2 TESALONIKA1
Zimbote
1Meno Pawuli, Sila na Timote,Tusonikini ku dibundu dii ku mbanza yi Tesalonika divwihulu ku Nzambi Tata dyeto na ku Mfumu Yesu-Klisto.2Bika Nzambi Tata dyeto na Mfumu eto Yesu-Klisto kalusakumuna na kaluhaana kiyenge!
Kilumbu ki mfundusu yi nza
3Zimpangi, tufweti tatamana mu vutulanga matondo ku Nzambi mu dyambu dyeno. Bumbote budi ti tuhidika bo, kadi kiminu kyeno kina toma kula, mpe luzolo luu na kadi muntu mu zimpangi luna toma sampa.4Ni hahoho, tuna luzonzila mu kyese ku Mabundu ma Nzambi, mu dyambu ti ludi bakangama nakekete mu kiminu, mpeleko zimfyetokoso na nzomono zimvimba zi luna vibidila.5Kyo ni kidimbu kina lonka ti mfundusu yi Nzambi yidedakana yidi, mwanki luba bantu balunga mu kimfumu ki Nzambi, ki luna kwe yeniningi mpasi.6Nzambi wulunungu kadi: waavutula mpasi ku bantu bakwe luyenisanga mpasi,7mpe waahaana ku yeno luna yena mpasi mvundulu ha kimosi neto, mu ntangu Mfumu Yesu yi kaayenika ku mazulu na zimbazi zandi zilulendo,8ha kati di milaka mi tiya, mu haana nsembolo ku yobobo balembolo zaba Nzambi na yobobo bakwe lembolo tumiminanga Musamu Wumbote wu Mfumu eto Yesu-Klisto.9Nsembolo yi baabaka ni mfuukulu yi mimvu ka mimvu, kitatu na Mfumu mpe kitatu na lulendo lu nkembo andi.10Myaahilama mu kilumbu bekyokyo ki kaakwiza. Baamukembisa na baamusiika ku bantu bavwihulu ku Nzambi na bakwe sanga kiminu kyawu mu yandi. Mpe ni yeno lukwikidi mu kimbangi ki tulusamunini.11Ni hahoho tuna tatamana mu lusambidilanga. Tuna lomba ku Nzambi eto kalulungisa mu mbokolo yi lutambula ku yandi, mpe mu lulendo lwandi, kalusadisa mu lungisa nsatu zeno ze hidika misamu mimbote, na kiminu kyeno kitoma sala.12Bwabobo, nkumbu yi Mfumu eto Yesu-Klisto yaakembosolo ku yeno, mpe yandi kaalukembisila. Bonso budi lusakumunu lukwe haananga Nzambi eto na Mfumu Yesu-Klisto.Wycliffe Bible Translators, Inc.