1 Qorontoosike Manni'a3
Mageniinxe Tuuta Giddo Kadeexxa Weli Giba
1Anke dayyuwwa Kiristoosi darre'n reefi annoole kaddineemmaxxe maalnke mannishsha malee'e hafuurnke mannishsha ha'noo'ni haaso'a dandebo'non.2Ookkone wodda jabata gophphineemmaxxe'e adote malee'e jabaxxa ita ha'no'o itisebo'non; ta'atenna kaddoole ha'no eettene jabaxxa ita itiyyo danedetinebaan.3Ta'anna ha'no'o ookkne maalnke mannan; ha'noxxe oddo'n gaabenna weli gonphe hexxeemmaxxe'e ha'no ta'anna ookkone maalnke mannabaata? Assitina'neexxi yaane duuchchi tenne buttaki manni assaammanxebaata?4Tinninna mitti, «Ani Phawuloosike» weli kinni «An Aphiloosike» hiyyaa wodda ha'no maalnke manna hiyyondebaata?5Isinni Aphiloosi maachcho? Phawuloosinna maachcho? Insa'neqqa ha'no amandinaasha assineeke erganjuwwan; mitti mitti insa'nek ergatema'neek Gootti insa'ene'a uwweexxe ifi fixxe hujeniten.6Ani kaasenne, Aphiloosi wode'e ha'wise; Mageni kinni nosse.7Tennexxe nosseemmaki Mageno malee'e kaasek yookaan wode'e ha'wiseek mitteelchonabaan.8Kaasakinna wode'e ha'wisaak qixxenden; mitti miitng hujemaxxe hujexxe qixxe'n hira alfaan.9No'o Magenoke mitteba huja'neke erganjuwwan; ha'no Mageniinke fichchanna Mageniinke minen.10Magen ani'a uwweeke badhaadhinni miniinke ijaarsixxa oge afeeke mitte beeki manjishsha umennexxi booso ofolishenne; wele manji eettene booso hana ijaaraan. Yaane kinni mitti mitting hitta ijaarxa xexxe'achcho hasisaan.11Eettene woldo umende ofo'lishendexxa booso malee ayyinna wele booso ume ofo'lisha dande'aak hedhebaan; tinni boosonna Yessuus Kiristoositen.12Tenne booso hana ayyinna worqeti yookaan birreti sibljinni yookaan fixxe kinonni yookaan haqqeti, buuyoti yookaan huurk ijaark hedheexxe kaddole,13mitti mittinge manjixxi huje hitta ifisendaaxxe murtetixxi barra daggaan eettene barra mitti mittinge manjixxi huje hittate kaddeexxa giirate'ni e'yite higa uudendaan.14Mitti manji ijaaremmaxxi huje baxxebaang hexxemashanni gattoole badhaasa alfaan.15Huje isixxi giirate'n gubate baxxak kinni badhasa alfaba'a; kaddo malee isi umo ifikenni giira giddo e'yeexxi gubatebaang gatamake manjishsha anjiremaan.16Ha'no umo ha'noongeninna Mageniink galma kaddineexxanna Mageniink Hafuur ha'no giddo hedhaaxxa e'gena gophphinetaa?17Ayyiinna Mageniinka Galma diigoole Magenkinna iso'o diigan; Mageniink Galmi woyyichchaken; iikki galminna ha'nooten.18Ayyinna ifi soboqqe'e; ha'no giddii'n ayyinna tenne buttake beekumixxe mikenni beekuma afe'esha ifi hedhoole beekake kaddo'a ifi gowwak assee uuda hassissaan.19Tenne buttak beekumi Mageni edo gowwumate kadeemmaxxe'e hiyyende borreesendee qic, «Magen beekole insa'nexxe shokkoninni abiddan» hiyyende'een.20Iittanni wele booncho'ni kinni, «Gootti beekoetik yaada wayi fulabaake kadeexxa ege'naan» hiyyendee borresende'een.21Tennexxe duuchchiinxi yaane ha'nooxxe kaddeemmaxxee'e ayyinna manjoke'n ifi saadoqqe'e.22Phawuloosite kadi Aphiloosi yookaan Keefanna yookaan butta tennete kaddo hedho yookaan reyo ta'a hexxeexxe yaanuwwa kaddo'o hegeri daggaaxxi duuchchi ha'nooxxen.23Ha'noonna Kiristoosiken; Kiristoosinna Mageniinken.The Word for the World International