BYAPHY1
1E ccauh tuh Jesu Khri kya-e byaphy nynh thua, aro mawze solei yn cyihkuh cih paw uccaw hae kha a ryalahtu hae kalan langsahpya khylan Pachia nynh Khri kalan a pyapaw byaphy nynh thua. Khri nynh a vaaw ccungccapaw kha saw zah a seepaw Johan kha tuh-e byaphy tuh a nysah.2Johan nynh Pachia bya te Jesu Khri kya-e ccaekia te a muihpaw balyn kha ccaekia a khan.3Hynh-e profehbya hae hynh a ria paw, a thae hae paw te tuin kya azeikuhpaw kha a zui hae paw tuh hythuaccou hae paw nynh thua hae; pawccecize accyh tuh anae vae.
Khriccaawbuu Buu Sari kalan Beihlangnaw4Kae, Johan nynh Asia ram kya umpaw khriccaawbuu buu sari kha kae beihlang oh. Atu lya a umpaw, langmawlya a la um vae paw te malang zemah a um cih paw amaw kyate thuasah, a bawitungkhung malang a um hae paw muisaw hae ccangsari kyate thuasah,5a lungzipaw ccaekia a thuapaw, a chih hae paw kyate masaty yn puipaw te laephi siapharan hae uktu bawi athuapaw Jesu Khri kyate thuasah thawccinaw te daenaw tuh nae tungvaw la um sah. Aening kha oun sungsah zah a chiise te aening seinaw balyn kha oun luesahpaw,6aening hanlan peenaw kha oun raepah zah a Paaw te a Pachia malang khe ranpibawi hae lang oun raetupaw tungvaw kya phu-enaw te uknaw kaw tuh zungzae te zungzae cia la um sah. Amen.7Dotua oh, Khri tuhmaeking te nynh yn thua,ccungccaw miakaw te amawa thuingtu hae nynhamaw kha a muih cih hae;laephi vaw e minphuin hae balyn tuhamaw keiccuzea rah a khui cih hae.Ou tuhmawte nynh thua, Amen.8Bawipaw Pachia nynh, “Kae tuh Alfa te Omega nynh ka thua,” a ci. Aning tuh atu lya a umpaw, langmawlya a la um vae paw te malang zemah a um cih paw, Athung Huaccepaw nynh thua.
Johan Vizin kya-e Khri9Jesu Khri kya-e vawsawrunaw, peenaw te ngaesangnaw kya nanning ry a mungkuh buapaw, nae upaw kae, Johan tuh Pachia bya keiccu te Jesu Khri ccaekia lang ka tang keiccuze Patmos cikuhpaw tuikoih kya ka um.10Bawipaw Nin kya kae tuh Muisaw kya ka um zah, ka nulang khe mungkae roi hawte myarya accaepaw roi kha ka thae.11Tuh-e roi nynh, “Na muihpaw kha ccauh kya zei lah, Asia ram e Efesa khua, Smyrna khua, Perkamum khua, Thiatira khua, Sardis khua, Filadelfia khua te Laodisia khua kya umpaw khriccaawbuu buu sari kalan ky hae,” a ci.12Bya yn hopah zah roi a sawtupaw kha muih khylan he ka maeleihkuh tuh, sui maeekhuatung ccangsari,13te maeekhuatung ccangsari angaelung khe Ccungccaw Ccapaw alopaw lu kheit kha ka muih; tuh-e paw tuh angkiccua kha kikuh zah a by kyakhe sui taeccia te a cciakuh.14A lu te a sang tuh tuuming te vuiraw hawte araw; a mit tuh maeesoi hawte nynh thua.15A ccu tuh maeesopi kya a phung vae hae paw thyaararihpaw sohin nynh alo, a roi tuh tuiphue patae roi accaepaw nynh alo.16A ranglang kuih kya awsi ccangsari a ccyng; a khalang lungkhu te kyn ning mawte ahepaw thaloi a pou; a maesue tuh thawzung phe beih lante apawpaw khuanin hawte nynh thua.17Amaw kha he ka muih tuh, a cculeihpaw khe achihpaw hawte ka khuliakuh. Thuasalama a ranglang kuih kha ka tungvaw khe khang zah, “Rih nan, kae tuh masaty te nyathyakou nynh ka thua;18a hiinpaw mah ka thua; kae tuh ka la chih, thuasalama dotua, kae tuh zungzae te zungzae cia po a hiinpaw nynh ka thua, Chinaw toh te Michi khua toh kha ka hoi.19Tukeiccuze na muihpaw uccaw hae, atu lya a umpaw uccaw hae te malang yn cyihkuh cih paw uccaw hae kha zei.20Ka ranglang kuih kya na muihpaw awsi ccangsari te sui maeekhuatung ccangsari nynh a ho rypaw byakhupaw tuh hynhte nynh thua: Awsi ccangsari tuh khriccaawbuu buu sari kya-e vaaw hae nynh thua; na muihpaw maeekhuatung ccangsari tuh khriccaawbuu buu sari kha nynh thua. Efesa Khriccaawbuu kalan Byataw1“Efesa khua umpaw khriccaawbuu kya-e vaawpaw kalan hynhte zei: A ranglang kuih kya awsi ccangsari a ccyngtupaw, sui maeekhuatung ccangsari hae laku kya a cceihtupaw nynh hynhte a ho.2“Na ryalaw hae, thawte rya na lawpaw te na ngaesangnaw hae kha ka ny, ccungccaw hoylei hae paw kha na ngaesangpah khyh hae cipaw kha thuasah, locceihtu hae nynh kae thua a ci hae zemah locceihtu athua lei hae paw kha akaw-aleih bya na khia hae zah mihyn hae nynh athua hae cipaw kha thuasah nang nynh phe na muih cipaw ka ny;3nang tuh ngaesangnaw na hoi zah ka min keiccuze na teing zah na lungthawthang khyh cipaw ka ny.4Thuasalama nang kha kae ccaenaw a um, pawccecize masaty na hoipaw sungsahnaw kha phe na cciataw vae.5Tukeiccuze paw kyate nynh ka khuliaku cipaw kha liathui lah, ngaesikute masaty e na ryalaw kha lawtua. Tukhyhze tuh na kalan arangte kae thua cih zah na ngaesikuh khyh ze, na maeekhuatung kha a umnaw kyate kae nuepah cih.6Thuasalama poo lan na ccannaw a um, kae nynh mah ka huapaw Nikolas zuitu hae mih cyisahnaw kha nang nynh na hua.7Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah. A taetupaw tuh Pachia kya-e paradis kya umpaw hiinnaw thingthae kha aenaw kaw ka pya cih.
Smyrna Khriccaawbuu kalan Byataw8“Smyrna khua kya umpaw khriccaawbuu kya-e vaawpaw kalan hynhte zei: Chih zah bua a hiinpaw, masaty te nyathyakou athuapaw nynh hynhte a ho.9“Na vawsawnaw te na ryachinaw kha ka ny. Thuasalama nang tuh a hoirumpaw nynh na thua. Judah hae nynh kae thua a ci hae zemah athua lei hae paw, Satan ccungccaw athua hae paw nynh na thethya ae ho hae paw kha ka ny.10Na teing lanpaw vawsawnaw kha rih nan. Dotua, nanning tuh syntawnaw teing khylan Satan nynh nanning kyaze abang kha thonginn lungkhu lang a sang cih hae, te nin haw lungkhu vawsawnaw na tung cih oh. Nang tuh chinaw kyacia a lungzipaw la thua, tuhteze tuh hiinnaw bawilukhung kha kae pya cih.11Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah. A taetupaw tuh vaening chinaw kha teing vae lan khyh.
Perkamum Khriccaawbuu kalan Byataw12“Perkamum khua kya umpaw khriccaawbuu kya-e vaawpaw kalan hynhte zei: Kyn ning te ahepaw thaloi a hoitupaw nynh hynhte a ho.13“Na umnaw hmin kha ka ny, tuin kya Satan bawitungkhung a um. A lungzipaw ka ccaekia Antipas tuh Satan a umnaw hmin athuapaw nanning laku chia athua nin kya heize nang tuh ka min kha tynkaring lan na kyngkuh zah kae nae zynnaw kha na vua khyh.14Thuasalama nang kha kae ccaenaw ccapyh a um. Pawccecize nae laku kya Balaam ccangpyanaw a kyngkuh hae paw abang a um hae; Israel hae nynh zohtuh hae kalan silawnawpaw uccaw hae kha ae khylan te ohhuakunaw rae khylan mih malang khe thykunawpaw kha nungkhaw khylan Balaam nynh Balak kha a ccangpya.15Tuhawte nae laku kya Nikolas ccangpyanaw a kyngkuh hae paw a um hae.16Tukeiccuze ngaesikuh, na ngaesiku khyh ze, na kalan arangte kae thua cih zah ka khalang kya-e thaloi khate minmin kha rhaw ka tuk cih hae.17Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah. A taetupaw kha thuruhpaw manna sanlou abang kha ka pya cih, arawpaw lung kha mah ka pya cih, tuh-e lung vawlan khe min thawpaw azeikuh, tuh-e min kha tuh-e lung a muepaw laelan hum nynh san nyh khyh.
Thiatira Khriccaawbuu kalan Byataw18“Thiatira khua kya umpaw khriccaawbuu kya-e vaawpaw kalan hynhte zei: Maeesoi alopaw mit a hoitupaw, thyaararihpaw sohin alopaw ccu a hoitupaw Pachia Ccapaw nynh hynhte a ho.19“Na ryalaw hae, na sungsahnaw, na zynnaw, rya na lawpyanaw te na ngaesangnaw kha ka ny; nyalang e na ryalaw tuh masaty e laeze alunghua cipaw ka ny.20Thuasalama nang kha kae ccaenaw a um; pawccecize ka rya yn lawpatu hae kha ohhuakunaw raesah khylan te zohtuh hae kalan silawnawpaw kha aesah khylan ccangpyate hynpah hae zah amaw te amaw kha profehnung a cikuhnung Jezebel kha nang nynh kaw na ua.21A ohhuakunaw konglang te ngaesikunaw ccyh ka pya zahmah aning nynh ngaesiku lan phe mya.22Dotua, amaw kha ikhung vawlan ka vua cih, te amaw ryte a seikheih hae paw kha mih cyisahnaw a ngaesiku khyh hae lanze, myarya lepaw vawsawrunaw lungkhu lang ka vua cih hae.23A ccaaw hae kha chinaw te ka theih cih hae. Kae tuh tuanaw te thinlung a ccungtu nynh ka thua cipaw kha khriccaawbuu hae balyn nynh yn nyh cih hae; nanning milu raveih kha nae ryalaw thyhte kae pya cih oh.24Thuasalama nae kalan te Thiatira khua kya umpaw tuhlaepaw hae kalan kae hopya oh, tuh-e nopinung ccangpyanaw kha a kyngkuh lei hae paw te ‘Satan kya-e akhupaw uccaw hae,’ cite abang nynh a ho hae paw kha mah a nyh lei hae paw nanning nae tungvaw kya ccangpaw phupaw kha kae khang vae lan khyh oh.25Na hoi oh paw kha kamaw kae thua cia varyng kyngkuh oh.26Taetu athuapaw te athangnaw cia ka ryalaw a lahpaw tuh,minphuin hae tungvawkawhoinaw kha ka pya cih;27aning nynh minmin khasivaw hoitang te a uk cih hae;laephi ang kha zoihtatyh lankoi hawte minmin khaa koi cih hae; tuh-e tuhkae nynh ka Paaw kyateka muepaw kawhoinaw te alokuh,28tuh-e paw tuh nizy awsi kha mah ka pya cih.29Muisaw nynh khriccaawbuu hae kya a hopaw kha nakaring a hoipaw ccungccaw tuh thae sah.
Sardis Khriccaawbuu kalan Byataw1“Sardis khua kya umpaw khriccaawbuu kya-e vaawpaw kalan hynhte zei: Pachia kya-e muisaw ccangsari te awsi ccangsari a hoitupaw nynh hynhte a ho.
“Na ryalaw hae kha ka ny. Nang tuh na hiin cite min na hoi zemah na chih cipaw ka ny.2Ngawrandotua, na chi maw hin na hoi ungpaw thawzung kha lawku tua; pawccecize Pachia malang na ryalaw hae tuh accing cite ka muih khyh.3Tukeiccuze ae ccangpyapaw te na thaepaw miakaw kha liathui lah varyng kyngkuh, te ngaesikuh. Tukeiccuze ngawran na do khyh ze, miruh hawte na kalan kae thua cih zah hohtuh ccyh nynh na kya kae thua cih cipaw na nyh lan khyh.4Sardis khua kya mih boeining athu leipaw ccungccaw hae ccapyh na hoi hae; minmin tuh angaekuhpaw athua hae keiccuze boeining rawpaw lawkute kamaw ryte a cceihbua cih hae.5A taetupaw tuh boeining rawpaw kha lawsahku athua cih, hiinnaw ccauh kyate a min kha ka thee vae lan khyh, ka Paaw malang te a vaawccungccaw hae malang a min kha ccaekia ka khan cih.6Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah.
Filadelfia Khriccaawbuu kalan Byataw7“Filadelfia khua kya umpaw khriccaawbuu kya-e vaawpaw kalan hynhte zei:Athyaapaw, ahmepaw,David kya-e toh a hoitupaw,hum nynh san a khaw kho lei lana hungtupaw, te hum nynh sana hung kho lei lana khawtupaw nynh hynhte a ho:8“Na ryalaw hae kha ka ny. Dotua, hum nynh san a khaw kho leipaw thuakaw ahungkuhpaw kha na malang ka nung vae. Pawccecize nang tuh thawzung ccapyh nynh na hoi cipaw ka ny, ka bya kha na ccykekuh zah ka min kha na vua khyh.9Dotua, Judah hae nynh kae thua cite ho hae zah athua lei hae paw mihyn hae kha Satan ccungccaw hae lang ka rae cih hae. Dotua, na cculeihpaw kya bakhung sah khylan te nang kha kae sungsah cipaw nysah khylan minmin kha na kalan kae thuasah cih hae.10Ngaesangnaw te asekuhpaw ka bya kha na ccykeku keiccuze laephi vawlan a um hae paw kha syntawtua khylan, laephi pynpi kya yn thua vae cih paw tuhounaw ccyh kyate nang kha kae khynsah cih.11Kae tuh arangte kae thua vae cih. Hum nynh sanmah na bawilukhung kha ae luade khyh nawlan, na hoi vae paw kha varyng kyngkuh.12A taetupaw kha ka Pachia beikinn kya tungpi lang ka rae cih, aning tuh atolang kharouh pou vae lan khyh. ka Pachia min te ka Pachia khuapi min kha a tungvaw khe ka zei cih; tuh-e khuapi tuh ka Pachia kyate vaawlang te yn rungbungpaw, Jerusalem thawpaw nynh thua; ka min thawpaw kha mah a tungvaw khe ka zei cih.13Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah.
Laodisia Khriccaawbuu kalan Byataw14“Laodisia khua kya umpaw khriccaawbuu kya-e vaawpaw kalan hynhte zei: Pachia kya-e raenaw athonaw athuapaw, a lungzipaw te ahmepaw ccaekia athuapaw Amen nynh hynhte a ho.15“Na ryalaw hae kha ka ny. Nang tuh kyaa mah na kyaa khyh, so mah na so khyh. Nang tuh na kyaa ze kyaa, na so ze so ci ka ry.16Tuhcite nang tuh kyaa mah kyaa lei, so mah so lei, lalungpaw na thua keiccuze ka khalang kyate kae thoi vae cih.17Nang nynh, ‘Kae tuh ka hoirum, ka dunghoy zah pawsang mah ka hobounaw um vae khyh,’ na ci keiccuze nang tuh myarya a riathaepaw, thawcci lan umpaw, a ryachipaw, a mitmohpaw te ccakaete a umpaw na thuapaw kha na nyhkuh khyh.18Tukeiccuze nang kha hynhte tuanaw kae pya: nang tuh na hoirum ccaw, maee kya thyaasah vae paw sui kha kamaw kya-e rekuh, na ccakaete na umpaw maethyanaw kha a langku khyh nawlan boeining na lawku ccaw, boeining arawpaw kha kamaw kya-e rekuh; te ngaw na muih nawlan na mit kha sii na thuhku ccaw, kamaw kya-e rekuh.19Ka sungsahpaw ccungccaw hae kha ka pe hae zah ka thuihei hae, tukeiccuze na lungtho sah lah, ngaesikuh.20Dotua, kae tuh thuakawzung khe ka thadyn zah ka khua. Ccungccaw lukhakheit nynh ka roi thae zah thuakaw yn hungpya ze, tuh-e paw kalan ka tee cih zah looh kae aekheih cih, aning mah kamaw ryte kae aekheih cih.21Kae tuh taetu ka thua zah ka Paaw ryte a bawitungkhung vawlan kae haung hawte, taetu athuapaw tuh ka bawitungkhung vawlan kamaw ryte haungnaw kaw ka pya cih.22Muisaw nynh Khriccaawbuu hae kalan a hopaw kha nakaring a hoipaw ccungccaw tuh thae sah,” yn cipya.
Vaawlang kya Pachia Beiknaw1Hynh-e koute ka do zah vaawlang kya thuakaw ahungkuhpaw kha ka muih. Masaty ka thaepaw roi tuh mungkae roi hawte bya yn hopahpaw roi nynh thua; tuh-e roi nynh, “Hynhlang yn kaethung lah, hynh-e koute yn cyihkuh lanpaw kha kae muihsah cih,” yn cipya.2Vaekheihmawte kae tuh Muisaw kyakhe ka um. Dotua, vaawlang kya bawitungkhung ccangkheit um zah, tuh-e bawitungkhung vawlan ccungccaw lu kheit a haung.3Tuh-e a haungpaw tuh jasper lung te sardias lung hawte nynh alang. Bawitungkhung po voilu lan emerald lung te alokuhpaw sawdoih a um.4Tuh-e bawitungkhung po voilu lan ccangpaw bawitungkhung hae ccangkuin lae pali a um. Tuh-e bawitungkhung hae vawlan piccan hae lu kuin lae pali tuh boeining rawpaw lawkute a haung hae paw kha ka muih. Minmin tuh mih lu kya sui lukhung a khungkuh hae.5Bawitungkhung kyate khozawlaepaw, riakawpaw te roiccaepaw hae a pou; te bawitungkhung malang khe Pachia kya-e muisaw ccangsari athuapaw, maeekhua ccangsari a awkuhpaw a um hae.6Bawitungkhung malang khe lung-awmatei te alokuhpaw muinsado rili a um. Bawitungkhung angaelung te a pepan khe nulang malang te mit te phe beihpaw ahiinpaw sarangpaw sa pali a um hae.7Masaty ahiinpaw sarangpaw tuh chindeih te lokuh zah, ccangningnaw ahiinpaw sarangpaw tuh vaetuataw te nynh aloku. Ccangthumnaw ahiinpaw sarangpaw tuh ccungccaw hawte mitmae hoi zah, ccangpalinaw ahiinpaw sarangpaw tuh mosipi azoupaw te nynh aloku.8Tuh-e ahiinpaw sarangpaw sa pali tuh sake ccangtaruh cci a hoi hae. Atolang te alungkhu lang tuh mit te phe beih hae, minmin nynh,“Athyaa, athyaa, athyaa,Athung huaccepaw Bawipaw Pachia,atu lya a umpaw, langmawlyaa la um vae paw te malang zemaha um cih paw nynh thua,”cite khuazi khuadae apaekuh lei lan hlaw a sah hae.9Bawitungkhung vawlan a haungpaw, zungzae te zungzae cia a hiinpaw kalan khe tuh-e ahiinpaw sarangpaw hae nynh phu-enaw te sawtuanaw kha pya hae zah lungtuabya he a ho hae tuh,10bawitungkhung vawlan a haungpaw malang khe piccan hae lu kuin lae pali tuh bakhung hae zah zungzae te zungzae cia a hiinpaw kha a beik hae, te bawitungkhung malang khe mih bawilukhung hae kha nungsya hae zah,11“Pou Bawipaw, nang tuh phu-enaw,sawtuanaw te huhan khamue lan na ngaekuh;pawccecize pawpaw balyn khana rae vae, tuh-e hae tuhna rynaw hawte rae thua zah a um hae,”a ci hae. Ccakue te Tuutaw1Alungkhu lang te anulang ccawzeikuh zah tazeih ccangsari te khia athuapaw ccakue ccangkheit kha bawitungkhung vawlan a haungpaw a ranglang kuih kyakhe ka muih.2A thawsaepaw vaawpaw nynh, “Tuh-e ccakue kha daw lan te tazeih hae kha ro lan hummou a ngaekuh?” cite thawte khua-opaw kha ka muih.3Tuh-e ccakue a daw kho lanpaw te a do kho lanpaw tuh vaawlang kya thuasah, laephi vaw thuasah, lae kaw lang thuasah hum sanmah um khyh.4Tuh-e ccakue tuh daw lan, ria lan te do lan angaekuhpaw hum sanmah muih lan a um khyh keiccuze thawte ka rah. Khri nynh Ccakue A Daw5Piccan hae kyaze lukheitpaw nynh, “Rah nan, dotua, Judah phin kya-e Chindeih, David Tharui nynh a tae vae, ccakue kha daw kho zah tuin kya-e tazeih ccangsari kha a ro kho vae,” cite kae kha yn hopya.6Kae nynh ka do zah bawitungkhung te ahiinpaw sarangpaw hae sa pali angaelung kya te piccan hae angaelung kyakhe a chia vae hae paw hawte athuapaw Tuutaw a thadynpaw kha ka muih; tuh-e Tuutaw tuh ki kisari te mit ccangsari hoi zah, tuh-e hae tuh laephi pynpi kalan sawpaw Pachia kya-e muisaw ccangsari nynh thua.7Tuutaw nynh cceih zah bawitungkhung vawlan a haungpaw a ranglang kuih kya-e ccakue kha a law.8Tuhte ccakue kha he a lah tuh, ahiinpaw sarangpaw hae sa pali te piccan hae lu kuin lae pali nynh tintang kha thuasah, mithyaa hae sawsangnaw athuapaw mynkhuhpaw te phe beihpaw sui pakekhupaw hae kha thuasah ccarou ccyngkuh hae zah Tuutaw malang khe a bakhung hae.9Minmin nynh hlaw thawpaw kha sah hae zah,“Nang tuh ccakue kha law lan teccakue kya-e tazeih hae khakia lan na ngaekuh,pawccecize nang tuhchia na thua zah na chiise liatephin miakaw, bya miakaw,minphuin miakaw teram miakaw kya-e ccungccaw hae khaPachia hanlan na shawkhaw hae.10Minmin kha kae Pachia hanlansiapharan lang te ranpibawi langna rae hae zah, minmin nynhlaephi hynh a uk cih hae,” a ci hae.11Ka do zah bawitungkhung, ahiinpaw sarangpaw hae te piccan hae pepan khe vaaw hae patae roi kha ka thae, tuh-e vaaw hae tuh riatae lei, athong-asan acih hae.12Minmin nynh,“Chia athua vae paw Tuutaw tuhthungnaw, hoirumnaw, hawnaw,thawzung, sawtuanaw, phu-enaw tehythuanaw kha ccou lan a ngaekuh,”cite roi accae lante a ho hae.13Vaawlang, laephi vawlan, laephi kaw, rili te pawpaw kya balyn a um hae paw ahysuepaw miakaw nynh,“Hythuanaw, sawtuanaw,phu-enaw te thungnaw tuhbawitungkhung vawlana haungpaw kya te Tuutaw kyazungzae te zungzae cia um sah!”a ci hae paw kha ka thae.14Ahiinpaw sarangpaw hae sa pali nynh, “Amen!” a ci