2 Moyanjuwwiinkaa Maxaafa10
Aki'abiki Mini hadi Shiyeme
1Ettene yanna'ni Aki'aab Samariya giddo Torbaane tomme labbaxxa oose afeemmani; tennexxe Iyyu borro borreesseexxi Iyyizira'eelike ja'labuwwi'a, geedheteenna Aki'aabixxa oose nossammake duuchchi'a Semaariya'a erge; borrotinna hitaamma qici,2«Ha'nooke goottixxi oose ha'noonni welti hexxemmaxxe; fadhaduwwanna gaaruwwa; kinjiinke dala'i giddo hedheeka qachchuwwanna bagediinka miyuwwa affinemmaxxe; tinni borro ha'no'ni gelteeshshanni ikki woddi,3gootti ha'nookixxe oose giddii'ni sa'aakanna hasisaani hitinaaka mitte fildineexxi anxe moote'ni ofo'lishshe. Ookkoneechchi uduma ha'nooke goottike mini hadixxe'e lolle!» hitaaxxemman.4Insa'ne kinni yo'oshsha sodanteemmaxxe «Lami moyanji isoo injifatebaaka manjo no'oo hitta iso injifata dandeennanno?» hine.5Tennexxe mootummatike miniki ajajali, qachcha galchaammaki, geedhetinna, oose nossitammaxxiri, «No'o atike erganjuwwaani; ajaja atika duuchcha munxannoni; no'oo ayyinna moyaashsha assinabe'noni atee gammachchiissaaxxa duuchcha atinni assi» hina'ni tennee erga Iyyu'aa ergine.6Ookkoneechchi uduma Iyyunna «Ha'noo gamo anxe kaddineexxi ani'a ajajendina'noole gootti ha'nookixxe ooseka gooba woxxine soodo tenne yanaa'ni ani'a aaxxineexxi Izira'eeli'a iyyedaginaashsha» hiyye borro insa'ne'a higgeeni borreesse. Ettene yanna torbaane tomme moyanjiinxi oose qachchi giddo ege'nemeeke nossaamake manniba hexxemmani.7Iyyuxxi borro anga insa'neexxe'ni gelteeshshan; manni torbaane tomme moyanjiinxa oose duuchchiinxa aadheexxi shiye. Umo insa'neekanna agalladete'ni uggineexxi Iyyubaa Iyyizira'eeli'a ergine.8Erganjikinna mare geyeeshshani; Iyyu'aa «Moyanjiinxe ooseka gooba wonxe aa'ne dange'eni» hiyye kule. Ookkoneechchi uduma iyyu, «Qachchi giddi'a e'yinammaxxe hula'ni lame bakka'ni tuuldineexxi soodo gorsi qico'ni ookkooni tursee» hiyye ajaje.9Langa baro gorsa Iyyu gadhi'a fuleexxi ardi duuchchi edo uurreexxi hiyyee qici: «Ha'no quliyyeteni; gootta anke'ni fuggoxxini ke'ennexxi shiyenneki anteni. Yaane kinni konne duuchchinga shiye bireeki ayyete?10Yooni Duuchchi Woddiki Gootti Aki'aabike mini hadixxee hiyyeki hiyyichchi mittikinna midde butta ibe gatabaaxxa ege'ne. Duuchchi Woddik Gootti Erganjo ifike'ni Eliyaasi'ni hiyyemaxxa muuxxe'eni.»11Tennexxe Iyyu Aki'aabike minenaa'ni gatemmaka duuchcha lumollamma mannanna shiqika jaaluwwa isikanna qeese mittetiinna gatebaangi Iyyizira'eeli giddo shiye. Akaaziyaasik firuwwi shiyyeme.12Ookkoneechchi uduma Iyyu ke'exxi Semaariya'a me'e; Bete Ekedi hiyyemaaba'a gedhebo allaldammaxxe alalisanoke miniba geyee wodda;13Yihudaka moyanjo Akaaziyaasi'a aantete kadeeka firuwwa shiixxoka manna alfeexxi ha'no ayye manna? Hiyye qore.Insa'nenna, «No'oo Akaaziyaasike shiqike firani: moyanjiinka mini hadonna mootittetixxa oose nage'a aa'nonna'a kaba adadde dirrine dangeenneni» hine.14Iyyunna «Konnee manna lubbondinni he'nee'naa abidde!» hiyye ajaje. Tennexxe lubbondini he'ne'naa'a adhdhine me'ineexxi Beeti'eekedi baleti qarqara shoole tommenna lame manna shiye bire; mittekanna midde gatisebaani.15Isinna ookko'ni ke'e me'aa'naa Rekaabik belti Iyyonaadaabi isibaa dagaa'na orake'ni afe. Iyyunna nage'a aadheexxi, «Godobi anki ate addata'neeshshani atiki godobinna ittani anee addata'ne?» hiyye qore.
Iyyonadabinna, «eeti ittanden» hiyye hiisse.
