Read MITIYEGEC 119

MITIYEGEC119ded_wbt

Kebuac dedeseriyoac

¹Ngicngac yeni kopocsic mong mi meficgema kecma KEBUAC dedeseri modacandae, yeni kenecnginagoc.²KEBUNGO yoac ngicngac dekperagiyemmeu yeneng imoc modacma heregoc ye hofocandae, yeni kenecnginagoc amma³kopocsic mong mi meficgema yeac hanising modacma kengkecgecde.⁴KEBU, geng dederecgeyoacga nemmena imoc serima modacnideac negennec.⁵Ni geac singyoac seria tofohoma sing imoc hafoangoc yombong modacma kecbadeac yombong anende.⁶Ni geac nonoyoac sasawa hengkecba ngic yeneng game kpekpeu naric mi fainugecde.⁷Ni geac dederecgeyoac dindingac negen negennau arenggeba herenau ikoc nga hamangec mong mi feu ge dengeregubade.⁸O, ni geac singyoac modacbade. Kebu ge ni mi ngadenuma wanudacna.

Kebuac dedeseriyoac tofohobesonga

⁹Sebigbori medac ye singau garengemema uba kongaha kefude, sing imoc eng mi meficgeude, kpac. Ye geac yoac gombunga modacma garengemeude, imohai naric kefude,¹⁰Ni heregoc hofocguduae. Geac nonoyoac kpebaiac garennuma kpae heinenna.¹¹Ni yoacga kpema kopocsic meficgebaiac yoacga herena manau faiba feude.¹²O KEBU, kenecgubisina.Ge singyoacga kpounenna ni imoc negen negennau arenggema mekecbade.¹³Enacgaac dederecgeyoac sasawa, imoc enacbibicnango dekperagibade.¹⁴Ngicngac yeneng dzofinacnginaac sogaiandae, ni ifi isoc geac dedekperagiyoac negemma sing imoc modacma sogaibade.¹⁵Ni geac dederecgeyoac hennegeng amma imoc negensikecma kicna fima geac sing hengkecbade.¹⁶Ni singyoacgaac ubangerec negemma geac yoac naric mi nigecnuude, kpac.

Dedeseriyoacngo ubangerec meficgenende

¹⁷Ni, kingang ngicgango gbori kecma yoacga tofohobadeac gombunga anenna.¹⁸Wiac gombunga gombunga dedeseriyoacgau fede, imoc hembadeac kicna merecgena.¹⁹Ni bangecfu kuric kecduae. Ge nonoyoacga nearunac mi mesufuna.²⁰Ubaonganango nasosoc geac dederecgeyoac negembeso ammiu kuha kpac ambeso ande.²¹Anutu ge ubakpekpe ngic yoac ngabasiric ayemmeannec, yeni geac nonoyoac wama ngadehema kecgec ge sowecyununec.²²Ni geac dedekperagiyoac modackecduaeac amma yeni desofoc nga desusuic anendae. Ge faka imoc meickenenna kpac ambeso.²³Ngictau yeneac medacfocngina yeneng tacma ni memanganenugecdeac yoac denegeng angandae, fora. Nga ni, geac kingang ngicngo sifu geac singyoac hennegeng amma imoc negensikecbade.²⁴Geac dedekperagiyoacngo ni ubangerec meficgenemma dederecge gombunga anenude.

Dedseriyoac tofohobade

²⁵Ubaonganango sendunggoc kpeketahema homebeso ande. Ge yoacga dema deserinec, imoc modacma kekecna monggoc megborina.²⁶Ni haniana edeguba geng imocac turunga merennemma singyoacga kpounenna.²⁷Geng meefainuna dederecgeyoacgaac sing negentegecma uaga bibiagoc hennegeng amma negensikecbade.²⁸Ubaebicngo ubaongana meebiriu sisingaima kpac ambeso ande. Ge yoacga denec, imoc modacma monggoc meserinuna.²⁹Ge ikocfakaunac onggonnuma ubangerec anemma dedeseriyoacga kpounenna.³⁰Ni yoac modac modac ngic ambeso negenduaeac sing imoc meisinggema kengkecduae. Ni dederecgeyoacga kicnau faiba fede.³¹O KEBU, ge dedekperagiyoacga nennec imoc seria mekecduaeac goa yeneng desofoc anembauac kpae heiyemmebesena.³²Ge negen negentegecna meyadikecna geac nonoyoacgaac sinnu nedzikecbade.

