2 Moyanjuwwiinkaa Maxaafa17
Isira'eelika Moyanjo Hoose'i
1Yihudak moyanji Akaazi moyeexxe tommenna lame wogga'ni Elaki belti Hoose'i Semaariyake qachcha'ni Isira'eel'ni moye; sallane wogga moye galche.2Isinna Duuchchi Woddike Gootti edo elobaaxxa yaane asse; kaddo male'e cubbo isixxinna edo hedhemmaki Isira'eeliki moyanjuwwi hujeexxa cubbo gelteexxemmabaan.3Asoorik moyanji Selminasoori isoo lole'na'a injifatemeexxi isi'anna irbo uwwe.4Asooriki moyanji kinni Hoose'i iso'ni fuggoxxinni ke'eexxa ege'ne; Yaane kinni Gibtseke moyanjo Sigooribaa erga ergedheemmaxxeenna wogga woga'nini assammashshanni Asoorike moyanji'a irbo uwwa gophemmaxxeeteni; tennenaa'ni kexxeexxa Selminasoori abideexxi usuriinke mine'ni e'yishe.Samariyake Qachchixxa Iba
5Asoorik moyanji boga duuchcha lole abixxeexxi Semaariyaka qachcha sase wogga erqe kayyi'ni buqe.6Hoose'i moyemmake baro'ni sallanixxe wogga'ni Asooriki moyanji lole injifate Semaariya abixxe: Isira'eelika ardanna booji'eexxi Asoori'a aadhe me'e. Kunnirinna Halahi, Gozaani giddo Heboorike galaani bira ittani Meedoonike qachchuwwa'ni he'naashsha asse.Isira'eeli Cubbo Hujjemmaxxe Daafe'a Booji'ende
7Yooni Isira'eeli'ni tinni duuchcha geya dandeetteeki; Gibtseke boganaa'ni Feri'oonixxe galchanaa'ni Gibtseke moyanjonaa'ni insa'ne fulcheeka Duuchchi Woddika Gootta Mageno insa'neeka balleessinemmaxxeeteni; ittani wele magenuwwa magenoonfante.8Duuchchi Woddik Gootti insa'ne edi'ni fulche shorremmaka gosa gosake ardikanna Isira'eeliki moyanjuwwi bogi giddi'a e'yinshemmaxxa batte aada hordonfemmaxxeeteni.9Isira'eeli, Duuchchi Woddike Gootta'n ifike Mageno'ni seeri beloxxa yaane sho'iki assite; qaaferi xellephpho heqqinammabaa'ni ke'issine kinjiinke dalla'ike qachcha'ni hedheeke minuwwa insa'neeke duuchcha'ni hedheeke tullichchuwwi hana magenoonfachchotika boonchuwwa giisse'ne.10Mitte mitte tullichchuwwi hananna mitte mitte shafi callike haqichchi hunda sooddo magenoonfantaxxanna asheera hine ye'naaxxa meyyake magenixxa fakke uurrinse.11Duuchchi Woddik Gootti insa'ne edi'ni fulche shorremmaki gosa gosaki ardi assemmashshani; tullichchuwwi duuchchi hana hixxaana gunbe; Duuchchi Woddika Gootta aararsitaaxxa fuggoxxa yaane assine.12Duuchchi Woddik Goottinna insa'nee «Tenne assa ha'no'a hasissabaani» hiyyoolenna midde insa'ne fakkuwwa magenoonfante.13Tinni kaddoolenna Duuchchi Woddik Goottinna «Fuggoka ora ha'nooka waaldine higge; annuwwi ha'nooki muuuxaashsha ajajenneke seera duuchcha, iittanni erganjuwwa anxe, wabeeko darree'ni ha'no'a sa'isse uwwenneke seerike ke'injishshani; ajaja ankanna aada anxa heqqedhdhe» hiyye wabeekotanna leella uudammake manna duuchcha'ni Isira'eelinna Yihuda'a xexxe'achchiiseemmani.14Kaddo male'e