Iyyunna yooni, «Anga hinni» hiyye. Angatanna uwwe. Ookkoneechchi uduma Iyyu kipheexxi gaareti hana sa'isse.16Iyyunna hiyyee qici: «Amo aninni welti me'inee'naa Duuchchi Woddike Gootti'a hinaafaanne qico uudi» hiyye. Ookkoneechchi uduma gaareti isoo adhdhe me'e.17Iyyu Semaariya mare geyeeshshani Aki'aabike firanaa'ni gatemmaka duuchcha shiye. Tinninna kaddeechchi Duuchchi Woddik Gootti wabeeka Eliyaasi'n hiyyemmake hiyyichchishani kutti asse. Ba'ali Hinaake Magenuwwi'a Ergatammakiiri Shiyeme.18Ookkoneechchi uduma Iyyu Samaryaka arda mitteba bukki asseexxi hiyyee qici; «Aki'aab Ba'aali'aa erigatemeeki shiixxo qiconi; Iyyu kinni isi irra erigatemaani.19Ta'a Ba'aalixxa wabeeko duuchcha, ise'a ergatammakaaranna qeesole isexxa duuchcha ani'a ye'we. Ba'aali'a lumooka tolcha shiqishaannaxxe mitti manjinna midde gatabaashsha. Dagabaaki manji hedhoole kinni lubboti hedhabaani» Iyyu kinni tenne asseechchi Ba'a'lixxa ergatammakaara biro'a asseexxe xaqaromman.20Iyyunna, «Ba'aalike ulfinni'a ardi fulo'a lasse» hiyye; insa'nenna tennee ardake'ni ege'ninshe.21Ookkoneechchi uduma Iyyu Isira'eelike ardi duuchchi'a erga erge; Ba'aali'aa ergatammakir duuchchi mitti manjinna gatebaani dage; Ba'aalike galma'n kasakenaa'ni kasiini qico'ni manji wo'me.22Iyyunna seemma uggendammake minika akeekallo; «Ba'aal'aa ergatemamake manni duuchchia'a seemma idage» insinna seemma insa'ne'a idagge.23Ookkoneechchi uduma Iyyu Rekaabike belto Iyyonadabin welti Ba'aalixxe fakkeke mini giddi'a e'ye: Ba'aali'a ergatemamakaara; «Yooni Ba'aalixxe erigatameeyye male'e Duuchchi Woddike Goottik erganjuwwi kaba ha'noni hedhebaaxxa kokkine uudde» hiyye.24Ookkoneechchi uduma cinco'aaka tolchanna wele tolcha shiqinsho'a e'yine. Etennee yanna Iyyu «Anga ha'noxxe'ni sa'isse uwwenneke mannanaa'ni mittekanna midde baaje fulaashsha asseeki manji fonxoro isixxe'ni e'yaani» hiyye xexxe'achchiseexxi gadho saddeeta tomme manna qophpheeseemaani.25Iyyu tolcha shiqilshe ke'eechchi uduma heqqanjuwwakanna loliinke mannika ookkone sooresuwwa, «E'yitine insa'ne shiwwe; mitti manjinna baqate fuloqqe» hiyye ajaje. Insa'nenna wolaantichchik shinne birre; heqqanjuwwikinna loliinke manniki ja'labuwwinna rensha duuchchiinga gadhi'a fulchineexxi hunne. Ookkoneechchi uduma giddike Ba'aalike galma'n e'yine.26Magenoofantammaxxa soodduwwa Ba'aalike galmanaa'n gadhi'a fulchineexxi giirati gunbe.27Ba'aalixxa magenoonfantammaxxa soodduwwa butuchchine; Ba'aalika galmanna findinge'naa ardi telchi qico'ni foole'ake offole'aaxxe bakka assedhe.28Konne qicinni Iyyu Ba'aalixxa magenoonfachcho Isira'eelike bogana'ni balleesse.29Kado male'e Iyyu Naabaaxik belti Iyyorbi'aami Beeteli'ninna Daani'n worqetixxa jabbuwwa magenoonfantaashsha Isira'eeli dedhisemmaxxe cubbonaa'n bayyatebana.30Duuchchi Woddik Gootti Iyyu'u, «Ani edo eloxxa yaane assitettaxxenna Aki'aabike mini hado'ni assonna'a qalbe anxi giddo hasennexxa duuchcha muuxxettaxxe; sanne atixxi shoole ila qico'ni Isira'eelixxe moote'ni ofoldaani» hiyye.31Yaane kinni Iyyu Isira'eelike Duuchchi Woddike Gootta Magenike seeri'a mitte qalben heqqedhatee xexxe'achcho assebaani. Iyyorbi'aaminna, Isira'eeli dedhake'ni ibisemmaxxe'e cubbotenaa'ni bayyatebaani.
Iyyuxxa Reyo
32Ookkone baro'ni Duuchchi Woddik Gootti Isira'eelike bogiki ba'linni cu'misa safe: Azaheelinna Isira'eeli'i bogiinke kasanaa'ni kasinin qico'n lole injifate.33Isi abixxeeki bogi, Yordaanoosike galaananaa'ni boroti darree'ni, hedheeka Gele'adika boga duuchcha (Gaadika, Roobeelikanna Minaaseka boga), Arinoonike galaani alidarre hedheeke Aro'eerike qachanaa'n Gaadinna Baasaani qico'nten.34Gatemmaki Iyyu moyemake baro'ni kadeexxi, asseexxi duuchcha, hujeexxi huje duuchchi Isira'eelike moyanjuwwinke jirtetike maxaafa'ni borreesende hexxexxeebaata?35Iyyu edike isike annuwwashshaani reye; Semaariya isoo moonge. Belti isiki Iyyo'akaazi isixxi bakka'n moye.36Iyyu Semaariya ofo'lexxi Isira'eeli'ni moyyeeki lame tommenna saddeeta wogamani.The Word for the World International