Negen negentegec nembesena

³³O KEBU, ge singyoacga fainec, imocac sing kpounenna. Ni imoc negen negennau arenggema modacma kengkecba kekecna wisickebeso.³⁴Ni dedeseriyoacga modacma heregoc imoc tofohobadeac negen negentegec nenna.³⁵Nonoyoacgaac ubangerec negenduaeac sing imohai hesicnuna.³⁶Ge herenaunac bangecac songo meickema geac dedekperagiyoacngo seria febeso.³⁷Wiac hania hania uaya kpac fede, ni kicna imohai fibaiac kicna garenggena kekecna geac sinnu kengkecbeso.³⁸Ngicngac goi heigengandae, yeni wiac yemmebesonga deserima denec, imoc kingang ngicga nearu meserima edzacnuna.³⁹Geac dederecgeyoac sasawa imoc gombunga. Game kpekpeu fainugec kengecgoc kecbaiac ebic imoc meickenenna.⁴⁰Ge fakaga dindingac imocac amma kekecna megborima kekec monggoc nenna. Negenna, ni geac dederecgeyoac negembadeac anende.

Kebuac dedeseri negensima ruaegoc kecbade

⁴¹O KEBU, geng yoac dedzege amma imoc modackecnec, geac faka imocngo nearu habeso. Ge ebicfunac mesinunadeac deserima denec, faka imocngo ifingoc nearu habeso.⁴²Ifi anu ngic goa deendema anengandae, yeni turunga naric merengyemmebade. Ni geac yoac negenserima kecbade.⁴³Ni yoac forau kecma yoac fora dekecduae, imoc kpac ambacac ge imoc enacnaunac mi meickebesena. Ni geac dederecgeyoac negensikecba fora fingerudeac tomai kecduae.⁴⁴Ni geac dedeseriyoac nasoya nasoya modackecbade.⁴⁵Ni geac dederecgeyoac meficgebadeac ua mekefaiac witiha kpac kengha ambade.⁴⁶Ni ngictau yeneac kicfu ifingoc geac dedekperagiyoac ayemmeba game kpekpeu naric mi fainugecde.⁴⁷Ni geac dedeseriyoacac songo negemma yoac imoc ubangerecgoc debade.⁴⁸Ni nonoyoacgaac songo negemma marina miacma fendzonggema singyoacga hennegeng amma negensikecbade.

Dedeseri hoanggema ruaegoc kecbade

⁴⁹Ge ni, kingang ngicga yoac edenunec, imoc negenna febeso. Ge imoc denenna negensikecba fora fingerudeac tomai kecduae.⁵⁰Geac dedeserigango kekec meficgenenu kpendzeng kpekecbare wiac imocngo meserinuude.⁵¹Ngic Anutu ngadehema kecdae, yeneng deendema anengandae, fora. Nga ni sifu geac dedeseriyoac mong mi ngadehema wabade.⁵²O KEBU, ge dederecgeyoacga warac yombong denec, imoc negensikecba imocngo meserinuude.⁵³Ngic Anutu ngadehema mangana megecdeac ayemmeande, yeneng geac dederecgeyoac ngadehema wagec, imocac amma herebu negemba herena gerec dzeude.⁵⁴Ni yei kuricngic amma amanginau kecbare singyoacgango ubangerecyegecna anu heibade.⁵⁵O KEBU, ni tofocnac geac kpac kuneng negemba feu geac dedeseriyoac modackecduae.⁵⁶Ni dederecgeyoacga modackecba imoc fingecnenu neac kenec ande.