insa'ne kinni lanqebaani; Duuchchi Woddike Gootta ifike Mageno'ni addatemabaake edike annuwwi insa'neekishsha jalline.15Isixxa Aadanna edike annuwwi insa'neekinni welti aagemmaxxa kako, insa'ne'aa uwweexxa xexxe'achcho tuffante woyi fuldabaaxxa fakke magenoonfatati umo ifinge woyi fulabaake kande: Duuchchi Woddik Gootti «Insa'ne assinaaxxa assitinoqqe» hiyye insa'nee ajajoolenna midde qarqara insa'neeke'ni hedheeka gosa gosaka arda hordonfe; Duuchchi Woddiki Gootti assinabaashsha hoyyemmaxxanna assineeni male'e waallebaani.16Duuchchi Woddik Gootti insa'neeki Mageni insa'nee ajajeexxa duuchcha muunxebaani; worqe baqinse lame jabbetixxa fakkenna Ashera hinaaxxa meyyaxxike magenixxa sooddo giissine; urjuwwa sagande; Ba'aali'i magenoonfante.17Ittani labbaxxanna meyyaxxa oose ifixxa ciincatike tolchi'a shiqinshe; morraakenna gonjaake kande; Duuchchi Woddike Gootti edo elobaaxxa yaane assate'e ifi uune; aaraashshanna assine.18Tennexxe Duuchchi Woddik Gootti Insa'ne'ni yo'oshsha aare; Yihudaxxi gosa calli gatteeni; Isira'eeli'i ifi edi'ni bayyise.19Yihudake ardanna kadoole, Isira'eelinaa'ni adhdhemmaxxa aada hordofeeni male'e Duuchchi Woddike Goottika insa'neeke Mageniinka ajaja heqqedhebaani.20Tennexxe Duuchchi Woddik Gootti Isira'eelika arda duuchcha waale; insa'nenna rakkise; ifi edi'ni insa'ne fuggussaa qico'ni; booji'aake mannnixxe anga'ni sa'isse uwwe.21Duuchchi Woddik Gootti Isira'eeli'i Daawwitike minenaa'ni gargaritti hiisseechchi uduma; insa'ne Naabaaxika belto Iyyoribi'ami'i moyanjoke assine; Iyyorbi'aaminna Isira'eeli Duuchchi Woddika Gootta hordoffabaashsha dedhisati lumoxxa cubbo hujaashsha asse.22Isira'eelinna Iyyorbi'aami hujemmaxxa cubbo duuchcha hunje; eettene cubbonaa'ninna bayyata ginbe.23Duuchchi Woddik Gootti erganjuwwa ifixxe wabeeko duuchchi darree'ni xexxe'achchiisemmashshani ifi edii'n insa'nee fugussa qico'ni ookkone ora'nini me'ine; tennexxee Isira'eelik ardi boga ifikenaa'ni boojine Asoori'a adhdhine me'ine; ta'anna ookkonni he'na'neeni.Asoorito Samaariya Ofolde
24Asoorik moyanjuwwi arda ifike Baabilooni'n, Kutaa'n, Awaa'n, Hamaati'n, Sefariwayimike qachchuwwanaa'ni iyyedaggeexxi; Isira'eeli hexxammake booncho'ni aangaashsha Samariyake qachchuwwa'ni ofo'lishe; insa'nenna Semaariya Dhaaleexxi iseke qachchuwwa'n hedhate'n ke'ne.25Ookkoo hedha sanfeeshaani; Duuchchi Woddika Gootta magenoonfantebaani; tennexxee Duuchchi Woddiki Gootti neenqa insa'ne'ni erge insa'ne giddi'ni heenooka shiye.26Asoorike moyanji'a «Semaariyake qachchuwwibaa iyyemartettexxi shookishshettaki ardi ookkone bogiki magen harsaaxxa ege'nebaani; tennenaa'ni kexxeexxa Duuchchi Woddiki Gootti shiyaaka neenqa insa'ne'ni erge» hitaaxxi odo iso'ni gelte.27Ookkoneechchi