1 Qorontoosike Manni'a15
Kiristoosixxa Reyotenaa'n Ke'a
1Ta'a anke dayyuwwa ha'no'a lallabe'naa adhdhitineemmaxxa, ise'ninna jabaatineexxi uurritinemmaxxa wengeele ha'no kassi assonaa haseennen.2Ani ha'no'a lalabennekaichcho jabaatineexxi abixitinoole tenne wengeelenni anjirendinaan; iittate kada gophphoole amana ha'nooxxi toliinxe.3Ani adhdheennexxa umoke kaddeexxa yaane ha'no'a sa'isse'eennen. Sa'issennexxi yaanenna Woyyichcha maxaafa'n borreessendeemmashshanni, Kiristoosi no'oxxe cubboxxee reye,4moogeme; Woyyichcha maxaafa'n borreesendeemmashshanni sakkaxxa bara moogokenaa'n ke'eedheen.5Ookkoneechchi uduma Keefa'n leelle; ookkoneechchi uduma eettene tommenna lame ergameyye'n leelle.6Ookoneechchi uduma onde dhibba saxxaaxxee ifixxe hordofeeyye'n mitte yanna'n leelle. Insa'nenaa'ninna heddi manni ta'i qico'n lubbo hedheen; mitti mitti kinn reyeedheen.7Ookkoneechchi uduma Ya'iqoobi'n leelle; uddumii'n ergaemeeyye duuchcha'ninna leelle.8Duuchchiinge'n leelleechchi uduma kinni anee gufoti ilendeexxe annoshsha hedheneke'n leelle.9Ani Magenxa tuuta shorsheennaxxee ergameeyye duuchchinaa'n shiixedheennekenna ergamalloke hiyyeme ye'ema ani'a hassissabaaken.10Yaane kinni ta'a kadeenne qico kade'eennek Mageniike badhaadiniten; ani'a uwwemeek badhaadhinna gumma beloke kadeba'a; wele waalini welekenaa'n caala si'ik huje'eenne. Yaane kinni tennee asseek aninni welti hedheeke Mageniinke badhaadha malee'e antebaan.11Yoonna antenna kadi insa'ne lallanbaannexxi tennenden; ha'nonna amandineeke tennenden.Reyeeke Mannixxa Ke'a
12Kiristoosi reyotenaa'n ke'eexxa lallabendeechchinni ha'no giddii'n mitti mitti hittatta, «Reyotenaa'n ke'a hexxebaan» hiyyaa?13Reyotenaa'n ke'a hedha gophpha'noole kiristoosinna reyotenaa'n ke'ebaan hiyyatentaa!14Kiristoosi reyotenaa'n ke'a gophoodhoole no'oxxi lallaba, ha'nooxxi aamananna toliinxen.15Iittanni, «Mageni Kiristoosii'i reyotenaa'n ke'ise'een» hine no'o dhuka kulat dhariyye Mageniinxe dhuga kula kande afeemmeennen hiyyaten; reyeek manni reyotenaa'n ke'a gopha'noole Magen Kiristoosii'i reyotenaa'n ke'isebaani hiyyaten.16Tinninna kaddaachchi reyeeki manni reyotenaa'n ke'a gophoole Kiristoosinna reyotenaa'n ke'ebaan hiyyaten.17Kiristoosi reyotenaa'n ke'a gopheele amana ha'nooxxi toliinxen! Ha'no ta'i qico cubbo ifinxi giddo hexxiine'een hiyyaten!18Iittanni Kiristoosi'n amane reyeekiiri ba'een hiyyatentaa!19Kiristoosi'i tenne buttixxe hedho calli'a addantaanole manni duuchchi irra manni no'aa yaadake mannan hiyyaten.20Yaane kinni Kiristoosi reyeeke manni'a umoke kade'e reyotenaa'n ke'a dhugaate'n.21Reyo mitte manji darree'n daggemmaxxee reyotenaa'n ka'atinna manji darre'n kadde'een.22Duuchchiing Addaami darree'n reyammashsha iittanni duuchchiing Kiristoosi darree'n hedhotike kadaan.23Tinni kadaak mitte mittenge'n bado badonniten; ediseexxi umoke kadeek Kiristoosi, ookkoneechchi uduma isi dagaa wodda isike kadeekir reyotenaa'n ke'aan.24Ookkoneechchi uduma galcha baalomakanna hunna duuchcha balleeseechchi uduma moottumma Mageno Aabi'a sa'isseexxi uwwa wodda eettene yanna muuxamake kadaan.25Naapha isika duuchcha lekka isixxi hunda sa'isaa qico'n isi moya hassissaan.26Injifatemeexxi udu'me ba'aak naaphi reyoten.27«Duuchixxa yaane Mageni balloomma isik hund hirendaashsha asse'een» hiyyendee borresende'een; Yaane kinni «Duuchchiinxi isike baaloomi hunda kadde'een» hiyyendaa wodda duuchchiinxa yaane isike baaloomi hunda kaddaashsha asseeka Mageno Aabi'a gadhi darre hiyyaten.28Duuchinxi yaane Kiristoosike baaloomi hunda kaddeechchi uduma Magen Aabi duuchchiinxe yaane'n baalooma afaashsha Kiristoosi isike umininni duuchchiinxa yaane isike baaloomi hiuda asseemmake Mageno Aabi hunda hedhaan. Duuchchiingechchinna Mageno Aabike baaloomi hunda hedhaan.29Yoona reyeek manni reyotenaa'n ke'a gopha'noole reyeeke mannixxee xammaqema'neeke