Read Luka 1

Luka1dne_twf

¹Munahota Teofilu. Bhando bhamahele bhajhighite ngita chibhahotwila kujhandika mbone malobhe ghighatendika pakate jhito twenga,²na bhajhandike malobhe ghibhachimulilwa na bhala bhubhalolita kwa miho ghabhe bhene kuhumii makacho pighatumbukina, na kwa bhala bhibhatangicha malobhe gheniya.³Kwa gheniya Makolongwa, na nenga pinyomolila kuhingukiya kwa uchakaka gwake, mwene mbaha ninyandikile na mwenga ngita chighapitila mambu gheniya.⁴Ndehila naha, kupala hele umanye kwa uchakaka mwe mabhene mambu ghoha ghubhammolita.

Kubhelukwa kwa Yohane Mbatichajhe kulongelwa

⁵Machiko gha Helode pakibha munahota nkolongwa jwa ku Yudeya, peniya pakibha na mundo jhumo jwakemitwa Zakaliya jwa kibhogha cha akapiya matambiko cha Abiya. Nhwana mundo Zakaliya liina lyake Elizabete helahela na jwenio ahumila kulukolo lwa mpiya litambiko lwa Halune.⁶Kwa bhoha bhabhele bhabhonekina bhambone na kuhalalicha palonge jha Chapanga kwa kukamuu mbone Malaghalikilo na malobhe ghoha ghakanikiya Chapanga.⁷Nambo bhakibha jhe na mwana, nhwalo Elizabete akibha ntonga, na bhoha bhabhele bhakibha bhaghoime.⁸Lichiko limo, Zakaliya pakibha mu chamo jhake jha kuhenga lihengo lyake lya kupiya litambiko mu Nyumba jha Chapanga,⁹ngita chibhakayobhalile mpiya litambiko, Zakaliya ajhakuhaghulilwa kwa ndela jha kula kujhingii nkate mu Nyumba jha Bhambo kwa lihengo lya kuhukulukiya ubane.¹⁰Machiko ghenagha Zakaliya lichaa lya kututukiya ubane pilihikita, bhando bhamahele bhakonganika panja kongo bhanyopita Chapanga.¹¹Bhahe, ntumiche jwa kunane kwa Bhambo Chapanga ajhakupwitikilila pwitu Zakalilya mwenio nkate na kujhema lubhoko lwalelo lwa luchangwale lwa kututukiya ubane.¹²Zakaliya panolekiya, ajhakujhoghopa na kilendemo kijhakubhehe twe.¹³Nambo ntumiche jwa kunane kwa Chapanga jhola nganongolila “Ma Zakaliya! Nkotoka kulendema, Chapanga ajhohine kujhopa kwino. Hote nhwana gwino Elizabete napapila mwana munalome, na mabhene namutina liina lyake Yohane.¹⁴Mabhene ndi nanuluta hake na bhando bhamahele nabhahekelela, kwa nhwalo gwa kubhelukwa kwa mwana jwenio.¹⁵Hote nabhaha ntumiche nkolongwa palonge jha Bhambo, jwenio nanywe jhe divaye hilu ughembe. Nalongochwa na Uhuke gwa Chapanga kuhumii mulutumbo lwa majhe mundo.¹⁶Helahela nalongocha bhando bhamahele bhu ku Ichilahele, kumujhiii Bhambo Chapanga gwabhe,¹⁷nanongolela Bhambo, kongo abhii na likakala na uhuke ngita gwa Eliya jwakibha nnondole jwa Chapanga. Naighalambula miojho jha katate jhaholelele yana yabhe na kwatenda bhibhankana Chapanga bhabhehe na mawacho ghambone gha kunyekete Chapanga.”¹⁸Zakaliya pakonyita ntumiche jwa kunane kwa Chapanga, “Kilebhe cheneche nakimanyikana bhole kongo ne na nhwana gwango tughogholwike?”¹⁹Ntumiche jwa kunane kwa Chapanga panyangwila, “Liina lyango na Gabuliele, jhunijhema palonge jha Chapanga andumite kwino mwenga, nipwepwele lilobhe lya mbone leno.²⁰Nambo ngoheno nahuighalika nuu changalonge, ade lichiko lya pighapala kupitii mambu gheniya, nhwalo gwangajheketela malobhe ghango ghighapala kuhengeka kwa machiko ghake.”²¹Machiko ghenagha bhando bhibhanendelila panja Zakaliya, bhatehila kukangacha kwa kutamikiya naha mu Nyumba jha Chapanga.²²Bhahe, Papitita panja, Zakaliya ahotwila ndeka kulonge nabho. Ajhake bhala bhakamanye kibhii chakiwene mwenio kuhumii kwa Chapanga. Nhwalo gwangalongela, ndi alongila kwa kulaha mabhoko.²³Machiko ghake ghakuhenga mahengo mu Nyumba jha Chapanga, pighajhomokila abhujhita kajhake.²⁴Bhahe, machiko ghandina pighapetita, nhwana mundo Elizabete jhola ajhakubhehe na ndumbo. Ajhakughongela kwa miyehe nhwano, kongo apipikiya totolo kajhake.²⁵Kongo Elizabete alongila, “Bhambo anolokiye na andangatile, na ngohe amohite hone jhango pamiho jha bhando!”

