1 Odotikaa Maxaafa12
Daawwitinn Welti Makemeeka Loliinka Manna
1Daawwiti Qiisike belto Saa'oli edii'n baqateexxi Tsiqilagi hedhe'naa isiba'a dageek manni konnechinn iimi'a hedheramman; insa'nenna lolake'n gargarike mannixxe oddo'ni he'nemman.2Mannikinna gabeti lolaakeera kada wodda, middixxenna bita'ixxe anganni fuggo hujatinna kinjo darbatixxa dande'a afeekeeramman; insa'nenna Biiniyaamike mini hadi darre'n Sa'ool shiqike firamman.3Akeekisanji insa'neke Ahi'eezertemmani itti aane Iyyo'aasi hedhemman; lamiing Gibtsi'awicho Shema'ixxe oosemman; Azimootixxi oose Yizi'eelina, Faalixxi, Beerakiya, Anaatooti ilemeek Iyyu,4Gibi'a ilemeeki Ishema'aa sase tomme manni giddi'n hunnameessakenna sase tommingike sooreessamman; Eermiyaasi, Yahazi'eeli, Yohanani, Gedirichchi Yozabaadi,5Eluuzayi, Yaarmuti, Be'aaliya, Semarya, Harufiichi Sefaxiya,6Qore'a ilemeek Hilqaana, Yushiya, Azer'el, Yuzaare, Yashobi'am,7Gedoori ilemeekeranaa'n kinn Yohaananixxi oose Yu'elinna Zebadiya.8Daawwit qiilla gammoojje hedheeke kollifachcho giddo hedhee'naa; Gaadixxe gosake mini hadik manni dageexxi isike sannachchinn welti makeme; insa'nenna lolake'e qophphefanteexxa wontenna bagedo abixxa dandenaak jabake loliinke mannamman; albi insa'nekinna neenqiishsha sodachchisa'neekenna koobuwate'n hana utaldamaxxe geedujoshsha yo'osha muddamakeeramman.9Konneechchinn iimi'a hedheeki akeekisanj Etseretemman;langak ajajalli Abidiyu; sakkak Eli'aabi10Sholgak Mesimena ondik Ermiyaasi,11Jiyak Atayi, torbak Eli'eeli,12Saddeetik Yohanani, sallanik Elizabadi,13Tommeessok Ermiyaasi, tommenna mitteessok Mekibenayi.14Gaadixxe gosa kadeek duuchchi loliinke ajajalluwamman, insa'ne giddi'n maa'nichchi dhibba manjo, angafi kinn mitte kuma akeekisanuwwa laako'a'nemman.15Siretike agenjo'n Yordaanoosik galaan butti'ni iimi qico'ni wo'me'naa, wode'e foonfe dhiidhimi darreke'inna boroti darrexxe dhooqaba hedhammaka duuchchiira okko'ni shorreer konne mannamman.16Weli Biiniyaamikenna Yihudake gosa darre'ni kadeek manni Daawwit hedhexxe kolloba'a dange.17Daawwitinna konne manna qophecaatee fuleexxi hiyyee qic; «Ha'no daggineek ane'e gargartino'anna nagi'akete kadoole aninni welti bobbatino'a ha'no a'late'e qophphefateennen; yaane kinn ballesa mitte hujebe'nog naapha anke'e ane'e sa'isitine uutina'noole, annuwwi no'okik Mageni iso'o uudeexxi huje isixxishshanni isi'a murowwaal.»18Okko'ni Magenik Hafuur sase tommike akeekisanjo'ni Amasayi'ni dirreexxi hiyye qic:«Koo Daawwit no'o atiken,Koo Isseyike belto no'o atinni welti he'nennen;Nage'i duuchchi woddik nage'i ati'a kadowwaal;ate'e gargaraake duuchchi'a nage'i kadowwaal;Atik Mageni ate'e gargaraan» hiyye.Tennexxee Daawwit insa'nee qophedhe; sannachchiink akeekisano insa'ne'e asse.19Daawwit Filisixeemike manninn welti gudde Sa'ool'i lolate'e mare wodda, Minaaseke mini hadi darre'n heenok manni finqile Daawwitike sannachchin welti makemme. Isi kinn insa'ne'a gargaarsa asseebaan; buutotinna Filisixeemik mannik ajajaluwwa, «No'onaa'ni finqile ifike goota Sa'ooliba'a maroole no'o'o biraan» hine soodantemmaxxee afo'o