mannik hiri maachcho? Reyeeki manni haranga ke'a gopha'noole manni insa'nexxa bakka mayeeta xammaqema?30No'onna duuchchi wodda sodachchiisaaka galduma galla'ennek mayeete?31Anke dayyuwwa ani barra barra'ninni reyaannen; tenneenna Gootta no'oke Yessuusi Kiristoosi darre'n ha'no'n afennexxe ifi saadanni kokeesaannen.32Manjiinke yaadishsha calla kaddoole Efesooni giddo biniinchik welti wolaa'ncho abixxa ani la'o maachcho? Reyeek manni reyotenaa'n ka'a gopha'noole, «Soodo rena'ennaxxee amme indo amme ha'wino» hiyyendemmashsha kandeennen.33Mee soobbemme; «Elobaaxxi jaalumma eloka adaba balleesitaan.»34Ca'ichchi hedumibaa higge; cubbotanna hujinoqqe'e; Mageno ege'nebaak manni hedhemmaxxe tenne hiyyaa'nek ha'noo shookishonnaa hiyyeeten.Reyotenaa'n Ke'atika Biso
35Yaane kinni «reyeek manni hita ke'a? Reyotenaa'n ke'aa wodda insa'ne anfaak bisi hita hedheeke?» Hiyyeexxi qoraak manji hedha dande'aan.36Ko ati bada gowwi rokkatoxxi midha reya gophoole hedho affebaan.37Ati rokkattoxxi dinnetixxe yookaan wele midhatixxe sanne malee'e dokko mudhaake mudhobaan.38Magen kinni eeyyeeshsha eettene sanne'a biso uwwaan; mitte mittende sanne'a isenga biso ise'a uwwaan.39Maal duuchhci mittekbaan; manjiin maal kinni mitte bifaken; biichiink maal wele bifaken; ci'atike maalinna wele bifaken; qulxumetiki maalinna wele bifaken.40Iitanni iimatike biso hedheen; buttatik bisinna hedheen; yaane kinni iimatike bisik ulfinni mitte bifake; buttatike bisik ulfinni wele bifaken.41Arishshotik ulfinni mitte bifan; agenjiink ulfinni weleke; urjuwwatik ulfininna welengen; mitte urjek ulfinni wele urjeke ulfinninaa'n gargar hedheeken.42Reyotenaa'ni ke'aak manninna iittanden; alo'aake biso kade rokemeek alo'abaake biso kadee ke'aan.43Saliphphinik rokemeek ulfinnik ke'aan; gonpheti rokemeek hunnatike kadee ke'aan.44Maaliink bisi rokemaan hafuuriink bisi ke'aan. Maaliink bisi hedheexxenni hafuuriink bisinna hedheen.45Tennexxee «Iikki siretik manji Addaami hedho affexxe dada kade'een» hiyyendee borresende'een: udumik Addaami kinn hedho uwwaake hafuura kade.46Yaan kinni sirte'ni dageek ookkone maaliinke malee'e hafuuriinkebaan; iikki hafuuriink dageek ookkone maaliinkee udu'meeten.47Iikki sirtik manji dademeek buttinakenaa'nite; iikki udumik manji dageek iimatenaa'niten.48Buttatike kadeekiir ookkone buttatenaa'n dademeemmakishshaten; iimatike kadeekiirinna ookkone iimitenaa'n dageemmakishshaten.49Ookkone buttatike manjixxa bifa oddo'winnenneshshanni iittanni ookkone iimatike manjixxa bifanna oddo'winnannon.50Anke dayyuwwa ha'noo'ni mitte kulaannexxi, maalikinna munde Mageniinxa mootumma dhaaldabaan. Iikki reye ba'aak bisi ookkone ba'abaaka hedhotika biso dhaalabaan.51Yoona mitte buqo yaane ha'no'n kulaannene. No'o duuchchiingi rennabe'no; yaane kinni no'o duuchchiinge jijjiiremmannon.52No'o jijjiiremmannokinna iikki udumik malagati ufuufemaa wodda dedhanga ille himmi hite baqqitammaxxe yanna giddon. Malagatikinna ufuufemaan, reyeek manninna alo'abaake kade ke'aan; no'onna jijjiiremmannon.53Kunni ba'aak ookkonee ba'abaaka kunni reyaakinna ookkonee reyaaka oddo'wa hasissaan.54Kunni ba'aak ookkonee ba'abaaka kunni reyaakinna ookkonee reyabaaka oddo'waaxxa yanna «Reyo injifatendeexxi liqiinsende» hiyyemee borreesemeek hiyyichchi muuxxemmaan.55Iittanni, «Tee reyoo injifachcho atixxa haba hexxee? Tee reyoo manjo miitattoxxi atixxi hunna haba hexxee?» hiyyende'een.56Manjo miidhatixxi reyotixxi hunna cubboten; cubbotixxi hunnanna seeraken.57Yaane kinni Gootta Yessuusi Kiristoosi darree'ni injifachcho no'aa uwwaake Mageni'aa galati geyowwaal.58Tennexxee eeyyendineeke anke dayyuwwaa Goottakee elo'a ha'nooxxi toliinxe kaddabaaxxa eegendineemmaxxee ti'ni hitine uurre; fedheexxe yaane'ninna weekendinnoqqe'e; Goottiinxa huje'n duuchchi wodda sitineeke kadde.The Word for the World International