Uba hafoangoc

⁵⁷O KEBU, ge neac areng nga yeneng bangec isoc mederema noboha nenggec, imoc ge. Ni yoacga modacbadeac geac kicfu deserima deduae.⁵⁸Ge neac negenna ngereeude, imoc meficgebadeac herenango hafoa uatoa meai. Ge yoac deserima denennec, imoc modacma wosoefac anenna.⁵⁹Ge faka modackecnec, imoc negensima geac dedekperagiyoacga modacbadeac nananna mengereba geac yoacgau kenude.⁶⁰Ni naso mi ukuma geac nonoyoac bic yombong modacma uaya mebade.⁶¹Ngic Anutu ngadehema mangana megecdeac ayemmeande, yeneac witicngo dedecnuande, fora. Nga ni geac dedeseriyoac sifu mong mi nigecnuude.⁶²Ni tofocnac dzongiau yacma dedeseriga dindingac negemma imocac dengeregukecbade.⁶³Ngicngac geac eweheihei angandae nga dederecgeyoacga modacandae, yeneac ogongina.⁶⁴O KEBU, geng yoac dedzege amma imoc modacnade, fakaga imocngo bangec sokoma fede. Ge singyoacga kpounenna.

Dedeseri imoc wiac engena

⁶⁵O KEBU, ge yoacga modacma ni, kingang ngicga, gombunga anengkecnec.⁶⁶Ni geac nonoyoac negensinggeduaeac negen negentegec nga negengising faka gombunga kpounenna.⁶⁷Ni kpendzenga kpac kefai, imohai sing segema kengkefai. Nga yofinenggac geac yoac modacbade.⁶⁸KEBU, ge gombunga amma faka gombunga angannec. Ge singyoacga kpounenna.⁶⁹Ngic Anutu ngadehema kecdae, yeneng ikoc amma ngadeyoac dema enacfu faifai anengkecdae, fora. Nga ni sifu geac dederecgeyoac heregoc modackecbade.⁷⁰Ngic Anutu wagec, yeni ubaseri amma tosofocngina yeneac ubamangang negenggecdeacsoc mi ande, fora. Nga ni sifu geac dedeseriyoacac ubangerec negengkecbade.⁷¹Ge ebic meficgenennec, imoc negemba ngereede. Ge ifi anna geac singyoac haniaac negen negeng mema arenggekecbade.⁷²Geac enacgaac dedeseriyoac, imocngo wiac engena ande. Imocngo ngereenende nga imoc hoc gol nga siriwango memea taoseng nga taoseng feracyunuude.

Dedeseri imoc dindinga

⁷³Geng meficnuma marigango menuma memengere anennec. Ni nonoyoacgaac negen negeng arenggema mekecbadeac anende. Ge imocac negen negentegec nenna.⁷⁴Ni geac yoac negensiba fora fingerudeac tomai kefaiac amma ngicngac goa eweheihei anggengandae, yeneng nemma sogaigecde.⁷⁵O KEBU, geac singyoac imoc dindingac nga gennoc yoac modac modac Kebu, imocac ebic meficgenennec, imoc negenduae.⁷⁶Ge ni, kingang ngicga, yoac deserinennec. Ge yoac imoc modacma faka anenna. Geng yoac dedzege amma imoc modackecnec, ge efaima fakaga imocngo ni, kingang ngicga, meserinuna.⁷⁷Ni dedeseriyoacgaac ubangerec negenduaeac ubamangang anenna gbori kecbade.⁷⁸Ngic Anutu ngadehema kecdae, yeneng hania kpacfu mangana anenggecac ge negemmana game kpekpeu faiyunubesonga. Ni geac dederecgeyoac hennegeng amma imoc negensikecbade.⁷⁹Ge eweheiheigoc hoangguma kecandae, yeneng naric nearu hama geac dedekperagiyoac negembisia.⁸⁰Ngicngac goa yeneng gameu fainubauac herenango geac singyoacfu seria kpeketaheu kopocsic mong mi meficgebesare.

