1 Qorontoosike Manni'a12
Woyyichchi Hafuurxa Uwwaara
1Anke dayyuwwa ta'a Woyyichchi Hafuurxe uwwaxxee egendino'a hasaanen.2Mageno amandinemabaa wodda dhariinxe yaanebaa oofendina'n haaso'a danideettabaaxxe eettene fakkuwwa hordofina'emmaxxa egendine'een.3Tennexxee Mageniinke Hafuurinni haaso'a'n Yessuussi badinemeeken hiyyaak ayyinna hedhabaan. Iittanni Woyyichchi Hafuurinnitte kaddoole malee'e, «Yessuusi Goottaken» hiyyaaki ayyinna hedhabaaxxa ha'noo'n kulaanneni.4Gargar gargar hexxeexxi Woyyichchi Hafuurixxi uwwa hexxeen, Hafuurikinn mittengenni.5Gargar gargar hexxeexxi ergatenshauwwa hexxeen Goottikinna mittengen.6Gargar gargar hexxeexxi Woyyichchi Hafuurxe hujuwwa hexxeeni; yaane kinni duuchchiinxa huje duuchchiinge'n hujaak ookkone mitte Magenon.7Yaane kinni mitte mittengee'e Woyyichchi Hafuurxi ifisatixxi huje uwwendaak qabetixxe la'o'aaten.8Woyyichchi Hafuuri mitte manji'a beekumik haaso'atixxa dande'a uwwaan. Iikki Hafuuri iittanni wele manji'a ege'nati haaso'atixxa dande'a uwwaan.9Iikkinni Hafuur mittekee amanatixxa, welekee fayyisatixxa uwwa,10iittanni mittekee mambe'a hujatixxa, welekee iittanni raaga haaso'atixxa, welekee hafuuruwa gargar hiisse e'ge'natixxa, iittanni welekee gargar gargar hedheeke laagadinni haaso'atixxa, weleekee iittanni gargar gargar hedheeke laagadinni haaso'endeexxa tikatixxa uwwa uwwaan.11Kaddo malee'e tennee duuchcha assaak ookkone mittenge Hafuuran. Woyyichchi Hafuur eeyyeeshsha mitte mittengee gargar gargar hexxeexxa uwwa uwwaan.Mitte Biska Garar Gargar Hedheeka Qooluwwa
12Mitti bisi heddo bisiinka qoolluwwa afeexxe kadoolenna mitte bisonni; yaane kinni qoolluwwi heddoke kadoolenna bisi mitteken; Kiristoosinna iittanni mitte bisishaten.13Iittanni Ayihudake kandoonnole, Girkeeke manna kandoonnole, garbake kandoonnole yookaan leexxa manna kandoonnole no'o duuchchiing mitte biso kandoonna'a mitte Hafuurinni xammaqemeennen; no'o duuchchiing konne mitte Hafuura ha'wineennen.14Bisi dademeek heddo qoolluwwike kadeete malee mitte qoolike calla kadeetebaan.15Fakkeenakee lekka, «Ani angate kada gopheennaxxee bisiinke qoolabaan» hitoole iitta hiteexxee'e bisiinke qoola kada isixxi gattaata?16Manshatinna, «Ani illete kada gopheennaxxee bisiinke qoolabaan» hitoole iitta hiteexxee bisiinke qoola kada isixxi gattaata?17Bisi duuchcha ille calla kadde'eele mayik laqa dandeessissamma'a? Bisi duuchchi mansha calla kadde'eele mayik ulata dandeessissamma'a?18Yaane kinni Mageni eeyyeesha mitti mitting qooli bisoke'n hedhaasha asse'een.19Kunni duuchchi mitte qoola calla kade'eele wo'm bis haba hedhemmata?20Yoonna bisiink qooluwwi heddoken bisi kinni mittengen.21Tennexxee ille angaa, «Ati ani'a hassissabexxon» hiyya dandeetabaan; iittanni umi lekkaa, «Ati ani'a hassissabexxon» hiyya dande'abaan.22Wele waalin ifi gopheeke labaak bisiink qoolluwwi caala hasisaakeeran.23Tufateemeeke labaaka no'oka bisiinka qooluwwa lumo qico ulfeesinnannon; iittanni no'o shookishaaka no'oke bisika qoolluwwa caala ulfeesinee xexxe'antannon.24Shoonkabe'noke no'oke bisiinke qoolluwwi'a kinn tinni duuchchi hassissabaan. Mageni kinn bisiinka qooluwwa mitteba abidiseexxi ulfinni xe'yeemmake bisiinke qoolluwwi'a caala ulfinna uwwe'een.25Tenneenna iitta assechchi bisiinke qoolluwwixxe oddo'n gargar higa hexxebaang qixxe weli'anni weli hishshi hiyyaashshaten.26Mitti bisiink qoolli abara uudaa wodda weli bisiink qoolluwwi duuchchi isinni welti abara uudaan. Mitti bisiik qool ulfeesemaa wodda wel bisiink qoolluwwi isinni welti gammadaan.27Ha'no duuchchiing Kiristoosike bison; Mitti mitting ha'no isik bisike qoolluwwan.28Tennexxee Mageniinxe tuuta giddo ediseexxi ergameeyye, langakaba wabeeko, sakkaba barachchiisalluwwa, itti aanseexxi mambe'a hujaaka manna, fayyisatixxa uwwa afe'eeka manna, wele gargaaratixxa uwwa afe'eeka manna, lebeexxi galchatixxa uwwa afe'eeka mannanna gargar gargar hedheeke haaroke laagadinni haasoa'atixxa uwwa afe'eeka manna ugge'een.29Duuchchiing ergameeyyeteeta? Duuchchiing wabeekoteeta? duuchchiing barachchiisalluwwakeeta? Duuchchiing mambe'a aassakeerata?30Duuchchiing fayyisatixxa uwwa afe'eekeerata? Duuchchiing haaroke laagadinni haaso'atixxa dande'a afe'eekeerata? Duuchchiing tikatixxa dande'a afe'eekeerata?31Tennexxee duuchchiinxenaa'n saxxaaxxa uwwa alfatee jaba qicinni halsee! Ta'a iittanni duuchchingenaa'n sa'aaka ora ha'no'a leelishaannen.The Word for the World International