1 Saamu'eeli17

Daawwitinna Golyaadi'i

1Filisixeemik manni ifika sannachcha lolakee bukki asse'ne'ee; Yihudake boga'ni Sekooti'ni bukki asse'ne. Insa'nenna Sekooti'ninna Azeeqaxxe oddo'n Efeesidaamimi hinaammaxxe bakka'n kaanbe oltine.2Sa'oolinna Isira'eeliki loliinki manni Filisixeemika manna lolatee qophpheenfanteexxi Eelaxxe dhooqa giddo bukki hine kaanbe oltine.3Dhooqa oddote'n hexxe'naa mitte darree'n hedheeke tullichcha'n hana Filisixeemik manni wele darree'ni hedheeke tullichcha'n kinni Isira'eeliki manni googesiki uurre'emman.
4Gaatike qachchinaa'n dageeki, Goliyaadi hiyyemaaka mitti janni manjichchi, Filsixeemike mannixxe kaanbe giddi'n fule dage; isixxe hojjaki qeerrnni sase meetirenna taakkotemman.5Isinna maalde'iinxa gulle umoke'n uggudheexxi, ha'urri onde tommenna torbaane kiilo kaddaaxxa maalde'inxa koote qomate'n oddo'weemman.6Sarbuwwatanna maalde'inxe ganbelenni buqedheemman; maalde'inka bagedonna dugumote'n dulke'emman.7Isike bagedike somelchiki furidinni seemma gandammaxxe ogeeyyeke mirqisanjo haqichchiinshaten; isike bagedik sibiljik a'urrinna torbaane kiilomman; isixxa wonte ba'edhammak iikki loliink manjichchinna isi edi edii'n eettene wonte ba'edhee me'aamman.
8Golyaadi ke'e uurrexxi googesake'n uurre'eka Isira'eelika loliinke manna hafuura gikki assexxi hiyyee qici, «Ta'a ookko lolake'e googeessitinechchi maa assitino'ate? Ani Filisixeemichchokebaa? Ha'no kinni Sa'oolike reganjuwwabaa? Yoona ha'noo giddii'n mitte manjo fildine'e isi ani hedhenebaa adade dirruuni;9Isi anee lole injifate shiyoole, no'oo ha'nooke garba kande ha'noo hunda hiremee gallanon; yaane kinni ani isoo injifate shiyoonnole, ha'noo Isira'eelito no'ke garbuwwa kaddine no'oo Filisixeemitoti hunda galdinaan.»10Okkoneechchi uduma, iikki Filisixeemichchi, «Ani techcho kaba Isira'eelika loliinka manna geeqqisha'ennen! Aninni welti lolemaaka ha'nooka mitte manjo uwwe!» hiyye.11Sa'oolinna Isira'eeliki loliink manni konne Filisixeemichchiinka hiyyichcho lanqeexxa yanna yo'oshsha alanne culphinse.