Naso dafiguc tomai kecbesare?

⁸¹Ubaonganango geac memengerecac ammikefu yoacga negensiba fora fingerudeac tomai kecduae.⁸²Kicnango dedeseriga fora fingeru hembadeac fikecba kuha kpac anu yofi deanduae, “Ge hama meserinunade, naso imocac tomai kecduae.”⁸³Ni waing sebera hosucfu fekecma harandanggeande, ifi isoc anai, fora. Amma dedeseriyoacga sifu mi nigecnuec, kpac.⁸⁴Ni, kingang ngicgango naso dafiguc ebicfu kecma tomai kecbesare? Ngic nukporac anengandae, yeni turunga yemmenade, naso imocac tomai kecduae.⁸⁵Ngic Anutu ngadehema kecdae, yeneng menugecdeac teng keme kemea usugec. Ngic imoc yeni geac dedeseriyoac kpema kecdae.⁸⁶Ge nonoyoac sasawa dekecnec, imoc yoac fora. Ngic yeneng ine ikoc amma nukporac anengkecdaeac meficnuna.⁸⁷Yeni bangecfu kekecna kpetotiebeso anggec, fora. Nga ni sifu dederecgeyoacga mekecma imoc ngadehema mi wayai.⁸⁸Geng yoac dedzege amma imoc modackecnec. Ni enacgaac dedekperagiyoac modacbadeac fakaga imocngo kekecna onggonggena.

Dedeseriyoac negensinggebesonga

⁸⁹O KEBU, geac yoac imoc kekecseri. Imoc nasoya nasoya kurumenga kurumenga, imohai fefeseri fekefude.⁹⁰Ge yoacga modackecnec, imocngo fingecsahenina fekefudesoc, yenearu feengkefude. Geng bangec tatahau faina seria tarudengoc.⁹¹Geng yoac dema wiac sasawa faiyemmenec. Imocac amma imoc yofinenggac fedengoc. Wiac sasawa fedacde, yeni geac enac tofohogecde.⁹²Geac dedeseriyoacngo ubangerec mi meficgenembacfu kpendzennango mebucnuu kpac ambai.⁹³Ge dederecgeyoacga faima kekec nennecac amma dederecgeyoacga naric mi nigecnuude.⁹⁴Ni geac ngic nga dederecgeyoacga meficgebadeac ua mekefaiac ebicfunac mesinuna.⁹⁵Ngic Anutu ngadehema mangana megecdeac ayemmeande, yeneng memanganenuma meicnugecdeac tomai feandae, fora. Nga ni sifu dedekperagiyoacga negensima kecbade.⁹⁶Wiac gombunga nga sirihau, imoc sasawa hemba wisic wisickea feu maya kpesereai. Nga geac dederecgeyoac imoc maya kpac feecngoc fede.

Dedeseriac songo negembesonga

⁹⁷O, ni geac dedeseriyoacac songo homac yombong negemma asoacnac kemma marai imoc hennegeng amma negensima kecanduae.⁹⁸Geac dedeseriyoac, imoc nasoya nasoya nearu fekecdeac imocngo ngabafocna feracyunuma negen negentegec homac meficgenenude.⁹⁹Ni dedekperagiyoacga hennegeng amma negensikecduaeac negen negentegecgoc amma kpoukpoufocna feracyunubade.¹⁰⁰Ni geac dederecgeyoac modackecduaeac ngicngac kifangina homac kecgec feracyunuma monggoc negentegecbade.¹⁰¹Ni yoacga modacbadeac amma haninango yarengic yeneac sing mangana hania hania tibaiac hanina kpae heimima garenggekecbade.¹⁰²Geng dederecgeyoacga kpounennecac amma imoc naric mi ngadehema wabade.¹⁰³Ni yoacga negemba songea yombong ande, enacnau imoc kukundzauac songea ferahade.¹⁰⁴Geac dederecgeyoacngo negen negentegec nenudeac sing ikoha sasawa imocac modzona tiude.