hae. Piccan hae lu kuin lae pali nynh bakhung hae zah a beik hae. Tazeih Ccangsari1Tuutaw nynh tazeih ccangsari kya-e ccangkheit a kiapaw kha ka muih, ahiinpaw sarangpaw hae sa pali kyaze sa kheit nynh riakawpaw roi hawte, “Rang lah yn do,” a cipaw kha ka thae.2Ka do zah marang arawpaw sa kheit kha ka muih, tuh-e marang tungvaw a ccikuhpaw nynh li kha a ccyngku; amaw kha bawilukhung a pya hae, aning tuh rhaw a tae lalia lante rhaw tae lan po a cceih.3Tuutaw nynh ccangningnaw tazeih kha he a kia tuh, ccangningnaw ahiinpaw sarangpaw nynh, “Yn cceih!” a cipaw kha ka thae.4Ccangpaw marang sekakingpaw po yn pou; tuh-e marang tungvaw a ccikuhpaw tuh ccungccaw hae nynh lu kheit te lu kheit a chiaku ccaw hae cite laephi kyate daenaw kha lawnaw kaw a hoi, tuh-e paw tuh thaloi pipi kha pya athua.5Ccangthumnaw tazeih kha he a kia tuh, ccangthumnaw ahiinpaw sarangpaw nynh, “Yn cceih!” a cipaw kha ka thae. Ka do zah marang amanpaw sa kheit kha ka muih, tuh-e marang tungvaw a ccikuhpaw nynh a kuih kya zawccu kha a ccyngku.6Ahysuepaw sa pali angaelung kyate yn ccaepaw roi alopaw nynh, “Chanvuih kilo ccangkheit ze denari kia kheit, barli kilo ccangthum ze denari kia kheit nynh thua; chitui te misutui kha rosah nan,” a cipaw roi kha ka thae.7Ccangpalinaw tazeih kha he a kia tuh, ccangpalinaw ahiinpaw sarangpaw nynh, “Yn cceih!” a cipaw roi kha ka thae.8Ka do zah marang puakakaepaw sa kheit ka muih, tuh-e marang a ccikuhpaw a min tuh Chinaw cikuh zah Hell nynh a nulang te a zui. Minmin tuh laephi pum pali pum kheit kha uknaw kaw hoi hae zah, thaloi te thuasah, ccakannaw te thuasah, chinaw te thuasah, laephi kya-e sarepaw hae te thuasah ccungccaw hae kha chianaw kaw a hoi hae.9Ccangpangawnaw tazeih kha he a kia tuh, Pachia bya keiccu thuasah, ccaekia a khan hae keiccu thuasah a chia hae paw mih muisaw hae kha silawhang kaw khe ka muih;10minmin nynh, “Athyaapaw te ahmepaw, pou Bawipaw, laephi vawlan a um hae paw hynh kaening chiise mee lang hohseciamou byapia leite, liaru leite na um cih?” cite thawte a sia hae.11Minmin lu raveih tuh arawpaw angkiccua kha pya athua hae, mimaw hawte chia athuabua cih hae paw, mimaw ryte ryalahkheih hae paw te mih uno hae kha milu accing makhia sosoh haeung lan a hopya hae.12Ccangtaruhnaw tazeih kha he a kia tuh, ka do zah myarya rupaw innrysuekuhpaw a um; khuanin tuh saming te kuakuhpaw buriboei hawte man zah, sawpaw tuh chii hawte ase.13Khisan arupaw nynh thaeku ku kha he a mung vae ze, accyh zaw leite thaeku thae a khuaku hawte vaawlang e awsi hae tuh laephi vawlan a ccah hae.14Vaawlui tuh ccakue kue hawte a zo; mua miakaw te tuikoih miakaw tuh mih umnaw kyate a nuekuh hae.15Tetuh laephi siapharan hae, a minthaanpaw ccungccaw hae, a hoirumpaw ccungccaw hae, rhawbawi hae, alesaepaw ccungccaw hae, see hae te aluepaw ccungccaw hae balyn tuh laekarung hae te mua e lungpi hae kyakhe a rekuh hae.16Minmin nynh mua hae te lungpi hae kha, “Kaening hynh oun tingthin oh lah, bawitungkhung vawlan a haungpaw a mae te Tuutaw thinrianaw kyate oun khaw oh.17Pawccecize mih thinrianaw nin pi tuh yn thua vae zah, hum nynh mou a ing kho cih?” a cipya hae. Israel hae 144,000 Tazeihkhia Thua hae1Tukoute laephi ki kipali kya a thadyn hae paw vaaw hae lu pali nynh laephi vawlan, rili vawlan te thingku hae kha khisan nynh mung nan sah cite laephi san pali kya-e khisan hae phang a kyng hae paw kha ka muih.2Ahiinpaw Pachia kya-e tazeih a hoipaw, nithua langte yn kaethungpaw, ccangpaw vaawpaw kha ka muih; tuh-e paw nynh laephi te rili kha vawsaw pya khylan kaw a mue hae paw vaaw hae lu pali kalan khe thawte sia zah,3“Ah Pachia see hae kha mih terui kya tazeih ah khia mawlaezung oh, laephi thuasah, rili thuasah, thingku hae thuasah vawsaw pya nan oh,” a cipya hae.4Tukoute tazeihkhia athua hae paw milu ccazing kha ka thae; Israel ccungccaw hae kya-e phin balyn kyate thong za kheit sung pali thong pali kha tazeihkhia athua hae.5Judah phin kyate thong haw lae ning kha tazeihkhia athua hae, Reuben phin kyate thong haw lae ning, Gad phin kyate thong haw lae ning,6Asher phin kyate thong haw lae ning, Naftali phin kyate thong haw lae ning, Manasseh phin kyate thong haw lae ning,7Simeon phin kyate thong haw lae ning, Levi phin kyate thong haw lae ning, Issakhar phin kyate thong haw lae ning,8Zebulun phin kyate thong haw lae ning, Josef phin kyate thong haw lae ning, Benjamin phin kyate thong haw lae ning
kha tazeihkhia athua hae. Ram Takyh kyate Ccungccaw Patae9Tukoute ka do zah ram takyh, phin takyh, minphuin takyh te bya takyh a ho hae paw kyate riatae leipaw ccungccaw zapi pi tuh bawitungkhung malang te Tuutaw malang khe a thadyn hae; minmin tuh arawpaw angkiccua kha lawkuh hae zah mih kuih kya sarutah ange hae kha ccyng biate,10“Khumnaw tuh bawitungkhung vawlana haungpaw ah Pachia teTuutaw kya nynh a um,”cite roi accae lante thawte a sia hae.11Bawitungkhung pepan, piccan hae te ahiinpaw sarangpaw sa pali pepan khe vaaw hae balyn tuh a thadyn hae, bawitungkhung malang khe bakhung hae zah Pachia kha a beik hae.12“Amen! Hythuanaw, phu-enaw,hawnaw, lungtuabya honaw,sawtuanaw, thungnaw tethawsaenaw tuh ah Pachia kyazungzae te zungzae cia um sah!Amen,” a ci hae.13Piccan hae kyaze lukheitpaw nynh tho zah, “Arawpaw angkiccua a lawkuh hae paw hynh-e hae hynh hum hae mou? Teitemou oun thua hae?” cite kae kha yn khia.14Kae nynh, “Bawipaw, nang nynh na nyh,” ka cipya. Aning nynh kae kha, “Hynh-e hae tuh myarya lepaw vawsawrunaw kyate oun pou hae paw nynh thua hae; minmin nynh mih angkiccua kha Tuutaw chii kya sukuh hae zah a rawsahku hae.15Tukeiccuze minmin tuhPachia kya-e bawitungkhung malang kheum hae zah a beikinn kyakhekhuazi khuadae rya a lawpya hae;te bawitungkhung vawlana haungpaw tuh minmin laku khe a um cih.16Minmin tuh mih vuelawboi vae lan khyh, mih tui mahhaw boi vae lan khyh;khuanin nynh e vae lan khyh hae,maeeso nynh mah u vae lan khyh hae.17Pawccecize bawitungkhungangaelung kya a umpawTuutaw nynh minmin khaa rin cih hae zah, hiinnaw tuidy kalana cciakhae cih hae,te Pachia nynh mih mit kya-emitphi balyn kha a hupah cih hae,”yn cipya. Ccangsarinaw Tazeih1Tuutaw nynh ccangsarinaw tazeih kha he a kia tuh, vaawlang kya suimilan akhoi loukaw daetedae.2Pachia malang a thadyn hae paw vaaw hae lu sari kha ka muih, te minmin kha mungkae ccangsari a pya hae.3Ccangpaw vaawpaw nynh yn thua zah sui pakephepaw kha ccyngkute silawhang pe khe a thadyn; bawitungkhung malang a umpaw sui silawhang vawlan khe mithyaa hae balyn kya-e sawsangnaw ryte thuakhae khylan maee te upaw mynkhuhpaw patae kha tuh-e paw tuh a pya hae.4Maee te upaw mynkhuhpaw a maeekhuh tuh mithyaa hae kya-e sawsangnaw ryte vaawpaw kuih kyate Pachia malang a kaethung.5Tukoute vaawpaw nynh pakephepaw kha lah zah, tuh-e tuh silawhang kya-e maee khate phe a biasah koute laephi vawlan dae a vua; tetuh kholung yn thyh, roi yn ccae, khozaw yn laekuh zah innry yn suekuh. Mungkae Ccangsari6Mungkae ccangsari a hoi hae paw vaaw hae lu sari tuh mungkae tu lan paccynkute a um hae.7Lu kheitnaw vaawpaw nynh mungkae he a tu tuh, chii ryte apykuhpaw hya te maee palou yn um zah, tuh-e hae tuh laephi vawlan a ccah hae; laephi pum thum pum kheit kha a u, thingku hae pum thum pum kheit te lonua ahinpaw balyn kha marya a u.8Lu ningnaw vaawpaw nynh mungkae tu zah, maee nynh a upaw, myarya lepaw mua alopaw tuh rili lungkhu lang ccaring vua athua; te rili pum thum pum kheit tuh chiise lang a tang.9Rili kya umpaw ahiinpaw sarangpaw pum thum pum kheit tuh a chih hae; sanphalung hae pum thum pum kheit tuh aroh.10Lu thumnaw vaawpaw nynh a mungkae kha he a tu tuh, maeekhua hawte aruapaw awsipi tuh vaawlang te ccah zah, vawpi hae pum thum pum kheit vawlan te tuidy hae vawlan khe a ccah.11Tuh-e awsi min tuh Eccangkary acikuh. Tui hae pum thum pum kheit tuh eccangkary lang a tang; tui tuh akhahpaw lang rae athua keiccu tui keiccuze ccungccaw patae a chih hae.12Lu palinaw vaawpaw nynh mungkae tu zah khuanin pum thum pum kheit, sawpaw pum thum pum kheit te awsi hae pum thum pum kheit tuh ro athua keiccuze tuh-e hae pum thum pum kheit tuh pong amoh; khuadae pum thum pum kheit tuh aw khyh; khuazi pum thum pum kheit mah tuhawte nynh thua.13Ka do zah vaawlang angaelung kya azoupaw mosipi sa kheit nynh, “Vaawccungccaw hae lu thum nynh oun tu vae cih hae paw ccangpaw mungkae roi keiccuze laephi vaw um hae paw hanlan ngaethya lan kou um, ngaethya lan kou um, ngaethya lan kou um!” cite thawte a siapaw roi kha ka thae.1Lu pangawnaw vaawpaw nynh mungkae tu zah, awsi ccangkheit tuh vaawlang te laephi vawlan a ccawpaw kha ka muih. Adianaw um lei lan akhupaw laekarung toh kha tuh-e paw tuh a pya hae.2Aning nynh adianaw um lei lan akhupaw laekarung kha he a hung tuh, myarya lepaw maeephupi kya-e maeekhuh hawte laekarung lungkhu te maeekhuh a pouthung; laekarung kya-e maeekhuh keiccuze khuanin te vaawlui tuh pong amoh.3Maeekhuh kyate tungkhipaw hae tuh laephi vawlan oun pou hae, laephi kya-e zekang hae nynh a hoi hae paw thungnaw te alokuhpaw thungnaw kha minmin tuh pya athua hae.4Laephi kya-e lonua, ahinpaw aku te thingku ku kheit sanmah vawsawnaw pya leite, mih terui kya Pachia kya-e tazeih a hoi leipaw ccungccaw hae kyalya kha vawsaw a pya nawlan hae minmin kha kawpya athua hae.5Minmin nynh tazeihkhia athua leipaw ccungccaw hae kha chianaw kaw hoi khyh hae, thuasalama sawpaw sah pangaw cia vawsaw pyanaw kaw tuh ua athua hae. Minmin nynh vawsawnaw pya hae zah accipaw tuh zekang nynh ccungccaw a teih vae ze accipaw te nynh aloku.6Tuin ccyh kya ccungccaw hae nynh chinaw kha a ccungkuh cih hae zah muihkuh lan khyh hae; chi a ry hae zemah chinaw nynh a ccuetaw cih hae.7Tuh-e tungkhipaw hae pungsan tuh rhawtuk lan a paccyn hae paw marang hae te nynh aloku; mih lu kya sui te raepaw bawilukhung a khungkuh hae paw te lokuh zah, mih maesue tuh ccungccaw maesue te nynh aloku.8Mih sang tuh nopi hae sang te lokuh zah, mih haw tuh chindeih haw te nynh aloku.9Mih kya-e bykhaw tuh sivaw bykhaw te lokuh zah, mih sake a zaw hae paw roi tuh rhawtuk lan a ccue hae paw marangle hae patae roi te nynh aloku.10Zekang hawte leihmae hoi hae zah, mih leihmae kya hinpaw a um, tuh-e mih leihmae kyatuin sawpaw sah pangaw cia ccungccaw hae vawsaw pyanawpaw thungnaw a hoi hae.11Minmin nynh siapharan lu kheit hoi hae zah, tuh-e paw tuh adianaw um lei lan akhupaw laekarung kya-e vaawpaw nynh thua. A min tuh Hebru bya te Abaddon cikuh zah Grik bya te Apollyon acikuh.12Ngaethya lan umpaw ccangkheit tuh athang vae; dotua, hynh-e koute ngaethya lan umpaw ccangning yn thua ung cih.13Lu taruhnaw vaawpaw nynh mungkae tu zah, Pachia malang umpaw sui silawhang kya-e ki kipali kyate roi roikheit ka thae;14tuh-e roi nynh mungkae a hoitupaw lu taruhnaw e vaawpaw kha, “Myarya lepaw Zufrates vawpi kya a khii hae paw vaaw hae lu pali kha supah hae,” a cipya.15Ccungccaw hae pum thum pum kheit kha chia khylan tuh-e suimilan, tuh-e nin, tuh-e sawpaw, tuh-e kum hanlan a paccyn hae paw vaaw hae lu pali kha a supya hae.16Marang a ccikuh hae paw rhawkaw phu milu tuh million za ning acih; minmin milu ccazing kha ka thae.17Ka vizin kya marang hae kha hynhte ka muih: tuh-e marang hae tungvaw a ccikuh hae paw tuh maee hawte asepaw, ke hawte amepaw, safaia lung hawte ahinpaw bykhaw hae kha a hoi hae; marang hae lu tuh chindeih lu te nynh aloku hae, te mih khalang lungkhu te maee, maeekhuh te kemaee apou.18Mih khalang lungkhu te apoupaw maee, maeekhuh te kemaee, hynh-e phuin thum keiccuze ccungccaw hae pum thum pum kheit tuh a chih hae.19Marang hae mih thungnaw tuh mih khalang te mih leihmae kya nynh a um; mih leihmae tuh hupaw hawte lu hoi zah, tuh-e mih leihmae te ccungccaw hae kha vawsaw a pya hae.20Hynh-e shethya keiccu chi leite a laehypaw ccungccaw hae tuh raerangsaro hae kha thuasah, ngawmuih kho leipaw, nawthae kho leipaw te a cceih kho leipaw sui, ngun, sohin, lung, thingphe te raepaw zohtuh hae kha thuasah a beik khyh nawlan hae, mih kuih te a raeku hae paw hanlan ngaesikunaw hoi khyh hae.21Minmin nynh ccungccaw a chia hae paw, ccungccaw a naaw hae paw, a ohhuakunaw hae paw te a ru hae paw kha ngaesikuh khyh hae. Vaawpaw te Ccakue Taraw1A thawsaepaw ccangpaw vaawpaw tuh maeking kha zingkute vaawlang te yn rungbungpaw kha ka muih; a lu vawlan sawdoih a um, a maesue tuh khuanin te lokuh zah, a ccu tuh maee tungpi te nynh aloku.2Adawkuhpaw ccakue taraw kha a kuih kya a ccyng; a ranglang ccu kha rili vawlan sy zah a voilang ccu kha laephi vawlan a sy.3Chindeih nynh a sia hawte roi accae lante thawte a sia; he a sia koute kholungthyhpaw roi vaesari accae.4Kholungthyhpaw roi vaesari accae koute, kae tuh ccaw zei lan ka noukuh vae; vaawlang kyate roi nynh, “Kholungthyhpaw roi vaesari accaepaw uccaw hae kha tazeihkhia lah, tuh-e hae tuh zei nan,” cite kamaw yn hopyapaw kha ka thae.5Rili te laephi vawlan a thadynpaw ka muihpaw vaawpaw nynh a kuih kha vaawlang hangthung zah,6vaawlang te vaawlang kya umpaw uccaw hae, laephi te laephi kya umpaw uccaw hae, rili te rili kya umpaw uccaw hae a raetupaw, zungzae te zungzae cia a hiinpaw min phyate thyalawkuh zah, “Accyh ro vae lan khyh.7Pachia nynh a ryalahtu profeh hae kya a la ho vae hawte, lu sarinaw e vaawpaw nynh mungkae a tupaw roi he yn ccae ccyh kyakhe Pachia byakhupaw tuh yn ccing cih,” a ci.8Vaawlang e ka thaepaw roi nynh kamaw kha bua yn hopah zah, “Rili te laephi vawlan a thadynpaw vaawpaw kuih kya adawkuhpaw ccakue taraw khuh ccianua lah yn lah,” yn cipya.9Vaawpaw kalan ka cceih zah, “Ccakue taraw kha yn pya,” ka cipya. Aning nynh, “Lawkuh lah ae, na vue kya a khah cih, thuasalama na khalang kya tuh khoitui hawte a e cih,” yn cipya.10Vaawpaw kuih kya-e ccakue taraw kha ka lawkuh zah ka ae; ka khalang kya tuh khoitui hawte e zah, ccahe ka ae kou tuh ka vue kya a khah.11Aning nynh, “Ccungccaw hae patae, minphuin hae, bya hae te siapharan hae kalan khe profehbya bua na ho hahe cih,” cite yn hopya. Ccaekia Lu Ning1Tukoute hoitang alopaw tounawpaw ccungngue ccangkheit kha yn pya zah, “Thokuh lah, Pachia beikinn te silawhang kha la tou, tuin kya a beiktu hae kha mah la ria hae.2Thuasalama beikinn atolang e voidu kha tuh tou leite la cciataw; pawccecize tuh-e tuh Zenta hae kalan pya athua vae; minmin nynh athyaapaw khualipi kha sawpaw sung pali sah ning cia a syde cih hae.3Ka ccaekia lu ning kha thungnaw ka pya cih hae zah, minmin nynh buriboei kha zingkute nin thong kheit za ning sung taruh cia profehbya a ho cih hae,” a ci.4E ccaekia hae lu ning tuh laephi a peetu Bawipaw malang a thadyn hae paw maeekhuatung ccangning te oliv thingku ku ning nynh thua hae.5Lukhakheit nynh minmin kha vawsaw pya a ry hae ze, mih khalang lungkhu te maee pou zah mih rhaw hae kha po a laang hae; lukhakheit nynh minmin kha vawsaw pya a ry hae ze, tuh-e paw tuh tuhcite chia athua hahe cih.6Tuh-e hae nynh profehbya a ho lya hae khe khuaa araw khyh nawlan, vaawlang thuakaw khaw khonaw kaw a hoi hae; tui kha chii lang tangsah khonaw thungnaw, a ry takyh hae te shethya aphuinphuin te laephi kha vawsaw pya khonaw thungnaw kha a hoi hae.7Minmin nynh ccaekiakhan hae paw kha he a thangsah hae te, adianaw um lei lan akhupaw laekarung lungkhu te yn kaethungpaw sarepaw nynh minmin kha rhaw a tuk cih hae, a tae cih hae zah a theih cih hae.8Mih rhua hae tuh muisaw lante Sodom te Izip a ci hae paw, myarya lepaw khuapi kya-e laanpi kyakhe a huekuh cih hae; mih Bawipaw kha mah tuin khua kyakhe vaelantung kya a khiade hae.9Ram hae, phin hae, bya hae te minphuin hae kya-e ccungccaw hae nynh mih rhua hae kha nin thum khoi lungkhu a muih cih hae zah, shaw kya uu lan a kang cih hae,10laephi vawlan a um hae paw tuh mih lungtua cih zah mih lungpaw cih, lu kheit te lu kheit lasung a kykuh cih hae; pawccecize langmawlya tuh-e profeh hae lu ning nynh laephi vawlan a um hae paw kha myarya ccih lante vawsawnaw a la pya hae.11Nin thum khoi acih koute Pachia kyate hiinnawpaw hy tuh mih lungkhu lang tee zah mih ccu te a thadyn hae, minmin kha a muih hae paw tuh myarya a rih hae.12Tuinte vaawlang e myarya ccaepaw roi nynh, “Hynhlang oun kaethung oh!” cite a hopya hae paw kha tuh-e hae lu ning nynh a thae hae. Minmin tuh mih rhaw hae muihnaw kyakhe maeking te vaawlang a kae hae.13Tuh ccyh lyakhe innry thawte suekuh zah khuapi pum haw pum kheit tuh pong ating, tuh-e innrysuekunaw kya ccungccaw thong sari a chih hae, tuhlaepaw ccungccaw hae tuh rih hae zah vaawlang e Pachia kha phu-enaw a pya hae.14Ngaethya lan umpaw ccangningnaw tuh athang vae; dotua, hynh-e koute ngaethya lan umpaw ccangthumnaw tuh taloi yn thua cih. Ccangsarinaw Mungkae15Lu sarinaw vaawpaw nynh a mungkae kha tu zah, vaawlang te myarya accaepaw roi hae nynh,“Laephi peenaw tuhah Bawipaw peenaw te a Khri kya-epeenaw lang phe tang vae,aning nynh zungzae tezungzae cia a uk vae cih,”cite a ho hae.16Pachia malang mimaw bawitungkhung vawlan a haung hae paw piccan hae lu kuin lae pali nynh bakhungte Pachia kha beik hae zah,17“Atu lya a umpaw, langmawlya maha la um vae paw, Athung huaccepaw,Bawipaw Pachia, alesaepawna huhan kha na lawkuh zahna uk vae keiccuze na kalanlungtuabya kae ho.18Minphuin hae tuh myarya mih thinria,thuasalama na bungpawnaw tuhyn thua vae;michi hae byapianaw ccyh tuhyn thua vae,namaw rya ae lawpah hae pawna profeh hae, mithyaa hae,na min raw a rih hae pawccungccaw adih ale hae kharyalaw mee pyanaw ccyh telaephi a rohtu hae kharonaw ccyh tuh yn thua vae,”a ci hae.19Vaawlang a umpaw Pachia beikinn tuh hungkuh zah, a beikinn kyakhe amaw kya-e byakin thingkua kha muih athua; te khozaw alaekuh, roi accae, kholung athyh, innrysuekuh zah myarya lepaw hya accah.
