1 Saamu'eeli27
Daawwitixxa Filisixeemike Boga'ni Hedha
1Yaane kinni Daawwiti godobi giddo, «Mitte barra ani Sa'oolixxe anga'n reya gattabaan. Yooni anee fulchaachchi baqatee Filisixeemike bogibaa me'a callan; ookkoneechchi uduma Sa'ooli Isira'eelike bogi giddo anee hasa waalammaxxee nage'iki hedhannon.»2Tennexxe Daawwitinna isinni welti hedhemmaki jaani dhibbi manni rake ke'eexxi Gaatike moyanjibaa Ma'oke belto Akishibaa'a me'ine.3Daawwitinna isinni welti hedhemmaki manni ifi ifinge mini hadinni welti Gaatike booncho'n ofolle. Daawwitinna ifixxe lamiinxe arenni, Iyyizira'eelike bogixxe Ahino'aaminninna Qermeeloosike bogike Naabaalii'i reyyemakixxe Abigeelinni welti hedhemman.4Sa'oolinna Daawwiti Gaati'a baaje me'eexxa laqeexxi isika hasito waale.5Daawwitinna moyanjo Akishii'i, «Ani ati edo elle alfonnole shiixoke qachcha'n ofo'lonnaa eetti ani'a uwwi, anke gootta. Konne lumoke qachcha'n ani atinni welti ofo'la ani'a hasissabaani» hiyye.6Tennexxe Akishi Tsiqilaagika qachcha Daawwiti'a uwwe, tenne daafe'a eettene yannanaa'n ke'isse Tsiqilaagiki qachchi Yihudake moyanjuwwike qadaada kadeeshshanni gate.7Konne qicinni Daawwiti Filisixeemike bogga'n mitte woganna shoole agenjo ofo'le.8Eettene yanna giddo Daawwitinna duuka isixxa me'ammaki manni Geshuureto, Geezaawwitonna Amaaleqitote'n duule; kunni ardinna Suurii'n Gibtseke bogi qico'n olimiinaa'ninni ookko'o boga'ni hedhaamman.9Daawwitinna labballonna melaalle duuchcha shiya'n, lalo gedhebo, harruwwa, gaaluwwakanna seemmuwwa booji'e adhdhe; ookkoneechchi uduma Daawwiti Akishii'a hige.10Akishinna, «Techcho hoone gama'n duuldine» hiyye qoraa wodda Daawwitinna, «No'o duulelneebi Yihuda'n bita'i darree'n hedheeke boga'nten; iittanni Yirahime'eelike gosati minike boga'ninna Qenaanito hexxemmake boga'niten» hiyya'ni hiissaamani.11Daawwiti labbakenna kadi meyyaaxxa Gaati'a iyyedagebaangi duuchchiinga shiyye bire. Tennee assechchi Daawwiti iitta asseene hineexxi haasonaanni hiyye hedemmaxxeeten. Filisixeemike boga'n hedhemmake baro duuchcha'n iitta assa isi'a baratendeexxemman.12Akishi kinni Daawwiti'i godobi mittinni addatammaxxee hiyyaamma qici, «Gosa isixxe Isira'eelike ardi giddo hara gibemeemmaxxee hedhaake baro duuchcha'n ani'a ergatemaan» hiyya'n heda'nemman.The Word for the World International