Taakkakaa Moyanjuwwiinkaa Maxaafa18
Eeliyasinna Abidiyyu'u
1Heddo yanna uduma sakkaxxe wogga'n Duuchchi Woddik Gootti Elyaasi'a hiyyee qici, «Marte Aki'aabi'n leeli; aninna bogake'ni xeena gansiisannon» hiyye.2Tennexxe Eliyaasii Aki'aabi'n ifi leellisho'a me'e.Eettene yanna solo'i Semaariyake boga'n birasa'eemman.3Aki'aab mootummatike minika ajajallo Abidiyuu'u ye'e; Abidiyuunna Duuchchi Woddika Gootta yo'oshsha sodataake manjomman.4Elizaabeelinna Duuchchi Woddike Goottixxa wabeeko shilshiishshamma wodda, Abidiyu dhibba wabeeko aadheexxi lameba qoode onde onde tomme asse wolo'oti giddo sho'eexxi itanna wode'e insa'ne'a uwwa'nemman.5Aki'aabinna Abidiyuu'u, «Kexxettexxi bogi giddo hexxeexxe muummebaanna wolo'oba'a mari; fadhaduwwinna gaanguwwa no'oxxi rennabaashsha hedhoti he'naaka arso dedha alfinannoxxe hexxeen» iso'o hiyye.6Tennexxe me'inaaka boga qoqqoodemme Aki'aab mitte darre'ni Abidiyunna wele darre'ni me'ine.7Abidiyu me'ande'ni hedhee'na Eliyaasi'i afe; Abidiyyunna iso ege'ne butta wabbi hiyyeexxi anga iimi'a ke'isse; «Koo anke gootta Eelyaasi; isi dhugaandinn atendee?» hiyye.8Eliyaasinna, «Eeti! Anenden; marte goota atike'e ‹Eeliyaasi kabani hedheen› hite iso'ni kuli» hiyye.9Abidiyunna iso'o hiyyee qici; «Abbo mayee ate'e maa balleessannalete erganji atik reyaashsha Aki'aabi'n sa'isite uutettechchi.10Duuchchi Woddika Gootta hedhaaka atika Mageno! Gooti anki ate'e balleesssatee gosa gosake ardina'ninna mootummana'ni ergaa'na gateeng hedhebaan; hoone gosa gosake ardanna kado mootumma ati ookko'o hexxebexxoxxa ege'nishe wodda duuchching ati ookko'o uudebaaxxa dhugeesashsha kakachchiisaamman.11Ta'a kinni ati anke goottiba mare, ‹Eliyaasi kaba hedheen› hiyyona'a hassaatten;12Ati birii'ni me'anno wodda Duuchchi Woddike Gootti hafuur atee haba aadhe me'aaxxa ege'nabe'non; yoona mare Aki'aabi'n kuleenneechchi uduma ate'e afa gophoole ane'e shiyaan; yaane kinni ani erganji atik dargaggeeyyummandenaa'ninni Duuchchi Woddika Gootta magenoonfataannen.13Koo anke gootta, Elizaabeeli Duuchchi Woddike Goottixxa wabeeko shilchiishshee wodda maa assennexxa laqqeettabaa? Duuchchi Woddike Goottixxa wabeeko aadhe onde tomme mitte wolo'o'ni onde tomme mitte wolo'o giddo sho'neexxi itanna wode'e insa'ne'a uwwa'nemman;14Yoona ati mare gootta anke'e ‹Eliyaasi kaba hedheen› hiyyonna'a hassaatten; isinna ane'e shiyaan!» hiyye.15Eliyaasinna hiyyee qici, «Ani isi edo uurreenneke Dada Duuchcha Ajajaake Duuchchi Woddike Goottixxa, telcho Aki'aabi edo dhugaandinni leellannon» hiyye.