Nopinung te Nakaa-hupi1Vaawlang kya myarya lepaw muihsahnaw a langkuh: Nopinung lu kheit tuh khuanin khate ccaankuh zah sawpaw kha a ccu kaw khe a nung, awsi haw lae ning a umpaw bawilukhung kha a lu vawlan a khungku.2Tuh-e nung tuh ccaawpoi zah a ccaaw pui lan acih tuh, neitangia acci keiccuze thawte a siakhaekuh.3Vaawlang kya ccangpaw muihsahnaw alangkuh: Dotua oh, alu lu sari te aki ki haw hoi zah, a lu hae vawlan bawilukhung ccangsari a hoipaw, myarya lepaw nakaa-hupi sekakingpaw a um.4A leihmae nynh vaawlang e awsi hae pum thum pum kheit kha sue hae zah, laephi vawlan a vua hae; nopinung kya-e vyavya pui vae paw ccaaw tuh ccahe yn pui te, po laang lan cite nakaa-hupi tuh nopinung malang khe phang a thadyn.5Tuinte sivaw hoitang te minphuin miakaw a uk cih paw ccapaw kha nopinung nynh a saah; a ccaaw tuh Pachia kalan te a bawitungkhung kalan lawthung athua.6Nopinung tuh nin thong kheit za ning sung taruh cia looh dang athua ccaw cite Pachia nynh a paccynpyapaw hmin, ramkaw langkhe a ccue. Mikhael nynh Nakaa-hupi A Tae7Te vaawlang kya rhawtukkunaw a um; Mikhael te a vaawccungccaw hae nynh nakaa-hupi kha rhaw a tuk hae, nakaa-hupi te a vaawccungccaw hae nynh rhaw a tukru hae zemah8a shung hae keiccuze minmin hanlan vaawlang kya umnaw kharouh um vae khyh.9Laephi pynpi a lingpaw, Raerangsaro te Satan a ci hae paw langmawlya e hupaw, myarya lepaw nakaa-hupi tuh laephi kalan vua athua, amaw ryte a vaawccungccaw hae tuh vua athua hae.10Vaawlang e roi accaepaw nynh,“Khumnaw, huhan,ah Pachia kya-e peenaw tea Khri kya-e kawhoinaw tuhatu yn thua vae;pawccecize ah uno hae khaseibetupaw, ah Pachia malangkhuazi khuadae minmin khaseibetupaw tuh sawbung athua vae.11Ah uno hae nynhTuutaw chii liate thuasah,mih ccaekia tangnaw bya liate thuasahSatan kha a tae hae; minmin tuhchi ngan ciate mih hiinnaw khaa pyakuh hae.12Tukeiccuze, pou vaawlang tevaawlang a um hae paw,nae lungtua sah!Pou laephi te rili, nanning hanlanngaethya lan kou um;pawccecize Satan nynhccyh sosoh rou nynhka hoi vae cipaw kha a nyku keiccuzemyarya a thinria zahnae kalan yn rungbung vae,”cite a hopaw kha ka thae.13Nakaa-hupi nynh laephi kalan yn vua vae hae cipaw he a nyh tuh, ccapise a saahpaw nopinung kha a dee.14Tuh-e nopinung tuh hupaw kyate lue khylan ramkaw lang a zou nawlan myarya lepaw mosipi sake ccangning kha pya athua; nopinung tuh tuin kyakhe ccyh kheit, ccyh hae te ccyh angankuh cia do-oih athua.15Tuh-e nopinung tuh tui nynh lou sah cite hupaw nynh a khalang lungkhu te tui kha vawpi hawte nopinung nulang te a pousah.16Thuasalama laephi nynh nopinung kha a bawm, laephi nynh a khalang kha aw zah nakaa-hupi nynh a khalang lungkhu te a pousahpaw vawpi kha po a laang.17Nakaa-hupi tuh nopinung elang myarya a thinria zah, nopinung ciihan a laehy hae paw kha rhawtuk khylan po a cceih; tuh-e hae tuh Pachia kawbya a zui hae paw te Jesu Khri kya-e ccaekia a hoi hae paw nynh thua.18Hupi tuh rili kin laesia vawlan khe a thadyn. Sarepaw Sa Ning1Rili lungkhu te yn pouthungpaw sarepaw sa kheit kha ka muih; tuh-e sarepaw tuh lu lusari te ki kihaw a hoi; a ki vawlan bawilukhung ccanghaw um zah, a lu hae vawlan Pachia thethyasahpaw min a um.2Ka muihpaw sarepaw tuh kaesing te nynh aloku; a ccu tuh vong ccu te lokuh zah a khalang tuh chindeih khalang te nynh aloku. Nakaa-hupi nynh a thungnaw, a bawitungkhung te alepaw kawhoinaw kha sarepaw kalan a pya.3Alu lu kheit tuh chikhaeku khopaw vaemaw a muepaw hawkhate nynh thua; chikhaeku khopaw a vaemaw tuh dansah athua, laephi ccungccaw hae balyn tuh mih ngaeangthua zah sarepaw nulang khe a zuikuh hae.4Sarepaw kha kawhoinaw a pyatupaw nakaa-hupi kha minmin nynh a beik hae; sarepaw kha mah beik hae zah, “Sarepaw alopaw hummou a um? Hummou sarepaw kha rhawtuk kho cih?” a ci hae.5Sarepaw tuh lysakunaw bya te Pachia thethyasahnaw bya a hothyapaw munglae kha pya thua zah, sawpaw sung pali sah ning lungkhu kawhoinaw kha mah pya athua.6A khalang kha aw zah Pachia thethyasahnaw bya kha a ho, Pachia a min, a umnaw te vaawlang a um hae paw kha thethyasahnaw bya a ho.7Mithyaa hae kha rhawtuknaw kaw te taenaw kaw a mue; phin miakaw, minphuin miakaw, bya miakaw te ram miakaw tungvaw kawhoinaw kha amaw kya pya athua.8Chia athuapaw Tuutaw kya-e hiinnaw ccauh kya laephi athotakaw te mih min zei athua lei hae paw, laephi vawlan a um hae paw balyn nynh sarepaw kha oun beik cih hae.9Nakaring a hoipaw ccungccaw tuh thae sah:10Ming hae kha seetangnaw kalana cciakhae hae paw ccungccaw tuhamaw mah seetangnaw kalana cceih cih; thaloi teccungccaw a theihpaw tuhamaw mah thaloi techia athua hahe cih.E kyahin mithyaa hae zynnaw te lungsaenaw tuh a um. Sarepaw Sa Ningnaw11Laephi lungkhu te yn poupaw ccangpaw sarepaw kha ka muih; aning tuh tuutaw hawte ki kining hoi zah nakaa-hupi hawte bya a ho.12Tuh-e sarepaw nynh masaty sarepaw kya-e thungnaw balyn kha amaw a muihnaw kya mawkhe pong a mang; aning nynh laephi te laephi kya um hae paw kha chikhaeku khopaw vaemaw kyate a dan vae paw masaty sarepaw kha a beiksah hae.13Aning nynh myarya lepaw muihsahnaw kha langsakuh zah, ccungccaw hae muihnaw kyakhe maee kha vaawlang te laephi vawlan a ccawsah.14Aning nynh masaty e sarepaw malang langsakunaw kaw a muepaw muihsahnaw hae liate laephi vawlan a um hae paw kha a ling hae. Thaloi te vaemaw a mue zemah a hiin ungpaw sarepaw azuh kha raeku lan laephi vawlan a um hae paw kha a hopya hae.15Sarepaw azuh nynh bya a ho kho nawlan thuasah, sarepaw azuh a beik leipaw miakaw tuh chia athua nawlan thuasah, sarepaw azuh tuh hiinnaw pya khonaw kaw kha aning tuh pya athua.16Aning nynh ccungccaw balyn kha, adihpaw mah alepaw mah, a hoirumpaw mah a ryachipaw mah, a luepaw mah see mah mih ranglang kuih kya khyhze mih terui kyakhe syntawnaw tazeih a khiasaku hae.17Sarepaw min khyhze a min namba athuapaw syntawnaw tazeih a um khyh lanze, humhung mah re khonaw te zua khonaw kaw hoi khyh.18Hynh-e kya hawnaw a um: thaethyanaw a hoipaw ccungccaw nynh sarepaw namba kha ria sah; pawccecize tuh-e tuh ccungccaw namba thua zah, tuh-e namba tuh 666 nynh thua. Tuutaw te A Ccungccaw hae 144,0001Kae do zah, Tuutaw tuh Zion Mua vawlan a thadyn, mih terui kya amaw min te a Paaw min azeikuhpaw 144,000 tuh amaw ryte a umkheih hae.2Tuiphue atoikuhpaw patae roi hawte thuasah, myarya accaepaw kholungthyhpaw roi hawte thuasah vaawlang e roi kha ka thae; tintang a khua hae paw nynh mih tintang a khua hae paw roi hawte accaepaw roi kha mah ka thae.3Bawitungkhung malang thuasah, ahiinpaw sarangpaw sa pali te piccan hae malang thuasah hlaw thawpaw kha minmin nynh a sah hae. Tuh-e hlaw tuh laephi kyate shawkhaw athua hae paw 144,000 laelan hum nynh sanmah ccangkuh kho khyh hae.4Minmin tuh ccangvady thua hae zah, nopi hae ryte a nungsikuh lei hae paw nynh thua; minmin tuh Tuutaw a ccianaw miakaw lang a zui hae paw nynh thua; ccungccaw hae laku kyate shawkhaw thua hae zah, Pachia te Tuutaw hanlan masaty athae nynh thua hae.5Mih munglae kya hynbya um khyh, pawccecize minmin tuh ccaenaw hoi khyh hae. Vaaw hae Lu Thum6Tukoute vaawlang angaelung kya azoupaw ccangpaw vaawpaw kha ka muih; aning tuh laephi vawlan um hae paw ram miakaw, phin miakaw, bya miakaw te minphuin miakaw kalan hopya lanpaw zungzae atynpaw thehoypaw a hoitu nynh thua.7Aning nynh roi accae lante ho zah, “Pachia raw kha rih oh lah, thehoysah oh; pawccecize a byapianaw ccyh tuh yn thua vae; vaawlang, laephi, rili te tuidy a raetupaw kha beik oh,” a ci.8Ccangpaw vaawpaw, lu ningnawpaw nynh zuikuh zah, “Alesaepaw Babilon khuapi tuh a khuliakuh vae, a khuliakuh vae, pawccecize anungsikuhpaw a ohhuakunaw athuapaw misutui kha minphuin hae balyn pong a niasah hae,” a ci.9Ccangpaw vaawpaw, lu thumnawpaw nynh minmin kha zui hae zah, “Ccungccaw lukhakheit nynh sarepaw te tuh-e sarepaw azuh kha beik zah, tuh-e sarepaw kya-e syntawnaw tuh a terui kya khyhze a kuih kya a hoi lanze,10tuh-e paw tuh Pachia thinrianaw banang lungkhu lang pawpaw mah pyde leite a ccae hae paw Pachia thinrianaw athuapaw misutui kha a neih cih; tuh-e paw tuh athyaapaw vaaw hae malang te Tuutaw malang khe maee te kemaee khate thawte vawsawnaw a pya cih hae.11Minmin nynh a teing hae paw vawsawnaw maeekhuh tuh zungzae te zungzae cia a kaethung; sarepaw te sarepaw azuh a beik hae paw te sarepaw min syntawnaw tazeih a mue hae paw tuh khuazi khuadae haeung khyh hae,” cite roi accae lante a ho.12Hynh-e kyahin Pachia kawbya zui hae zah Jesu kya zynnaw a hoi hae paw mithyaa hae tuh ngaesangnaw a hoi hae.13Vaawlang te roi nynh, “Hynh-e hynh zei: Atu ccyh kyate Bawipaw kya a chih hae paw tuh hythuanaw a ccou hae paw nynh thua,” cite yn hopyapaw kha ka thae. Muisaw nynh, “Athua ccaccing, minmin tuh mih ryalaw kyate a haeung vae cih hae, pawccecize mih ryalawnaw nynh minmin kha a zui hae!” a ci. Laephi Loohruenaw14Tukoute ka do zah, maeking rawpaw a um; ccungccaw alopaw nynh a lu vawlan bawilukhung kha khungkuh zah a kuih kya rungkou ahepaw kha ccyngkute tuh-e maeking vawlan khe a haung.15Ccangpaw vaawpaw nynh beikinn lungkhu te yn pou zah maeking vawlan a haungpaw kyakhe, “Na rungkou kha mang lah loohrue ccavae, pawccecize loohrue ccyh azaw vae, laephi kya-e loohrue lanpaw tuh avoi vae,” cite thawte sia zah a hopya.16Maeking vawlan a haungpaw nynh a rungkou kha laephi vawlan hang zah laephi kya-e looh kha a rue vae.17Ccangpaw vaawpaw tuh vaawlang a umpaw beikinn lungkhu te yn pou, aning mah rungkou ahepaw a hoibua.18Maee tungvaw kaw a hoitu, ccangpaw vaawpaw tuh silawhang kyate yn pou; aning nynh rungkou ahepaw a ccyngkuhpaw kalan khe thawte sia zah, “Na rungkou ahepaw kha mohsua lah, laephi kya-e misu thae ange hae kha suelua, pawccecize misu thae tuh avoi vae,” cite a hopya.19Vaawpaw nynh a rungkou kha laephi vawlan khe mohsua zah, laephi kya-e misu ange kha a suelua; tuh-e tuh Pachia thinrianaw athuapaw myarya lepaw misu mianawpaw akhu lungkhu langkhe moh a phang.20Khuapi atolang umpaw misu mianawpaw akhu kyakhe miade thua zah, tuin kyate chii tuh marang khabaw se phe thua lante pou zah, me za ning loukaw cia a thua. Vaaw hae te Nyathyakou Shethya1Alesaepaw te ngaeang lan umpaw ccangpaw muihsahnaw kha vaawlang khe ka muih, tuh-e tuh nyathyakou e shethya ccangsari a hoi hae paw vaaw hae lu sari nynh thua; pawccecize tuh-e shethya hae tuh Pachia thinrianaw a thangnaw nynh thua.2Maee te apykuhpaw thawlang rili alopaw kha ka muih; sarepaw, sarepaw azuh, sarepaw kya-e syntawnaw te a min namba tungvaw taenaw a hoi hae paw nynh Pachia tintang hae kha ccyngkuh hae zah thawlang rili kin khe a thadyn hae paw kha ka muih.3Minmin nynh Pachia ryalahtu Moses hlaw te Tuutaw hlaw kha sah hae zah,“Athung huaccepaw Bawipaw Pachia,na ryalaw hae tuh lesae zahngaeang lan a um!Minphuin hae Siapharan,na laanpi hae tuh ding zah ahme!4Pou Bawipaw, hummou na rawri leite,na min kha phu-esah leite a um cih?Pawccecize nang rou nynhathyaapaw na thua.Bya na piapaw balyn tuha langku vae keiccuzeminphuin hae balyn nynhoun thua cih hae zahae beik cih hae,”a ci hae.5Tukoute he ka do tuh, vaawlang kya ccaekiakhankunaw bu a umnaw beikinn tuh ahungkuh.6Shethya ccangsari a hoi hae paw vaaw hae lu sari tuh beikinn lungkhu te oun pou hae; minmin tuh dalahdalah ak zah thyaararihpaw boeining arawpaw kha lawkuh hae zah mih by kya sui taeccia a cciakuh hae.7Ahiinpaw sarangpaw hae sa pali kyaze sa kheit nynh zungzae te zungzae cia ahiinpaw Pachia a thinrianaw te phe beihpaw sui pakekhupaw ccangsari kha vaaw hae lu sari kalan khe a pya hae.8Beikinn tuh Pachia a phu-enaw te a thungnaw maeekhuh te phe abeih; te vaaw hae lu sari kya-e shethya ccangsari athang makhia tuh hum sanmah beikinn lungkhu lang tee kho khyh. Pachia Thinrianaw Pakekhupaw hae1Beikinn lungkhu te myarya accaepaw roi nynh, “La cceih oh lah, Pachia thinrianaw athuapaw pakekhupaw ccangsari kha laephi vawlan ccae oh,” cite vaaw hae lu sari kalan a hopya hae paw kha ka thae.2Masaty e vaawpaw nynh cceih zah a pakekhupaw kha laephi vawlan khe a ccae; te sarepaw kya-e syntawnaw a hoi hae paw te sarepaw azuh a beik hae paw tungvaw kyakhe myarya dothah zah luathua-ae-ui lan umpaw te myarya ccihpaw balyh nynh a thuanua hae.3Lu ningnaw e vaawpaw nynh a pakekhupaw kha rili vawlan khe a ccae; rili tuh ccungccaw achihpaw chii hawte chii lang phe a tang; rili kya umpaw a hiinpaw miakaw marya a chih hae.4Lu thumnaw e vaawpaw nynh a pakekhupaw kha vawpi hae te tuidy hae vawlan khe a ccae; tuh-e hae tuh chii lang phe a tang.5Tui a uktu vaawpaw nynh,“Atu a umpaw, langmawlyaa la um vae paw, pou Athyaapaw,nang tuh na ding,pawccecize nang nynhhynh-e hae hynh bya na pia.6Minmin nynh mithyaa hae chii teprofeh hae chii kha luasah hae zah,nang nynh minmin a nia lan hae pawchii kha na pya hae.Minmin tuh tuhcite teing lana ngaekuh hae paw nynh thua,”cite a hopaw kha ka thae.7Ccangpaw vaawpaw nynh silawhang kyate,“Athung huaccepawBawipaw Pachia, na byapianaw tuhhme zah adingpaw nynh thua!”cite a hopaw kha ka thae.8Lu palinaw e vaawpaw nynh a pakekhupaw kha khuanin vawlan khe a ccae; khuanin tuh ccungccaw hae kha maee te unaw kaw a mue.9Myarya asopaw maeeso khate ccungccaw hae kha u thua hae zah, hynh-e shethya hae tungvaw kaw a hoitupaw Pachia min kha thya a law hae; minmin tuh ngaesikuh khyh hae, Pachia kha mah phu-enaw pya khyh hae.10Lu pangawnaw e vaawpaw nynh a pakekhupaw kha sarepaw kya-e bawitungkhung vawlan khe a ccae; a peenaw tuh mohnaw te phe beih zah, eih acci keiccuze ccungccaw hae nynh mih lae kha a teiku hae.11Minmin nynh a teing hae paw mih vaemaw te mih balyh hae keiccuze vaawlang e Pachia kha thyalaw hae zah, mih cyisahnaw kha ngaesikuh khyh hae.12Lu taruhnaw e vaawpaw nynh a pakekhupaw kha myarya lepaw Zufrates vawpi vawlan khe a ccae; nithua lang e siapharan hae ccianaw kha paccynpya khylan, tuin kya-e tui tuh phe akan.13Nakaa-hupi khalang, sarepaw khalang te ahme leipaw profeh khalang kyate buphaw te alokuhpaw athupaw muisaw hae ccangthum yn poupaw kha ka muih.14Tuh-e muisaw hae tuh muihsahnaw hae a langsakuhpaw raerangsaro hae kya-e muisaw hae nynh thua; Athung huaccepaw Pachia kya-e alesaepaw nin kya rhawtukku khylan minmin nynh laephi pynpi kya-e siapharan hae kha ccianua hae zah a suelua hae.15(“Dotua, kae tuh miruh hawte nynh kae thua! A ccakaete a ccia khyh nawlan te a maethyanaw alang khyh nawlan a uccaw kha a rinkuhpaw te ngaw a dokuhpaw tuh hythua a ccoupaw nynh thua!”)16Tuh-e muisaw hae nynh siapharan hae kha Hebru bya te Armageddon a ci hae paw hmin kyakhe nynh a suelua hae.17Lu sarinaw e vaawpaw nynh a pakekhupaw kha khivae kyakhe a ccae; vaawlang e beikinn kya umpaw bawitungkhung kyate myarya accaepaw roi yn pou zah, “Athang vae!” a ci.18Khozawlaekunaw, roiccaenaw, kholungthyhnaw te myarya rupaw innrysuekunaw a um; laephi vawlan ccungccaw a um takaw te tuhcih arupaw te tuhcih alepaw innrysuekuhpaw tuh um boi khyh.19Myarya lepaw khuapi tuh san thum lang phia thua zah, minphuin hae kya-e khuapi hae tuh phe ating. Pachia nynh a thinrianaw te asekuhpaw bungpawnaw misutui banang kha niasah khylan myarya lepaw Babilon khuapi kha a liathui vae.20Tuikoih miakaw tuh pong ccue hae zah, mua hae tuh muih lan um vae khyh hae.21Pung za kheit loukaw aripaw myarya lepaw hya tuh ccungccaw hae tungvaw khe vaawlang te a ccah. Tuh-e shethya tuh myaryamaw ccih zah, tuh-e hya te asekuhpaw shethya keiccuze ccungccaw hae nynh Pachia kha thya a law hae. Ohhuanung Lepaw te Sarepaw1Tuinte pakekhupaw ccangsari a hoipaw vaaw hae lu sari kyaze lukheitpaw nynh yn cceih zah yn hopyapaw tuh, “Rang, tui patae vawlan a haungpaw ohhuanung lepaw tungvaw byapianaw kha kae muihsah cih;2laephi siapharan hae nynh tuh-e nung te a ohhuakuh hae; laephi vaw a um hae paw tuh tuh-e nung kya-e ohhuakunaw misutui khate pong a rui vae hae,” a ci.3Tuhcite Muisaw liate kae kha ramkaw lang yn cciakhae; alu lu sari te aki ki haw hoi zah Pachia thethyasahnawpaw min hae te phe beihpaw sarepaw sekakungpaw vawlan a haungpaw nopinung kha ka muih.4Nopinung tuh sephaphuhpaw te asepaw boeining kha lawkuh zah sui, aphutepaw lung hae te palee hae khate a ccaankuh; a ohhuakunaw kya-e luathua-ae-ui lan umpaw te myarya anungsikuhpaw sui banang kha a kuih kya a ccyngbia.5A terui kyakhe, “Alesaepaw Babilon, ohhua hae nung te laephi kya-e luathua-ae-ui lan umpaw nung,” cite byakhu lante min azeikuh.6Nopinung tuh mithyaa hae chii te Jesu a zyn hae keiccu a chia hae paw chii khate a ruipaw kha ka muih, tuh-e nung kha he ka muih tuh, myarya ka ngaeangthua.7Vaawpaw nynh, “Pawccemou na ngaeangthua? Tuh-e nopinung kya-e byakhupaw te tuh-e nung a cciakhaepaw alu lu sari te aki ki haw a hoipaw sarepaw kya-e byakhupaw kha kae hopah ung cih.8Na muihpaw sarepaw tuh langmawlya la um zah atu um khyh, adianaw um lei lan akhupaw laekarung lungkhu te yn kaethung cih zah ronaw kalan a cceih cih; laephi vawlan um hae zah laephi athotakaw te hiinnaw ccauh kya mih min zei athua lei hae paw nynh langmawlya la um zah atu a um leipaw, te bua yn langkuh cih paw sarepaw kha he oun muih hae tuh, mih ngaeangthua cih.9“Hein kyahin hawnaw te nythyanaw hoi aho: alu lu sari tuh nopinung nynh a haungnawpaw mua muasari nynh thua;10siapharan hae lu sari mah a um hae; lu pangaw tuh a ccahbung vae hae, lu kheit tuh a um ung; ccangpaw lu kheit tuh yn thua loh khyh; aning tuh he yn thua te, ccyh dyntari rou nynh atyn cih.11Langmawlya la um zah atu a um leipaw sarepaw tuh lu taryanaw e siapharan nynh thua, aning tuh lu sari kya a um buapaw mah thua zah, ronaw kalan a cceih cih.12Na muihpaw aki ki haw tuh siapharan kawhoinaw a mue loh leipaw siapharan lu haw hae nynh thua; thuasalama siapharan hae hawte kawhoinaw kha sarepaw ryte suimilan ccangkheit lungkhu a muekheih cih hae.13Tuh-e hae tuh tuanaw ccangkheit a hoi hae paw thua zah mih thungnaw te kawhoinaw kha sarepaw kalan a pya cih hae.14Tuh-e hae nynh Tuutaw kha rhaw a tuk cih hae zah Tuutaw nynh minmin kha a tae cih hae, pawccecize Tuutaw tuh bawi hae Bawipaw te siapharan hae Siapharan nynh thua; amaw ryte a umkheih hae paw tuh ko athua hae paw, po athua hae paw te mih lungzipaw nynh thua hae,” yn cipya.15Vaawpaw nynh, “Ohhuanung nynh a haungnawpaw tui na muihpaw tuh minphuin hae, ccungccaw zapi hae, ram hae te bya hae nynh thua.16Na muihpaw aki ki haw hae te sarepaw nynh ohhuanung kha a hua cih hae, a uccaw miakaw kha a ropah cih hae zah a ccakaete a nung cih hae; a ngesaw kha a ae cih hae zah amaw kha maee te a u cih hae.17Pawccecize Pachia bya accing mawlaezung, a rynaw kha ccingsah khylan, minmin kha lunglokunaw hoisah te minmin kya-e siapharan kawhoinaw kha sarepaw kalan pya lan Pachia nynh mih thinlung kya phe a sang vae.18Na muihpaw nopinung tuh laephi siapharan hae a uktupaw, myarya lepaw khuapi kha nynh thua,” cite yn hopya. Babilon Ronaw1Tukoute myarya lepaw kawhoinaw a hoipaw ccangpaw vaawpaw nynh vaawlang te yn rungbungpaw kha ka muih; a phu-enaw khate laephi tuh phaephae a aw.2Aning nynh roi accae lante thawte sia zah,“Myarya lepaw Babilon tuha khuliakuh vae, a khuliakuh vae!Raerangsaro hae umnaw lang nynha tang vae, anungsikuhpawmuisaw miakaw elang thonginn lang,te athyaa leipaw te hua lan umpawpavaw miakaw elangrekunaw lang nynh a tang vae.3Pawccecize minphuin hae balyn nynha ohhuakunaw te asekuhpawathyaa leipaw misutui kha a nia vae hae;laephi siapharan hae tuhamaw ryte a ohhuakuh vae hae;laephi vaw e kungku hae tuhtuh-e nopinung a ohhuakunaw kya-e sisua liatea hoirum vae hae,” a ci.4Tuinte vaawlang te ccangpaw roi khaka thae zah tuh-e roi nynh,“Ka ccungccaw hae, nanning tuhtuh-e nung a seinaw kyana umbua khyh nawlan oh thuasah,aning nynh a teing lanpaw shethya kyana umbua khyh nawlan oh thuasahamaw kyate oun pou oh.5Pawccecize a seinaw tuhvaaw cia phe phah vae zaha hoyleinaw khaPachia nynh a liathui vae.6Aning nynh ae cyi oh hawtecyihru oh; a cyisahnaw thyhteleit ning liaru oh; aning nynha pydepaw banang kyakheleit ning pydepah oh.7Aning nynh amaw te amaw khamyarya a phu-esakuh zahohhuakunaw kya a hoysah hawkhatevawsawnaw te rawkhuinaw khapyaru oh; pawccecize aning nynha thinlung kyakhe,‘Kae tuh siapharannung nynh ka thua,nomae ka thua khyh,rawkhuinaw tuh ka tung lan khyh,’a ciku.8Tukeiccuze aning nynhshethya hae athuapaw chinaw,rawkhuinaw te ccakannaw khanin kheit lungkhu a tung cih zah,maee nynh pong a u cih;pawccecize amaw khabya a piatupaw Bawipaw Pachia tuha thawsaepaw nynh thua,” a ci.9Amaw ryte ohhuakuh hae zah ohhuakunaw kya a hoysah kheih hae paw laephi siapharan hae nynh a rhua a uunaw hae paw maeekhuh kha he a muih hae tuh, amaw elang a rah a khui cih hae.10Aning nynh a teingpaw vawsawnaw kha minmin nynh a ri hae keiccuze asawnaw langkhe thadyn hae zah,“Ezou, ezou! Khuh-e myarya lepawkhuapi, athungpawBabilon khuapi khuhlou!Suimilan ccangkheit lungkhubyapianaw nynh ae thuanua vae rei!”a ci cih hae.11Laephi vaw e kungku hae tuh amaw elang oun rah oun khui cih hae; pawccecize mih uccaw hae kha hum nynh sanmah repah vae lan khyh hae.12Mih kungkunaw uccaw hae sui, ngun, aphutepaw lung hae, palee hae, nebaleihpaw boeining , kadipa uccaw, po-uccaw, sekakungpaw uccaw, amynkhuhpaw thing aphuinphuin, saepanua te raepaw uccaw aphuinphuin, aphutepaw thing te raepaw uccaw aphuinphuin, sohin uccaw, sivaw uccaw te lung rawpaw uccaw,13cinnamon te mynkhuhpaw upaw, zimuin te frankinsen, misutui te oliv chitui, chanvuih akhuipaw te chanvuih, sahiin hae te tuu hae, marang hae te marangle hae, see hae te ccungccaw hiinnaw hae kha hum nynh san re vae lan khyh hae.14Kungku hae nynh,“Na thinlung kyate kou na duaapawthingthae hae tuh na kyate a zo vae hae,na hoysahnawpaw uccaw hae tena phu-enaw balyn tuhna kyate a zo vae hae, tuh-e hae tuhkharouh na muih boi vae lan khyh!”a ci hae.15Tuh-e khuapi kya-e uccaw hae khate kungku hae zah a hoirum hae paw kungkutu hae tuh tuh-e nung nynh a teingpaw vawsawnaw kha a ri hae keiccuze asawnaw langkhe a thadyn cih hae zah rawkhuite,16“Ezou, ezou, nebaleihpaw boeining,sephaphuhpaw te asepawboeining kha lawkuh zahsui te aphutepaw lung hae,palee hae te a ccaankuhpawkhuh-e myarya lepaw khualipi khuhlou!17Khahcih alungpaw sisua hae tuhsuimilan ccangkheit lungkhuaccakaepaw lang phe a tang vae rei,”oun ci cih hae.