Isseeyyi Daawwiti Sa'ooli'a Ergatemo'a Erge

12Daawwiti Yihudake bogike Beetelihemike qachcha'n hedhamake ookkone Eefiraatichchi Isseyyike beltommani; Isseyi saddeeta labbaxxa oose afe'emmake manjomman. Isi Sa'ooli moyemmake baro'n cime'eeke qeerraxxe woggake manjomman.13Isixxi Sasiinxi lumolla oose Sa'oolinni welti duulde'emman; angafi belti Eli'aabi, langaki Aminadaabi, sakkaki Saama hiyyemaakemman.14Daawwiti maa'nichchoke kadaa wodda, sasingi isik angafuwwi Sa'oolixxa duuka me'emman.15Daawwiti Sa'oolibaa'n mara'n anniinka gedhebo Beetelihemi allala'emman.
16Golyaadi Filisixeemichchi shoole tomme barra duuchcha gorsanna galgala Isira'eelike manni edi darre dage uurra'nee geerara'emman.
17Mitte barra Isseyi Daawwitii'i hiyyee qici, «Tomme kiilo ayyeemeeka deeddamonna tomme kebbo aaxxee bagediinxe kanbe'n hedheeke atike dayyuwwi'a rakke'e iyyemar.18Tennee tomme loobo itichchanna loliinka manna ajajammake jalaaban uwwi; dayyuwwi atiki nage'inginni hedheexxa uuddi; nage'ik hedha insa'nexxa ege'nannoka beessisa insa'nenaa'n ani'a iyyedagi.19Moyanji Sa'oolii, atiki dayyuwwinna Isira'eelik ardi duuchchi Eelaxe dhooqa'n Filsixeemike manninni lolake'n he'neen.»
20Daawwitinna gedhebo wele allalisanjo'n waaleexxi Isseyi ajajemmashshanni qophpheessendemmaxxa ita aadheexxi bariisa ke'e me'e; Isira'eeliki loliink manni bagedo ibiso'a hafuura gikki assee geerara'n bakka abixa'emmaxxee safe: Daawwiti bagediinxe kaanbe giddo mare geye.21Filisixeemikinna Isira'eelik loliink manni ifi ifixxa bakka erqe kayya abixxeexxi welti iba calla gate'emman.22Daawwitinna iyyemaremmaxxa ita gala'a heqqammake'n uwweexxi loliinbaa gongee mareexxi dayyuwwa ifika nage'a aadhe.23Daawwitinna dayyuwwa ifikenni haaso'a'neege'n Goliyaadite hiyyemammaki Filisixeemichchi Gaatike qachchik janni manjichchi edi wodda assammashshanni loliinke mannike googessi giddi'n fuleexxi Isira'eeli'n geeraraa'na'a Daawwiti laqe.24Isira'eeliki manninna Golayaadi uudeexxi yo'oshsha sodaate baaje.25Isira'eeliki manninna weli'aanni weli hiyyaamma qici, «Isira'eeli geeqishsho'a barra barra'inni daga'neeka konne manjichcho uudineen? Moyanji Sa'aooli isoo shiyaake manji'a lumoxxa karra uwwo'aaten; belto ifixxanna ookkone manjichchi'a uwwo'anna isike anniki minni hadik manninna Isira'eelike bogi giddo irbo laqemabaashsha haasoe'edheen» hiyya'n haaso'a'naa laqe.
26Daawwitinna isi bira uurreemmaka manna, «Konne'e Filsixeemichcho shiyee Isira'eeli salphinakenaa'n gatisaake manji'a maachcho assemaa? Issinni hedhaake Mageniinka arda geeqisha'nek kunni jila offolebaaki Filisixeemichchi isi ayyete?» hiyye qore.27Insa'nenna, Golyaadi shiyake manji'a maachchi assemaaxxa Daawwiti'n kulle.
28Daawwittiki angafi dayyi, Eli'aabi, Daawwiti manniki haaso'a'naa laqeexxi, yo'oshsha aareexxi, «Maa assitato kaba? Qilla gammoojje hedheeka ookkone gedhebo ayye'n walide daggete? Ifi dukkatoxxanna fuggoxxa godoba uggudhitatoxxa ege'nennen; welechchi'atebaan ati daggeetechchi bagedo daa'weteten» hiyye.
29Daawwitinna, «Ani ta'a maa assene? Qortumakanna qorabe'no hyyotee?» hiyye hiisse haaso'e.30Ookkoneechchi uduma wele manjichchib'a wirri hiyyexxi wolidinga qortuma isoo qore; qortuma qoreexxe yanna duuchcha'n uwwemaammaki hissichchi edike'n mittengemman.
31Daawwiti haaso'emmaka haaso'a laqemmaki manni mareexxi Sa'ooli'n kule; Sa'oolinna Daawwiti'n manjo erge ye'isiise.32Daawwitinna Sa'ooli'i, «Moyanjoo! Konne Filisixeemichchokenaa'n kexxeexxa ayyinna ayyik godobinna hojjoggi hiyyoqqe'e! Atiki gaaribbichchi ani maree isoo lolanon» hiyye.
33Sa'oolinna Daawwiti'i, «Ati ooseten; isi oosumande'n lolake'n nophpheeke kademmaxxee konne Filisixeemichcho marite lola dandetabexxon» hiyye hiisse haaso'e.
34Daawwiti kinni hiyyee qici, «Moyanjoo! Atiki garibbichchi ani anke annika gedhebo allalenneke allalanjon; hore iitaak biniichchi dageexxi gedhebi giddii'n mitte adhdhaa wodda,35Shorre maree'e adhdhemmaka afo'okenaa'n ibisanaan; biinniichchi ikki ane'n illee iima higeexxi dagaa woddanna isoo hudhe abidee'e gane shiya'ennan.36Ani atiki garibbichchi ookkone biniichcha shiyeneeneken; ookkone biniichcha'n asseneeshshanni hedhaake Mageniinka arda qeeqishemmaxxee konne mageno ege'nebaaka Filisixeemichchoke'ninna iittanni assannon.37Daawwitinna lebeexxi, biiniichchike afo'inaa'n anee anjireek Duuchchi Woddik Gootti konne Filisixeemichchiinxe anganaa'ninna ane'e anjiraan.»
Sa'oolinna, «Eloxxen! Duuchchi Woddiki Gootti atinni hedhuun, me'i!»
38Sa'oolinna ifixxa lolinxa oddoono Daawwiti'ni oddeese. Maalde'iinxa gullenna umoke'n uggeexxi sibliinxa koote qomate'n oddeesse.39Daawwitinna iitta hexxeexxa seemma odo'we ege'na gophemmaaxxe Sa'oolika wolaantichcha loliinxe seemma'n hana ka'le'e me'o'aa hobbi hiyyee wodda me'a dande'ebaa; tennexxe Daawwiti Sa'ooli'i, «Baratebe'noxxe yaane kaddemmaxxee tenne seemma odo'we lola dande'abe'non!» hiyye. Tennexxe duuchchingeechcho fulchedhe.40Ookkoneechchinni udumi'a Siqqichcho adhdheexxi, onde kuku'michcha kinjo lagii'n file aadheexxi allaleti woddixxe subbi giddo uggudheexxi looyyatanna adhdhee Filisixeemichchiinbaa shikki hiyye mare.