Dedeseringo mekperaginunuude

¹⁰⁵Geac yoac, imocngo haninaac kifa amma sinna mekperagiude.¹⁰⁶Ni dedeseriyoacga dindingac modacbadeac yoac deserima imoc meseriai.¹⁰⁷O KEBU, ni ebicnagoc yombong kecduae. Ge yoacga modacma kekec nenna.¹⁰⁸O KEBU, ni efaima enacnango dedengerec sese megenduae, imocac negenna ngereebeso. Ge dederecgeyoacga kpounendacna negen negeng imoc arenggema mekecbade.¹⁰⁹Ni kekecna marinau mekecduae, fora. Nga dederecgeyoacga sifu mong mi nigecnuude.¹¹⁰Ngic Anutu ngadehema mangana megecdeac ayemmeande, yeneng botac faima menubesonga angandae, fora. Nga ni dederecgeyoacga modackecma sing mi segebade, kpac.¹¹¹Geac dedekperagiyoac, imoc nasoya nasoya maridzominna fefeseri fenenude. O, herenango imoc negemma sogaima kecbade.¹¹²Herenango geac singyoac nasoya nasoya angammemenango modacbadeac isinggeai, ni ifi kecba naso wisickeude.

Dedeseri modacma ruaegoc kecni

¹¹³Ngic monde monde kecdae, yeneac modzona tiu geac dedeseriyoacac songo negengkecduae.¹¹⁴Ge sufu sufuamana nga kasona nga ni geac yoac negensiba fora fingerudeac tomai kecbade.¹¹⁵Ni Anutunaac nonoyoac modacbadeac negenduae. Yarengic ngeni imocac wanuma kembisia.¹¹⁶Ge yoac deserima denec, imoc modacma garennuna gbori kecbade. Ni negen negensina foragoc mi ambacac ngic yeni geng negemmana game kpekpeu mi fainubisia.¹¹⁷Ge marinau menuma nanggenuma onggonnuna. Ni geac singyoac negensima kecbade.¹¹⁸Ngicngac sing segema singyoacga kpeandae, yeni ikocnginagoc kecgec uatoanginango fora mong mi meficgeude. Ge imocac ngadeyunudacnec.¹¹⁹Geng ngic Anutu ngadehema mangana megecdeac ayemmeande, yenenna seuc isoc angkecde, imocac amma ni dedekperagiyoacgaac songo negengkecduae.¹²⁰Ni geac kengec amba sebinango gbigbihekecde nga geng yoacna isinggema desinade, imoc negemma negengfagunggoc kecduae.

Dedeseriyoac tofohobesonga

¹²¹Ni singyoac mi kpema faka dindingac angkefai. Ngic yeneng ebicfu fainubeso ambauac onggonnuma yeneac mariu mi fainuna.¹²²Ni, kingang ngicgango naric kecbadeac nenggareng anenna. Nga ngic Anutu wama kecandae, yeneng ebicfu fainubauac geng onggonnuna.¹²³Ge faka dindingac modacma deserima ebicfunac mesinunadeac denec, imocac fora fingerudeac kicfifi kecba kicna kuha kpac ande.¹²⁴Geng yoac dedzege amma imoc modackecnec. Ge ni, kingang ngicga gombunga anemma singyoacga kpounenna.¹²⁵Ni geac kingang ngic amma dedekperagiyoacga arenggema negembadeac negen negentegec nenna.¹²⁶Ngicngac yeneng dedeseriyoacga kpegecac KEBU, ge efaina, uaga menadeac naso bic hade.¹²⁷Ni imocac geac nonoyoacac songo negenduae. Nga imocngo golac songo ferahaude, imoc goltegeng pirac pirac, imocac songo ferahaude.¹²⁸Ni imocac geac dederecgeyoac sasawa modacma imocac sing tikecma sing ikoha hania hania tibeso modzona tiude.

