1 KOLINTO5
Kinsuza mu Dibundu
1Bantu bana kwe zonzi mu bifulu bimvimba ti luna kwe sadidi kindumba ha kati dyeno, kindumba kihyokidi kitezo, kyo kilembolo ba ku bakwe lembolo kwikilanga! Mpe bantu bana kwe te ti wumosi mu yeno wuna kwe se kindumba na mukento wu tata andi!2Mpe luna kitumpidika! Wufweti toma luyenisa kyadi kikingi. Muntu wuhidikidi musamu wu bobobo, nganunu lumukumini ha kati dyeno.3Mu meno, mu kimuntu nii neeno kintwadi ko, kansi mu mpeve nii neeno, mpe nameni fundisa yondowo wuhidikidi musamu wubobo, bonso ti nii kwa neeno kintwadi.4Bu lwaakutakana, mu nkumbu yi Mfumu eto Yesu-Klisto, naaba neeno kintwadi mu mpeve na mu lulendo lu Mfumu eto Yesu-Klisto.5Muntu bewowo lufweti muyekola ku Satana, mwanki nsuni andi yifukila, mpe mpeve andi yivuuka mu kilumbu ki Mfumu.6Ka wuu musamu we kitumpidika ko! walutomini zaba ti: «Mwa kima kikwe vimbisanga kiputi kivimbisi kiputi kimvimba ki mampa.»7Seeno ti luba bavedila mu katula kima kinkulu kikwe vimbisanga kiputi ki mampa, mwanki kikituka kiputi kimoona, mu dyambu ti lusiidi na kima kikwe vimbisanga kiputi ki mampa ko. Kadi Klisto ni dimeme dyeto di Pake di bahaana bonso munkayulu.8Ni hahoho, tukembileeno mukembo wu Pake, ka na mampa maa na kima kinkulu kikwe vimbisanga kiputi ko, kima ki misamu mimbi na mimbalu, kansi na mampa malembolo ba na kima kikwe vimbisanga kiputi ki mampa, ni mu ba wuvedila na kikedika.9Mu mukanda ani wutekila, nalusonikina mu lembolo ba kintwadi na yobobo bakwe sadilanga kindumba.10Nazonzila bantu bamvimba bakwe sadilanga kindumba mu nza beyiyi ko, yobobo baa na nzinunu, bamivi, hoti bakwe sambilanga biteki. Tala ti kabobo ko, nganunu luketi totoka mu nza beyiyi.11Kansi nalusonikini ti lubandi kintwadi na muntu wuna kibika ti mu Klisto kadi, kansi wuna sadila kindumba, nzinunu, kusambila biteki, kutola bantu, kinkolo mbungu hoti mwivi. Muntu wubobo lulendi dya ha kimosi nandi ko.12Kadi ni meno mfweti fundisa bantu balembolo ba kintwadi na Klisto e? Ka ni bantu baa mu dibundu dyeno ko lufweni fundisa e?13Mpe yobobo baa ku mbazi, Nzambi waabafundisa, mu dyambu ti wusonama: «Kumeeno ha kati dyeno muntu wumbalu.»Wycliffe Bible Translators, Inc.