Sanphalung uktu hae balyn, sanphalung kya a cceihbua hae paw balyn, sanphalung mawng hae paw, rili kya kungku hae paw balyn nynh asawnaw langkhe thadyn hae zah,18khuapi a unawpaw maeekhuh kha he a muih hae tuh,“Khuh-e myarya lepaw khuapi tealokuhpaw paw khuapi mou a um?”cite a sia hae.19Minmin nynh laenoi kha mih lu vawlan phingkuh hae zah,“Ezou, ezou, rili kya a cceihpawsanphalung hae a hoitu hae balyn khaamaw a hoirumnaw liatea hoirumsah bua hae pawkhuh-e khuapi khuhlou!Suimilan ccangkheit lungkhuphe roh vae rei.20Pou vaawlang, pou mithyaa hae,locceihtu hae te profeh hae,nae lungtua sah!Pawccecize Pachia nynhnanning hanlan amaw khabya a pia vae!”cite rawkhuite a sia hae.21Tukoute a thawsaepaw vaawpaw nynh myarya lepaw sungmia-lung alopaw lung ccangkheit kha lawkuh zah rili lungkhu lang vua zah,“Babilon khualipi tuh hynhcitemyarya ccih lan vua athua cih zah,kharouh muih lei lan vae.22Tintang a khua hae paw roi,tyngdaw a khua hae paw roi,phyly a tu hae paw roi,mungkae a tu hae paw roi khana kya kharouh thae lei lan vae;a kuihhae hoypaw ccungccaw lu kheit sanna kya muih lei lan vae;te sungmia-lung roi mah na kyakharouh thae lei lan vae.23Maeekhua a awnaw mahna kya kharouh aw vae lan khyh;te zudy ccangvaepaw teakaepaw liaccanung roi mahna kya kharouh thae lei lan vae;pawccecize na kungku hae tuhlaephi kya alesaepawccungccaw hae nynh thua hae;pawccecize minphuin hae balyn tuhnaaw na thyanaw khate ling athua hae.24Profeh hae chii, mithyaa hae chii telaephi vawlan chia athuahae paw balyn chii tuhtuh-e khuapi kya muih athua,” a ci.Vaawlang kya Lungtuanaw1Tukoute vaawlang a umpaw ccungccaw zapi patae roi tahawpaw myarya accaepaw roi kha ka thae zah,“Hallelujah!Khumnaw, phu-enaw te thungnaw tuhah Pachia kya-e nynh thua.2Pawccecize a byapianaw tuhkyh zah ading;ohhuakunaw a raenaw te laephi a rosahpawohhuanung lepaw kha bya a pia vae;tuh-e nung kuih te luasah athuapawPachia ryalahtu hae chiise hanlana tungvaw a liaru vae,” a ci hae.3Minmin nynh, “Hallelujah!A maeekhuh tuh zungzae tezungzae cia a kaethung,”bua a sia hae.4Piccan hae lu kuin lae pali te ahiinpaw sarangpaw hae sa pali nynh bakhung hae zah bawitungkhung vawlan a haungpaw Pachia kha beik hae zah,“Amen, Hallelujah!”a ci hae.5Bawitungkhung kyate roi yn ccae zah,“Pachia ryalahtu hae balyn teamaw raw a rih hae pawadih te ale balyn,ah Pachia kha thehoysah oh,”a ci.6Tukoute ccungccaw zapi patae roi, tuiphue hae patae roi, myarya athungpaw riakawpaw roi te alokuhpaw roi kha ka thae zah, tuh-e roi nynh,“Hallelujah!Pawccecize AthungpawBawipaw ah Pachia nynh a uk.7Ah lungtua sah lah, ah lungpaw sah;amaw kha phu-enaw pya oh sih;pawccecize Tuutaw zudy poi tuhyn thua vae, a liaccanung tuha paccynkuh vae,” a ci.8Tuh-e nung tuh nebaleihpaw,athyaapaw te arawpaw boeining teccaankunaw kaw a mue;pawccecize nebaleihpaw boeining tuh mithyaa hae kya-e adingpaw cyisahnaw nynh thua.9Vaawpaw nynh, “Tuutaw zudy poi zerya mangnaw kalan kobua athua hae paw tuh hythua a ccou hae paw nynh thua cite zei,” cite kae kha yn hopya. Aning nynh, “Hynh-e bya tuh Pachia bya ccaccing nynh thua,” yn cipya.10Kae tuh amaw kha beik lan cite a cculeihpaw khe ka bakhung; aning nynh, “Hynhte cyih nan! Kae tuh nang te ryalahkheihtu nynh ka thua, Jesu kya-e ccaekia a hoi hae paw na uno hae ryte ryalahkheihtu nynh ka thua, Pachia palia kha beik! Pawccecize Jesu kya-e ccaekia tuh profehbya honaw kya-e muisaw nynh thua,” cite yn hopya. Marang Rawpaw Ccikuhpaw11Vaawlang tuh hungkuh zah marang rawpaw sa kheit kha ka muih. Tuh-e marang tungvaw a ccikuhpaw tuh Alungzipaw, Ahmepaw cite ko athua; aning tuh dingnaw te byapia zah rhaw a tuk.12A mit tuh maeesoi te lokuh zah, a lu vawlan bawilukhung hae a khungkuh; a tungvaw kyakhe amaw laelan hum nynh san a ny leipaw min azeikuhpaw a hoi.13Chii kya adungkuhpaw angkiccua kha kikuh zah, a min tuh Pachia Bya a cikuh.14Vaawlang e rhawkaw hae nynh arawpaw marang hae kha ccikute, raw zah athyaapaw nebaleihpaw boeining kha lawku biate amaw kha a zui hae.15Minphuin hae kha detah nawlan ahepaw thaloi tuh a khalang lungkhu te a pou. Aning nynh minmin kha sivaw hoitang te a uk cih hae; Athung huaccepaw Pachia thinrianaw te asekuhpaw bungpawnaw misu mianaw khu kha aning nynh a syde cih.16A angkiccua vawlan te a phae vawlan khe, “Siapharan hae Siapharan, bawi hae Bawipaw,” cite azeikuhpaw min kha a hoi. Sarepaw te A Rhawkaw hae Shungnaw17Vaawpaw lu kheit nynh khuanin kya a thadynpaw kha ka muih, aning nynh vaawlang angaelung kya a zou hae paw pavaw hae balyn kha roi myarya accae lante ko hae zah, “Rang oh lah, alesaepaw Pachia kya-e loohdangkunaw kalan oun sueluakuh oh;18siapharan hae ngesaw, rhawbawi hae ngesaw, a thawsaepaw ccungccaw hae ngesaw, marang hae te marang a ccikuh hae paw ngesaw, a luepaw te see, adihpaw te alepaw ccungccaw hae balyn ngesaw kha na ae ccaw oh oun sueluakuh oh,” cite a sia.19Sarepaw te laephi siapharan hae te mih rhawkaw hae nynh marang tungvaw a ccikuhpaw te a rhawkaw hae kha rhawtuk khylan oun sueluaku hae paw kha ka muih.20Sarepaw kha phe a kyng hae; sarepaw kya-e syntawnaw a hoi hae paw te sarepaw azuh a beik hae paw kha ling hae zah sarepaw malang muihsahnaw a langsakuhpaw lingthya profeh kha mah amaw ryte a kyngbua hae. Hynh-e lu ning hae hynh parouhte a hiin hae pite, kemaee te a ruanaw maee tuili lungkhu lang a vua hae.21Tuhlaepaw kha marang tungvaw a ccikuhpaw a khalang lungkhu te yn poupaw thaloi khate chia athua hae; te pavaw hae balyn nynh mih ngesaw kha phe byn lan a ae hae.
Kum Thong Kheit1A kuih kya adianaw um lei lan akhupaw laekarung toh te myarya lepaw sivawrui a ccyngpaw vaawpaw lu kheit tuh vaawlang te yn rungbungpaw kha ka muih.2Aning nynh langmawlya e hupaw, Raerangsaro te Satan athuapaw nakaa-hupi kha kyng zah kum thong kheit lungkhu phang a khii.3Kum thong kheit accing cia minphuin hae kha a ling vae khyh ccaw hae cite amaw kha tuh-e laekarung lungkhu lang vua zah a khawsung koute a vawlan khe tazeih a khia. Kum thong kheit accing koute aning tuh ccyh sosoh supya athua cih.4Tuinte bawitungkhung hae te tuh-e vawlan a haung hae paw kha ka muih, minmin tuh byapianaw kaw a mue hae. Sarepaw te sarepaw azuh kha a beik lei hae paw, mih terui kya khyhze mih kuih kya sarepaw syntawnaw a hoi lei hae paw te Jesu ccaekia lang a tang keiccu te Pachia bya keiccuze mih lu pae hae paw mih muisaw hae kha ka muih; minmin tuh oun hiin hae zah Khri ryte kum thong kheit a uk hae.5Thuasalama tuhlaepaw a chih hae paw tuh kum thong kheit athang makhia bua hiin khyh hae. Hynh-e tuh masaty thoothuinaw nynh thua.6Masaty thoothuinaw kya a um buapaw tuh hythua a ccoupaw te a thyaapaw nynh thua. Tuhcihawpaw ccungccaw tungvaw kya vaening chinaw nynh kaw hoi vae khyh; minmin tuh Pachia ranpibawi hae te Khri ranpibawi hae athua vae cih hae zah, Khri ryte kum thong kheit a uk vae cih hae. Satan Shungnaw7Kum thong kheit he athang te, Satan tuh thong a ccawnaw kyate supya athua cih zah,8laephi ki kipali kya a um hae paw minphuin hae athuapaw Gog te Magog kha ling khylan te rhawtuk khylan minmin kha suelua lan po a cceih cih, minmin tuh milu lante rili laesia zeih a cih hae.9Minmin tuh laephi vaw balyn pazaekuh hae zah mithyaa hae umnaw hmin te sungsahpaw khuapi kha po a koihlu hae; thuasalama vaawlang te maee yn ccah zah minmin kha marya a u hae.10Minmin a lingtu hae paw Satan kha sarepaw te lingthya profeh a umnaw hae, kemaee te maee tuili lungkhu langkhe ccaring vua athua; minmin tuh khuazi khuadae zungzae te zungzae cia vawsawnaw pya athua vae cih hae. Michi hae Byapianaw11Myarya lepaw bawitungkhung arawpaw te tuh-e vawlan a haungpaw kha ka muih, tuh-e paw malang kyate vaaw te lae tuh ccue hae zah, mih hanlan umnaw um vae khyh.12Michi hae adih te ale nynh bawitungkhung malang a thadyn hae paw kha ka muih; te ccauh hae kha a kia hae. Hiinnaw ccauh athuapaw ccangpaw ccauh kha mah kia athua. Michi hae tuh mih ryalaw thyhte, tuh-e ccauh hae kya azeiku thyhte byapia athua hae.13Rili nynh a kya umpaw michi hae kha a poukhae. Chinaw te michi khua hae nynh mih kya umpaw michi hae kha a poukhae hae. Ccungccaw hae balyn tuh mih ryalaw thyhte byapia athua hae.14Chinaw te michi khua tuh maee tuili lungkhu lang vua athua hae. Tuh-e maee tuili tuh vaening chinaw nynh thua.15Hiinnaw ccauh kya a min zei athua leipaw miakaw tuh maee tuili lungkhu lang vua athua hae. Vaaw Thawpaw te Laephi Thawpaw1Tukoute vaaw thawpaw te laephi thawpaw kha ka muih; pawccecize masaty vaaw te masaty laephi tuh zo hae zah rili mah um vae khyh.2Athyaapaw khuapi athuapaw Jerusalem Thawpaw tuh a vawpaw hanlan a ccaankuhpaw akaepaw liaccanung hawte paccynkuh zah Pachia kyate vaawlang te yn rungbungpaw kha ka muih.3Vaawlang te roi accaepaw nynh,“Dotua oh, Pachia nynha umnawpaw bu tuhccungccaw hae kya um zah,Pachia tuh minmin ryte a um vae cih;minmin tuh a ccungccaw haeathua vae cih hae.Pachia tuh minmin ryte a um cih zahmih Pachia athua vae cih.4Pachia nynh mih mit kyatemitphi balyn kha a hupah cih hae.Chinaw um vae lan khyh.Ngaethyanaw, rawnaw te ccinawum vae lan khyh;pawccecize langmawlya euccaw hae tuh pong azo vae hae,”cite a hopaw kha ka thae.5Bawitungkhung vawlan a haungpaw nynh, “Dotua oh, pawpaw balyn kha athawpaw lang ka rae vae,” a ci. Aning nynh kamaw kha, “Hynh-e hynh zei, pawccecize hynh-e bya tuh zyn lan umpaw te akyhpaw nynh thua,” yn cipya.6Aning nynh kamaw kha, “Phe athang vae! Kae tuh Alfa te Omega, athonaw te athangnaw nynh ka thua. A tuihawpaw ccungccaw tuh hiinnaw tuidy kya-e tui kha amee leite ka pya cih.7A taetupaw tuh hynh-e rho hynh a ccou cih; kae tuh a Pachia ka thua cih zah aning tuh ka ccapaw athua cih.8Thuasalama mih rawthah hae paw, a zyn lei hae paw, luathua-ae-ui lan um hae paw, ccungccaw theih hae paw, a ohhuakuh hae paw, naawthya hae paw, zohtuh beik hae paw te a hyn hae paw balyn tuh kemaee te aruapaw maee tuili kyakhe nynh mih hanpaw a hoi cih hae, tuh-e tuh vaening chinaw nynh thua,” yn cipya. Jerusalem Thawpaw9Nyathyakou e shethya ccangsari te phe beihpaw pakekhupaw ccangsari a ccyng hae paw vaaw hae lu sari kyaze lu kheit tuh ka kya yn thua. Kae kha bya yn beih zah, “Hynhlang rang, Tuutaw zu, akaepaw liaccanung kha kae muihsah cih,” yn cipya.10Aning nynh myarya lepaw te ahangpaw mua kalan khe Muisaw liate yn cciakhae zah, athyaapaw khuapi Jerusalem tuh Pachia kyate vaawlang te yn rungbungpaw kha yn muihsah.11Tuh-e khuapi tuh Pachia phu-enaw te phe beih zah, a awnaw tuh lung-awmatei hawte accipaw jasper lung hawkhate, aphute huapaw lung te nynh aloku;12koikua haw lae ning umpaw myarya lepaw te ahangpaw khualungrua hoi zah, tuh-e koikua hae kyakhe vaaw hae lu haw lae ning a um hae; tuh-e koikua hae kyakhe Israel ccapaw hae phin haw lae ning min kha zei athua.13Nithua lang koikua ccangthum, palung lang koikua ccangthum, deilang koikua ccangthum, te niccaw lang koikua ccangthum a um.14Khuapi kya-e khualungrua tuh athonaw lungbing haw lae ning a um, tuh-e hae kyakhe Tuutaw kya-e locceihtu hae lu haw lae ning min a um.15Kamaw kha bya yn hopahtupaw tuh khuapi kha thuasah, a koikua hae te khualungrua hae kha thuasah tou nawpaw sui ccungngue ccangkheit a hoi.16Khuapi tuh asaepaw te akopaw alokuh; aning nynh khuapi kha a ccungngue te tou zah asaepaw, akopaw te ahangpaw tuh me thong kheit za pangaw cci cih hae zah a lokuh hae.17Khualungrua tuh tou zah vaawpaw kya-e tounawpaw thyhte ccungccaw dung te za kheit sung pali dung pali acih.18Khualungrua tuh jasper lung te rae thua zah, khuapi tuh ccirarihpaw thawlang te alokuhpaw sui ccipaw nynh thua.19Khuapi kya-e khualungrua athonaw aleihpaw hae tuh aphutepaw lung aphuinphuin te a ccaan hae; masaty athonaw aleihpaw tuh jasper lung, ccangningnaw tuh nilar lung, ccangthumnaw tuh agate lung, ccangpalinaw tuh emerald lung;20ccangpangawnaw tuh oniks lung, ccangtaruhnaw tuh karnelian lung, ccangsarinaw tuh khrisolaih lung, ccangtaryanaw tuh beril lung, ccangtakuanaw tuh topaz lung, ccanghawnaw tuh khrisoprase lung, haw lae kheitnaw tuh jacinth lung, haw lae ningnaw tuh amethist lung nynh thua.21Koikua haw lae ning tuh palee haw lae ning thua zah, koikua ccangkheit cci tuh palee ccangkheit cci nynh thua; khuapi kya-e laanpi tuh thawlang hawte awrarihpaw sui ccipaw nynh thua.22Tuh-e khuapi kya beikinn ka muih khyh; pawccecize a beikinn tuh Athung huaccepaw Bawipaw Pachia te Tuutaw tuh nynh thua.23Tuh-e khuapi tuh khuanin awnaw te sawpaw awnaw ho vae khyh; pawccecize Pachia phu-enaw nynh tuh-e khuapi tuh awsah zah, Tuutaw tuh khuapi a maeekhua nynh thua.24Khumnaw a muepaw minphuin hae nynh tuh-e khuapi a awnaw kyakhe a pae cih hae; laephi siapharan hae nynh mih phu-enaw kha tuh-e khuapi lungkhu lang a thuakhae cih hae.25Khuapi kya-e koikua hae tuh khuadae ccyh kya khaw thua vae lan khyh; pawccecize tuin kya khuazi um vae lan khyh.26Minmin nynh minphuin hae mih phu-enaw te sawtuanaw kha tuh-e khuapi lungkhu lang oun thuakhae cih hae.27Anungsikuhpaw uccaw hae kha tuh-e khuapi lungkhu lang teekhae thua lan khyh, luathua-ae-uipaw rya a lahpaw te a hynpaw tuh tuh-e khuapi lungkhu lang kharouh tee lan khyh hae. Tuutaw kya-e hiinnaw ccauh kya min zei athua hae paw rou nynh a tee cih hae. Hiinnaw Tui1Tuinte vaawpaw nynh Pachia bawitungkhung te Tuutaw bawitungkhung kyate yn luapaw, lung-awmatei hawte awrarihpaw hiinnaw tui vawpi kha yn muihsah.2Tuh-e vawpi tuh khualae e laanpi angaelung khe lua zah, tuh-e vawpi sirawkhuraw te thingthae phuin haw lae ning a thaepaw hiinnaw thingku a um; tuh-e thingku tuh sawpaw sah takyhte athae thae zah, tuh-e thingku anaw tuh minphuin hae dansahnaw hanlan nynh thua.3Thyalawnaw kharouh um vae lan khyh, Pachia kya-e te Tuutaw kya-e bawitungkhung tuh tuh-e khuapi kya a um cih zah, Pachia rya a lawpatu hae nynh amaw kha a beik cih hae.4Minmin nynh amaw mae kha a muih cih hae zah amaw min tuh mih terui kya zei athua cih.5Tuin kya khuazi um vae lan khyh; minmin tuh maeekhua kya-e awnaw te khuanin kya-e awnaw kha ho vae lan khyh, pawccecize Bawipaw Pachia nynh minmin kha awnaw a pya hae, minmin nynh zungzae te zungzae cia a uk vae cih hae.6Vaawpaw nynh kamaw kha, “Hynh-e bya tuh zyn lan umpaw te ahmepaw nynh thua. Profeh hae muisaw a peetu Bawipaw Pachia nynh aro mawze yn cyihkuh hahe cih paw uccaw hae kha a ryalahtu hae kalan langsahpya khylan a vaaw ccungccapaw kha yn saw vae,” cite yn hopya.7“Dotua oh, kae tuh arangte kae thua cih. E ccauh kya-e profehbya hae a zuipaw ccungccaw tuh hythua a ccoupaw nynh thua,” a ci. Thangsahnaw te Nyathya Sawsang8Kae, Johan nynh hynh-e uccaw hae hynh ka muih zah ka thae. Tuh-e hae tuh ka thae zah he ka muih tuh, hynh-e uccaw hae yn muihsahpaw vaawpaw cculeihpaw khe beik lan cite ka bakhung.9Aning nynh, “Hynhte cyih nan! Kae tuh nang te ryalahkheihtu nynh ka thua, na uno hae profeh hae te hynh-e ccauh kya umpaw bya a zui hae paw ryte ryalahkheihtu nynh ka thua. Pachia palia kha beik,” yn cipya.10Aning nynh kamaw kha, “E ccauh kya-e profehbya hae hynh tazeihkhia nan; pawccecize accyh anae vae.11Hoyleinaw a raepaw ccungccaw tuh hoyleinaw kha rae ccaleih hin sah, a nungsikuhpaw tuh nungsikuh ccaleih hin sah, a dingpaw tuh ding ccaleih hin sah, a thyaapaw tuh thyaa ccaleih hin sah,” yn cipya.12“Dotua oh, kae tuh arangte kae thua cih; ccungccaw miakaw kha a ryalaw thyhte pya khylan ka kya-e ryalaw mee kha kae ccyngbia cih.13Kae tuh Alfa te Omega, athonaw te athangnaw, masaty te nyathyakou nynh ka thua,” a ci.14A kawbya hae kha zui hae zah, hiinnaw thingku kya-e athae aenaw kaw a hoi hae paw te khuapi lungkhu lang koikua hae kyate teenaw kaw a hoi hae paw tuh hythua a ccou hae paw nynh thua.15Tuhzemah atolang tuh ui hae, naawthya hae paw, a ohhuakuh hae paw, ccungccaw theih hae paw, zohtuh beik hae paw te hynbya kha sungsah zah a hopaw miakaw nynh a um hae.16“Kae, Jesu nynh hynh-e uccaw hae hynh khriccaawbuu hae kya ccaekiakhan sah khylan ka vaaw ccungccapaw kha nae kalan kae saw. Kae tuh David tharui te a ciihan ka thua zah, phaephae akpaw nizy awsi nynh ka thua,” a ci.17Akaepaw liaccanung teMuisaw nynh, “Rang!” a ci hae.A thaepaw ccungccaw nynh, “Rang!” ci sah.A tuihawpaw ccungccaw tuh yn cceih sah.A rypaw ccungccaw tuhhiinnaw tui hynh amee leite lawkuh sah.18E ccauh kya a umpaw profehbya hae a thaepaw ccungccaw miakaw kalan kae nynh ccaekia ka khanpaw tuh: Lukhakheit nynh hynh-e uccaw hae hynh a biachih lanze, Pachia nynh tuh-e paw tungvaw kya hynh-e ccauh lungkhu azeikuhpaw shethya hae kha a biachih cih.19Lukhakheit nynh hynh-e ccauh lungkhu e profehbya hae kha a lawbang lanze, hynh-e ccauh kya azeikuhpaw hiinnaw thingku kyate thuasah, athyaapaw khuapi kyate thuasah Pachia nynh a hanpaw kha a lawpah ru cih.20Hynh-e uccaw hae kong ccaekiakhantupaw nynh, “Thanccingte, kae tuh arangte kae thua vae cih,” a ci.
