2 Odotikaa Maxaafa22
Yihudiinka Moyanjo Akaziyaasii'i
1Iyyerusaalemiki ardi Iyyoraamika maa'nichcho belto Akaaziyaasii anniinxe bakka'n mootonse; ookko'a Arabiinxe baxxebaa duuka dageemmaki loliinki manni angafoole isixxa shiyemmaxxee Yihudiink moyanji Iyyoraamiki belti Akaziyaasi moye galche.2Akaaziyaasi moyee wodda wogga isixxi lame tommenna lametemman Iyyerusaalemi ofo'leexxi mitte wogga moye galche. Ama isixxinna Gotooliya hiyyendaaxxe Omerike beltixxe beltomman.3Ama isixxi isi elobaaxxa assaashsha isoo gorsitammaxxee isinna Aki'aabike mini hadike elobaake ora'n me'e.4Ann isiki reyeechchi uduma Aki'aabike mini hadi elobaaxxa isi'a gorseemmaxxee Aki'abiki mini hadi assemmaxxa duuchcha isinna Duuchchi Woddike Gootti edo elobaaxxa asse.5Iittanni Isira'eeliki moyanji Aki'aabik belti Iyyoraami Soriyaka moyanjo Azaheeli lolo'a Raamoti Gele'adi'a me'ee wodda ookkone mannika gorsa adhdheexxi Iyyoraaminni welti me'e; Sooriyaki manni Iyyoraamii madeesse.6Tennexxee Sooriyake moyanjinn Azahelinni welti lolemmeeke lola'n Remati mado'emaxxe madanaa'n fayyo'a Iyyizira'eeli'a higeen.Aki'aabik belti Iyyoraami mado'emmaxxee Yihudiinki moyanji Iyyoraamiki belti Akaziyaasi gatteenni hexxette hiyyo'a Iyizira'eli'a me'e.7Akaziyyasi Iyyoraamii gatteeni hexxette hiyyo'a maremmaxxee buuto'a Duuchchi Woddiki Gootti Akaziyaasi'n ba'ne geessise; Akaziyaasi ookko geyeeshshanni Nameesika belto Iyyuu qophedho'a Iyyoraaminni welti fule; Iyyunna Aki'aabika mine biro'a Duuchchi Woddiki Gooti harireeke manjommani.8Iyyuu Aki'aabike mine'n murte muree wodda Akaaziyaasii'i elqe kayyii'n qoqqobbeemmaxxa Yihudiinxa hayyoolenna isike firixxa labbaxxa oose afeexxi shiye.9Isinna Akaaziyaasika hasito fule me'e; isiki manninna Akaziyaasii Semaariya shoome'naa anfeexxi abinde; Iyyubana iyyedangeexxi shinne, «Duuchchi Woddika Gootta mitte godobinni halseeki Iyyosafixxike beltoni» hina'n moonge. Tennexxee Akaziyaasike minenaa'n mootummate'n baalloma dande'aki manji hedhdhemmabaan.
Yihudixxa Mootitte Ataliyaa'a
10Akaaziyaasixxi Ama Gotooliya belti iseki reyeexxa uuddeexxa yanna Yihudiinke moyanjuwwika mini hado duuchcha shilchiisse.11Moyanjo Iyyoraammixxi belti Yihosheba'i kinn shiyendammaxxe moyanjiinxe oose giddii'n Iyyo'aasii shoxxe adhdhite me'iteexxi isonna iso'oo nossitammaxxe manjichcho galdumminxe kuta giddo shoxxe. Iyyoraamika belto qeesichcho Yodaahexxi are Yosabeeti Akaaziyaasixxike dayyo kaddemmaxxee eettene anno shoxxechchi Gotooliya shiltabaashshaten.12Isinna Gotooliya moote boga galchitee wodda Mageniinke galmi giddo sho'ome jaane wogga insa'neni welti ture.The Word for the World International