Wagal1
1Baluwa ino ikulawa kumwangu nie mtumigwa Paulo, nie sitangigwe wala situmigwe na want'hu, mbali nitumigwa na Yesu Kilisito na Mulungu Tata ambwelezile Yesu muugima.2Nie na want'hu wose wamtogole Kilisito chili hamwenga, chikuwalasani mweye mose mumtogole Kilisito mkukala uko Galatia.3Chikuwalombeleni wende na nt'hindiwalo kulawa kwa Mulungu Tati yetu na kwa Mndewa wetu Yesu Kilisito, ziwe hamwenga na mweye.4Kilisito katogola kudanganika kwaajili ya kuchihalavila zambi zetu, ili chihonywe mui isi ino ihile, gesa vila alondile Mulungu Tati yetu.5Atunyigwe Mulungu siku zose bila nk'homelezo! Tawile.6Nikangawala nk'hani ivo mkumleka himahima Mulungu, awatangile muuwende wa Yesu Kilisito, na kuhokela mbuli imwenga ikuoneka gesa Mbuli Idamane.7Mbali kubule Mbuli Idamane imwenga, mbali kuna want'hu wakuwazaganyeni na kulonda kuibidula kweli ya Mbuli Idamane ya Kilisito.8Mbali hata ikawa cheye egu wasank'hani wa kuulanga, akawalongela mbuli imwenga ukaleka ino chiwalongele cheye, Mulungu naamtende mnt'hu iyo apate mbuli zihile.9Gesa ivochilongole kuwalongela, na vino haluse chikubwelela kaidi, mnt'hu yoyote akawalongela mbuli imwenga na sio ila muihokele kulawa kumwetu, Mulungu naamtende mnt'hu iyo apate mbuli zihile.10Vino, nie hulonda kutogoligwa na want'hu? Bule! Nie hulonda kutogolwa na Mulungu. Ingi niwile nink'hali hulonda kuwambedeza want'hu, silondile kuwa msank'hani wa Kilisito.11Watogozi wayangu, hulonda mmanye kuwa ila Mbuli Idamane niwalongele hailawile kwa want'hu.12Nie siihokele Mbuli Idamane kulawa kwa want'hu, wala sifunzigwe na want'hu, mbali Yesu Kilisito mwenyewe nio anigubulile.13Muhulika umwaka ivonikalile mui dini yangu ya Chiyahudi. Mkumanya vila nidihenyeze pelela dya want'hu wamtogole Kilisito na kulonda kuubananga utogozi wawe.14Nie nikala galu wa kuitoanila dini ya Wayahudi kuhuma Wayahudi wengi wa kamo dyangu, kwavila nikala niiyoha nk'hani kuyahokela yala yose chifunzigwe kulawa kwa wasaho zetu.15Mbali ivoimbwedeze Mulungu, anisagulile tangu sinaelekwa, akanitanga nimsank'hanile.16Mulungu kanilagisa mwanake ivoeli, ili nidahe kuilonga mbuli yake Idamane kwa want'hu sio Wayahudi. Nie sitile kumuza mnt'hu yoyote,17wala sikwelile kwita Yelusalemu kuwauza wala wakalile walongola kuwa watumigwa. Mbali nikaita kui isi ya Alabia, kamala nikabwela mdibululu da Demasiko.18 Kamala ivoifosile myaka mitatu, nikaita kudibululu dya Yelusalemu kuiyona na Petulo. Nikakala nae kwa siku kumi na tano,19mbali habule mtumigwa yoyote imwenga nimuonile, ukaleka Yakobo akalile ndugu yake Yesu.20Ivo yano huwandikila ni ya ukweli na Mulungu akumanya, kuwa sikuhuna.21Ivoyafosile ayo, nikalawa na kwita isi ya Silia na isi ya Kilikia.22Mchipindi icho, want'hu wa Yudea wamtogole Kilisito, wakala hawanimanyile nie.23Ao wakalile wakuchimanya ni chila wachihulike, “Mnt'hu ila akalile mwanduso akuchihenyeza, haluse akuilonga Mbuli ilaila Idamane ya utogozi ya Kilisito akalile akulonda kuiangamiza.”24Ivo, wakamtunya Mulungu kwa yala nikalile huyatenda.
The Word for the World International