uduma Asoorik moyanji «Samariyaa'ni boojitine iyyedaggeneexxe qeesenaa'ni mitti; ookko'anni higee hedhaashsha hiissitine imartineexxi bogi isikiki mageni maa hasa'neexxa arda ifika barsiisowwaali» hiyye ajaje.28Tennexxe Semaariyanaa'n boojine adhdhine me'inemmaki mitti qeesichchi Beeteli'a higeexxi Duuchchi Woddika Gootta hitta insa'ne magenoonfachcho hasissaaxxa barsiise.29Iittanna kaddoole mitti mittinxi gamo ofoldemmange qachcha'ni ifi ifinga mageno giissedhdhe; ookkone'e magenonna edi wodda Samaariyak ardi tullichchake'ni hana giissemmake magenoonfantamachcho iyyemara'ni uurrise.30Konne qicinni Baabilooni'ni dageeki manni Sukotibenotii'i giisse, Kutaanii'n dageeki manni Neerigaalii'i giisse, Hamaati'ni dageeki manni Ashimaa'a giissine.31Awwito Alibaziriinna Tertaaqi hiyyemaaka magenuwwa giisse'ne wodda, Sefariwayimii'n dageeki manni Adiraameelekinna Anameleek hiyyemaake magenuwwi'a ifixxa oose ciincatike tolchi'a shiqinshe.32Kunnini manni dhugaatika Duuchchi Woddika Gootta magenoonfatammani. Kaddo male'e mitte mitte gamo dagemmake ifi ifike ardiinxa aada hordofeexxi; tullichchuwwake'ni hedheeke fakkuwwa magenoonfantammake mine'ni ergatendaaxxa qeese hariire.33Insa'nenna mittele Duuchchi Woddika Gootta magenoonfanta'ni; welele kinni insa'ne giddi'n fulemmake wele bogike mannixxe aadashshani ifiifinga magenuwwa magenoonfanta'nemmani.34Tennee elobaaxxa aada telchi qico'ni waallebaani; insa'ne Duuchchi Woddika Gootta seeriki magenoonfanta'nebaani; iittanni Isira'eeli hiyye ye'emaake Ya'iqoobixxe horte'a uwwemmaxxa aadanna seeruwwa, murtenna ajajuwwa hordonfa'nebaani.35Duuchchi Woddik Gootti Isira'eelini welti kako aagee wodda, hiyye ajajemma qici, «Wele magenuwwa magenoonfatinoqqe, isi'anna kumbu hitinoqqe'e, tolchakanna isi'a tolchitinoqqe.36Yaane kinni lumoxxe hunnanninna jabaxxe hirreni Gibtseke boganaa'ni ha'no'o fulcheeka Duuchchi Woddika Gootta calla magenoonfachcho ha'no'a hasissaani. Isi'a kumbu hiyye; isi'a tolchakanna shiqishshe.37Ha'no'aa borreesse uwwennexxa aadanna nmurte, seeruwwakanna ajajuwwa; duuchchi wodda jabaattine heqqedhdhe. Wele magenuwwa magenoonfattinoqqe.38Ani ha'noni welti aagennexxa kako deetinoqqe: wele magenuwwanna magenoonfattinoqqe.39Yaane kinni Duuchchi Woddika Gootta ha'nooka Mageno magenoonfatte; naaphi ha'nookixxe anganaa'ni ha'no anjiraaki isoteni.»40Yaane kinni edinxe aada insa'neexxe'ni jabaanteni male'e waallebaani.41Kunni ardi fedheexxinninna midde mitte gamini Duuchchi Woddika Gootta magenoonfanitoolenna qunqumendeexxa fakkuwwanna magenoonfanta'nemmani. Oose insa'neexxinna akka'uwwa insa'neexxi ediki annuwwi insa'neeki assinemmaxxa telchonna assina'nini he'neeni.The Word for the World International