Amen. Bawipaw Jesu, yn thua ccavae!21Bawipaw Jesu a thawccinaw tuh mithyaa hae balyn kya la um sah. Amen.
Khriccaawbuu Buu Sari kalan Beihlangnaw4Kae, Johan nynh Asia ram kya umpaw khriccaawbuu buu sari kha kae beihlang oh. Atu lya a umpaw, langmawlya a la um vae paw te malang zemah a um cih paw amaw kyate thuasah, a bawitungkhung malang a um hae paw muisaw hae ccangsari kyate thuasah,5a lungzipaw ccaekia a thuapaw, a chih hae paw kyate masaty yn puipaw te laephi siapharan hae uktu bawi athuapaw Jesu Khri kyate thuasah thawccinaw te daenaw tuh nae tungvaw la um sah. Aening kha oun sungsah zah a chiise te aening seinaw balyn kha oun luesahpaw,6aening hanlan peenaw kha oun raepah zah a Paaw te a Pachia malang khe ranpibawi hae lang oun raetupaw tungvaw kya phu-enaw te uknaw kaw tuh zungzae te zungzae cia la um sah. Amen.7Dotua oh, Khri tuhmaeking te nynh yn thua,ccungccaw miakaw te amawa thuingtu hae nynhamaw kha a muih cih hae;laephi vaw e minphuin hae balyn tuhamaw keiccuzea rah a khui cih hae.Ou tuhmawte nynh thua, Amen.8Bawipaw Pachia nynh, “Kae tuh Alfa te Omega nynh ka thua,” a ci. Aning tuh atu lya a umpaw, langmawlya a la um vae paw te malang zemah a um cih paw, Athung Huaccepaw nynh thua.
Johan Vizin kya-e Khri9Jesu Khri kya-e vawsawrunaw, peenaw te ngaesangnaw kya nanning ry a mungkuh buapaw, nae upaw kae, Johan tuh Pachia bya keiccu te Jesu Khri ccaekia lang ka tang keiccuze Patmos cikuhpaw tuikoih kya ka um.10Bawipaw Nin kya kae tuh Muisaw kya ka um zah, ka nulang khe mungkae roi hawte myarya accaepaw roi kha ka thae.11Tuh-e roi nynh, “Na muihpaw kha ccauh kya zei lah, Asia ram e Efesa khua, Smyrna khua, Perkamum khua, Thiatira khua, Sardis khua, Filadelfia khua te Laodisia khua kya umpaw khriccaawbuu buu sari kalan ky hae,” a ci.12Bya yn hopah zah roi a sawtupaw kha muih khylan he ka maeleihkuh tuh, sui maeekhuatung ccangsari,13te maeekhuatung ccangsari angaelung khe Ccungccaw Ccapaw alopaw lu kheit kha ka muih; tuh-e paw tuh angkiccua kha kikuh zah a by kyakhe sui taeccia te a cciakuh.14A lu te a sang tuh tuuming te vuiraw hawte araw; a mit tuh maeesoi hawte nynh thua.15A ccu tuh maeesopi kya a phung vae hae paw thyaararihpaw sohin nynh alo, a roi tuh tuiphue patae roi accaepaw nynh alo.16A ranglang kuih kya awsi ccangsari a ccyng; a khalang lungkhu te kyn ning mawte ahepaw thaloi a pou; a maesue tuh thawzung phe beih lante apawpaw khuanin hawte nynh thua.17Amaw kha he ka muih tuh, a cculeihpaw khe achihpaw hawte ka khuliakuh. Thuasalama a ranglang kuih kha ka tungvaw khe khang zah, “Rih nan, kae tuh masaty te nyathyakou nynh ka thua;18a hiinpaw mah ka thua; kae tuh ka la chih, thuasalama dotua, kae tuh zungzae te zungzae cia po a hiinpaw nynh ka thua, Chinaw toh te Michi khua toh kha ka hoi.19Tukeiccuze na muihpaw uccaw hae, atu lya a umpaw uccaw hae te malang yn cyihkuh cih paw uccaw hae kha zei.20Ka ranglang kuih kya na muihpaw awsi ccangsari te sui maeekhuatung ccangsari nynh a ho rypaw byakhupaw tuh hynhte nynh thua: Awsi ccangsari tuh khriccaawbuu buu sari kya-e vaaw hae nynh thua; na muihpaw maeekhuatung ccangsari tuh khriccaawbuu buu sari kha nynh thua. Efesa Khriccaawbuu kalan Byataw1“Efesa khua umpaw khriccaawbuu kya-e vaawpaw kalan hynhte zei: A ranglang kuih kya awsi ccangsari a ccyngtupaw, sui maeekhuatung ccangsari hae laku kya a cceihtupaw nynh hynhte a ho.2“Na ryalaw hae, thawte rya na lawpaw te na ngaesangnaw hae kha ka ny, ccungccaw hoylei hae paw kha na ngaesangpah khyh hae cipaw kha thuasah, locceihtu hae nynh kae thua a ci hae zemah locceihtu athua lei hae paw kha akaw-aleih bya na khia hae zah mihyn hae nynh athua hae cipaw kha thuasah nang nynh phe na muih cipaw ka ny;3nang tuh ngaesangnaw na hoi zah ka min keiccuze na teing zah na lungthawthang khyh cipaw ka ny.4Thuasalama nang kha kae ccaenaw a um, pawccecize masaty na hoipaw sungsahnaw kha phe na cciataw vae.5Tukeiccuze paw kyate nynh ka khuliaku cipaw kha liathui lah, ngaesikute masaty e na ryalaw kha lawtua. Tukhyhze tuh na kalan arangte kae thua cih zah na ngaesikuh khyh ze, na maeekhuatung kha a umnaw kyate kae nuepah cih.6Thuasalama poo lan na ccannaw a um, kae nynh mah ka huapaw Nikolas zuitu hae mih cyisahnaw kha nang nynh na hua.7Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah. A taetupaw tuh Pachia kya-e paradis kya umpaw hiinnaw thingthae kha aenaw kaw ka pya cih.
Smyrna Khriccaawbuu kalan Byataw8“Smyrna khua kya umpaw khriccaawbuu kya-e vaawpaw kalan hynhte zei: Chih zah bua a hiinpaw, masaty te nyathyakou athuapaw nynh hynhte a ho.9“Na vawsawnaw te na ryachinaw kha ka ny. Thuasalama nang tuh a hoirumpaw nynh na thua. Judah hae nynh kae thua a ci hae zemah athua lei hae paw, Satan ccungccaw athua hae paw nynh na thethya ae ho hae paw kha ka ny.10Na teing lanpaw vawsawnaw kha rih nan. Dotua, nanning tuh syntawnaw teing khylan Satan nynh nanning kyaze abang kha thonginn lungkhu lang a sang cih hae, te nin haw lungkhu vawsawnaw na tung cih oh. Nang tuh chinaw kyacia a lungzipaw la thua, tuhteze tuh hiinnaw bawilukhung kha kae pya cih.11Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah. A taetupaw tuh vaening chinaw kha teing vae lan khyh.
Perkamum Khriccaawbuu kalan Byataw12“Perkamum khua kya umpaw khriccaawbuu kya-e vaawpaw kalan hynhte zei: Kyn ning te ahepaw thaloi a hoitupaw nynh hynhte a ho.13“Na umnaw hmin kha ka ny, tuin kya Satan bawitungkhung a um. A lungzipaw ka ccaekia Antipas tuh Satan a umnaw hmin athuapaw nanning laku chia athua nin kya heize nang tuh ka min kha tynkaring lan na kyngkuh zah kae nae zynnaw kha na vua khyh.14Thuasalama nang kha kae ccaenaw ccapyh a um. Pawccecize nae laku kya Balaam ccangpyanaw a kyngkuh hae paw abang a um hae; Israel hae nynh zohtuh hae kalan silawnawpaw uccaw hae kha ae khylan te ohhuakunaw rae khylan mih malang khe thykunawpaw kha nungkhaw khylan Balaam nynh Balak kha a ccangpya.15Tuhawte nae laku kya Nikolas ccangpyanaw a kyngkuh hae paw a um hae.16Tukeiccuze ngaesikuh, na ngaesiku khyh ze, na kalan arangte kae thua cih zah ka khalang kya-e thaloi khate minmin kha rhaw ka tuk cih hae.17Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah. A taetupaw kha thuruhpaw manna sanlou abang kha ka pya cih, arawpaw lung kha mah ka pya cih, tuh-e lung vawlan khe min thawpaw azeikuh, tuh-e min kha tuh-e lung a muepaw laelan hum nynh san nyh khyh.
Thiatira Khriccaawbuu kalan Byataw18“Thiatira khua kya umpaw khriccaawbuu kya-e vaawpaw kalan hynhte zei: Maeesoi alopaw mit a hoitupaw, thyaararihpaw sohin alopaw ccu a hoitupaw Pachia Ccapaw nynh hynhte a ho.19“Na ryalaw hae, na sungsahnaw, na zynnaw, rya na lawpyanaw te na ngaesangnaw kha ka ny; nyalang e na ryalaw tuh masaty e laeze alunghua cipaw ka ny.20Thuasalama nang kha kae ccaenaw a um; pawccecize ka rya yn lawpatu hae kha ohhuakunaw raesah khylan te zohtuh hae kalan silawnawpaw kha aesah khylan ccangpyate hynpah hae zah amaw te amaw kha profehnung a cikuhnung Jezebel kha nang nynh kaw na ua.21A ohhuakunaw konglang te ngaesikunaw ccyh ka pya zahmah aning nynh ngaesiku lan phe mya.22Dotua, amaw kha ikhung vawlan ka vua cih, te amaw ryte a seikheih hae paw kha mih cyisahnaw a ngaesiku khyh hae lanze, myarya lepaw vawsawrunaw lungkhu lang ka vua cih hae.23A ccaaw hae kha chinaw te ka theih cih hae. Kae tuh tuanaw te thinlung a ccungtu nynh ka thua cipaw kha khriccaawbuu hae balyn nynh yn nyh cih hae; nanning milu raveih kha nae ryalaw thyhte kae pya cih oh.24Thuasalama nae kalan te Thiatira khua kya umpaw tuhlaepaw hae kalan kae hopya oh, tuh-e nopinung ccangpyanaw kha a kyngkuh lei hae paw te ‘Satan kya-e akhupaw uccaw hae,’ cite abang nynh a ho hae paw kha mah a nyh lei hae paw nanning nae tungvaw kya ccangpaw phupaw kha kae khang vae lan khyh oh.25Na hoi oh paw kha kamaw kae thua cia varyng kyngkuh oh.26Taetu athuapaw te athangnaw cia ka ryalaw a lahpaw tuh,minphuin hae tungvawkawhoinaw kha ka pya cih;27aning nynh minmin khasivaw hoitang te a uk cih hae;laephi ang kha zoihtatyh lankoi hawte minmin khaa koi cih hae; tuh-e tuhkae nynh ka Paaw kyateka muepaw kawhoinaw te alokuh,28tuh-e paw tuh nizy awsi kha mah ka pya cih.29Muisaw nynh khriccaawbuu hae kya a hopaw kha nakaring a hoipaw ccungccaw tuh thae sah.
Sardis Khriccaawbuu kalan Byataw1“Sardis khua kya umpaw khriccaawbuu kya-e vaawpaw kalan hynhte zei: Pachia kya-e muisaw ccangsari te awsi ccangsari a hoitupaw nynh hynhte a ho.
“Na ryalaw hae kha ka ny. Nang tuh na hiin cite min na hoi zemah na chih cipaw ka ny.2Ngawrandotua, na chi maw hin na hoi ungpaw thawzung kha lawku tua; pawccecize Pachia malang na ryalaw hae tuh accing cite ka muih khyh.3Tukeiccuze ae ccangpyapaw te na thaepaw miakaw kha liathui lah varyng kyngkuh, te ngaesikuh. Tukeiccuze ngawran na do khyh ze, miruh hawte na kalan kae thua cih zah hohtuh ccyh nynh na kya kae thua cih cipaw na nyh lan khyh.4Sardis khua kya mih boeining athu leipaw ccungccaw hae ccapyh na hoi hae; minmin tuh angaekuhpaw athua hae keiccuze boeining rawpaw lawkute kamaw ryte a cceihbua cih hae.5A taetupaw tuh boeining rawpaw kha lawsahku athua cih, hiinnaw ccauh kyate a min kha ka thee vae lan khyh, ka Paaw malang te a vaawccungccaw hae malang a min kha ccaekia ka khan cih.6Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah.
Filadelfia Khriccaawbuu kalan Byataw7“Filadelfia khua kya umpaw khriccaawbuu kya-e vaawpaw kalan hynhte zei:Athyaapaw, ahmepaw,David kya-e toh a hoitupaw,hum nynh san a khaw kho lei lana hungtupaw, te hum nynh sana hung kho lei lana khawtupaw nynh hynhte a ho:8“Na ryalaw hae kha ka ny. Dotua, hum nynh san a khaw kho leipaw thuakaw ahungkuhpaw kha na malang ka nung vae. Pawccecize nang tuh thawzung ccapyh nynh na hoi cipaw ka ny, ka bya kha na ccykekuh zah ka min kha na vua khyh.9Dotua, Judah hae nynh kae thua cite ho hae zah athua lei hae paw mihyn hae kha Satan ccungccaw hae lang ka rae cih hae. Dotua, na cculeihpaw kya bakhung sah khylan te nang kha kae sungsah cipaw nysah khylan minmin kha na kalan kae thuasah cih hae.10Ngaesangnaw te asekuhpaw ka bya kha na ccykeku keiccuze laephi vawlan a um hae paw kha syntawtua khylan, laephi pynpi kya yn thua vae cih paw tuhounaw ccyh kyate nang kha kae khynsah cih.11Kae tuh arangte kae thua vae cih. Hum nynh sanmah na bawilukhung kha ae luade khyh nawlan, na hoi vae paw kha varyng kyngkuh.12A taetupaw kha ka Pachia beikinn kya tungpi lang ka rae cih, aning tuh atolang kharouh pou vae lan khyh. ka Pachia min te ka Pachia khuapi min kha a tungvaw khe ka zei cih; tuh-e khuapi tuh ka Pachia kyate vaawlang te yn rungbungpaw, Jerusalem thawpaw nynh thua; ka min thawpaw kha mah a tungvaw khe ka zei cih.13Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah.
Laodisia Khriccaawbuu kalan Byataw14“Laodisia khua kya umpaw khriccaawbuu kya-e vaawpaw kalan hynhte zei: Pachia kya-e raenaw athonaw athuapaw, a lungzipaw te ahmepaw ccaekia athuapaw Amen nynh hynhte a ho.15“Na ryalaw hae kha ka ny. Nang tuh kyaa mah na kyaa khyh, so mah na so khyh. Nang tuh na kyaa ze kyaa, na so ze so ci ka ry.16Tuhcite nang tuh kyaa mah kyaa lei, so mah so lei, lalungpaw na thua keiccuze ka khalang kyate kae thoi vae cih.17Nang nynh, ‘Kae tuh ka hoirum, ka dunghoy zah pawsang mah ka hobounaw um vae khyh,’ na ci keiccuze nang tuh myarya a riathaepaw, thawcci lan umpaw, a ryachipaw, a mitmohpaw te ccakaete a umpaw na thuapaw kha na nyhkuh khyh.18Tukeiccuze nang kha hynhte tuanaw kae pya: nang tuh na hoirum ccaw, maee kya thyaasah vae paw sui kha kamaw kya-e rekuh, na ccakaete na umpaw maethyanaw kha a langku khyh nawlan boeining na lawku ccaw, boeining arawpaw kha kamaw kya-e rekuh; te ngaw na muih nawlan na mit kha sii na thuhku ccaw, kamaw kya-e rekuh.19Ka sungsahpaw ccungccaw hae kha ka pe hae zah ka thuihei hae, tukeiccuze na lungtho sah lah, ngaesikuh.20Dotua, kae tuh thuakawzung khe ka thadyn zah ka khua. Ccungccaw lukhakheit nynh ka roi thae zah thuakaw yn hungpya ze, tuh-e paw kalan ka tee cih zah looh kae aekheih cih, aning mah kamaw ryte kae aekheih cih.21Kae tuh taetu ka thua zah ka Paaw ryte a bawitungkhung vawlan kae haung hawte, taetu athuapaw tuh ka bawitungkhung vawlan kamaw ryte haungnaw kaw ka pya cih.22Muisaw nynh Khriccaawbuu hae kalan a hopaw kha nakaring a hoipaw ccungccaw tuh thae sah,” yn cipya.
Vaawlang kya Pachia Beiknaw1Hynh-e koute ka do zah vaawlang kya thuakaw ahungkuhpaw kha ka muih. Masaty ka thaepaw roi tuh mungkae roi hawte bya yn hopahpaw roi nynh thua; tuh-e roi nynh, “Hynhlang yn kaethung lah, hynh-e koute yn cyihkuh lanpaw kha kae muihsah cih,” yn cipya.2Vaekheihmawte kae tuh Muisaw kyakhe ka um. Dotua, vaawlang kya bawitungkhung ccangkheit um zah, tuh-e bawitungkhung vawlan ccungccaw lu kheit a haung.3Tuh-e a haungpaw tuh jasper lung te sardias lung hawte nynh alang. Bawitungkhung po voilu lan emerald lung te alokuhpaw sawdoih a um.4Tuh-e bawitungkhung po voilu lan ccangpaw bawitungkhung hae ccangkuin lae pali a um. Tuh-e bawitungkhung hae vawlan piccan hae lu kuin lae pali tuh boeining rawpaw lawkute a haung hae paw kha ka muih. Minmin tuh mih lu kya sui lukhung a khungkuh hae.5Bawitungkhung kyate khozawlaepaw, riakawpaw te roiccaepaw hae a pou; te bawitungkhung malang khe Pachia kya-e muisaw ccangsari athuapaw, maeekhua ccangsari a awkuhpaw a um hae.6Bawitungkhung malang khe lung-awmatei te alokuhpaw muinsado rili a um. Bawitungkhung angaelung te a pepan khe nulang malang te mit te phe beihpaw ahiinpaw sarangpaw sa pali a um hae.7Masaty ahiinpaw sarangpaw tuh chindeih te lokuh zah, ccangningnaw ahiinpaw sarangpaw tuh vaetuataw te nynh aloku. Ccangthumnaw ahiinpaw sarangpaw tuh ccungccaw hawte mitmae hoi zah, ccangpalinaw ahiinpaw sarangpaw tuh mosipi azoupaw te nynh aloku.8Tuh-e ahiinpaw sarangpaw sa pali tuh sake ccangtaruh cci a hoi hae. Atolang te alungkhu lang tuh mit te phe beih hae, minmin nynh,“Athyaa, athyaa, athyaa,Athung huaccepaw Bawipaw Pachia,atu lya a umpaw, langmawlyaa la um vae paw te malang zemaha um cih paw nynh thua,”cite khuazi khuadae apaekuh lei lan hlaw a sah hae.9Bawitungkhung vawlan a haungpaw, zungzae te zungzae cia a hiinpaw kalan khe tuh-e ahiinpaw sarangpaw hae nynh phu-enaw te sawtuanaw kha pya hae zah lungtuabya he a ho hae tuh,10bawitungkhung vawlan a haungpaw malang khe piccan hae lu kuin lae pali tuh bakhung hae zah zungzae te zungzae cia a hiinpaw kha a beik hae, te bawitungkhung malang khe mih bawilukhung hae kha nungsya hae zah,11“Pou Bawipaw, nang tuh phu-enaw,sawtuanaw te huhan khamue lan na ngaekuh;pawccecize pawpaw balyn khana rae vae, tuh-e hae tuhna rynaw hawte rae thua zah a um hae,”a ci hae. Ccakue te Tuutaw1Alungkhu lang te anulang ccawzeikuh zah tazeih ccangsari te khia athuapaw ccakue ccangkheit kha bawitungkhung vawlan a haungpaw a ranglang kuih kyakhe ka muih.2A thawsaepaw vaawpaw nynh, “Tuh-e ccakue kha daw lan te tazeih hae kha ro lan hummou a ngaekuh?” cite thawte khua-opaw kha ka muih.3Tuh-e ccakue a daw kho lanpaw te a do kho lanpaw tuh vaawlang kya thuasah, laephi vaw thuasah, lae kaw lang thuasah hum sanmah um khyh.4Tuh-e ccakue tuh daw lan, ria lan te do lan angaekuhpaw hum sanmah muih lan a um khyh keiccuze thawte ka rah. Khri nynh Ccakue A Daw5Piccan hae kyaze lukheitpaw nynh, “Rah nan, dotua, Judah phin kya-e Chindeih, David Tharui nynh a tae vae, ccakue kha daw kho zah tuin kya-e tazeih ccangsari kha a ro kho vae,” cite kae kha yn hopya.6Kae nynh ka do zah bawitungkhung te ahiinpaw sarangpaw hae sa pali angaelung kya te piccan hae angaelung kyakhe a chia vae hae paw hawte athuapaw Tuutaw a thadynpaw kha ka muih; tuh-e Tuutaw tuh ki kisari te mit ccangsari hoi zah, tuh-e hae tuh laephi pynpi kalan sawpaw Pachia kya-e muisaw ccangsari nynh thua.7Tuutaw nynh cceih zah bawitungkhung vawlan a haungpaw a ranglang kuih kya-e ccakue kha a law.8Tuhte ccakue kha he a lah tuh, ahiinpaw sarangpaw hae sa pali te piccan hae lu kuin lae pali nynh tintang kha thuasah, mithyaa hae sawsangnaw athuapaw mynkhuhpaw te phe beihpaw sui pakekhupaw hae kha thuasah ccarou ccyngkuh hae zah Tuutaw malang khe a bakhung hae.9Minmin nynh hlaw thawpaw kha sah hae zah,“Nang tuh ccakue kha law lan teccakue kya-e tazeih hae khakia lan na ngaekuh,pawccecize nang tuhchia na thua zah na chiise liatephin miakaw, bya miakaw,minphuin miakaw teram miakaw kya-e ccungccaw hae khaPachia hanlan na shawkhaw hae.10Minmin kha kae Pachia hanlansiapharan lang te ranpibawi langna rae hae zah, minmin nynhlaephi hynh a uk cih hae,” a ci hae.11Ka do zah bawitungkhung, ahiinpaw sarangpaw hae te piccan hae pepan khe vaaw hae patae roi kha ka thae, tuh-e vaaw hae tuh riatae lei, athong-asan acih hae.12Minmin nynh,“Chia athua vae paw Tuutaw tuhthungnaw, hoirumnaw, hawnaw,thawzung, sawtuanaw, phu-enaw tehythuanaw kha ccou lan a ngaekuh,”cite roi accae lante a ho hae.13Vaawlang, laephi vawlan, laephi kaw, rili te pawpaw kya balyn a um hae paw ahysuepaw miakaw nynh,“Hythuanaw, sawtuanaw,phu-enaw te thungnaw tuhbawitungkhung vawlana haungpaw kya te Tuutaw kyazungzae te zungzae cia um sah!”a ci hae paw kha ka thae.14Ahiinpaw sarangpaw hae sa pali nynh, “Amen!” a ci hae. Piccan hae lu kuin lae pali nynh bakhung hae zah a beik hae. Tazeih Ccangsari1Tuutaw nynh tazeih ccangsari kya-e ccangkheit a kiapaw kha ka muih, ahiinpaw sarangpaw hae sa pali kyaze sa kheit nynh riakawpaw roi