Mukanda wu Pawuli ku bisi- Loma15
Yangidika munaku, kansi ka ngebende ko
1Yeto tuu na kiminu kikwikama, tufweti vibidila lebakani di yobobo balembolo ba na kyo, mpe tusoosandi mu kiyangidika yeto bende ko.2Kadi muntu fweti soosa kaka mu yangidika munandi mu bumbote bwandi, mwanki ka musadisa kakula mu kiminu.3Klisto kasoosa mu kiyangidika yandi bende ko, kansi bonso bu wusonama ti: «Bituku bi yobobo bakutukidi, bimbwididi.»4Mu dyambu ti, misamu mimvimba bemyomyo misonama mu ntama, misonoko mu tuhaana ndongosolo, mwanki mu mvibudulu na nsyamusunu yikwe haananga Masonama, tuba na kivuvu.5Bika Nzambi yi mvibudulu na yi nsyamusunu katunga kintwadi ha kati dyeno bonso buu luzolo lu Yesu-Klisto.6Mwanki mu mutima wumosi na mu ndinga yimosi, lukembila Nzambi, Tata di Mfumu eto Yesu-Klisto.Klisto, kisadi ki bantu bamvimba
7Ni hahoho, kitambuleeno yeno na yeno bonso Klisto bu kalutambula, mu dyambu di nkembo wu Nzambi.8Kedika nina ta ti Klisto wuyiza kituka kisadi ki bantu bazengoso bubakala mu lonka kikedika ki Nzambi, mpe mu lungisa nsilulu zi kasa ku zinkaka zawu,9ku balembolo ba Bayudayo, bakembila Nzambi mu dyambu di nkenda zandi bonso buu wusonama ti:«Ni hahoho, naakukembila ha kati di balembolo ba Bayudayo,mpe naayimbila mu zangula nkumbu aku.»10Wusonama dyaka ti:«Yeno lulembolo ba Bayudayo, yangalaleeno ha kimosi na mukangu andi!»11Wubwesa sonama dyaka ti:«Yeno bamvimba lulembolo ba Bayudayo, kembileeno Mfumu,na makanda mamvimba ma bantu ma mukembila!»12Mumbikudi Yesaya wuta dyaka ti :«Muntu waatotoka mu nkuna yi Yese,waatelama mu yaala balembolo ba Bayudayo,mpe mbo basa kivuvu kyawu mu yandi.»13Bika Nzambi yikwe haananga kivuvu kalufulusa mu kyese na kiyenge mu dyambu di kiminu kyeno mu yandi, mwanki luba basempa mu kivuvu mu lulendo lu Mpeve Yilongo.Kisalu ki Pawuli
14Mpangi zani, mu myo mi lutadidi, me bende nii na kiminu ti bafuluka ludi mu bumbote, mu madyela mamvimba, mpe luu na lulendo mu lwengasana yeno na yeno.15Mu ndambu zihiika zi mukanda ani, nalusonikina na vema kumvimba, mu lubambula moyo mu misamu mi luteka longoka. Nasonikina bobo mu dyambu di mulemvo wumpaana Nzambi,16mu ba kisadi ki Yesu-Klisto ku balembolo ba Bayudayo. Nabyeko mu mwangisa Musamu Wumbote wu Nzambi, mwanki balembolo ba Bayudayo baba munkayulu waayangidika Nzambi, bazinga mu yandi mu nzila yi Mpeve Yilongo.17Meno bwabu nalendi kitumpidika mu Yesu-Klisto mu dyambu di kisalu ki Nzambi.18Nakasonika ko tala ti ka misamu bemyomyo kwandi ko Klisto mi kalungisa mu meno bu kansadila mu twadisa balembolo ba Bayudayo mu lutumumu, mu mpova na mu nsadulu,19mu lulendo lu bidimbu na bimangu na mu lulendo lu Mpeve yi Nzambi. Ni hahoho, kutonina ku mbanza yi Yelusalemi natee ku kizunga ki Ilili, nasamuna bubwingi mu ndambu ka ndambu Musamu Wumbote wu Klisto.20Kansi, nabindama mu kwe samuna Musamu Wumbote, mu bibuka kaka bi balembolo zonzila Klisto, mwanki nalembolo tunga mu lufulu lungana.21Mu dyambu ti wusonama:« Ku yobobo kukalembolo samuna wo, baamuyena,mpe ku yobobo balembolo yuwa wo, baabakula .»Makani ma Pawuli
22Ni mamomo makwe sanga kikaku, mwanki nalembolo kwiza ku yeno.23Kansi bwabu, nsidi na kisalu mu bizunga bebibi ko. Tuuka mimvu mimingi, nii na mayindu mu kwiza luvunga,24mpe bu naakwenda ku nsi yi Esipani, nii na kivuvu mu luyena bu nahyoka, na mu tambula lusadusu lweno mwanki nenda koko, ku manima me hyokisa mwa ntangu ha kimosi neeno.25Kansi bwabu, nenzi ku mbanza yi Yelusalemi mu sadisa balongo baa koko.26Mu dyambu ti, bantu ba bizunga bi Masedwani na Akayi, babongidi nzengolo ye yonzika minkayulu mye sadisila bamputu baa ha kati di balongo ba mbanza yi Yelusalemi.27Bayeni ti bumbote budi, mpe mfuka yi yawu yiba nawu. Mu dyambu ti balembolo ba Bayudayo, bu batambula ndambu yi bimvwama bi kimpeve bi Bayudayo, yawu mpe bafweti basadisa mu mvwilu zawu.28Bu naatumbu manisa musamu bewuwu, na bu nabahaana minkayulu mi bayonzikidi, mbo naahyokila ku kweno mu kwenda ku nsi yi Esipani.29Nazebi ti, bu nina kwiza lu vunga, nina kwiza wufuluka mu lusakumunu lu Klisto.30Mpangi zani, nina lulomba mu nkumbu Mfumu eto, Yesu-Klisto na mu luzolo lu Mpeve Yilongo, lunwana ha kimosi naani bu luna sambila ku Nzambi mu dyambu dyani.31Sambileeno, mwanki nalembolo bwa mu moko ma bantu ba kizunga ki Yuda bakwe lembolo kwikilanga Klisto, mpe balongo ba mbanza yi Yelusalemi batambula bumbote lusadusu lu nina banatina.32Bwabobo naalendila mu kwiza wufuluka mu kyese ku yeno, tala ti Nzambi tiidi, mpe naabaka mwa ntangu ye huma ha kimosi neeno.33Bika Nzambi yi kiyenge kaba na yeno bamvimba! Ameni!Wycliffe Bible Translators, Inc.