1 Qorontoosike Manni'a9
Ergameeyyetee'e Uwwendeexxa Deette
1Ani leexxa fuleeneke manjobaataa? Ani ergemallongebataa? Ani Gootta no'oka Yessuusi uudebe'noketaa? Ha'noo Goottik anxe elonni afendineexxe gummabaata?2Welekee ergemmalloke kada gophoonolenna midde ha'no'aa dhugaandinni ani ergemmalloke kadeenaxxee Goottiki anxe ergemmallumaatik maxxansi ha'nnooten.3Anee qo'nisa'neekee uwwaaneke hiissichchi koneten.4No'o isi itatixxanna ha'watixxa deette hanfebeno hiyyateeta?5Wele ergameeyyesha Goottinke dayyuwwishshanna Keefashsha no'oxxa aammaagne are adhine marematixxa deette anfebe'no hiyyateeta?6Yookaan galduma no'oke huccinabe'noshsha deette anfebe'nok ergameyetenaa'n Bernabaasinna ane callata?7Maalaqa ifikenni loliinke manjo kade ergatemaak aatte? Yookaan kaaseexxi gumma itabaak aatte? Yookaan hore alala'n ado ha'wabaak aatteta?8Tenne haaso'enek manjiinke yaadi callinteeta? Muusek seerinna hiyya'neexxi tennedebaata?9«Uxxitaaxxa qotiyyo afo'o usurtoxxe'e» hiyyendeexxi Muuseke seera'n borreesende'een. Mageni tennee hiyye'eechchita'a qotiyyotee'e heddiyotiteeta?10Mageni tennee hiyyeechchi no'andebaata? Wiilsak manijji addet wiilsashsha, uxxaaki manninna addet uxxashshanna konne orinn duuchching ifi fika qoobo alfatee addet huja hassissaaxxa leellishshati no'oxxe borresende'een.11No'o ha'no giddo hafuuriinxa yaane facaansennexxe kaddo'oole, maalakee kaddaaxxa yaane haa'minenele lumoxxe yaane kaddeni hiyyoteeta?12Weli tenne yaane ha'noonaa'n alfatixxa deette afeechchinni no'o tennenaa'n saaxxa alfa hassissamabaata? No'o kinni tenne uwwendeexxa deette la'onfanetebe'no; tenne irra Kiristoosixxi wengeele guggufatabaashsha hediyyot duuchchiinxa yaanenn ossinene malee'e.13Woyyichcha Galmi giddoo ergatemaakiir ita ookkone Woyyichch Galminaa'n alfaaxxa, iittanni tolchimalchoke'n tolcha shiqishaakiirinna ookko tolchemeechchirinaa'n qoodemaaxxa egendinebaata?14Iittanni wengeele lallabaakiir galduma ifikee hasisaachchuwwa wengeeletenaa'n alfinaashsha Gootti ajaje'een.15Ani kinn tenne uwwendeexxe deettuwwa'naan mittetanna midde la'onfatebe'no; ta'anna tenne ha'no'a borreesanek tenneersha hexxeexxi yaanuwwa ani'a assitinaan hiyyatixxe addentebaan; ayyinna ifi saada anxa woyifuldababaaxxe asseexxi mannii'n ani'a reyo woyyan.16Wengeele lallabanoshsha Magen anee ajajeexxe kaddemmaxxee, isee lallaba anxe'n ifi saadabe'no; wengeele lallaba gophonole ani'a aane'e!17Tenne wengeel fedhii anxenni lallabenole hirake afe'ennen; fedhiite kada gophphoole kinni assa'ennexxi yaane ane'n uwwendeexxa maganne muuxate calla kaddaan.18Yoona anxe hujeke hirita maachcho? Anik hiriqqaa wengeele lallabanno wodda ani'a uwwendeexxa deette la'oonfatebe'nok wengeele tola lallabonoleten.19Ani leexxa manjonni ayyike garbannabaan; yaane kinni heddo manna Kirstoosibaa iyyedagatee ani manji duuchchi'a ifi garbake asse'eennen.20Ayihudoota hiissonna'a Ayidichchoke kadenne; ani seer hunda hedhebe'nog seer hunda hedheekaara hiissonna'a ookkone seer hunda hedheekishaara kadenne.21Ani umo anigeninni Magenke seer hunda hedhebe'nokenna, Kiristoosike seeri'a hiremanoke kadoonnolenna seera afebaakaara hiissonna'a seera afebaake manjishsha kadenne.22Amanati ifi gopheekaara hiissonna'a ifi gopheekeerishsha kadenne; dandeesisaake or duuchchinni mitte mitte anjironna'a duuchchingen welti duuchchiinxa yaane kadenne.23Tenne duuchcha assennek wengeeltixxa eebba qoodematee wengeeltixxe hiyyeeten.24Gonigiichchiinxe hokkokke'n gongaak heddo manna kadeexxanna badhaasa adhdhaak kinni mitte calla kadeexxa egendineenni hexxinebaata? Tennexxe ha'noonna ookkone badhaasa adhdhitino'a gonge.25Gonigichchik hokkokkisaaki duuchchi ifi jaba qico leenjisaan; insa'ne iitta elooneechchi sa'aakanna ba'aaka kallacha alfino'aaten; no'o eloona'enneechch kinni baxxabaaxxanna duuchchi woddixxa hedho alfateeten.26Ani kinni mare geyaaba ege'nebaak gongamake manjishsha tola gongabe'non; iittanni diidallo tuntummoti ganamake manjishsha tola wolaancho abixxabe'no.27Yaane kinni welekee lallabenechchi uduma ani umo ankenni hunemeenneke kadabe'noshsha manjunte anixxa ifi xexxe'ata'n ani'a hirendaashsha assannon.The Word for the World International