Kubhelukwa kwa Yecho kulongelwa

²⁶Pamwehe gwa chita gwa ndumbo jhake Elizabete, Chapanga ajhakuntuma ntumiche gwake jwa kunane jwankemitwa Gabuliele ajhende kubomane jha ku Nachalete jhibhii ku kilambo chuku Galilaya.²⁷Kwa nchikana jhumo jwangakongana na munalome jwakemitwa Maliya, jwenio apalwa kutolelwa na mundo jhumo liina lyake Uchupo, jwahumii mulukolo lwa Daude.²⁸Bhahe, ntumiche jwa kunane kwa Bhambo Chapanga jhola ajhakuhika kwa Maliya na kunyambucha, “Mwenga jhunangiwe umbone na Chapanga na antwelii mota hake!”²⁹Papalapala Maliya pajhohina malobhe gheniya, ajhakuhechuka hake na ahololila chakumwojho, nhwalo gwa nike anyambwiche naha?³⁰Ntumiche jwa kunane kwa Chapanga, ajhakunyanguu, “Maliya nkotoka kujhoghopa, Chapanga anangiye umbone gwake.³¹Mwenga nanng'egha ndumbo, na kupapa mwana munalome na mabhene namutina liina lyake Yecho.³²Jwenio nabhaha nkolongwa, hote nakemwa Mwana jwa Chapanga, na Bhambo Chapanga chantenda kubhehe munahota nkolongwa, ngita chabhii munahota nkolongwa hoko mundo Daude.³³Hote jwenio nabhaha ndi munahota nkolongwa jwa kibheleko cha Yakobu kwa machiko ghoha, na unahota nkolongwa gwake ghangapeta!”³⁴Bhahe, Maliya ajhakunobholela ntumiche jwa Chapanga jhola, “Ghenagha naghatendeka bhole, na nenga ninakongana jhe na munalome?”³⁵Ntumiche jwa kunane kwa Chapanga ajhakunyanguu, “Uhuke gwa Chapanga nahulukiya panane jhino, na uhotolo gwa Chapanga Nkolongwa naghuyekelela. Nhwalo Mwana jwenio jwapalwa kubhelukwa, nakemwa mwana jwa Jwanyahinyahi, Mwana jwa Chapanga.³⁶Dola nnongo gwino Elizabete abhii na ndumbo mughogholo gwake, na ngohe ndumbo jhake itamii mu mwehe gwa chita, jwenio jwamanyikina na bhando ntonga.³⁷Nhwalo kibhii ndeka chikilimba kwa Chapanga.”³⁸Maliya ngalongila, “Nanjino natumiche jwa Bhambo, nijhopa undendele ngita chimulonge.” Peniya ntumiche jhola ajhakukibhokela.

Maliya ityangii Elizabete

³⁹Ghakapetite ndeka machiko ghamahele, Maliya ajhakutenda mwanja gwa kubhutuka gwa kujhenda ku kilambo cha kubomane jhibhii kwiitombe yaku Yudeya.⁴⁰Pahikita kwenio, ajhakuhikila munyumba jha Zakaliya na kunyambucha Elizabete.⁴¹Elizabete pajhohina tu Maliya inyambucha, kamwana kamulutumbo lwa Elizabete kajhakuomba, na kongo Elizabete atwelii Uhuke gwa Chapanga twe,⁴²alongila kunonoho, “Nkwete mota Elizabete kupeta akakeghe bhoha, na jwenio jhumumpala kumpapa hele jhuna mota!⁴³Nenga njochite kilebhe ghane, hilu majhe gwa Bhambo gwango kuhika kulebhata palubhanja lwango pano?⁴⁴Nanjino ninnobholele, pinyohina lilobhe lino punyambwicha pala, king'enya cha mulutumbo lwango kijhakuomba kwa kuhangana.⁴⁵Chapanga ampekiye mota mwenga nhwalo nnyeketii malobhe ghala ghimilongolelwa na Bhambo kubhehe naghatendeka!”