hawte, “Rang lah yn do,” a cipaw kha ka thae.2Ka do zah marang arawpaw sa kheit kha ka muih, tuh-e marang tungvaw a ccikuhpaw nynh li kha a ccyngku; amaw kha bawilukhung a pya hae, aning tuh rhaw a tae lalia lante rhaw tae lan po a cceih.3Tuutaw nynh ccangningnaw tazeih kha he a kia tuh, ccangningnaw ahiinpaw sarangpaw nynh, “Yn cceih!” a cipaw kha ka thae.4Ccangpaw marang sekakingpaw po yn pou; tuh-e marang tungvaw a ccikuhpaw tuh ccungccaw hae nynh lu kheit te lu kheit a chiaku ccaw hae cite laephi kyate daenaw kha lawnaw kaw a hoi, tuh-e paw tuh thaloi pipi kha pya athua.5Ccangthumnaw tazeih kha he a kia tuh, ccangthumnaw ahiinpaw sarangpaw nynh, “Yn cceih!” a cipaw kha ka thae. Ka do zah marang amanpaw sa kheit kha ka muih, tuh-e marang tungvaw a ccikuhpaw nynh a kuih kya zawccu kha a ccyngku.6Ahysuepaw sa pali angaelung kyate yn ccaepaw roi alopaw nynh, “Chanvuih kilo ccangkheit ze denari kia kheit, barli kilo ccangthum ze denari kia kheit nynh thua; chitui te misutui kha rosah nan,” a cipaw roi kha ka thae.7Ccangpalinaw tazeih kha he a kia tuh, ccangpalinaw ahiinpaw sarangpaw nynh, “Yn cceih!” a cipaw roi kha ka thae.8Ka do zah marang puakakaepaw sa kheit ka muih, tuh-e marang a ccikuhpaw a min tuh Chinaw cikuh zah Hell nynh a nulang te a zui. Minmin tuh laephi pum pali pum kheit kha uknaw kaw hoi hae zah, thaloi te thuasah, ccakannaw te thuasah, chinaw te thuasah, laephi kya-e sarepaw hae te thuasah ccungccaw hae kha chianaw kaw a hoi hae.9Ccangpangawnaw tazeih kha he a kia tuh, Pachia bya keiccu thuasah, ccaekia a khan hae keiccu thuasah a chia hae paw mih muisaw hae kha silawhang kaw khe ka muih;10minmin nynh, “Athyaapaw te ahmepaw, pou Bawipaw, laephi vawlan a um hae paw hynh kaening chiise mee lang hohseciamou byapia leite, liaru leite na um cih?” cite thawte a sia hae.11Minmin lu raveih tuh arawpaw angkiccua kha pya athua hae, mimaw hawte chia athuabua cih hae paw, mimaw ryte ryalahkheih hae paw te mih uno hae kha milu accing makhia sosoh haeung lan a hopya hae.12Ccangtaruhnaw tazeih kha he a kia tuh, ka do zah myarya rupaw innrysuekuhpaw a um; khuanin tuh saming te kuakuhpaw buriboei hawte man zah, sawpaw tuh chii hawte ase.13Khisan arupaw nynh thaeku ku kha he a mung vae ze, accyh zaw leite thaeku thae a khuaku hawte vaawlang e awsi hae tuh laephi vawlan a ccah hae.14Vaawlui tuh ccakue kue hawte a zo; mua miakaw te tuikoih miakaw tuh mih umnaw kyate a nuekuh hae.15Tetuh laephi siapharan hae, a minthaanpaw ccungccaw hae, a hoirumpaw ccungccaw hae, rhawbawi hae, alesaepaw ccungccaw hae, see hae te aluepaw ccungccaw hae balyn tuh laekarung hae te mua e lungpi hae kyakhe a rekuh hae.16Minmin nynh mua hae te lungpi hae kha, “Kaening hynh oun tingthin oh lah, bawitungkhung vawlan a haungpaw a mae te Tuutaw thinrianaw kyate oun khaw oh.17Pawccecize mih thinrianaw nin pi tuh yn thua vae zah, hum nynh mou a ing kho cih?” a cipya hae. Israel hae 144,000 Tazeihkhia Thua hae1Tukoute laephi ki kipali kya a thadyn hae paw vaaw hae lu pali nynh laephi vawlan, rili vawlan te thingku hae kha khisan nynh mung nan sah cite laephi san pali kya-e khisan hae phang a kyng hae paw kha ka muih.2Ahiinpaw Pachia kya-e tazeih a hoipaw, nithua langte yn kaethungpaw, ccangpaw vaawpaw kha ka muih; tuh-e paw nynh laephi te rili kha vawsaw pya khylan kaw a mue hae paw vaaw hae lu pali kalan khe thawte sia zah,3“Ah Pachia see hae kha mih terui kya tazeih ah khia mawlaezung oh, laephi thuasah, rili thuasah, thingku hae thuasah vawsaw pya nan oh,” a cipya hae.4Tukoute tazeihkhia athua hae paw milu ccazing kha ka thae; Israel ccungccaw hae kya-e phin balyn kyate thong za kheit sung pali thong pali kha tazeihkhia athua hae.5Judah phin kyate thong haw lae ning kha tazeihkhia athua hae, Reuben phin kyate thong haw lae ning, Gad phin kyate thong haw lae ning,6Asher phin kyate thong haw lae ning, Naftali phin kyate thong haw lae ning, Manasseh phin kyate thong haw lae ning,7Simeon phin kyate thong haw lae ning, Levi phin kyate thong haw lae ning, Issakhar phin kyate thong haw lae ning,8Zebulun phin kyate thong haw lae ning, Josef phin kyate thong haw lae ning, Benjamin phin kyate thong haw lae ning
kha tazeihkhia athua hae. Ram Takyh kyate Ccungccaw Patae9Tukoute ka do zah ram takyh, phin takyh, minphuin takyh te bya takyh a ho hae paw kyate riatae leipaw ccungccaw zapi pi tuh bawitungkhung malang te Tuutaw malang khe a thadyn hae; minmin tuh arawpaw angkiccua kha lawkuh hae zah mih kuih kya sarutah ange hae kha ccyng biate,10“Khumnaw tuh bawitungkhung vawlana haungpaw ah Pachia teTuutaw kya nynh a um,”cite roi accae lante thawte a sia hae.11Bawitungkhung pepan, piccan hae te ahiinpaw sarangpaw sa pali pepan khe vaaw hae balyn tuh a thadyn hae, bawitungkhung malang khe bakhung hae zah Pachia kha a beik hae.12“Amen! Hythuanaw, phu-enaw,hawnaw, lungtuabya honaw,sawtuanaw, thungnaw tethawsaenaw tuh ah Pachia kyazungzae te zungzae cia um sah!Amen,” a ci hae.13Piccan hae kyaze lukheitpaw nynh tho zah, “Arawpaw angkiccua a lawkuh hae paw hynh-e hae hynh hum hae mou? Teitemou oun thua hae?” cite kae kha yn khia.14Kae nynh, “Bawipaw, nang nynh na nyh,” ka cipya. Aning nynh kae kha, “Hynh-e hae tuh myarya lepaw vawsawrunaw kyate oun pou hae paw nynh thua hae; minmin nynh mih angkiccua kha Tuutaw chii kya sukuh hae zah a rawsahku hae.15Tukeiccuze minmin tuhPachia kya-e bawitungkhung malang kheum hae zah a beikinn kyakhekhuazi khuadae rya a lawpya hae;te bawitungkhung vawlana haungpaw tuh minmin laku khe a um cih.16Minmin tuh mih vuelawboi vae lan khyh, mih tui mahhaw boi vae lan khyh;khuanin nynh e vae lan khyh hae,maeeso nynh mah u vae lan khyh hae.17Pawccecize bawitungkhungangaelung kya a umpawTuutaw nynh minmin khaa rin cih hae zah, hiinnaw tuidy kalana cciakhae cih hae,te Pachia nynh mih mit kya-emitphi balyn kha a hupah cih hae,”yn cipya. Ccangsarinaw Tazeih1Tuutaw nynh ccangsarinaw tazeih kha he a kia tuh, vaawlang kya suimilan akhoi loukaw daetedae.2Pachia malang a thadyn hae paw vaaw hae lu sari kha ka muih, te minmin kha mungkae ccangsari a pya hae.3Ccangpaw vaawpaw nynh yn thua zah sui pakephepaw kha ccyngkute silawhang pe khe a thadyn; bawitungkhung malang a umpaw sui silawhang vawlan khe mithyaa hae balyn kya-e sawsangnaw ryte thuakhae khylan maee te upaw mynkhuhpaw patae kha tuh-e paw tuh a pya hae.4Maee te upaw mynkhuhpaw a maeekhuh tuh mithyaa hae kya-e sawsangnaw ryte vaawpaw kuih kyate Pachia malang a kaethung.5Tukoute vaawpaw nynh pakephepaw kha lah zah, tuh-e tuh silawhang kya-e maee khate phe a biasah koute laephi vawlan dae a vua; tetuh kholung yn thyh, roi yn ccae, khozaw yn laekuh zah innry yn suekuh. Mungkae Ccangsari6Mungkae ccangsari a hoi hae paw vaaw hae lu sari tuh mungkae tu lan paccynkute a um hae.7Lu kheitnaw vaawpaw nynh mungkae he a tu tuh, chii ryte apykuhpaw hya te maee palou yn um zah, tuh-e hae tuh laephi vawlan a ccah hae; laephi pum thum pum kheit kha a u, thingku hae pum thum pum kheit te lonua ahinpaw balyn kha marya a u.8Lu ningnaw vaawpaw nynh mungkae tu zah, maee nynh a upaw, myarya lepaw mua alopaw tuh rili lungkhu lang ccaring vua athua; te rili pum thum pum kheit tuh chiise lang a tang.9Rili kya umpaw ahiinpaw sarangpaw pum thum pum kheit tuh a chih hae; sanphalung hae pum thum pum kheit tuh aroh.10Lu thumnaw vaawpaw nynh a mungkae kha he a tu tuh, maeekhua hawte aruapaw awsipi tuh vaawlang te ccah zah, vawpi hae pum thum pum kheit vawlan te tuidy hae vawlan khe a ccah.11Tuh-e awsi min tuh Eccangkary acikuh. Tui hae pum thum pum kheit tuh eccangkary lang a tang; tui tuh akhahpaw lang rae athua keiccu tui keiccuze ccungccaw patae a chih hae.12Lu palinaw vaawpaw nynh mungkae tu zah khuanin pum thum pum kheit, sawpaw pum thum pum kheit te awsi hae pum thum pum kheit tuh ro athua keiccuze tuh-e hae pum thum pum kheit tuh pong amoh; khuadae pum thum pum kheit tuh aw khyh; khuazi pum thum pum kheit mah tuhawte nynh thua.13Ka do zah vaawlang angaelung kya azoupaw mosipi sa kheit nynh, “Vaawccungccaw hae lu thum nynh oun tu vae cih hae paw ccangpaw mungkae roi keiccuze laephi vaw um hae paw hanlan ngaethya lan kou um, ngaethya lan kou um, ngaethya lan kou um!” cite thawte a siapaw roi kha ka thae.1Lu pangawnaw vaawpaw nynh mungkae tu zah, awsi ccangkheit tuh vaawlang te laephi vawlan a ccawpaw kha ka muih. Adianaw um lei lan akhupaw laekarung toh kha tuh-e paw tuh a pya hae.2Aning nynh adianaw um lei lan akhupaw laekarung kha he a hung tuh, myarya lepaw maeephupi kya-e maeekhuh hawte laekarung lungkhu te maeekhuh a pouthung; laekarung kya-e maeekhuh keiccuze khuanin te vaawlui tuh pong amoh.3Maeekhuh kyate tungkhipaw hae tuh laephi vawlan oun pou hae, laephi kya-e zekang hae nynh a hoi hae paw thungnaw te alokuhpaw thungnaw kha minmin tuh pya athua hae.4Laephi kya-e lonua, ahinpaw aku te thingku ku kheit sanmah vawsawnaw pya leite, mih terui kya Pachia kya-e tazeih a hoi leipaw ccungccaw hae kyalya kha vawsaw a pya nawlan hae minmin kha kawpya athua hae.5Minmin nynh tazeihkhia athua leipaw ccungccaw hae kha chianaw kaw hoi khyh hae, thuasalama sawpaw sah pangaw cia vawsaw pyanaw kaw tuh ua athua hae. Minmin nynh vawsawnaw pya hae zah accipaw tuh zekang nynh ccungccaw a teih vae ze accipaw te nynh aloku.6Tuin ccyh kya ccungccaw hae nynh chinaw kha a ccungkuh cih hae zah muihkuh lan khyh hae; chi a ry hae zemah chinaw nynh a ccuetaw cih hae.7Tuh-e tungkhipaw hae pungsan tuh rhawtuk lan a paccyn hae paw marang hae te nynh aloku; mih lu kya sui te raepaw bawilukhung a khungkuh hae paw te lokuh zah, mih maesue tuh ccungccaw maesue te nynh aloku.8Mih sang tuh nopi hae sang te lokuh zah, mih haw tuh chindeih haw te nynh aloku.9Mih kya-e bykhaw tuh sivaw bykhaw te lokuh zah, mih sake a zaw hae paw roi tuh rhawtuk lan a ccue hae paw marangle hae patae roi te nynh aloku.10Zekang hawte leihmae hoi hae zah, mih leihmae kya hinpaw a um, tuh-e mih leihmae kyatuin sawpaw sah pangaw cia ccungccaw hae vawsaw pyanawpaw thungnaw a hoi hae.11Minmin nynh siapharan lu kheit hoi hae zah, tuh-e paw tuh adianaw um lei lan akhupaw laekarung kya-e vaawpaw nynh thua. A min tuh Hebru bya te Abaddon cikuh zah Grik bya te Apollyon acikuh.12Ngaethya lan umpaw ccangkheit tuh athang vae; dotua, hynh-e koute ngaethya lan umpaw ccangning yn thua ung cih.13Lu taruhnaw vaawpaw nynh mungkae tu zah, Pachia malang umpaw sui silawhang kya-e ki kipali kyate roi roikheit ka thae;14tuh-e roi nynh mungkae a hoitupaw lu taruhnaw e vaawpaw kha, “Myarya lepaw Zufrates vawpi kya a khii hae paw vaaw hae lu pali kha supah hae,” a cipya.15Ccungccaw hae pum thum pum kheit kha chia khylan tuh-e suimilan, tuh-e nin, tuh-e sawpaw, tuh-e kum hanlan a paccyn hae paw vaaw hae lu pali kha a supya hae.16Marang a ccikuh hae paw rhawkaw phu milu tuh million za ning acih; minmin milu ccazing kha ka thae.17Ka vizin kya marang hae kha hynhte ka muih: tuh-e marang hae tungvaw a ccikuh hae paw tuh maee hawte asepaw, ke hawte amepaw, safaia lung hawte ahinpaw bykhaw hae kha a hoi hae; marang hae lu tuh chindeih lu te nynh aloku hae, te mih khalang lungkhu te maee, maeekhuh te kemaee apou.18Mih khalang lungkhu te apoupaw maee, maeekhuh te kemaee, hynh-e phuin thum keiccuze ccungccaw hae pum thum pum kheit tuh a chih hae.19Marang hae mih thungnaw tuh mih khalang te mih leihmae kya nynh a um; mih leihmae tuh hupaw hawte lu hoi zah, tuh-e mih leihmae te ccungccaw hae kha vawsaw a pya hae.20Hynh-e shethya keiccu chi leite a laehypaw ccungccaw hae tuh raerangsaro hae kha thuasah, ngawmuih kho leipaw, nawthae kho leipaw te a cceih kho leipaw sui, ngun, sohin, lung, thingphe te raepaw zohtuh hae kha thuasah a beik khyh nawlan hae, mih kuih te a raeku hae paw hanlan ngaesikunaw hoi khyh hae.21Minmin nynh ccungccaw a chia hae paw, ccungccaw a naaw hae paw, a ohhuakunaw hae paw te a ru hae paw kha ngaesikuh khyh hae. Vaawpaw te Ccakue Taraw1A thawsaepaw ccangpaw vaawpaw tuh maeking kha zingkute vaawlang te yn rungbungpaw kha ka muih; a lu vawlan sawdoih a um, a maesue tuh khuanin te lokuh zah, a ccu tuh maee tungpi te nynh aloku.2Adawkuhpaw ccakue taraw kha a kuih kya a ccyng; a ranglang ccu kha rili vawlan sy zah a voilang ccu kha laephi vawlan a sy.3Chindeih nynh a sia hawte roi accae lante thawte a sia; he a sia koute kholungthyhpaw roi vaesari accae.4Kholungthyhpaw roi vaesari accae koute, kae tuh ccaw zei lan ka noukuh vae; vaawlang kyate roi nynh, “Kholungthyhpaw roi vaesari accaepaw uccaw hae kha tazeihkhia lah, tuh-e hae tuh zei nan,” cite kamaw yn hopyapaw kha ka thae.5Rili te laephi vawlan a thadynpaw ka muihpaw vaawpaw nynh a kuih kha vaawlang hangthung zah,6vaawlang te vaawlang kya umpaw uccaw hae, laephi te laephi kya umpaw uccaw hae, rili te rili kya umpaw uccaw hae a raetupaw, zungzae te zungzae cia a hiinpaw min phyate thyalawkuh zah, “Accyh ro vae lan khyh.7Pachia nynh a ryalahtu profeh hae kya a la ho vae hawte, lu sarinaw e vaawpaw nynh mungkae a tupaw roi he yn ccae ccyh kyakhe Pachia byakhupaw tuh yn ccing cih,” a ci.8Vaawlang e ka thaepaw roi nynh kamaw kha bua yn hopah zah, “Rili te laephi vawlan a thadynpaw vaawpaw kuih kya adawkuhpaw ccakue taraw khuh ccianua lah yn lah,” yn cipya.9Vaawpaw kalan ka cceih zah, “Ccakue taraw kha yn pya,” ka cipya. Aning nynh, “Lawkuh lah ae, na vue kya a khah cih, thuasalama na khalang kya tuh khoitui hawte a e cih,” yn cipya.10Vaawpaw kuih kya-e ccakue taraw kha ka lawkuh zah ka ae; ka khalang kya tuh khoitui hawte e zah, ccahe ka ae kou tuh ka vue kya a khah.11Aning nynh, “Ccungccaw hae patae, minphuin hae, bya hae te siapharan hae kalan khe profehbya bua na ho hahe cih,” cite yn hopya. Ccaekia Lu Ning1Tukoute hoitang alopaw tounawpaw ccungngue ccangkheit kha yn pya zah, “Thokuh lah, Pachia beikinn te silawhang kha la tou, tuin kya a beiktu hae kha mah la ria hae.2Thuasalama beikinn atolang e voidu kha tuh tou leite la cciataw; pawccecize tuh-e tuh Zenta hae kalan pya athua vae; minmin nynh athyaapaw khualipi kha sawpaw sung pali sah ning cia a syde cih hae.3Ka ccaekia lu ning kha thungnaw ka pya cih hae zah, minmin nynh buriboei kha zingkute nin thong kheit za ning sung taruh cia profehbya a ho cih hae,” a ci.4E ccaekia hae lu ning tuh laephi a peetu Bawipaw malang a thadyn hae paw maeekhuatung ccangning te oliv thingku ku ning nynh thua hae.5Lukhakheit nynh minmin kha vawsaw pya a ry hae ze, mih khalang lungkhu te maee pou zah mih rhaw hae kha po a laang hae; lukhakheit nynh minmin kha vawsaw pya a ry hae ze, tuh-e paw tuh tuhcite chia athua hahe cih.6Tuh-e hae nynh profehbya a ho lya hae khe khuaa araw khyh nawlan, vaawlang thuakaw khaw khonaw kaw a hoi hae; tui kha chii lang tangsah khonaw thungnaw, a ry takyh hae te shethya aphuinphuin te laephi kha vawsaw pya khonaw thungnaw kha a hoi hae.7Minmin nynh ccaekiakhan hae paw kha he a thangsah hae te, adianaw um lei lan akhupaw laekarung lungkhu te yn kaethungpaw sarepaw nynh minmin kha rhaw a tuk cih hae, a tae cih hae zah a theih cih hae.8Mih rhua hae tuh muisaw lante Sodom te Izip a ci hae paw, myarya lepaw khuapi kya-e laanpi kyakhe a huekuh cih hae; mih Bawipaw kha mah tuin khua kyakhe vaelantung kya a khiade hae.9Ram hae, phin hae, bya hae te minphuin hae kya-e ccungccaw hae nynh mih rhua hae kha nin thum khoi lungkhu a muih cih hae zah, shaw kya uu lan a kang cih hae,10laephi vawlan a um hae paw tuh mih lungtua cih zah mih lungpaw cih, lu kheit te lu kheit lasung a kykuh cih hae; pawccecize langmawlya tuh-e profeh hae lu ning nynh laephi vawlan a um hae paw kha myarya ccih lante vawsawnaw a la pya hae.11Nin thum khoi acih koute Pachia kyate hiinnawpaw hy tuh mih lungkhu lang tee zah mih ccu te a thadyn hae, minmin kha a muih hae paw tuh myarya a rih hae.12Tuinte vaawlang e myarya ccaepaw roi nynh, “Hynhlang oun kaethung oh!” cite a hopya hae paw kha tuh-e hae lu ning nynh a thae hae. Minmin tuh mih rhaw hae muihnaw kyakhe maeking te vaawlang a kae hae.13Tuh ccyh lyakhe innry thawte suekuh zah khuapi pum haw pum kheit tuh pong ating, tuh-e innrysuekunaw kya ccungccaw thong sari a chih hae, tuhlaepaw ccungccaw hae tuh rih hae zah vaawlang e Pachia kha phu-enaw a pya hae.14Ngaethya lan umpaw ccangningnaw tuh athang vae; dotua, hynh-e koute ngaethya lan umpaw ccangthumnaw tuh taloi yn thua cih. Ccangsarinaw Mungkae15Lu sarinaw vaawpaw nynh a mungkae kha tu zah, vaawlang te myarya accaepaw roi hae nynh,“Laephi peenaw tuhah Bawipaw peenaw te a Khri kya-epeenaw lang phe tang vae,aning nynh zungzae tezungzae cia a uk vae cih,”cite a ho hae.16Pachia malang mimaw bawitungkhung vawlan a haung hae paw piccan hae lu kuin lae pali nynh bakhungte Pachia kha beik hae zah,17“Atu lya a umpaw, langmawlya maha la um vae paw, Athung huaccepaw,Bawipaw Pachia, alesaepawna huhan kha na lawkuh zahna uk vae keiccuze na kalanlungtuabya kae ho.18Minphuin hae tuh myarya mih thinria,thuasalama na bungpawnaw tuhyn thua vae;michi hae byapianaw ccyh tuhyn thua vae,namaw rya ae lawpah hae pawna profeh hae, mithyaa hae,na min raw a rih hae pawccungccaw adih ale hae kharyalaw mee pyanaw ccyh telaephi a rohtu hae kharonaw ccyh tuh yn thua vae,”a ci hae.19Vaawlang a umpaw Pachia beikinn tuh hungkuh zah, a beikinn kyakhe amaw kya-e byakin thingkua kha muih athua; te khozaw alaekuh, roi accae, kholung athyh, innrysuekuh zah myarya lepaw hya accah.