mitte kande mari'antechchi uduma higaasha assine.20Daawwiti Tsiqilagi'a mare wodda finqile isinn makeme'ek Minaasek gosak mini hadik manni konneechchinni butti'a hedheen; Adina, Yozabaadi, Yidi'eeli, Mika'eeli, Yozabadi, Elihu, Tsilitaayi, kunnir Minaasexxe galcha hunda gala'ni he'ne woddanni kuma manjo akeekaramman.21Insa'ne duuchching jabake loliinke mannanna Daawwitike sannachchi giddo ajajallo kandeemmaxxee naaphuwwi lole dhiiba'n daga wodda iso'o gargaaramman.22Sannachchuwwikinna Magenik sannachchuwwishshann kadaa qico'n Daawwiti'i gargaratee barra barra'ninn heddi manni yaa'amman.Welikinna Kebirooni'i Daawwitike Sannachchi Makeme
23Duuchchi Woddik Gootti Daawwiti'a aagemmaxxe kakoshann Sa'oolixxa mootumma hoyyine isi'a uunaashsha Daawwiti hedheeke miniba Kebirooniiba dagemmak mannik laakkossi konneechchinn butti'a hedheen:24Wontenna bagedo abixxe'e lolakee qophpheefateeke Yihudaki manni 6,800.25Lolakee qophpheefateek Siimi'oonixxe gosake mini hadinaa'n 7,100.26Leewwike gosake mini hadinaa'n 4,600.27Aaroonike mini hadike soorees Yodahene itti lephpheexxi sase kumanna torbaane dhibba manna;28Higgeenni lolake'e jabak dargagees Tsaadooqinna mini hado isikenaa'n lame tommenna lame loliinka akeekisanjuwwa.29Sa'ooli'a fira kadeek 3,000 Biiniyamik manni; konne giddii'n heddi eettene barra qico'n Sa'oolike mini'a addatenshati he'nemman;30Efireemike mannanaa'n gosati gurra fuleek jabak lolink manni 20, 800.31Minaaseke gosak mini hadina'n gamisi 18,000 mannan; insa'nenna Daawwiti'i mootonsatee summi summik borreessine'naa dageeke mannamman.32Baro qalbefate ege'nekiirinna Isira'eelik ardi maa assiyo hasissaaxxa hubateekir Yisakoorik manni 200 sooreessuwwan; insa'ne hunda hedhe ajajema'neeki insa'nek firuwwi.33Adhe barate hoone sibilininna kaddo lolakee qophpheefatekinna Daawwiti'i gargaaratee dageekir lame godoba gurabaak 50,000 Zabilonik manni;34Nefitaalemike mannanaa'n 1,000 loliinka sooreessuwwa; insa'nenni welti wontena bagedo abixxeeki 37,000 manna;35Daanike manni giddii'ni lolake'e qophpheefateek 28,600;36Aseerike manni giddii'ni adhe barateerinna lolakee qophpheefateeki loliink manni 40,000;37Dhidhimi darrexxe Yordaanoosinaa'n Roobelixxe, Gaadina'ninna Minaaseke gosak mini hadik gamis gargar gargri hedheeka miya ka'leekir 120,000 manna.38Kunniir duuchchi sannachchummat ergatematee eetii uwweeke loliinke mannan; Kebirooni'a dangeekir Daawwitii Isira'eeli duuchcha'n mootonsatee mudhineemmaxxeten. Gateek Isira'eelik mann duuchchi Daawwiti'i mootonsatee mitte afo'o kande.39Insa'ne'a hasissaaxxa mini hadi insa'nek qophpheessemmaxxee manni Daawwitinn welti ita'ni ha'wa'ni sase barra duuchcha ture.40Ittann bayya hedheeke Yisakoorike, Zabilonikenna Nefitaalemike boganaa'n gatteebaang insa'nek olla'uwwi harrete'n, gaalake'n, gaangete'ninnaa sanga'ake'n ita fee'neexxi insa'ne'a aa'ne dange. Isira'eeli'n lumok gammadi kademmaxxee bulle, muxxunqinseexxa balasenna zebibe, woyinetika bulbulonna ejersiinxa zayite, ittanni heddo lalinna, gedhebo insa'ne'a aane dangaamman.The Word for the World International