Daawwiti Goliyaadi Shiyye

41Goliyaadi Filisixeemichchi Daawwitibaa shiqqa'n dage; isika lolinka miyya ba'edhdhaammak manjichchinna isi edi edii'n me'a'nemman.42Daawwiti daayyake, dhagga biifaamake, oosichcha belto kademmaxxee Goliyaadi isoo hubate uudee wodda tuffate.43Tennexxee Goliyaadi Daawwitti'i, «Siqqo abixxite ane'n daga'etechchi ani wolchokee?» hiyye ke'exxe Filsixeemike magenuwwike summinni Daawwiti'i badine.44Lebeexxi, «Kaba'anni amo! Maala atika allaateteenna biniichchi itaashsha assannon» hiyye.
45Daawwitinna Filisixeemichchoke'n hiisse haaso'e hiyyee qici, «Ati wolaantichcha, bagedokanna marca abixxite aniba'a daggeten; ani kinni ati geeqqishshaateke Dada Duuchcha Ajajaak Duuchchi Woddika Gootta, Isira'eelike sannachchike Magenike summinni ate'n dagaannen.46Techcho Duuchchi Woddik Gootti atee anxe anga'ni sa'isse uwwaan; aninna gooba atika kutannoni; Filisixeemitotike sannachchika renshanna alaattuwwatinna biniinchuwwi itaashsha assannon. Tennexxe uduma butta duuchcha Isira'eeli Mageno affe'eexxa egendaan.47Kaba bukki hiyyeeki duuchchi, Duuchchi Woddik Gootti arda ifika anjiraaki wolaantichikinna bagedikite kadebaaxxa ege'naan; lolaak Magenoke kadeemmaxxee lollee ha'noo injifantannoshsha isi midditte no'aa uwwaan.»
48Goliyaadi Daawwiti lolo'a Daawwitiba'a sheqe maree wodda Daawwitinna Goliyaadi'i lolo'a filsixeemike loliinke mannike googessiba'a gonga'n mare.49Daawwitinna anga subbi giddi'a luqqu'mi asse mitte kinjo aadhdhe'e Goliyaadi'n looyye; kinjikinna Goliyaadike kallachcha'n mare lixe; Goliyaadinna buttinake'n gonbiseme ibe.50Konne qicinni Daawwiti wolaantichcha anga afebaang kinjkinna looyyati ookkonee Filisixeemichcho injifate shiye.51Daawwitnna gonge mareexxi Goliyaadike renshi hana uurre; wolaantichchakanna Goliyaadike gonofinaa'n luqqiseexxi gooba isika qurubbi asse.
Insa'nek janni iikki Goliyaadi shiyyemeexxa afeexxi Filisixeemik loliink manninna ke'e baaje.
52Ookkoneechchi uduma Isira'eelikinna Yihudak manni hafuura gikki assine geerara'n Filisixeemika lolinka manna Gaati qico'n okko'inna Eqiroonike dalla'ixxe huluwwa qico'ni shorrishe; Filsixeemike manniki renshi Shi'arayiimii'n Geeti qico'n, okko'ninna Aqaroonike dalla'ixxe huluwwa qico'ni hedheke ora duuchcha'n ibe'eemman.53Isira'eelik manni Filisixeemika manna shorrishe illeema higa'n kaanbe insa'nexxa saame.54Daawwiti ookkone Filisixeemichchiinka gooba aadheexxi Iyyerusaalemi iyyedage; Goliyaadika loliinka miya kinni ifinge duunkaani giddo ugge.

Abenerii Daawwiti'i Sa'ooliba Iyyemare

55Daawwiti ookkonee Filisixeemichchinni lolo'a me'aamma wodda Sa'ooli Daawwiti afeexxi ifike lolinke mannika akeekisanjo Abeneerii'i, «Kunni belti ayyike?» hiyye qore.
Abeneerinna «Moyanjo! Atixe hedhoo! Ayyike belto kadeexxa ege'nebe'noni» hiyye.
56Sa'oolinna, «Kunni belti ayyike kadeexxa manna qorte wo'mi» hiyye ajaje.57Tennexxe Daawwiti Ookkonee Filisixeemichcho shiyyeexxi ille iima higee wodda Abeneeri isoo Sa'oolibaa iyyemare; eettene yanna Daawwiti Goliyaadika gooba anganni afe'emman.58Sa'oolinna Daawwiti'a «Koo dargageessa! Ati ayyike belto?» hiyye qore.
Daawwitinna «Ani Betelheemike qachcha'n hedhammake erganjo atike Isseyike belton» hiyye hiisse haaso'e.

The Word for the World International

https://app.library.bible/content/2b894378475c6aea