Maliya inomba Chapanga kwa nhwambo

⁴⁶Maliya ngajhembita,“Mwojho gwango unnomba Bhambo,⁴⁷na uhuke gwango gwihanganii Bhambo, nhwalo ndi nkomboche gwango.⁴⁸Nhwalo anolokiye nenga natumiche jwake jwangaloka!Kuhumii ngohe ibheleko yoha naingema jhumbekiwe mota na Chapanga,⁴⁹nhwalo nabhajhoha ilebhe henge yandendile nenga Chapanga ikolongwa, na jwenio liina lyake ndi Nyahinyahi.⁵⁰Ulangii kiya jhake kwa bhando bhibhabhii na kiholo na jwenie,kuhumii kibheleko ade kibheleko,⁵¹na ulangii makakala ghake kwa kuhenga makolongwa,na ubhapechangana bhibhaloka mimwojho jhabhe.⁵²Abhahululwiye akanahota akakolongwa bhina makakala kuhumii mu igoda yabhe ya ulongoche,na kwabhatondobheya bhangaloka.⁵³Abhalicha bhina njala, kwa ilebhe yambone,na bhibhabhii na ilebhe yamahele abhabhengite mabhoko matopo.⁵⁴Atangatii ntumiche gwake Ichilahele,kwa kuikomboka kiya jhake,⁵⁵ngita chabhalongolila akahoko bhitoUlahimo na kibheleko chake, kwa machiko ghoha ghangapeta!”⁵⁶Maliya akatamite kwenio ukajha kwa Elizabete ibhandikii miyehe mitato, peniya ndi pabhujhita ukajhake.

Kubhelukwa kwa Yohane Mbatichajhe

⁵⁷Pighabhandikila machiko gha kupapa gha Elizabete, ajhakupapa mwana munalome.⁵⁸Bhando bhibhabhii pahina jhake na akalongo mundo bhoha pibhajhohina Bhambo antendii ilebhe ikolonga Elizabete, bhoha bhajhakuhanganila pamonga na jwenio.⁵⁹Lichiko lya nane bhakahikite kunyingii jando mwana, na bhapata kuntina liina lya Zakaliya, liina lya tate mundo.⁶⁰Nambo majhe mundo ajhakulonge, “Mbahi ndeka! Jweniojho mukema Yohane.”⁶¹Bhene bhajhakunongolela, “Mulukolo lwake, abhii jhe mundo jwakemwa liina ngita lyenio!”⁶²Bhahe, bhajhakukonya tate mundo kwa kulaha mabhoko, bhamanye apala kuntina liina ghane.⁶³Zakaliya ajhakujhopa lijhola lya kujhandikila, ajhakujhandika, “Jhonjone liina lyake Yohane.” Bhando bhoha bhajhakuhechuka!⁶⁴Papalapala Zakaliya ajhakutumbuu kulonge kabhele, ajhakutumbuu kunomba Chapanga.⁶⁵Peniya kila mundo jwakibhanako ajhakubhehe na bhoghohe, malobhe gheniya ghoha ghajhakuchobhela mu kilambo choha cha mwitombe yaku Yudeya.⁶⁶Bhahe, bhando bhoha pibhajhohina ilebhe ipitile kwenioko, bhajhakuholelela chakumwojho na kukikonya, “Bho, mwana hojho apala kubhehe bhole?” Nhwalo gwa makakala gha Bhambo ghakibha pamonga na jwenio.

Nhwambo gwa Zakaliya gwa kunnomba Chapanga

⁶⁷Zakaliya tate gwake Yohane, ajhakutwelela Uhuke gwa Chapanga, na jwenio ajhakutumbuu kulonge kwa ulondole.⁶⁸“Alumbililwe Bhambo, Chapanga jwa ku Ichilahele!Kwa nhwalo ahikite kwatangatila bhando bhake na kwakombola.⁶⁹Atuleti Nkomboche jhuna makakala,kuhumii muchokolo gwa Daude ntumiche mundo,⁷⁰na ngita chalongila makacho, kupete kwa akalondole bhake bha nyahinyahi.⁷¹Natukombola kuhumii mu mabhoko gha akamakoko bhito,na kutubhoha mu mabhoko gha bhando bhoha bhibhituchimwa.⁷²Akalongii nabhabhonela kiya akahoko bhito,na abhii kulikomboka lilaghano lya nyahinyahi.⁷³Akanapanikiye tate gwito Ulahimo, kubhehe natutangatila twenga,⁷⁴tughombokoke kuhumii mu mabhoko gha akamakoko bhito,na tunhengele lihengo Chapanga changapwelela.⁷⁵Kongo tubhii bhaumbone palonge jhake na kuhenga ghighanhalalila Chapanga,kwa machiko ghoha gha ughome gwito.

⁷⁶Mwanango jhonjo, nakemwa nnondole jwa Chapanga Nkolongwa,kongo namunongolela Bhambo,kunenganikiya lukwalo lwake, kunenganikiya ndela jhake,⁷⁷na kwatangachii bhando bhoha nabhaghombokoka,kwa kulekekewa uhakaho gwabhe.⁷⁸Chapanga gwito jwaumbone na jhuna kiya ngolongwa,natumulikila lilangamule lyake lya ughombokeko kuhumii kunane,⁷⁹na kwamulikila bhoha ndaa bhibhabhii mulubhendo lwa kuwe kwabhe,na kutulongoya matyangilo ghito muughome gwa uteeke.”⁸⁰Peniya mwana jhola ajhakuchocha kuyoloka, na kukangamala makakala gha uhuke. Akibha atamita kunjenga ade lichiko lela pakilangiya pamiho jha bhando bhu ku Ichilahele.