Nopinung te Nakaa-hupi1Vaawlang kya myarya lepaw muihsahnaw a langkuh: Nopinung lu kheit tuh khuanin khate ccaankuh zah sawpaw kha a ccu kaw khe a nung, awsi haw lae ning a umpaw bawilukhung kha a lu vawlan a khungku.2Tuh-e nung tuh ccaawpoi zah a ccaaw pui lan acih tuh, neitangia acci keiccuze thawte a siakhaekuh.3Vaawlang kya ccangpaw muihsahnaw alangkuh: Dotua oh, alu lu sari te aki ki haw hoi zah, a lu hae vawlan bawilukhung ccangsari a hoipaw, myarya lepaw nakaa-hupi sekakingpaw a um.4A leihmae nynh vaawlang e awsi hae pum thum pum kheit kha sue hae zah, laephi vawlan a vua hae; nopinung kya-e vyavya pui vae paw ccaaw tuh ccahe yn pui te, po laang lan cite nakaa-hupi tuh nopinung malang khe phang a thadyn.5Tuinte sivaw hoitang te minphuin miakaw a uk cih paw ccapaw kha nopinung nynh a saah; a ccaaw tuh Pachia kalan te a bawitungkhung kalan lawthung athua.6Nopinung tuh nin thong kheit za ning sung taruh cia looh dang athua ccaw cite Pachia nynh a paccynpyapaw hmin, ramkaw langkhe a ccue. Mikhael nynh Nakaa-hupi A Tae7Te vaawlang kya rhawtukkunaw a um; Mikhael te a vaawccungccaw hae nynh nakaa-hupi kha rhaw a tuk hae, nakaa-hupi te a vaawccungccaw hae nynh rhaw a tukru hae zemah8a shung hae keiccuze minmin hanlan vaawlang kya umnaw kharouh um vae khyh.9Laephi pynpi a lingpaw, Raerangsaro te Satan a ci hae paw langmawlya e hupaw, myarya lepaw nakaa-hupi tuh laephi kalan vua athua, amaw ryte a vaawccungccaw hae tuh vua athua hae.10Vaawlang e roi accaepaw nynh,“Khumnaw, huhan,ah Pachia kya-e peenaw tea Khri kya-e kawhoinaw tuhatu yn thua vae;pawccecize ah uno hae khaseibetupaw, ah Pachia malangkhuazi khuadae minmin khaseibetupaw tuh sawbung athua vae.11Ah uno hae nynhTuutaw chii liate thuasah,mih ccaekia tangnaw bya liate thuasahSatan kha a tae hae; minmin tuhchi ngan ciate mih hiinnaw khaa pyakuh hae.12Tukeiccuze, pou vaawlang tevaawlang a um hae paw,nae lungtua sah!Pou laephi te rili, nanning hanlanngaethya lan kou um;pawccecize Satan nynhccyh sosoh rou nynhka hoi vae cipaw kha a nyku keiccuzemyarya a thinria zahnae kalan yn rungbung vae,”cite a hopaw kha ka thae.13Nakaa-hupi nynh laephi kalan yn vua vae hae cipaw he a nyh tuh, ccapise a saahpaw nopinung kha a dee.14Tuh-e nopinung tuh hupaw kyate lue khylan ramkaw lang a zou nawlan myarya lepaw mosipi sake ccangning kha pya athua; nopinung tuh tuin kyakhe ccyh kheit, ccyh hae te ccyh angankuh cia do-oih athua.15Tuh-e nopinung tuh tui nynh lou sah cite hupaw nynh a khalang lungkhu te tui kha vawpi hawte nopinung nulang te a pousah.16Thuasalama laephi nynh nopinung kha a bawm, laephi nynh a khalang kha aw zah nakaa-hupi nynh a khalang lungkhu te a pousahpaw vawpi kha po a laang.17Nakaa-hupi tuh nopinung elang myarya a thinria zah, nopinung ciihan a laehy hae paw kha rhawtuk khylan po a cceih; tuh-e hae tuh Pachia kawbya a zui hae paw te Jesu Khri kya-e ccaekia a hoi hae paw nynh thua.18Hupi tuh rili kin laesia vawlan khe a thadyn. Sarepaw Sa Ning1Rili lungkhu te yn pouthungpaw sarepaw sa kheit kha ka muih; tuh-e sarepaw tuh lu lusari te ki kihaw a hoi; a ki vawlan bawilukhung ccanghaw um zah, a lu hae vawlan Pachia thethyasahpaw min a um.2Ka muihpaw sarepaw tuh kaesing te nynh aloku; a ccu tuh vong ccu te lokuh zah a khalang tuh chindeih khalang te nynh aloku. Nakaa-hupi nynh a thungnaw, a bawitungkhung te alepaw kawhoinaw kha sarepaw kalan a pya.3Alu lu kheit tuh chikhaeku khopaw vaemaw a muepaw hawkhate nynh thua; chikhaeku khopaw a vaemaw tuh dansah athua, laephi ccungccaw hae balyn tuh mih ngaeangthua zah sarepaw nulang khe a zuikuh hae.4Sarepaw kha kawhoinaw a pyatupaw nakaa-hupi kha minmin nynh a beik hae; sarepaw kha mah beik hae zah, “Sarepaw alopaw hummou a um? Hummou sarepaw kha rhawtuk kho cih?” a ci hae.5Sarepaw tuh lysakunaw bya te Pachia thethyasahnaw bya a hothyapaw munglae kha pya thua zah, sawpaw sung pali sah ning lungkhu kawhoinaw kha mah pya athua.6A khalang kha aw zah Pachia thethyasahnaw bya kha a ho, Pachia a min, a umnaw te vaawlang a um hae paw kha thethyasahnaw bya a ho.7Mithyaa hae kha rhawtuknaw kaw te taenaw kaw a mue; phin miakaw, minphuin miakaw, bya miakaw te ram miakaw tungvaw kawhoinaw kha amaw kya pya athua.8Chia athuapaw Tuutaw kya-e hiinnaw ccauh kya laephi athotakaw te mih min zei athua lei hae paw, laephi vawlan a um hae paw balyn nynh sarepaw kha oun beik cih hae.9Nakaring a hoipaw ccungccaw tuh thae sah:10Ming hae kha seetangnaw kalana cciakhae hae paw ccungccaw tuhamaw mah seetangnaw kalana cceih cih; thaloi teccungccaw a theihpaw tuhamaw mah thaloi techia athua hahe cih.E kyahin mithyaa hae zynnaw te lungsaenaw tuh a um. Sarepaw Sa Ningnaw11Laephi lungkhu te yn poupaw ccangpaw sarepaw kha ka muih; aning tuh tuutaw hawte ki kining hoi zah nakaa-hupi hawte bya a ho.12Tuh-e sarepaw nynh masaty sarepaw kya-e thungnaw balyn kha amaw a muihnaw kya mawkhe pong a mang; aning nynh laephi te laephi kya um hae paw kha chikhaeku khopaw vaemaw kyate a dan vae paw masaty sarepaw kha a beiksah hae.13Aning nynh myarya lepaw muihsahnaw kha langsakuh zah, ccungccaw hae muihnaw kyakhe maee kha vaawlang te laephi vawlan a ccawsah.14Aning nynh masaty e sarepaw malang langsakunaw kaw a muepaw muihsahnaw hae liate laephi vawlan a um hae paw kha a ling hae. Thaloi te vaemaw a mue zemah a hiin ungpaw sarepaw azuh kha raeku lan laephi vawlan a um hae paw kha a hopya hae.15Sarepaw azuh nynh bya a ho kho nawlan thuasah, sarepaw azuh a beik leipaw miakaw tuh chia athua nawlan thuasah, sarepaw azuh tuh hiinnaw pya khonaw kaw kha aning tuh pya athua.16Aning nynh ccungccaw balyn kha, adihpaw mah alepaw mah, a hoirumpaw mah a ryachipaw mah, a luepaw mah see mah mih ranglang kuih kya khyhze mih terui kyakhe syntawnaw tazeih a khiasaku hae.17Sarepaw min khyhze a min namba athuapaw syntawnaw tazeih a um khyh lanze, humhung mah re khonaw te zua khonaw kaw hoi khyh.18Hynh-e kya hawnaw a um: thaethyanaw a hoipaw ccungccaw nynh sarepaw namba kha ria sah; pawccecize tuh-e tuh ccungccaw namba thua zah, tuh-e namba tuh 666 nynh thua. Tuutaw te A Ccungccaw hae 144,0001Kae do zah, Tuutaw tuh Zion Mua vawlan a thadyn, mih terui kya amaw min te a Paaw min azeikuhpaw 144,000 tuh amaw ryte a umkheih hae.2Tuiphue atoikuhpaw patae roi hawte thuasah, myarya accaepaw kholungthyhpaw roi hawte thuasah vaawlang e roi kha ka thae; tintang a khua hae paw nynh mih tintang a khua hae paw roi hawte accaepaw roi kha mah ka thae.3Bawitungkhung malang thuasah, ahiinpaw sarangpaw sa pali te piccan hae malang thuasah hlaw thawpaw kha minmin nynh a sah hae. Tuh-e hlaw tuh laephi kyate shawkhaw athua hae paw 144,000 laelan hum nynh sanmah ccangkuh kho khyh hae.4Minmin tuh ccangvady thua hae zah, nopi hae ryte a nungsikuh lei hae paw nynh thua; minmin tuh Tuutaw a ccianaw miakaw lang a zui hae paw nynh thua; ccungccaw hae laku kyate shawkhaw thua hae zah, Pachia te Tuutaw hanlan masaty athae nynh thua hae.5Mih munglae kya hynbya um khyh, pawccecize minmin tuh ccaenaw hoi khyh hae. Vaaw hae Lu Thum6Tukoute vaawlang angaelung kya azoupaw ccangpaw vaawpaw kha ka muih; aning tuh laephi vawlan um hae paw ram miakaw, phin miakaw, bya miakaw te minphuin miakaw kalan hopya lanpaw zungzae atynpaw thehoypaw a hoitu nynh thua.7Aning nynh roi accae lante ho zah, “Pachia raw kha rih oh lah, thehoysah oh; pawccecize a byapianaw ccyh tuh yn thua vae; vaawlang, laephi, rili te tuidy a raetupaw kha beik oh,” a ci.8Ccangpaw vaawpaw, lu ningnawpaw nynh zuikuh zah, “Alesaepaw Babilon khuapi tuh a khuliakuh vae, a khuliakuh vae, pawccecize anungsikuhpaw a ohhuakunaw athuapaw misutui kha minphuin hae balyn pong a niasah hae,” a ci.9Ccangpaw vaawpaw, lu thumnawpaw nynh minmin kha zui hae zah, “Ccungccaw lukhakheit nynh sarepaw te tuh-e sarepaw azuh kha beik zah, tuh-e sarepaw kya-e syntawnaw tuh a terui kya khyhze a kuih kya a hoi lanze,10tuh-e paw tuh Pachia thinrianaw banang lungkhu lang pawpaw mah pyde leite a ccae hae paw Pachia thinrianaw athuapaw misutui kha a neih cih; tuh-e paw tuh athyaapaw vaaw hae malang te Tuutaw malang khe maee te kemaee khate thawte vawsawnaw a pya cih hae.11Minmin nynh a teing hae paw vawsawnaw maeekhuh tuh zungzae te zungzae cia a kaethung; sarepaw te sarepaw azuh a beik hae paw te sarepaw min syntawnaw tazeih a mue hae paw tuh khuazi khuadae haeung khyh hae,” cite roi accae lante a ho.12Hynh-e kyahin Pachia kawbya zui hae zah Jesu kya zynnaw a hoi hae paw mithyaa hae tuh ngaesangnaw a hoi hae.13Vaawlang te roi nynh, “Hynh-e hynh zei: Atu ccyh kyate Bawipaw kya a chih hae paw tuh hythuanaw a ccou hae paw nynh thua,” cite yn hopyapaw kha ka thae. Muisaw nynh, “Athua ccaccing, minmin tuh mih ryalaw kyate a haeung vae cih hae, pawccecize mih ryalawnaw nynh minmin kha a zui hae!” a ci. Laephi Loohruenaw14Tukoute ka do zah, maeking rawpaw a um; ccungccaw alopaw nynh a lu vawlan bawilukhung kha khungkuh zah a kuih kya rungkou ahepaw kha ccyngkute tuh-e maeking vawlan khe a haung.15Ccangpaw vaawpaw nynh beikinn lungkhu te yn pou zah maeking vawlan a haungpaw kyakhe, “Na rungkou kha mang lah loohrue ccavae, pawccecize loohrue ccyh azaw vae, laephi kya-e loohrue lanpaw tuh avoi vae,” cite thawte sia zah a hopya.16Maeking vawlan a haungpaw nynh a rungkou kha laephi vawlan hang zah laephi kya-e looh kha a rue vae.17Ccangpaw vaawpaw tuh vaawlang a umpaw beikinn lungkhu te yn pou, aning mah rungkou ahepaw a hoibua.18Maee tungvaw kaw a hoitu, ccangpaw vaawpaw tuh silawhang kyate yn pou; aning nynh rungkou ahepaw a ccyngkuhpaw kalan khe thawte sia zah, “Na rungkou ahepaw kha mohsua lah, laephi kya-e misu thae ange hae kha suelua, pawccecize misu thae tuh avoi vae,” cite a hopya.19Vaawpaw nynh a rungkou kha laephi vawlan khe mohsua zah, laephi kya-e misu ange kha a suelua; tuh-e tuh Pachia thinrianaw athuapaw myarya lepaw misu mianawpaw akhu lungkhu langkhe moh a phang.20Khuapi atolang umpaw misu mianawpaw akhu kyakhe miade thua zah, tuin kyate chii tuh marang khabaw se phe thua lante pou zah, me za ning loukaw cia a thua. Vaaw hae te Nyathyakou Shethya1Alesaepaw te ngaeang lan umpaw ccangpaw muihsahnaw kha vaawlang khe ka muih, tuh-e tuh nyathyakou e shethya ccangsari a hoi hae paw vaaw hae lu sari nynh thua; pawccecize tuh-e shethya hae tuh Pachia thinrianaw a thangnaw nynh thua.2Maee te apykuhpaw thawlang rili alopaw kha ka muih; sarepaw, sarepaw azuh, sarepaw kya-e syntawnaw te a min namba tungvaw taenaw a hoi hae paw nynh Pachia tintang hae kha ccyngkuh hae zah thawlang rili kin khe a thadyn hae paw kha ka muih.3Minmin nynh Pachia ryalahtu Moses hlaw te Tuutaw hlaw kha sah hae zah,“Athung huaccepaw Bawipaw Pachia,na ryalaw hae tuh lesae zahngaeang lan a um!Minphuin hae Siapharan,na laanpi hae tuh ding zah ahme!4Pou Bawipaw, hummou na rawri leite,na min kha phu-esah leite a um cih?Pawccecize nang rou nynhathyaapaw na thua.Bya na piapaw balyn tuha langku vae keiccuzeminphuin hae balyn nynhoun thua cih hae zahae beik cih hae,”a ci hae.5Tukoute he ka do tuh, vaawlang kya ccaekiakhankunaw bu a umnaw beikinn tuh ahungkuh.6Shethya ccangsari a hoi hae paw vaaw hae lu sari tuh beikinn lungkhu te oun pou hae; minmin tuh dalahdalah ak zah thyaararihpaw boeining arawpaw kha lawkuh hae zah mih by kya sui taeccia a cciakuh hae.7Ahiinpaw sarangpaw hae sa pali kyaze sa kheit nynh zungzae te zungzae cia ahiinpaw Pachia a thinrianaw te phe beihpaw sui pakekhupaw ccangsari kha vaaw hae lu sari kalan khe a pya hae.8Beikinn tuh Pachia a phu-enaw te a thungnaw maeekhuh te phe abeih; te vaaw hae lu sari kya-e shethya ccangsari athang makhia tuh hum sanmah beikinn lungkhu lang tee kho khyh. Pachia Thinrianaw Pakekhupaw hae1Beikinn lungkhu te myarya accaepaw roi nynh, “La cceih oh lah, Pachia thinrianaw athuapaw pakekhupaw ccangsari kha laephi vawlan ccae oh,” cite vaaw hae lu sari kalan a hopya hae paw kha ka thae.2Masaty e vaawpaw nynh cceih zah a pakekhupaw kha laephi vawlan khe a ccae; te sarepaw kya-e syntawnaw a hoi hae paw te sarepaw azuh a beik hae paw tungvaw kyakhe myarya dothah zah luathua-ae-ui lan umpaw te myarya ccihpaw balyh nynh a thuanua hae.3Lu ningnaw e vaawpaw nynh a pakekhupaw kha rili vawlan khe a ccae; rili tuh ccungccaw achihpaw chii hawte chii lang phe a tang; rili kya umpaw a hiinpaw miakaw marya a chih hae.4Lu thumnaw e vaawpaw nynh a pakekhupaw kha vawpi hae te tuidy hae vawlan khe a ccae; tuh-e hae tuh chii lang phe a tang.5Tui a uktu vaawpaw nynh,“Atu a umpaw, langmawlyaa la um vae paw, pou Athyaapaw,nang tuh na ding,pawccecize nang nynhhynh-e hae hynh bya na pia.6Minmin nynh mithyaa hae chii teprofeh hae chii kha luasah hae zah,nang nynh minmin a nia lan hae pawchii kha na pya hae.Minmin tuh tuhcite teing lana ngaekuh hae paw nynh thua,”cite a hopaw kha ka thae.7Ccangpaw vaawpaw nynh silawhang kyate,“Athung huaccepawBawipaw Pachia, na byapianaw tuhhme zah adingpaw nynh thua!”cite a hopaw kha ka thae.8Lu palinaw e vaawpaw nynh a pakekhupaw kha khuanin vawlan khe a ccae; khuanin tuh ccungccaw hae kha maee te unaw kaw a mue.9Myarya asopaw maeeso khate ccungccaw hae kha u thua hae zah, hynh-e shethya hae tungvaw kaw a hoitupaw Pachia min kha thya a law hae; minmin tuh ngaesikuh khyh hae, Pachia kha mah phu-enaw pya khyh hae.10Lu pangawnaw e vaawpaw nynh a pakekhupaw kha sarepaw kya-e bawitungkhung vawlan khe a ccae; a peenaw tuh mohnaw te phe beih zah, eih acci keiccuze ccungccaw hae nynh mih lae kha a teiku hae.11Minmin nynh a teing hae paw mih vaemaw te mih balyh hae keiccuze vaawlang e Pachia kha thyalaw hae zah, mih cyisahnaw kha ngaesikuh khyh hae.12Lu taruhnaw e vaawpaw nynh a pakekhupaw kha myarya lepaw Zufrates vawpi vawlan khe a ccae; nithua lang e siapharan hae ccianaw kha paccynpya khylan, tuin kya-e tui tuh phe akan.13Nakaa-hupi khalang, sarepaw khalang te ahme leipaw profeh khalang kyate buphaw te alokuhpaw athupaw muisaw hae ccangthum yn poupaw kha ka muih.14Tuh-e muisaw hae tuh muihsahnaw hae a langsakuhpaw raerangsaro hae kya-e muisaw hae nynh thua; Athung huaccepaw Pachia kya-e alesaepaw nin kya rhawtukku khylan minmin nynh laephi pynpi kya-e siapharan hae kha ccianua hae zah a suelua hae.15(“Dotua, kae tuh miruh hawte nynh kae thua! A ccakaete a ccia khyh nawlan te a maethyanaw alang khyh nawlan a uccaw kha a rinkuhpaw te ngaw a dokuhpaw tuh hythua a ccoupaw nynh thua!”)16Tuh-e muisaw hae nynh siapharan hae kha Hebru bya te Armageddon a ci hae paw hmin kyakhe nynh a suelua hae.17Lu sarinaw e vaawpaw nynh a pakekhupaw kha khivae kyakhe a ccae; vaawlang e beikinn kya umpaw bawitungkhung kyate myarya accaepaw roi yn pou zah, “Athang vae!” a ci.18Khozawlaekunaw, roiccaenaw, kholungthyhnaw te myarya rupaw innrysuekunaw a um; laephi vawlan ccungccaw a um takaw te tuhcih arupaw te tuhcih alepaw innrysuekuhpaw tuh um boi khyh.19Myarya lepaw khuapi tuh san thum lang phia thua zah, minphuin hae kya-e khuapi hae tuh phe ating. Pachia nynh a thinrianaw te asekuhpaw bungpawnaw misutui banang kha niasah khylan myarya lepaw Babilon khuapi kha a liathui vae.20Tuikoih miakaw tuh pong ccue hae zah, mua hae tuh muih lan um vae khyh hae.21Pung za kheit loukaw aripaw myarya lepaw hya tuh ccungccaw hae tungvaw khe vaawlang te a ccah. Tuh-e shethya tuh myaryamaw ccih zah, tuh-e hya te asekuhpaw shethya keiccuze ccungccaw hae nynh Pachia kha thya a law hae. Ohhuanung Lepaw te Sarepaw1Tuinte pakekhupaw ccangsari a hoipaw vaaw hae lu sari kyaze lukheitpaw nynh yn cceih zah yn hopyapaw tuh, “Rang, tui patae vawlan a haungpaw ohhuanung lepaw tungvaw byapianaw kha kae muihsah cih;2laephi siapharan hae nynh tuh-e nung te a ohhuakuh hae; laephi vaw a um hae paw tuh tuh-e nung kya-e ohhuakunaw misutui khate pong a rui vae hae,” a ci.3Tuhcite Muisaw liate kae kha ramkaw lang yn cciakhae; alu lu sari te aki ki haw hoi zah Pachia thethyasahnawpaw min hae te phe beihpaw sarepaw sekakungpaw vawlan a haungpaw nopinung kha ka muih.4Nopinung tuh sephaphuhpaw te asepaw boeining kha lawkuh zah sui, aphutepaw lung hae te palee hae khate a ccaankuh; a ohhuakunaw kya-e luathua-ae-ui lan umpaw te myarya anungsikuhpaw sui banang kha a kuih kya a ccyngbia.5A terui kyakhe, “Alesaepaw Babilon, ohhua hae nung te laephi kya-e luathua-ae-ui lan umpaw nung,” cite byakhu lante min azeikuh.6Nopinung tuh mithyaa hae chii te Jesu a zyn hae keiccu a chia hae paw chii khate a ruipaw kha ka muih, tuh-e nung kha he ka muih tuh, myarya ka ngaeangthua.7Vaawpaw nynh, “Pawccemou na ngaeangthua? Tuh-e nopinung kya-e byakhupaw te tuh-e nung a cciakhaepaw alu lu sari te aki ki haw a hoipaw sarepaw kya-e byakhupaw kha kae hopah ung cih.8Na muihpaw sarepaw tuh langmawlya la um zah atu um khyh, adianaw um lei lan akhupaw laekarung lungkhu te yn kaethung cih zah ronaw kalan a cceih cih; laephi vawlan um hae zah laephi athotakaw te hiinnaw ccauh kya mih min zei athua lei hae paw nynh langmawlya la um zah atu a um leipaw, te bua yn langkuh cih paw sarepaw kha he oun muih hae tuh, mih ngaeangthua cih.9“Hein kyahin hawnaw te nythyanaw hoi aho: alu lu sari tuh nopinung nynh a haungnawpaw mua muasari nynh thua;10siapharan hae lu sari mah a um hae; lu pangaw tuh a ccahbung vae hae, lu kheit tuh a um ung; ccangpaw lu kheit tuh yn thua loh khyh; aning tuh he yn thua te, ccyh dyntari rou nynh atyn cih.11Langmawlya la um zah atu a um leipaw sarepaw tuh lu taryanaw e siapharan nynh thua, aning tuh lu sari kya a um buapaw mah thua zah, ronaw kalan a cceih cih.12Na muihpaw aki ki haw tuh siapharan kawhoinaw a mue loh leipaw siapharan lu haw hae nynh thua; thuasalama siapharan hae hawte kawhoinaw kha sarepaw ryte suimilan ccangkheit lungkhu a muekheih cih hae.13Tuh-e hae tuh tuanaw ccangkheit a hoi hae paw thua zah mih thungnaw te kawhoinaw kha sarepaw kalan a pya cih hae.14Tuh-e hae nynh Tuutaw kha rhaw a tuk cih hae zah Tuutaw nynh minmin kha a tae cih hae, pawccecize Tuutaw tuh bawi hae Bawipaw te siapharan hae Siapharan nynh thua; amaw ryte a umkheih hae paw tuh ko athua hae paw, po athua hae paw te mih lungzipaw nynh thua hae,” yn cipya.15Vaawpaw nynh, “Ohhuanung nynh a haungnawpaw tui na muihpaw tuh minphuin hae, ccungccaw zapi hae, ram hae te bya hae nynh thua.16Na muihpaw aki ki haw hae te sarepaw nynh ohhuanung kha a hua cih hae, a uccaw miakaw kha a ropah cih hae zah a ccakaete a nung cih hae; a ngesaw kha a ae cih hae zah amaw kha maee te a u cih hae.17Pawccecize Pachia bya accing mawlaezung, a rynaw kha ccingsah khylan, minmin kha lunglokunaw hoisah te minmin kya-e siapharan kawhoinaw kha sarepaw kalan pya lan Pachia nynh mih thinlung kya phe a sang vae.18Na muihpaw nopinung tuh laephi siapharan hae a uktupaw, myarya lepaw khuapi kha nynh thua,” cite yn hopya. Babilon Ronaw1Tukoute myarya lepaw kawhoinaw a hoipaw ccangpaw vaawpaw nynh vaawlang te yn rungbungpaw kha ka muih; a phu-enaw khate laephi tuh phaephae a aw.2Aning nynh roi accae lante thawte sia zah,“Myarya lepaw Babilon tuha khuliakuh vae, a khuliakuh vae!Raerangsaro hae umnaw lang nynha tang vae, anungsikuhpawmuisaw miakaw elang thonginn lang,te athyaa leipaw te hua lan umpawpavaw miakaw elangrekunaw lang nynh a tang vae.3Pawccecize minphuin hae balyn nynha ohhuakunaw te asekuhpawathyaa leipaw misutui kha a nia vae hae;laephi siapharan hae tuhamaw ryte a ohhuakuh vae hae;laephi vaw e kungku hae tuhtuh-e nopinung a ohhuakunaw kya-e sisua liatea hoirum vae hae,” a ci.4Tuinte vaawlang te ccangpaw roi khaka thae zah tuh-e roi nynh,“Ka ccungccaw hae, nanning tuhtuh-e nung a seinaw kyana umbua khyh nawlan oh thuasah,aning nynh a teing lanpaw shethya kyana umbua khyh nawlan oh thuasahamaw kyate oun pou oh.5Pawccecize a seinaw tuhvaaw cia phe phah vae zaha hoyleinaw khaPachia nynh a liathui vae.6Aning nynh ae cyi oh hawtecyihru oh; a cyisahnaw thyhteleit ning liaru oh; aning nynha pydepaw banang kyakheleit ning pydepah oh.7Aning nynh amaw te amaw khamyarya a phu-esakuh zahohhuakunaw kya a hoysah hawkhatevawsawnaw te rawkhuinaw khapyaru oh; pawccecize aning nynha thinlung kyakhe,‘Kae tuh siapharannung nynh ka thua,nomae ka thua khyh,rawkhuinaw tuh ka tung lan khyh,’a ciku.8Tukeiccuze aning nynhshethya hae athuapaw chinaw,rawkhuinaw te ccakannaw khanin kheit lungkhu a tung cih zah,maee nynh pong a u cih;pawccecize amaw khabya a piatupaw Bawipaw Pachia tuha thawsaepaw nynh thua,” a ci.9Amaw ryte ohhuakuh hae zah ohhuakunaw kya a hoysah kheih hae paw laephi siapharan hae nynh a rhua a uunaw hae paw maeekhuh kha he a muih hae tuh, amaw elang a rah a khui cih hae.10Aning nynh a teingpaw vawsawnaw kha minmin nynh a ri hae keiccuze asawnaw langkhe thadyn hae zah,“Ezou, ezou! Khuh-e myarya lepawkhuapi, athungpawBabilon khuapi khuhlou!Suimilan ccangkheit lungkhubyapianaw nynh ae thuanua vae rei!”a ci cih hae.11Laephi vaw e kungku hae tuh amaw elang oun rah oun khui cih hae; pawccecize mih uccaw hae kha hum nynh sanmah repah vae lan khyh hae.12Mih kungkunaw uccaw hae sui, ngun, aphutepaw lung hae, palee hae, nebaleihpaw boeining , kadipa uccaw, po-uccaw, sekakungpaw uccaw, amynkhuhpaw thing aphuinphuin, saepanua te raepaw uccaw aphuinphuin, aphutepaw thing te raepaw uccaw aphuinphuin, sohin uccaw, sivaw uccaw te lung rawpaw uccaw,13cinnamon te mynkhuhpaw upaw, zimuin te frankinsen, misutui te oliv chitui, chanvuih akhuipaw te chanvuih, sahiin hae te tuu hae, marang hae te marangle hae, see hae te ccungccaw hiinnaw hae kha hum nynh san re vae lan khyh hae.14Kungku hae nynh,“Na thinlung kyate kou na duaapawthingthae hae tuh na kyate a zo vae hae,na hoysahnawpaw uccaw hae tena phu-enaw balyn tuhna kyate a zo vae hae, tuh-e hae tuhkharouh na muih boi vae lan khyh!”a ci hae.15Tuh-e khuapi kya-e uccaw hae khate kungku hae zah a hoirum hae paw kungkutu hae tuh tuh-e nung nynh a teingpaw vawsawnaw kha a ri hae keiccuze asawnaw langkhe a thadyn cih hae zah rawkhuite,16“Ezou, ezou, nebaleihpaw boeining,sephaphuhpaw te asepawboeining kha lawkuh zahsui te aphutepaw lung hae,palee hae te a ccaankuhpawkhuh-e myarya lepaw khualipi khuhlou!17Khahcih alungpaw sisua hae tuhsuimilan ccangkheit lungkhuaccakaepaw lang phe a tang vae rei,”oun ci cih hae.
