2 Saamu'eeli21
Gaba'oonke Mannixxa Halo Fula
1Daawwit moye galchammake baro'n weli duuka sase wogga duuchcha jabake solo'o hedhemman; tennexxee Daawwitinna Duuchchi Woddika Gootta laqe; Duuchchi Woddik Goottinna hiyyee qici, «Sa'oolinna mini hadi isiki manjo anga sa'eke fuggaaleessa manjon; Sa'oolinna Geba'oonka manna shiye bireen» hiyyeexxi hiisse.2Moyanji Geba'oonito ye'eexxi haasesse. Geba'oonto Amooritotenaa'ni fule dangeeke malee Isira'eelixxe gosammabaan; Isira'eelik manni ha'no heqqinannoni hiyye kakanteexxe kaddolenna Sa'ooli kinni Isira'eelike ardi'anna Yihudake ardi'a afeemmaxxe gaabbenaa'ni kexxeexxa insa'ne biro'a haseemman.3Daawwitinna Geba'oonito, «Maa ha'no'a asaanno? Duuchchi Woddike Goottika arda eebbissino'a ha'non geyeemmaka miiccama faaci'atee maa ha'no'a assanno?» hiyye qore.4Geba'oonto iso'ni, «Sa'oolitenna kadi mini hado birretika sibljo yookaan worqeti laqatika seera anfeebo'non iittanni Isira'eelinaa'ni mittekanna shiyate'e seera anfebo'non» hine hiissine.Daawwitinna, «Yooni maa ha'no'a assonaa'a hassina'ne?» hiyyeexxi insa'nee qore.5Insa'nenna «Xexxeeremmannoshshanna Isira'eelike bogi giddo hoone booncho'ninna he'nabo'noshsha no'oo birro'a haseemmake manjona'ninna fuggoxxa no'o'ni assemmake manjixxe,6hortenaa'ni torbaane labbaxxi oose no'no'aa uwwendowwaal; no'onna Duuchchi Woddike Gootti fileeke Sa'oolike boga'ni Gibi'a giddo Duuchchi Woddik Gootti edo insa'ne'e fanninso» hine hiissine.
Tennexxe moyanji, «Kadduun insa'nee ha'no'aa uwwannon» hiyye.7Moyanjikinna, Daawwitixxenna Sa'oolike belto Yoonataxxe oddo'ni Duuchchi Woddike Gootti edo assendeexxe kakoxxee hiyye Sa'oolka akka'o Yoonataanika belto Mefibosheetii'i reyotenaa'ni gatise.8Yaane kinni moyanji Iyyoheelixxi belto, Ritsifa Sa'ooli'a ildeemmaxxa lame labbaxxa oose Arimooninna Mefiboshetii'i adhdhe; ittanni Sa'oolixxi belto, Meroobi Mehoolichcho Baarizilaayika belto Adiri'eeli'a ildeemmaxxee onde labbaxxa oosenna adhdhe.9Isinna Gaba'oonitotee insa'nee sa'isse uwwe; Gaba'oonitotinna insa'ne'e tullichchi hana Duuchchi Woddike Gootti edo fanninse. Torbaaniniig mitteba renne; insa'nenna shiyemmeek midha aaggammake agenjuwwa'n, so'inxe haamemaxxe safanitemman.10Ookkoneechchi uduma Saa'olxxe shiixxooxxe are kaddeexxi Aayaxxi belto Ritsifa yaadotixxa seemma aaxxeexxi lumoxxe rassa hana fa'wite. Midha aaggammake siretike agenjonaa'ni xeeni renshake'ni ganaa qico'ni barra ci'a hashsha biniichchuwwi tuqabaashsha heqqitaamman.11Daawwiti, Sa'oolixxi shiixoxxi are Ritsifa, assiteexxa yaane laqeexxa yanna,12isinna mareexxi Sa'oolixxanna belto isike Yoonataanixxa miqe Gele'adi Iyyabiisike mannanaa'ni aadhe. (Iyyabusik manni ookkone renshuwwa aadheek Filisixeemito Sa'oolii'i Gilbo'a shinne ke'neexxi fanniseeke Beetishanixxe weldeenanaa'ni sho'ikitemman.)13Daawwitinna Sa'oolixxanna isika belto Yoonataanixxa miqe ookkoo'ni idage; iittanni ookkone shiyemeemmake torbaane mannixxa miqenna bukki assende.14Ookkoneechchi uduma Sa'oolixxanna isike belto Yoonataanixxa miqe Biiniyaamike boga'n Tsela'i hiyyemaake booncho'n Sa'oolike anna Qiisike hirreessa'n moogiyyoti moyanji ajejemmaxxa duuchcha assine. Ookkoneechchi uduma Mageni ookkone bogixxe soodatendemmaxxa soodachcho duuchcha laqe.
Filisixxeemitote'n Ke'eeka Lola
15Higgeeni Filisixeemitotinna Isira'eelixxe oddo'ni loli ke'e. Daawwitinna ifike loliinke manninni welti adadde Filisixxeemito lolatee me'e; isinna gophe.16Raafayimixxi hortek mitti Yushibiibenoobi hiyyemaak Sase kiilona gamisa geyaaka sageettotike sibljika bagedo abixxekeenna haaroka wolaantichcha ka'leeke manjomman; isinna Daawwiti'i shiyatee hede.17Tsuriyak belti Abisa kinni Daawwiti anjirate dage; isinna Filisixeemichcho oteexxi sheye. Ookkonneechch uduma Daawwitik manni isoo, «Isira'eeliki xassi xo'abaashsha ta'inni elqi'a ati no'onni welti lolakee fuldabexxo'n» hina'n kakante.18Ookkoneechchi uduma Goobi hiyyemaake booncho'ni Filisixeemitoti welti weli loli kade. Eettene yanna'ni Kuusitichchi Sibekayi, Raafayimixxe horteka Saafi hiyyemaaka manjichcho shiye.19Goobi hiyyemaaba Filisixeemitoti welti kadeeke wele lola'ni, Beeteliheemi ilmee, isike bagedik somelchik furdinni seemma ganatixxe ogeke mirqisanjishsha hedheek Ye'are'aarigimik belti Elihanan Gaatike bogika manjo Goliyaadii'i shiye.20Higgeenni Gaatii'ni ke'eeke lola'ni, lamiinxe lekka'ninna lamiinxe anga'ni jaane jaane qubba duuchchiinxi mitteba lame tommenna shoole qubba afeemmak mitti qeerrak manjichchi hedhemman. Isinna Raafayimixxe horteke manjomman.21Kunni manjichchinna Isira'eeli'i gacifatee wodda, Daawwitika dayyo Saamak belti Yoonataan isoo shiye.22Kunni shoolniig Gaati'ni he'nemmake Raafayimixxe horteke mannamman; insa'nenna Daawwitixxe'ninna isike erganjuwwixxe anga'ni inbe.The Word for the World International