Dedeseri modacbadeac anende

¹²⁹Geac dedekperagiyoac imoc wiac engena, imocac ubaonganango imoc modackefude.¹³⁰Ge yoacgaac nagu witina imocngo ngicngac mekperagiyemmema ngicngac negen negengngina efea, yeni negen negentegec yemmeude.¹³¹Ni nonoyoacgaac homac anenu enacna anggema asoringa anenu kecanduae.¹³²Ngicngac geac kpac kunenggaac songo negengandae, ge neneac anggengandeac nearugeng dzigenema neac ubaga manganeu.¹³³Faka manganango kekecna garenggeu ngicngac ogofocna memanganeyunubaiac singtitina meserina. Ge yoac deserima denec, imoc modacbesare.¹³⁴Ge meficnuna dederecgeyoacga modackecbade. Ngic yeneng ebicfu fainugec ubaebicgoc kecbaiac bummenuma yeneac witicfunac yungecnuna.¹³⁵Ge ni, kingang ngicga kicmesugango nerarannuma singyoacga kpounenna.¹³⁶Ngicngac yeneng geac dedeseriyoac mi modacandaeac kickumanango doku isoc made.

Dedeseriyoac monde mondea kpac

¹³⁷O KEBU, ge dindingac nga yoac isinggema foraya desiannec, imoc dindingac sasawa.¹³⁸Ge dedekperagiyoacgaac sing dindingac modacma yoacga imoc faima modackecma fainemmenec.¹³⁹Ngabafocna yeneng geac yoac nigecyunuandeac herena gerec dzeu kpac ambeso anduae.¹⁴⁰Geng yoac deserima denec, imoc ngicngac bic tobanggegec fora ande. Nga ni, kingang ngicgango imocac songo negenduae.¹⁴¹Ni ngictehec nga sure surea, fora. Nga geac dederecgeyoac imoc naric mi nigecnuude.¹⁴²Geac dindingac kekec imocngo nasoya nasoya fefeseri feude nga geac dedeseriyoac, imocngo fora.¹⁴³Ebic nga kpendzeng nearu fingecande, fora. Nga geac nonoyoacngo ubangerec meficgenenude.¹⁴⁴Geac dedekperagiyoac sasawango nasoya nasoya dindingac feengkefude. Ge negen negentegec nenna gbori kecbesare.

Dedeseri negensikebade

¹⁴⁵O KEBU, ni heregoc kpacguduaeac negennenna. Ge ifi anna ni geac singyoac modacbade.¹⁴⁶Ni gearu yofi kpacba, “Ni dedekperagiyoacga gombunga modacbadeac, ge ebicfunac mesinuna.”¹⁴⁷Negen negenna geac yoacfu faima tomai kecba ama mi wereckemmanu geng meficnunadeac yacma kpacgubade.¹⁴⁸Ge yoac deserima denec, imoc tofocnacsoc hennegeng amma negensikecbadeac naso herea gaugbori kecanduae.¹⁴⁹O KEBU, geng yoac dedzege amma imoc modacnade, imocac ubaudumenna negenna. Ge sing dindingac modacma ngic isinnunuma yoacnina desiannecac kekecna onggonggena.¹⁵⁰Ngic goa yeneng geac dedeseriyoacac hereau yombong kecma yarefaka megecdeac ayemmeu imoc arenggema neac wegenac hama nukporac anenggecde.¹⁵¹O KEBU, geng sifu neac wegenac kecnecngoc. Geac nonoyoac imoc sasawa fora ande.¹⁵²Ni geac dedekperagiyoac bicngoc negemma yofi negengkefai, “Geng yoac imoc fainec nga imoc nasoya nasoya feengkefude.”

