HEB6dgr_cbs

1Eyıt'à Zezì-Krı weghǫ ayìı t'akwełǫ̀ǫ̀ wek'èts'eezǫǫ sìı hòt'a weghǫ gots'ede ghǫ nats'ııt'è, eyıts'ǫ Nǫ̀htsı̨ wek'èts'eezǫ k'ę̀ę̀ ts'ııdà. Eyıt'à hołı̨ı̨ hots'ehtsı̨ı̨ wet'à ełaàts'edee sìı ghǫ edek'ets'ı̨ı̨lı̨ı̨, dànì Nǫ̀htsı̨ gogha ehkw'ı-ahodıı,2dànì dǫ k'ètaìdzı̨ı̨, dànì dǫ gık'eèyats'ehtıı, dǫ naìdàa, eyıts'ǫ dànì Nǫ̀htsı̨ welǫ whìle ts'ǫ̀ dǫ sınìyaehtıı sìı eyı hazǫǫ̀ hòt'a wek'èahsǫ hǫt'e.3Nǫ̀htsı̨ hanì ha nıwǫ nı̨dè ǫhdah nàowoò k'ę̀ę̀ hoghànaxets'eehtǫ ha.4Dǫ Nǫ̀htsı̨ wegodıì k'ègeezǫǫ̀ agììdlà tł'axǫǫ̀ Nǫ̀htsı̨ t'asìı nezı̨ı̨ goghàı̨ɂǫǫ sìı gınıedì nı̨dè, eyıts'ǫ Yedàyeh Nezı̨ı̨ gık'e ajà tł'axǫǫ̀,5Nǫ̀htsı̨ weyatıì nezı̨ı̨ hǫt'e gık'èhoèhzà tł'axǫǫ̀, eyıts'ǫ ı̨daà nìhǫǫwo nı̨dè Nǫ̀htsı̨ dànì enıìyah hohtsı̨ ha sìı gık'èezǫ tł'axǫǫ̀,6Nǫ̀htsı̨ ts'ǫǫ̀ ek'èt'à anagejà nı̨dè k'achı̨ edehołı̨į̀ k'egı̨ı̨lı̨į̀ agedle ha dìì hǫt'e. Nǫ̀htsı̨ Weza k'achı̨ dechı̨et'aa k'e wedıìtsò agehɂı̨ lanì, eyıts'ǫ k'achı̨ dǫ gıghàedlò agehɂı̨ t'à edets'ǫ̀ hoìla eghàlageeda hǫt'e.7K'àowo wedèè k'e chǫh łǫ at'ı̨ t'à wegha t'asìı nezı̨ı̨ dehshe nı̨dè, gots'ǫ̀ K'àowo eyı dèè xè sìghà hòɂǫǫ̀ ayehɂı̨ t'à hǫt'e.8Hanìkò dèè wek'e ı̨chį̀ghoò eyıts'ǫ tł'oh nezı̨-le dehshe nı̨dè, wet'àaɂà nıìle xè Nǫ̀htsı̨ yedıhohtsı̨ ha ts'ǫ̀ hawe. Nǫǫde ts'ǫ̀ wek'eek'ǫ̀ ha.9Seàgı̨ą, dıı hanì naxıts'ǫ̀ gots'ede kò eyı wenahk'e naxıxè hoı̨zı̨į̀ hòɂǫ agode ha hotıì wek'èts'eezǫ. Nǫ̀htsı̨ edaxànaxı̨ı̨la k'ę̀ę̀ nezı̨į̀ eghàlaahda.10Nǫ̀htsı̨ sìı ekǫ-le gots'ǫ̀ eghàlaeda nıìle; dànì wegha eghàlaahdaa eyıts'ǫ dànì weghǫnıahtǫǫ sìı yenadì ha hǫt'e. Wets'ǫ dǫ gıts'àahdı ı̨lè eyıts'ǫ dıı dzęę̀ ts'ǫ̀ ı̨łaà gıts'àahdı t'à weghǫnıahtǫǫ sìı yek'èezǫ hǫt'e.11Naxı̨ hazǫǫ̀ nǫǫde dzęę̀ ts'ǫ̀ hotıì k'èdaà hanì eghàlaahda naxıts'ı̨ı̨hwhǫ, hanì-ı̨dè ayìı wekanıahɂàa sìı wek'ę̀ę̀ agode ha.12Gots'eahdì aahde ha naxıts'ı̨ı̨hwhǫ-le, hanìkò dǫ gıgha ehkw'ı-ahodı xè ts'èwhı̨į̀ nageèhɂı̨ t'à ayìı gıdawheɂǫ gıghǫ̀t'à ha sìı gıxèahɂı̨ ha naxıts'ı̨ı̨hwhǫ.

Nǫ̀htsı̨ yatı whehtsı̨ı̨ sìı hotıì yek'ę̀ę̀ eghàlaeda ha hǫt'e

13Nǫ̀htsı̨ Abraham xè yatı whehtsı̨ ekò Nǫ̀htsı̨ wenahk'e gǫ̀hłı̨-le t'à ededı̨ edet'à yatı nàtsoo whehtsı̨ ı̨lè.14Nǫ̀htsı̨ Abraham ts'ǫ̀ hadı, “Nexè sìghà hòɂǫ ahłe ha, eyıts'ǫ nets'ıhɂǫ̀ǫ-dǫǫ̀ łǫ gǫ̀hłı̨ ahłe ha,” yèhdı.15Eyıt'à Abraham whaà yedanaèhɂı̨ tł'axǫǫ̀, Nǫ̀htsı̨ ayìı yegha dàle ha dıı sìı weghǫ̀t'ǫ.16Dǫ yatı nàtsoo gehtsı̨ nı̨dè dǫ gınahk'e elı̨ı̨ sìı wıızì t'à yatı nàtsoo gehtsı̨ hǫt'e. Yatı nàtsoo gehtsı̨ı̨ weghàà ehkw'ı gogede gık'èhoedzǫ, wet'à dǫ gots'ǫ̀ nàyagehtı-le aget'į̀.17Nǫ̀htsı̨ edeza edeyatıì goghàı̨ɂǫǫ sìı t'aats'ǫǫ̀ edeyatıì k'èdì ha gık'èezǫ ha nıwǫ t'à, ededı̨ edet'à yatı nàtsoo whehtsı̨ ı̨lè.18Nǫ̀htsı̨ sìı t'asìı nàke ładı̨į̀ adle ha-le t'à yatı whehtsı̨ hǫt'e, eyı weghàà Nǫ̀htsı̨ hots'ì ha honàedı nıìle wek'èts'eezǫ. Goxı̨ hoìla ch'à edaxàgoeze gha Nǫ̀htsı̨ ts'ǫ̀ kwı̨ts'eèhdee sìı eyı ghǫ goınì nàtso welì.19Eyıt'à Nǫ̀htsı̨ edeyatıì goghàı̨ɂǫǫ sìı godą̀ązhį̀ı̨ gha tègozè lanì, wet'à goxè nàgoìdà ha nıìle. Zezì wexè Nǫ̀htsı̨kǫ̀-gocho goyìı enìı̨t'ı weɂı̨į̀ degaı k'è gòɂǫǫ sìı ekǫ eyı yatı gogha wheɂǫ lanì hǫt'e.20Ekǫ Zezì gonakweè gogha goyaèhtła hǫt'e. Ededı̨ sìı welǫ whìle ts'ǫ̀ Melkızedek wek'ę̀ę̀ yahtıı-wet'àaɂàa-deè whelı̨ hǫt'e.
expand_more
Search