Eeliyaasi Qeermeloosixxe Kooba'ni
16Tennexxe Abidiyu mareexxi tenneen Aki'aabi'n kule; Aki'abinna Eliyaasi'inni afemo'a me'e.17Aki'aab Eliyaasii'i uudee wodda «Isira'eeli'i rakkissaatteki atetee?» iso'o hiyye.18Eeliyaasinna hiisse hiyyee qici: «Atetenna atike annike mini hado rakkisee malee ani Isira'eel'i rakkisebo'non. Duuchchi Woddike Goottika ajaja waaldine'en; Ba'aalinni hordofine'en.19Ta'anna ardi Qermeeloosixxe kooba'ni aninni afemo'a Isira'eelke ardi duuchchi'a lassi. Eelizaabeelixxe qorenaa'ni itta'neexxa shoole dhibbanna onde tomme Ba'aalixxa wabeeko shoole dhibba Asheeraxxa wabeeko iyyedag.»20Tennexxe Aki'aab Isira'eelike arda duuchcha'ni lassisiisse wabeekonna Qermeeloosixxe kooba'ni bukki asse.21Eliyasinna ardi edo shiqeexxi; «Lame yaadinni erqe kayya daaqqina'neek haaniqico'nite? Duuchchi Woddik Gootti Mageninke kadoole Mageno hordoffee; Ba'aali dhugaatike magenoke kadoole isoo hordoffe» hiyye.Ardi kinni mittelchonna bucuqqi hiyyebaan.22Ookko'ni Eliyaasi hiyyeeqici, «Duuchchi Woddike Goottixxe wabeekonaa'n gatennek ane callan; Ba'aalixxi kinni shooole dhibbanna onde tomme wabeeko hexxeen.23Lame jiboota no'o'a uwwe; insa'nenna mitte fi'line adhdhinowwaal; qooli qoolik wonxe haqichchoke'ni fanninsowwaal; yaane kinni giira konneechchi hunda ha'inshoqqe; aninna langaka jibichcha qophpheessannon; haqichchoke'inna fannisannon; giiranna ha'ishabo'non.24Ookko'o ha'no ha'nooke magenika summa ye'edhdhe; aninna Duuchchi Woddike Goottika summa ye'annon; laqe giirati hiissaak isi dhugaatike Magenon» hiyye.
Ookkoneechchi uduma ardi duuchchi hiyyee qici, «Hitettexxi eloxxen» hine.25Eliyaasinna Ba'aalixxe wabeeko, «Ha'no heddoke kadinemmaxxe'e edissine mitte jibichcha fi'litine qophpheesse; ha'nooke magenuwwika summa ye'we; yaane kinni giira ha'ishshinoqqe» hiyye.26Tennexxe insa'ne'a uuneka jibichcha adhdhine qophpheessine.
Ookkoo'ni gorsii'ni barra saafo'iin qico'n Ba'aali ye'e'ne; «Koo Ba'aali no'aa laqi» hina'ni raarre cuqqi hiyyachi kinni hedhemmabaan; hiisa'neek hedhemmabaan; hunjeeke tolchimalchi qarqara'n qeexalle.27Barra saafo'ake'n Eliyaasi «Hafuura ha'nooka gikki assitine raartinabaa! Isi magenokebaa! Dedha hedumi giddo hedhaan yookaan huje iso'ni bira saxxe'en ora me'ate'ni hedhaan; dhiiphoolenna ke'isse» hiyya'ni insa'ne'e coorate'ni ke'e.28Tennexxe baranteemmashshann raarra'ni munde insa'neexxi lolaata qico'ni ifika biso wolaantichchikinna cuupheti madeessinaamman.29Barra saafo'i sa'eechchi uduma insa'nenna galgalik tolchi shiqaa qico'ni wabeekumma haasoonnaamman. Kaddo malee'e ta'anna bucuqqi hiyyaachchi hedhemmabaan; caqase hiissammak hedhemmabaan.30Ookko'ni Eliyaasi arda duuchcha «Anibaa shikki hiyye» hiyye ardi duuchchi isibaa shiqe; isinna diigemeemmaka Duuchchi Woddike Goottika tolchimalcho giisse.31Duuchchi Woddik Gootti koonneechi edo «Isira'eel» hiyye summa fulche'eke Ya'iqoobinaa'n ilendeexxe tommenna lame gosake summinni tommenna lame kinjo aadheexxi,32Kinuwwate'n Duuchchi Woddike Goottik summi'a tolchimalcho giisse; tolchimalchiinke qarqara'n tommenna onde leetiro wode'e abiddaaxxa bale ume.33Haqqe tolchimalchoke'ni iimi'a giisse tuule; jibichiinka maala qooli qoolik kukkuteechchi uduma haqichchoke'ni iima fannise. Ookko'ninna «Wode'e shoole waaba'ni wonshitine tolchake'ninna haqqete'ni hana dunne» hiyye.34Higgenni «Ta'anna lebbe!» hiyye, insa'nenna lenbe.
