2 Odotikaa Maxaafa12
Gibtseke Moyanji Iyyerusaalemi'a Duule
1Roobi'aamixxi mootumma jabaate isinna hunna alfitechchi uduma isinna Isira'eeli ardi duuchchi Duuchchi Woddike Goottika seera waale.2Duuchchi Woddike Gootti'a xuurameessumma gophatenaa'n kexxeexxa Roobi'aami moyexxe ondixxe wogga'n Gibtseki moyanji Shishaaqi Iyyerusaalemii'i lole miidhe.3Insa'nenni welti Gibtse'n dageeke ardik laakosi tommenna lame kuma loliinxi gaaruwwa, jaane tomme kuma fadhado gulufeeke mannik laakkossi konnete hine dandeennabaaka Libiyaka, Sukamikanna Tophiyiinke loliinka manna adhdhe dageexxi,4moyanji Shishaaqi kinjinke dalla'ika Yihudiinka qachchuwwa anga ifixxe'ni ibirsedheexxi Iyyerusaalemi qico'n mare.5Ookkonneeechchi uduma wabeekichchi Shemmaya Roobi'aamibanna Shishshaqi sodaatee, Iyyerusaalemi bukki hiyyeeke Isira'eelike akeekisanjuwwiba'a mareexxi, «Duuchchi Woddiki Gootti hiyya'nee qici, ‹Ha'no ane'e waldineeni; tennexxee aninna Shishaqixxe anga'n ha'no'o waalenneni› » insa'ne'a hiyye.6Isira'eeliki akeekisanjuwwinna moyanji ifi salphinseexxi hinee qici, «Duuchchi Woddiki Gootti qulchaken» hine.7Duuchchi Woddiki Goottinna ifi salphinseexxa uudeexxa yanna; Duuchchi Woddiki Goottinna Shemayya'n hiyyee qici, «Balleessa ifixxa egene ifi salphinseemmaxxee insa'ne anjirannoni malee birabe'non; Shishshaqi insa'ne lola wodda; rake insa'ne anjirannon; Iyyerusaalemi mufe anxinni ganabe'non.8Kaddo malee ani'a ergatemiyyonnaa wele bogike moyanjuwwi'a ergatemiyyotixxe oddo'n hexxeexxa gargarunte egenaashsha; Shishaqi'a hireme galaan» hiyye.9Gibtsek moyanji Shishshaqi Iyyerusaalemi lole wodda; Duuchchi Woddike Goottike galmanna mootumatike miinixxa karra duuchcha mulqedhe adhdhe Solomoon worqeti giissisemmaxxa wonte midde gattebaangi duuchchingi geechcho gudhdhe me'e.10Moyanji Roobi'aaminna Shishaaqi adhdhemmaxxe wontexxa bakka, wele wonte sageettoti giissiseexxi; mootumatike minike dalla'ixxa huluwwa heqqammake mannike akeekisanjuwwa'n uwwe.11Moyanji Duuchchi Woddike Goottike galmbaa me'a wodda duuchcha; hula heqqammakiiri wonte abixxine erqe kayyi'n iso'o qoqqonba'nemman. Ookkoneechchi uduma wontuwwa hula heqqammake heqqanjuwwixxe kuta'n hiissina'nemman.12Robi'am balleesse ifixxa ege'ne ifi salphisemmaxxee Duuchchi Woddiki Gootti aare isoo bakka balleesitebaang walde; tinninna Yihudake'n heeno'mitoolenna eloxxi yaane afendeemmaxxeeten.13Moyanji Roobi'aaminna jabaate ti'ni hiyye Iyyerussaalemi moye galcha'n ture; Isi moye wodda wogga isixxi shoole tommenna mitte woggamman. Duuchchi Woddike Goottiki summi ookkoo ye'emaashsha Isira'eelixxe gosa duuchchanaa'n fi'leeke Iyyerusaalemike qachcha'n ofo'leexxi tommenna torbaane wogga moye. Ama isixxi Na'imate hinaaxxe Amoonichchomman.14Isinna Duuchchi Woddika Gootta halsate qalbe qophpheefata gopheemmaxxee fuggoxxa huje.15Moyanji Roobi'aami moyemmake baro'n hujeexxa hujuwwa duuchcha safokenaa'n muuxamii qico'n wabeek Shemaya borreesseeke jirtetike maxaafa'ninnaa leella udammake Addo borreesseemmake ilenshatixxe borrooxxe maxaafa'n afendaaan; Robi'amixxenna Iyyorbi'aamixxe oddo'n uurrabaake loli hedhemman.16Roobi'aaminna ifike edike annuwwishshanni lummedhe; Daawwitike qachcha'n moyanjuwwiinke hirreessa'ni moogeme. Isixxe bakka'ni belti isiki Abiya moye.The Word for the World International