Read 2 Odotikaa Maxaafa 32

2 Odotikaa Maxaafa32

Asoorito Iyyerusaalemi'ni Afo'o Fulchexxe

¹Moyanji Hiziqiyaasi konne qicinni xuurameessummati ergateme heddo yaane asseechchi uduma Asoorik moyanji Seenaakireeminna dageexxi Yihuda lole. Lole injifatee ifike assedho'a hedati kinjiinka dalla'a elqe kayyi'ni buqe.²Seenaakireeminna Iyyerusaalemii lolo'a hedeexxa moyanjo Hiziqiyasii ege'neexxa yanna³qachchi gadho hexxeexxa wedi'iinxa muummuwwa duuchchinaashsha ja'laabuwwikinna loliinke mannike akeekisanjinni welti mari'ate; insa'nenna isoo gargaarre.⁴Heddi manninna bukki hiyyeexxi, «Asoorik moyanjuwwi dagexxi insa'ne mayee muummuwwatenaa'ni wede'e alfina?» hineexxi buttini hundii'ni phu'isammaka wede'e duuchchine.⁵Ookkoneechchi uduma moyanji Hiziqiyaasi jabaate hujati diigememmaka dalla'uwwa qammachcheexxi hana xelleephpho ijaare; ittanni gadhi darree'ni wele dalla'a ijaarati Daawwitike qachchika hadhisanjo jabeesse; lebeexxi heddo loliinka miyanna wontuwwa huje.

⁶Lolinke mannixxi akeekisanjo arda ballonsiteexxi ookkone qachchik dalla'ixxe hula edo hedheek ba'lina'ni bukki assineechchi uduma hiyya'ni insa'ne'e jajjabeesine qici,⁷«Mee co'o jabaatte, Asoorika moyanjonna isinni welti hedheka sannachcha sodaatinoqqee. Isinni welti hexxeexxe hunna irra no'onni heexxeexxe hunna saxxaan.⁸Isinni welti hexxeexxi hunna manjiinxe hunnan no'onni welti hedhe'e no'o gargaraakinna naapha no'oka lolaaki Duuchchi Woddike Gootta no'oke Magenon.» Ardikinna Yihudiink moyanji Hiziqiyaasi kuleeke hiyyichcho'ni jajjabaate.

⁹Ookkoneechchi uduma Asoorik moyanji Seenaakireemi sannachchuwwa ifikinni welti Lakkishii buqe'naa, konneechchinni butti'a hexxeexxa erga loliinke mannik akeekisanjo darree'ni Hiziqiyaasi'anna isinni welti Iyyerusaalemii hedheeke Yihudike ardi'a konneechchi butta hexxeexxa erge.

¹⁰«Ani Asoori moyanji Seenaakireeminna, anike sannachchinni buqemeeke Iyyerusaalemike qachcha'ni turtino'a heddineek ayye'ni addatineete?¹¹Hiziqiyaasinna, ‹Duuchchi Woddik Gootti no'oki Mageni Asoorike moyanjixxe anganaa'ni no'o anjiraan› hiyya'n isixxi solo'ikinna dheeboti rertinaashsha dedhiso'aatebaa?¹²Mitte tolchimalchi edo kumbu hine; iso'nninna tolche hiyya'n Yihudanna Iyyerusaalemi ajaje, tullichchuwwiinxa magenoofachchotixxa bakkanna ciincatike tolchuwwa diigiseek Hiziqiyaasitebaa?

¹³«Aninna edik anuwwi anki welti wele bogike arda duuchcha'ni assineneexxa egendinebaa? Yoona ookkone moyanjuwwik magenuwwi boga insa'neka anxe anganaa'ni hoyya dandee?¹⁴Annuwwi anki balleesseeke konne moyanjuwwiki magenuwwi duuchchi gosa gosaka arda anjira dande'eki konne megenuwwanaa'ni hoonteta? Yoona ha'nook magenuwwi hitta anxe anganaa'ni ha'noo anjira dande'aa?¹⁵Ta'atenna kaddoole Hiziqiyaasi konne qicinn ha'noo soboqqee, dedhake'ni ha'no ibisoqqe'e. Heene gosa gosak ardik mageni arda ifika anxe angana'ni yookaan anke annuwwixxe anganaa'ni anjira dande'ek ijje hedha gopheemmaxxee isoo amandinoqqe'e. Ha'nook mageni anxe anganaa'ni ha'noo hitta anjira dande'ata?»

¹⁶Asoorixx akeekisanjo Duuchchi Woddike Gootti Mageninna erganjo Hiziqiyaasi'ni tennee saxxeexxa heddo elobaaxxa yaane haasonne.¹⁷Asoorik moyanji borro borreesseexxi hiyyee qici, «Wele ardik magenuwwi ifika arda anxe anganaa'ni anjirebaashshanni, Hiziqiyaasik Mageni ifika arda anxe anganaa'ni anjira hara dande'abaan» hiyya'ni Duuchchi Woddika Gootta Isira'eelika Mageno yowwa'nemman.¹⁸Ookkoneechchi uduma alalshatinna sodaachchisat ookkone qachcha abixxatee hine kinjiinke dalla'ani iima ofo'leeke Iyyerusaalemike arda'ni hafuura gikki assine Ibirawotiinke laagadinni cancine.¹⁹Manjiinxe anganni hujemeeke wele bogike ardike magenuwwa'ni hunnati haasonnemmashshanni Iyyerusaalemike Mageno'ninna ittanni haasonnamman.