«Sakkaxxanna lebbe!» hiyye ajaje insa'nenna sakkassine lenbe.35Wede'i kinni tolchimalchinke qarqara yaa'e; baletanna wo'me.36Galgaliki tolchi shiqammaxxa yanna wabeek Eliyaasi tolchimalchiinba shiqeexxi hiyye soodatee qici, «Ee Abirihaamike, Yissihaaqikenna Isira'eelike Duuchchi Woddike Gootta Magenoo! Ati Isira'eelike Mageno kaddeettexxa; aninna atike erganjo kadeennexxanna tenne duuchcha ajaja atikenna assennexxa techcho ege'nendowwaal.37Kunni ardi ati Duuchchi Woddike Gootta Mageno dhugaatike kaddettexxanna qalbe insa'neexxa hiissitetteki atete kaddettexxa ege'naashsha abbo maganneten soodachcho anxa laqi; Ee, Duuchchi Woddike Gootta maganneten hiissichcho ani'a uwwi.»38Ookkoneechchi uduma Duuchchi Woddike Goottixxi giira iimii'ni daggeexxi tolcha, haqqe, kinjokanna buttina itte birte; bale giddo hedhemmaka wode'e bassite.39Tennee uudeeki ardi duuchchi albik buttinake'n gonbiseme. «Duuchchi Woddik Gootti Magen isi dhugaatiken! Duuchchi Woddiki Gootti isi dhugaatike Magenon!» hine.40Ookkoo'n Eeliyaasi «Ba'aalixxa wabeeko abidde! Mitti manjinna baaje fuloqqe'e» hiyye ajaje. Ardikinna insa'ne'e abide; Eliyaasinna Qisoonike galaaniba'a iyyemarre insa'ne'e gorraasise.41Eliyaasinna Aki'aabii'i «Jabaki xeeni gano'a dinddima'neen marte itte ha'wi» hiyye.42Tennexxe Aki'aab ito'anna ha'wo'a me'e; Eliyaasi kinni Qermeeloosixxe koobaxxe xungo'ni fule; lame gulubixxe oddo'ni albik heeshshi hiyye.43Erganjokanna, «Marte abbaayyatiba'a uudi» hiyye.
Erganjikinna mare uudeexxinna, «Ookko'o hedheechchi hedheban» hiyye.
Eeliyaasinna torbaanele, «Higgeenna mari» hiyye.44Torbaxxe yanna'ni erganji «Kunse angatike ba'lnichiqicik shiixxook duucmanchi abbaayyatena'ni ke'a'neeni» hiyye.
Eeliyasinna hiyyeeqic «Marte Aki'aabii'i ‹Xeeni kutebaangi fadhadiinxa gaare fe'eexxe me'i› hite iso'o kuli» hiyye ajaje.45Iikki woddi duumanchi iima buqe; diidallotinna gande; jabaki xeeninna gane; Aki'aabinna fadhadiinxe gaare'n gulufe Iyyizira'eeli'a me'e.46Duuchchi Woddike Goottixxi hunna Eliyaasi'ni dagge; Eliyaasinna seemma iimi'a hiissedhe mixeti duudhe usudheechchi uduma Iyyizira'eeli qico'n Aki'aab edo gonge.
The Word for the World International