina tuqaa qico'ni heeshshi hiyye anga iimi'a ke'isseexxi; «Reyeeke wolchishsha uudemannoke ani'a tenne duuchcha assitaatek erganji atiki ani ayyete isi?» hiyye.9Ookkoneechchi uduma Sa'oolika erganjo Siibaa'a ye'eexxi hiyyee qici, «Sa'oolinna isike mini hado kadeeke kadeechcho duuchcha atike goottike beltike belti'a uwweennen.10Ati, atixxi labbaxxi oosenna atiki erganjuwwi ha'nooke goottik beltik belti itaachcho alfaashsha fichcha isika hujje; midhatanna isi'a aasse. Atik goottik belti Mefibosheeti kinni duuchchi wodda aninni welti anxe qorenaa'ni itaan.» Ookkone wodda Siiba tommenna onde labbaxxa oosenna lame tomme erganjuwwa afeemman.11Ookko'ni Siibanna moyanjo, «Anke gootta moyanji erganjo atikee ajajeeka duuchcha, atik erganjinna muuxan» hiyye. Tennexxe Mefibosheeti moyanjiinxe oose giddii'ni kadee Daawwitinna mitte qore'ni itaamman.12Mefibosheeti Miika hiyyemaaka mitte shiixoka belto afeemman; Siibak mini hadi duuchchi Menfeboshete'a ergatemaamman.13Mefibosheetinna duuchchi wodda moyanjiinxe qorenaa'ni ita ita'nemmaxxee Iyyerusaalemii'i hedhaamman; isinna lamiinxa lekka naafeman.
The Word for the World International