1 Saamu'eeli29
Filisixxeemiki Manni Daawwiti Jibbeexxa
1Isira'eeliki ardi Iyyizira'eelixxe dhooqa giddo hexxeexxe muumme bira bukki hine he'nee'naa, Filisixeemik sannachchi mitteba bukki hiyye Afeeqi hedhemman.2Ondingi Filisixeemik moyanjuwwi dhibbi dhibbikinna kumi kumiixxe kuta insa'neeke lolinke manninni welti duulle, Daawwitinna isixxa duuka me'ammaki manni Akishi udumii'n me'a'nemman.3Filisixeemike lolinke mannki ajajaluwwi insa'nee uudexxi, «Tinni Ibirito kaba maa assita'ne?» hiyye qore.Akishinna «Kunni Isira'eelike moyanjike erganjo Daawwititeba? Isi anba dageechchinni woggatenaa'n sa'een, Sa'ooli gibe anba dageechchinni anee yaadissaaxxa mitti balleessechchn hedhebaani» hiyye hiisse.4Yaane kinni Filisixeemike sannachchik akeekisanjuwwi Akishiini'ni muffante hinee qici, «Daawiti no'oke mannika gooba woxe aadhe iyyemaroole malee gootta ifikenni araaremaaki ori hedha gopheemmaxxee hedhaasha uutettake qachchibaa higaashsha assi malee; no'onni welti duuloqqee.5Konneechchi edi gama sirbake'ni meellina'n,« ‹Sa'ooli kuma shiye! Daawwiti tomme kuma shiye!›hina'ni meelina'n faarsinaammaki Daawwiti konnendeba?» hiyye.6Tennexxee Akishi Daawwiti'i ye'eexxi hiyyee qici, «Ati ani'a xuurameesake kaddeettexxa hedhaake Duuchchi Woddike Goottike summinni kakataannen; anini welti duuldettele gammadannan. Aniba daggeteexxe yannanaa'n ke'issite mitte balleessa balleessite'naa uudebo'non, yaane kinni weli galchaluwwinni ati welti duuldota'a eeyyebaan.7Tennexxe udumi'a higgee nage'iki me'i; Filisixeemik galchaluwwi gibaaxxa yaane mittelchonna assitoxxee.»8Daawwitinna, «Anke gootta maachcho balleessene? Ati'a ergatemennexxe yaanna'n balleessennelchi hedha gophoole anke goottanna anke moyanjo kaddettexxinni atixxa duuka me'e naapha atika mayeeteta dandee lola gophanno» hiyye hiisse.9Akishinna Daawwiti'i, «Ati ani'a Mageniinke iimike ergajishsha eloke kaddeettexxa ege'neennen; yaanne kinni Filisixeemik galchaluwwi ‹No'onni welti atee duula dande'abaan› hiyyen.10Tennexxe atinna atinni welti daggeemmaxxi atike goottixxi ergatoole boro dayyaateba edo kexxine hexxinemmake boonchiba'a higge» hiyye hiisse.11Tennexxe Daawwitinna isixxa duuka me'ammaki manni gorsa bariisa ke'eexxi Filisixeemike bogibaa hige me'o'a ke'e; Filisixeemiki manninna Iyyizira'eeli'a duule.
The Word for the World International