²⁰Moyanji Hiziqiyaasinna Amootsik belti wabeek Issayaasi tenne yaanexxee iimi'a soodachchoti raarre.²¹Duuchchi Woddik Gootti iimika erganjo ergeexxi Asoorike moyanjixxe kaanbe'ni loliinka manna, akeekisanjonna loliinke mannixxa akeekisano birraashsha asse. Tennexxee Asoorik moyanji salphate ifike bogibaa hige; isi magenoofatammaxxe fakkeke mine'n e'yeeshshanni i'leemmaxxi labbaxxi oose wolaantichchik isoo shilte.

²²Duuchchi Woddik Gootti Hiziqiyaasinna Iyyerusaalemik arda Asoorike moyanjo Seenaakireeminna wele naaphuwwa insa'nekixxe anganaa'ni anjire. Wele arda duuchchinni welti nage'iki he'naashsha asse.²³Heddi manni Duuchchi Woddik Gootti'a uwwa aa'ne Iyyerusaalemi'a dangeexxi Yihudike moyanjo Hiziqiyaasi'anna fiixxeexxa uwwa aa'ne dange. Eettene yannanaa'ni ke'isse Hiziqiyaasi gosa gosake arda duuchcha'ni ulfeesseme.

Hiziqiyaasixxa Ifi Duka, Hujeexxa Yaanuwwanna Isixxa Reyo

²⁴Ookkone wodda Hiziqiyaasi elagophe rewo shiqeemman; isinna Duuchchi Woddike Goottibaa soodate; Isinna isi'a hiissichcho hiisse; beesisakanna isi'a uwwe.²⁵Hiziqiyaasi kinni ifi dukee malee isi'a assendeexxa eloxxe yaane'a hasisaaka hiissichcho shiqisebaan. Tennenaa'ni kexxeexxa Duuchchi Woddike Goottixxi mufe iso'ni, Iyyerusaalemikenna Yihudake arda'ni gelte.²⁶Kaddo melee Hiziqiyaasi ifi duka ifixxe aadde aage; Iyyerusaalemik ardi tennenni asse. Tennexxee Duuchchi Woddike Goottixxi mufe Hiziqiyaasi moyemmake baro'ni geltemmabaan.

Hiziqiyaasixxa Durumanna Gurra Fula

²⁷Moyanji Hiziqiyaasi lumoxxa karra afeekenna ulfateeke manjomman; tennenaa'ni kexxeexxa ifike birretika sibiljo, worqe, fiixxeexxe werquwwaa, qimamuwwatee, wontuwwatenna gargar hedheek hiri fiixeeke miyuwwi duuchchi'a massinnaka minuwwa ijaare.²⁸Iitttanni ifixxe midhaa, woyinetixxe bookaanna zayitetee masse'naka minuwwa gargar hedheke hori'a dalla'a, gedhebokeenna re'etee goodhe ijaaremman.²⁹Hiziqiyaasi'a Mageni yo'oxxa karra uwweemmaxxee; heddo gedhebiinkanna re'etixxa, iittanni heddo lalo bukki asse; heddo qachchuwwakanna ijaare.

³⁰Ali darrexxi Giyoonixxi muumme yaatammaba kofeexxi wede'e dareerakenaa'ni butti'a dhidhimii darre'ni Daawwitike qachchibaa ya'aashsha asseeki Hiziqiyaasindemman; hujetinna isi'a qajeelde.³¹Yaane kinni bogake'ni kaddeeke mambe'iinke beesisi'a isoo qorro'a Baabiloonixxe akeekisano erganjuwwa ergitee wodda, Mageni isoo hega uudo'a qalbe isixxe'ni hexxeexxa duuchcha ege'no'a haseemaxxee waale.

Hiziqiyaasixxe Moottummake Barixxa Muuxensha

³²Moyanjo Hiziqiyaasi moyemmake baro'n hujeendeexxi wele hujenna arjunte Amootsike belto'ni wabeek Issayasixxe waleellanni Yihuda'ninna Isira'eelik moyanjuwike maxaafa'ni borreessendeen.³³Hiziqiyaasinna edike ifike annuwwishshanni lummedhe. Isinna Daawwitixxe horteke hirreessike tullichcha'ni moogeme. Isi reyee wodda Yihudak ardi duuchchinna Iyyerusaalemik ardi duuchchi ulfeessine. Isik belti Minaasenna isixxe bakka'ni moye.

The Word for the World International

https://app.library.bible/content/2b894378475c6aea