O Kebu, meficnuna

¹⁵³Ni geac dedeseriyoac imoc mi nigecnuude. Ge imocac kpendzenna hemma imohacnac mesinuna.¹⁵⁴Ge yoacfu meficnuma nanggenuma bummenuma yungecnuna. Ge yoac deserima denec, imoc modacma kekec monggoc nenna.¹⁵⁵Ngic Anutu ngadehema mangana megecdeac ayemmeande, yeni geac singyoac meficgegecdeac ua mong mi mekecdae. Yeni imocac geac memengerecac hereau kecdae.¹⁵⁶O KEBU, geac ubamangang imoc wiac engena. Ge sing dingdingac modacma isinnunuma yoacnina desiannec, imocacsoc anenna kekecgoc ambade.¹⁵⁷Ngic homacngo nukporac anemma ngaba anengandae, fora. Nga ni geac dedekperagiyoac sifu mong mi wabade.¹⁵⁸Ngicngac goa yeni negen negensingngina kpac kecandae, yeni geac dedeseriyoac mi modacandaeac ni yenemma modzona tide.¹⁵⁹Kebu, ni geac dederecgeyoacac songotoa negenduaeac geng imoc negensikecna. Geng yoac dedzege amma imoc modackecnec, imocac kekecna onggonggena.¹⁶⁰Yoacga sasawa imoc fora nga geac dederecgeyoac dindingac imoc sasawa tembuc tembuc nasoya nasoya feengkefude.

Efaima dedeseri hoanggebisia

¹⁶¹Ngictauac medacfora yeneng hania kpacfu nukporac anengandae, fora. Nga herenango sifu geac yoac bibiagoc, imoc hengkefude.¹⁶²Ngic mongngo finac hania hania buma kuneng bummema sogaiande, ni ifi isoc geac yoacac sogaibade.¹⁶³Ni ikocfakaac negemba wiac mangana yombong anu imocac modzona tide. Nga geac dedeseriyoac, imocac songo negemma kecduae.¹⁶⁴Ni geac dederecgeyoac dindingacac amma uamemesoc naso seweng dengeregukecbade.¹⁶⁵Ngicngac yeneng geac dedeseriyoacac songo negengandae, yeni ruae kekec kuneng meficgekecma wiac monnu tifotockema naric mi mayunuude.¹⁶⁶O KEBU, ni geac memengerecac negensikecba imoc fingerudeac tomai kecma nonoyoacgaac uaya mekecduae.¹⁶⁷Ubaonganango geac dedekperagiyoac modacma imocac songo kuneng negengkecduae.¹⁶⁸Wiac sasawa angkecduae, imoc negennecac dederecgeyoacga nga dedekperagiyoacga modacbade.

Kebu, ge meficnuna

¹⁶⁹O KEBU, kiacnango gearu hau ge negennenna. Yoacga modacma negen negentegecgoc ambadeac anenna.¹⁷⁰Ni kpesi kpesi gearu haba geng negemma yoac deserima denec, imoc modacma ebicfunac mesinuna.¹⁷¹Geng singyoacgaac negen negeng kpounengannecac enacbibicnango geac dedengerec yoac homac dekecbeso.¹⁷²Geac nonoyoac imoc fora nga dindingac sasawa, imocac nedzarannango geac yoacac yegec gombunga heibeso.¹⁷³Ni geac dederecgeyoac segerema meaiac marigango meficnunadeac efaima kecbesena.¹⁷⁴O KEBU, geng ebicfunac mesinunadeac anende nga ni dedeseriyoacgaac songo negenduae.¹⁷⁵Ge onggonnuna kekecnagoc ambadeac anenna dengereguma kecbade. Geac dederecgeyoacngo meficnubeso.¹⁷⁶Rama sufu sufuyango sing segema kengande, ni ifi isoc sing segema kenai. Ni, kingang ngicgango geac nonoyoac mi nigecnuudeac hama meficnuna.

MITIYEGEC 119 / ded_wbt