1 Saamu'eeli19
Sa'ooli Daawwiti'i Shiyo'a Asseexxa Wo'lancho
1Sa'ooli Daawwiti shiyo'a hedeexxa belto ifike Yoonataani'ninna jalqabuwwa ifike duuchcha'ni kule; yaane kinni Yoonatanni Daawwiti'i yo'oshsha eeyya'nemman.2Yoonataani Daawwitii'i, «Anki anni atee shiyo'a hasa'neen; soodo gorsa ifi heqqedhi; mitte qoonne bakka'n sho'onde hosi.3Ati sho'onde hexxetek fichchi giddi'a anke anninni welti dangennexxi atixxa yaane ke'issennexxi haaso'ashsha assannon; hexxeexxi yaane hexxoolenna egendattoshsha assannon.»4Yoonataaninna anna ifike Sa'oolinni Daawwitixxa eloxxa yaane haaso'a'ni hiyyee qici, «Erganjo atika Daawwiti fuggo assitoxxee; isi ati'a heddo elooxxa yaane assee malee atee balleessechchi hedhebaan.5Isi ookkone Filisixeemichcho shiyeek lubbo ifixxa gurgudheeten; Duuchchi Woddik Goottinna Isira'eelik ardi lumoxxa injifachcho injifataashsha asse; atinna tenne uudete wodda gammade'ettan; hittata mittechchonna balleessebaaka manjo fuggo assitota'a heddatto? Mayee tola boddichcha Daawwiti'i shilitota'a hassette?»6Sa'oolinna Yoonataani hiyyeexxa laqeexxi Daawwiti'i shiyabaaxxa: «hedhaake Duuchchi Woddike Goottike summinni kakate.»7Tennexxe Yoonataani Daawwitii'i ye'eexxi tennee duuchchinxa iso'n kuleechchi uduma Sa'ooliba isoo iyyemare; Daawwitinna edishshanni moyanjokee erigatemate'n hige.8Filisixeemike manninni haaroba lola ke'e; kaddolenna Daawwiti insa'ne lole heddo manna shiyyemmaxxe'e baanje me'ine.9Mitte barra Duuchchi Woddike Goottnaa'n ergemeeki fuggichchi hafuuri Sa'ooli'n dage; isinna bagedo anga abixxe mine ifike'n ofo'lemman; Daawwitinna ookko kiraara gana'nemman.10Sa'ooli bagedi ifikinni Daawwiti'i oteexxi miniki mineke asso'a hedeexxi bagedo iso'n darbe; Daawwiti kinni milqi hiliqemmaxxee bagedi mare mineke'n gobeme; Daawwitinna eettenenni hashsha ookko'n baaje fule.11Sa'ooli Daawwiti'i mine bunqee heqqa'n galeexxi gorsa shiyaaka manna erge; Daawwitixxi are Melkooli «Techcho hashsha baaje fula gophphotole soodi gorsi ati'a shiyyemanden» hita'n jaba qicinni xexe'achchiise kulde.12Mlkoolinna masikootetenaa'n Daawwiti'i fulchite'naa baaje fule.13Ookkoneechchi uduma Melkooli mini hadi magenoonfantammaxxa fakke aaxxexxi taqete'n diiphisse; re'etixxe oridanninna ganendeexxa boraate umii darre'n uggiteexxi seemma iti buyyisse.14Sa'oolik lolinki manni Daawwiti'i abido'a dagee wodda Melkooli insa'ne'n «Isi elagophee diiphe'en» hite.15Sa'ooli kinni «Isoo shiyona'a taqendinni dukkine anibaa iyyedage» hiyya'n manna illee iima hiisse erge.16Ergememmak manni mini'a e'yee wodda mataa magenoofachchotixxa fakkenna re'etixxe oridanni gandeemmaxxa boraate calla afe.17Sa'oolinna Melkoolii'i «Naaphi anki baaje fulaashsha assite anee iitta sobbettechchi mayeete?» hiyye isee qore.Isenna «Ani maa assanno, ‹Anee fulcha gophphottole atee shiyannon› anee hiyyeen» hita'ni iso'n hiissite haasote.18Daawwitinna baaje fuleexxi Saamu'eeliba Raama'a me'e; Sa'ooli isoo assexxa duuchcha Samu'eeli'n kule; ookkonechchi uduma Samu'eelinna Daawiti Naayyoti'a me'ine ookko ofolle.19Mataa Daawwiti Raama giddo Naayyoti hiyyemaaba hedhexxa Sa'ooli laqe.20Tennexxe Daawwiti abidaaka manna Sa'ooli erge insa'nenna ookko'o gennee wodda, Saamu'eelixxe akeetenni bukki hiteexxi wabeekotika hafuura gikki assitee raaga ragaa'naa anfe; ookkone wodda Sa'ooli ergemmake manna'n Mageniiki Hafuur dagemmaxxee insa'nenna hafuura gikki assineexxi raaga raange.21Sa'ooli tenne laqeexxi wele manna erge; insa'nenna wabeekumma haaso'ate'n ke'ne; Sa'oolinna sakkaxxa wele manna erge insa'nenna kinni wabeekumma haasonne.22Ookkoneechchi uduma Sa'ooli ifi'anni Raama'a me'o'a ke'e; Sekku hexxeexxe wode'e camma'neexxe lummoxxe baleba geyeexxi «Saamu'eelinna Daawwiti haba he'ne?» hiyye qoree wodda, Naayyoti he'neexxa iso'n kulende.23Tennexxee Sa'ooli Naayyoti'a me'a'ni ora hedhee'naa Mageniink hafuuri iso'inna dage; isinna Naayyoti geyaa qico'n raaga raanga'nee me'a'nemman.24Sa'ooli Saamu'eeli bira geyee wodda seemma fulchedheexxi raaga haaso'a'n eettene barranna eettene hashsha duuchcha duwwiti ibeeba hose gale; «Sa'oolinna wabeekotena'n mittiinsha laakko'emeen?» hiyyemaaki mammaassi mammaakemeek tennexxeetemman.
The Word for the World International