Sanphalung uktu hae balyn, sanphalung kya a cceihbua hae paw balyn, sanphalung mawng hae paw, rili kya kungku hae paw balyn nynh asawnaw langkhe thadyn hae zah,18khuapi a unawpaw maeekhuh kha he a muih hae tuh,“Khuh-e myarya lepaw khuapi tealokuhpaw paw khuapi mou a um?”cite a sia hae.19Minmin nynh laenoi kha mih lu vawlan phingkuh hae zah,“Ezou, ezou, rili kya a cceihpawsanphalung hae a hoitu hae balyn khaamaw a hoirumnaw liatea hoirumsah bua hae pawkhuh-e khuapi khuhlou!Suimilan ccangkheit lungkhuphe roh vae rei.20Pou vaawlang, pou mithyaa hae,locceihtu hae te profeh hae,nae lungtua sah!Pawccecize Pachia nynhnanning hanlan amaw khabya a pia vae!”cite rawkhuite a sia hae.21Tukoute a thawsaepaw vaawpaw nynh myarya lepaw sungmia-lung alopaw lung ccangkheit kha lawkuh zah rili lungkhu lang vua zah,“Babilon khualipi tuh hynhcitemyarya ccih lan vua athua cih zah,kharouh muih lei lan vae.22Tintang a khua hae paw roi,tyngdaw a khua hae paw roi,phyly a tu hae paw roi,mungkae a tu hae paw roi khana kya kharouh thae lei lan vae;a kuihhae hoypaw ccungccaw lu kheit sanna kya muih lei lan vae;te sungmia-lung roi mah na kyakharouh thae lei lan vae.23Maeekhua a awnaw mahna kya kharouh aw vae lan khyh;te zudy ccangvaepaw teakaepaw liaccanung roi mahna kya kharouh thae lei lan vae;pawccecize na kungku hae tuhlaephi kya alesaepawccungccaw hae nynh thua hae;pawccecize minphuin hae balyn tuhnaaw na thyanaw khate ling athua hae.24Profeh hae chii, mithyaa hae chii telaephi vawlan chia athuahae paw balyn chii tuhtuh-e khuapi kya muih athua,” a ci.Vaawlang kya Lungtuanaw1Tukoute vaawlang a umpaw ccungccaw zapi patae roi tahawpaw myarya accaepaw roi kha ka thae zah,“Hallelujah!Khumnaw, phu-enaw te thungnaw tuhah Pachia kya-e nynh thua.2Pawccecize a byapianaw tuhkyh zah ading;ohhuakunaw a raenaw te laephi a rosahpawohhuanung lepaw kha bya a pia vae;tuh-e nung kuih te luasah athuapawPachia ryalahtu hae chiise hanlana tungvaw a liaru vae,” a ci hae.3Minmin nynh, “Hallelujah!A maeekhuh tuh zungzae tezungzae cia a kaethung,”bua a sia hae.4Piccan hae lu kuin lae pali te ahiinpaw sarangpaw hae sa pali nynh bakhung hae zah bawitungkhung vawlan a haungpaw Pachia kha beik hae zah,“Amen, Hallelujah!”a ci hae.5Bawitungkhung kyate roi yn ccae zah,“Pachia ryalahtu hae balyn teamaw raw a rih hae pawadih te ale balyn,ah Pachia kha thehoysah oh,”a ci.6Tukoute ccungccaw zapi patae roi, tuiphue hae patae roi, myarya athungpaw riakawpaw roi te alokuhpaw roi kha ka thae zah, tuh-e roi nynh,“Hallelujah!Pawccecize AthungpawBawipaw ah Pachia nynh a uk.7Ah lungtua sah lah, ah lungpaw sah;amaw kha phu-enaw pya oh sih;pawccecize Tuutaw zudy poi tuhyn thua vae, a liaccanung tuha paccynkuh vae,” a ci.8Tuh-e nung tuh nebaleihpaw,athyaapaw te arawpaw boeining teccaankunaw kaw a mue;pawccecize nebaleihpaw boeining tuh mithyaa hae kya-e adingpaw cyisahnaw nynh thua.9Vaawpaw nynh, “Tuutaw zudy poi zerya mangnaw kalan kobua athua hae paw tuh hythua a ccou hae paw nynh thua cite zei,” cite kae kha yn hopya. Aning nynh, “Hynh-e bya tuh Pachia bya ccaccing nynh thua,” yn cipya.10Kae tuh amaw kha beik lan cite a cculeihpaw khe ka bakhung; aning nynh, “Hynhte cyih nan! Kae tuh nang te ryalahkheihtu nynh ka thua, Jesu kya-e ccaekia a hoi hae paw na uno hae ryte ryalahkheihtu nynh ka thua, Pachia palia kha beik! Pawccecize Jesu kya-e ccaekia tuh profehbya honaw kya-e muisaw nynh thua,” cite yn hopya. Marang Rawpaw Ccikuhpaw11Vaawlang tuh hungkuh zah marang rawpaw sa kheit kha ka muih. Tuh-e marang tungvaw a ccikuhpaw tuh Alungzipaw, Ahmepaw cite ko athua; aning tuh dingnaw te byapia zah rhaw a tuk.12A mit tuh maeesoi te lokuh zah, a lu vawlan bawilukhung hae a khungkuh; a tungvaw kyakhe amaw laelan hum nynh san a ny leipaw min azeikuhpaw a hoi.13Chii kya adungkuhpaw angkiccua kha kikuh zah, a min tuh Pachia Bya a cikuh.14Vaawlang e rhawkaw hae nynh arawpaw marang hae kha ccikute, raw zah athyaapaw nebaleihpaw boeining kha lawku biate amaw kha a zui hae.15Minphuin hae kha detah nawlan ahepaw thaloi tuh a khalang lungkhu te a pou. Aning nynh minmin kha sivaw hoitang te a uk cih hae; Athung huaccepaw Pachia thinrianaw te asekuhpaw bungpawnaw misu mianaw khu kha aning nynh a syde cih.16A angkiccua vawlan te a phae vawlan khe, “Siapharan hae Siapharan, bawi hae Bawipaw,” cite azeikuhpaw min kha a hoi. Sarepaw te A Rhawkaw hae Shungnaw17Vaawpaw lu kheit nynh khuanin kya a thadynpaw kha ka muih, aning nynh vaawlang angaelung kya a zou hae paw pavaw hae balyn kha roi myarya accae lante ko hae zah, “Rang oh lah, alesaepaw Pachia kya-e loohdangkunaw kalan oun sueluakuh oh;18siapharan hae ngesaw, rhawbawi hae ngesaw, a thawsaepaw ccungccaw hae ngesaw, marang hae te marang a ccikuh hae paw ngesaw, a luepaw te see, adihpaw te alepaw ccungccaw hae balyn ngesaw kha na ae ccaw oh oun sueluakuh oh,” cite a sia.19Sarepaw te laephi siapharan hae te mih rhawkaw hae nynh marang tungvaw a ccikuhpaw te a rhawkaw hae kha rhawtuk khylan oun sueluaku hae paw kha ka muih.20Sarepaw kha phe a kyng hae; sarepaw kya-e syntawnaw a hoi hae paw te sarepaw azuh a beik hae paw kha ling hae zah sarepaw malang muihsahnaw a langsakuhpaw lingthya profeh kha mah amaw ryte a kyngbua hae. Hynh-e lu ning hae hynh parouhte a hiin hae pite, kemaee te a ruanaw maee tuili lungkhu lang a vua hae.21Tuhlaepaw kha marang tungvaw a ccikuhpaw a khalang lungkhu te yn poupaw thaloi khate chia athua hae; te pavaw hae balyn nynh mih ngesaw kha phe byn lan a ae hae.
Kum Thong Kheit1A kuih kya adianaw um lei lan akhupaw laekarung toh te myarya lepaw sivawrui a ccyngpaw vaawpaw lu kheit tuh vaawlang te yn rungbungpaw kha ka muih.2Aning nynh langmawlya e hupaw, Raerangsaro te Satan athuapaw nakaa-hupi kha kyng zah kum thong kheit lungkhu phang a khii.3Kum thong kheit accing cia minphuin hae kha a ling vae khyh ccaw hae cite amaw kha tuh-e laekarung lungkhu lang vua zah a khawsung koute a vawlan khe tazeih a khia. Kum thong kheit accing koute aning tuh ccyh sosoh supya athua cih.4Tuinte bawitungkhung hae te tuh-e vawlan a haung hae paw kha ka muih, minmin tuh byapianaw kaw a mue hae. Sarepaw te sarepaw azuh kha a beik lei hae paw, mih terui kya khyhze mih kuih kya sarepaw syntawnaw a hoi lei hae paw te Jesu ccaekia lang a tang keiccu te Pachia bya keiccuze mih lu pae hae paw mih muisaw hae kha ka muih; minmin tuh oun hiin hae zah Khri ryte kum thong kheit a uk hae.5Thuasalama tuhlaepaw a chih hae paw tuh kum thong kheit athang makhia bua hiin khyh hae. Hynh-e tuh masaty thoothuinaw nynh thua.6Masaty thoothuinaw kya a um buapaw tuh hythua a ccoupaw te a thyaapaw nynh thua. Tuhcihawpaw ccungccaw tungvaw kya vaening chinaw nynh kaw hoi vae khyh; minmin tuh Pachia ranpibawi hae te Khri ranpibawi hae athua vae cih hae zah, Khri ryte kum thong kheit a uk vae cih hae. Satan Shungnaw7Kum thong kheit he athang te, Satan tuh thong a ccawnaw kyate supya athua cih zah,8laephi ki kipali kya a um hae paw minphuin hae athuapaw Gog te Magog kha ling khylan te rhawtuk khylan minmin kha suelua lan po a cceih cih, minmin tuh milu lante rili laesia zeih a cih hae.9Minmin tuh laephi vaw balyn pazaekuh hae zah mithyaa hae umnaw hmin te sungsahpaw khuapi kha po a koihlu hae; thuasalama vaawlang te maee yn ccah zah minmin kha marya a u hae.10Minmin a lingtu hae paw Satan kha sarepaw te lingthya profeh a umnaw hae, kemaee te maee tuili lungkhu langkhe ccaring vua athua; minmin tuh khuazi khuadae zungzae te zungzae cia vawsawnaw pya athua vae cih hae. Michi hae Byapianaw11Myarya lepaw bawitungkhung arawpaw te tuh-e vawlan a haungpaw kha ka muih, tuh-e paw malang kyate vaaw te lae tuh ccue hae zah, mih hanlan umnaw um vae khyh.12Michi hae adih te ale nynh bawitungkhung malang a thadyn hae paw kha ka muih; te ccauh hae kha a kia hae. Hiinnaw ccauh athuapaw ccangpaw ccauh kha mah kia athua. Michi hae tuh mih ryalaw thyhte, tuh-e ccauh hae kya azeiku thyhte byapia athua hae.13Rili nynh a kya umpaw michi hae kha a poukhae. Chinaw te michi khua hae nynh mih kya umpaw michi hae kha a poukhae hae. Ccungccaw hae balyn tuh mih ryalaw thyhte byapia athua hae.14Chinaw te michi khua tuh maee tuili lungkhu lang vua athua hae. Tuh-e maee tuili tuh vaening chinaw nynh thua.15Hiinnaw ccauh kya a min zei athua leipaw miakaw tuh maee tuili lungkhu lang vua athua hae. Vaaw Thawpaw te Laephi Thawpaw1Tukoute vaaw thawpaw te laephi thawpaw kha ka muih; pawccecize masaty vaaw te masaty laephi tuh zo hae zah rili mah um vae khyh.2Athyaapaw khuapi athuapaw Jerusalem Thawpaw tuh a vawpaw hanlan a ccaankuhpaw akaepaw liaccanung hawte paccynkuh zah Pachia kyate vaawlang te yn rungbungpaw kha ka muih.3Vaawlang te roi accaepaw nynh,“Dotua oh, Pachia nynha umnawpaw bu tuhccungccaw hae kya um zah,Pachia tuh minmin ryte a um vae cih;minmin tuh a ccungccaw haeathua vae cih hae.Pachia tuh minmin ryte a um cih zahmih Pachia athua vae cih.4Pachia nynh mih mit kyatemitphi balyn kha a hupah cih hae.Chinaw um vae lan khyh.Ngaethyanaw, rawnaw te ccinawum vae lan khyh;pawccecize langmawlya euccaw hae tuh pong azo vae hae,”cite a hopaw kha ka thae.5Bawitungkhung vawlan a haungpaw nynh, “Dotua oh, pawpaw balyn kha athawpaw lang ka rae vae,” a ci. Aning nynh kamaw kha, “Hynh-e hynh zei, pawccecize hynh-e bya tuh zyn lan umpaw te akyhpaw nynh thua,” yn cipya.6Aning nynh kamaw kha, “Phe athang vae! Kae tuh Alfa te Omega, athonaw te athangnaw nynh ka thua. A tuihawpaw ccungccaw tuh hiinnaw tuidy kya-e tui kha amee leite ka pya cih.7A taetupaw tuh hynh-e rho hynh a ccou cih; kae tuh a Pachia ka thua cih zah aning tuh ka ccapaw athua cih.8Thuasalama mih rawthah hae paw, a zyn lei hae paw, luathua-ae-ui lan um hae paw, ccungccaw theih hae paw, a ohhuakuh hae paw, naawthya hae paw, zohtuh beik hae paw te a hyn hae paw balyn tuh kemaee te aruapaw maee tuili kyakhe nynh mih hanpaw a hoi cih hae, tuh-e tuh vaening chinaw nynh thua,” yn cipya. Jerusalem Thawpaw9Nyathyakou e shethya ccangsari te phe beihpaw pakekhupaw ccangsari a ccyng hae paw vaaw hae lu sari kyaze lu kheit tuh ka kya yn thua. Kae kha bya yn beih zah, “Hynhlang rang, Tuutaw zu, akaepaw liaccanung kha kae muihsah cih,” yn cipya.10Aning nynh myarya lepaw te ahangpaw mua kalan khe Muisaw liate yn cciakhae zah, athyaapaw khuapi Jerusalem tuh Pachia kyate vaawlang te yn rungbungpaw kha yn muihsah.11Tuh-e khuapi tuh Pachia phu-enaw te phe beih zah, a awnaw tuh lung-awmatei hawte accipaw jasper lung hawkhate, aphute huapaw lung te nynh aloku;12koikua haw lae ning umpaw myarya lepaw te ahangpaw khualungrua hoi zah, tuh-e koikua hae kyakhe vaaw hae lu haw lae ning a um hae; tuh-e koikua hae kyakhe Israel ccapaw hae phin haw lae ning min kha zei athua.13Nithua lang koikua ccangthum, palung lang koikua ccangthum, deilang koikua ccangthum, te niccaw lang koikua ccangthum a um.14Khuapi kya-e khualungrua tuh athonaw lungbing haw lae ning a um, tuh-e hae kyakhe Tuutaw kya-e locceihtu hae lu haw lae ning min a um.15Kamaw kha bya yn hopahtupaw tuh khuapi kha thuasah, a koikua hae te khualungrua hae kha thuasah tou nawpaw sui ccungngue ccangkheit a hoi.16Khuapi tuh asaepaw te akopaw alokuh; aning nynh khuapi kha a ccungngue te tou zah asaepaw, akopaw te ahangpaw tuh me thong kheit za pangaw cci cih hae zah a lokuh hae.17Khualungrua tuh tou zah vaawpaw kya-e tounawpaw thyhte ccungccaw dung te za kheit sung pali dung pali acih.18Khualungrua tuh jasper lung te rae thua zah, khuapi tuh ccirarihpaw thawlang te alokuhpaw sui ccipaw nynh thua.19Khuapi kya-e khualungrua athonaw aleihpaw hae tuh aphutepaw lung aphuinphuin te a ccaan hae; masaty athonaw aleihpaw tuh jasper lung, ccangningnaw tuh nilar lung, ccangthumnaw tuh agate lung, ccangpalinaw tuh emerald lung;20ccangpangawnaw tuh oniks lung, ccangtaruhnaw tuh karnelian lung, ccangsarinaw tuh khrisolaih lung, ccangtaryanaw tuh beril lung, ccangtakuanaw tuh topaz lung, ccanghawnaw tuh khrisoprase lung, haw lae kheitnaw tuh jacinth lung, haw lae ningnaw tuh amethist lung nynh thua.21Koikua haw lae ning tuh palee haw lae ning thua zah, koikua ccangkheit cci tuh palee ccangkheit cci nynh thua; khuapi kya-e laanpi tuh thawlang hawte awrarihpaw sui ccipaw nynh thua.22Tuh-e khuapi kya beikinn ka muih khyh; pawccecize a beikinn tuh Athung huaccepaw Bawipaw Pachia te Tuutaw tuh nynh thua.23Tuh-e khuapi tuh khuanin awnaw te sawpaw awnaw ho vae khyh; pawccecize Pachia phu-enaw nynh tuh-e khuapi tuh awsah zah, Tuutaw tuh khuapi a maeekhua nynh thua.24Khumnaw a muepaw minphuin hae nynh tuh-e khuapi a awnaw kyakhe a pae cih hae; laephi siapharan hae nynh mih phu-enaw kha tuh-e khuapi lungkhu lang a thuakhae cih hae.25Khuapi kya-e koikua hae tuh khuadae ccyh kya khaw thua vae lan khyh; pawccecize tuin kya khuazi um vae lan khyh.26Minmin nynh minphuin hae mih phu-enaw te sawtuanaw kha tuh-e khuapi lungkhu lang oun thuakhae cih hae.27Anungsikuhpaw uccaw hae kha tuh-e khuapi lungkhu lang teekhae thua lan khyh, luathua-ae-uipaw rya a lahpaw te a hynpaw tuh tuh-e khuapi lungkhu lang kharouh tee lan khyh hae. Tuutaw kya-e hiinnaw ccauh kya min zei athua hae paw rou nynh a tee cih hae. Hiinnaw Tui1Tuinte vaawpaw nynh Pachia bawitungkhung te Tuutaw bawitungkhung kyate yn luapaw, lung-awmatei hawte awrarihpaw hiinnaw tui vawpi kha yn muihsah.2Tuh-e vawpi tuh khualae e laanpi angaelung khe lua zah, tuh-e vawpi sirawkhuraw te thingthae phuin haw lae ning a thaepaw hiinnaw thingku a um; tuh-e thingku tuh sawpaw sah takyhte athae thae zah, tuh-e thingku anaw tuh minphuin hae dansahnaw hanlan nynh thua.3Thyalawnaw kharouh um vae lan khyh, Pachia kya-e te Tuutaw kya-e bawitungkhung tuh tuh-e khuapi kya a um cih zah, Pachia rya a lawpatu hae nynh amaw kha a beik cih hae.4Minmin nynh amaw mae kha a muih cih hae zah amaw min tuh mih terui kya zei athua cih.5Tuin kya khuazi um vae lan khyh; minmin tuh maeekhua kya-e awnaw te khuanin kya-e awnaw kha ho vae lan khyh, pawccecize Bawipaw Pachia nynh minmin kha awnaw a pya hae, minmin nynh zungzae te zungzae cia a uk vae cih hae.6Vaawpaw nynh kamaw kha, “Hynh-e bya tuh zyn lan umpaw te ahmepaw nynh thua. Profeh hae muisaw a peetu Bawipaw Pachia nynh aro mawze yn cyihkuh hahe cih paw uccaw hae kha a ryalahtu hae kalan langsahpya khylan a vaaw ccungccapaw kha yn saw vae,” cite yn hopya.7“Dotua oh, kae tuh arangte kae thua cih. E ccauh kya-e profehbya hae a zuipaw ccungccaw tuh hythua a ccoupaw nynh thua,” a ci. Thangsahnaw te Nyathya Sawsang8Kae, Johan nynh hynh-e uccaw hae hynh ka muih zah ka thae. Tuh-e hae tuh ka thae zah he ka muih tuh, hynh-e uccaw hae yn muihsahpaw vaawpaw cculeihpaw khe beik lan cite ka bakhung.9Aning nynh, “Hynhte cyih nan! Kae tuh nang te ryalahkheihtu nynh ka thua, na uno hae profeh hae te hynh-e ccauh kya umpaw bya a zui hae paw ryte ryalahkheihtu nynh ka thua. Pachia palia kha beik,” yn cipya.10Aning nynh kamaw kha, “E ccauh kya-e profehbya hae hynh tazeihkhia nan; pawccecize accyh anae vae.11Hoyleinaw a raepaw ccungccaw tuh hoyleinaw kha rae ccaleih hin sah, a nungsikuhpaw tuh nungsikuh ccaleih hin sah, a dingpaw tuh ding ccaleih hin sah, a thyaapaw tuh thyaa ccaleih hin sah,” yn cipya.12“Dotua oh, kae tuh arangte kae thua cih; ccungccaw miakaw kha a ryalaw thyhte pya khylan ka kya-e ryalaw mee kha kae ccyngbia cih.13Kae tuh Alfa te Omega, athonaw te athangnaw, masaty te nyathyakou nynh ka thua,” a ci.14A kawbya hae kha zui hae zah, hiinnaw thingku kya-e athae aenaw kaw a hoi hae paw te khuapi lungkhu lang koikua hae kyate teenaw kaw a hoi hae paw tuh hythua a ccou hae paw nynh thua.15Tuhzemah atolang tuh ui hae, naawthya hae paw, a ohhuakuh hae paw, ccungccaw theih hae paw, zohtuh beik hae paw te hynbya kha sungsah zah a hopaw miakaw nynh a um hae.16“Kae, Jesu nynh hynh-e uccaw hae hynh khriccaawbuu hae kya ccaekiakhan sah khylan ka vaaw ccungccapaw kha nae kalan kae saw. Kae tuh David tharui te a ciihan ka thua zah, phaephae akpaw nizy awsi nynh ka thua,” a ci.17Akaepaw liaccanung teMuisaw nynh, “Rang!” a ci hae.A thaepaw ccungccaw nynh, “Rang!” ci sah.A tuihawpaw ccungccaw tuh yn cceih sah.A rypaw ccungccaw tuhhiinnaw tui hynh amee leite lawkuh sah.18E ccauh kya a umpaw profehbya hae a thaepaw ccungccaw miakaw kalan kae nynh ccaekia ka khanpaw tuh: Lukhakheit nynh hynh-e uccaw hae hynh a biachih lanze, Pachia nynh tuh-e paw tungvaw kya hynh-e ccauh lungkhu azeikuhpaw shethya hae kha a biachih cih.19Lukhakheit nynh hynh-e ccauh lungkhu e profehbya hae kha a lawbang lanze, hynh-e ccauh kya azeikuhpaw hiinnaw thingku kyate thuasah, athyaapaw khuapi kyate thuasah Pachia nynh a hanpaw kha a lawpah ru cih.20Hynh-e uccaw hae kong ccaekiakhantupaw nynh, “Thanccingte, kae tuh arangte kae thua vae cih,” a ci.
Amen. Bawipaw Jesu, yn thua ccavae!21Bawipaw Jesu a thawccinaw tuh mithyaa hae balyn kya la um sah. Amen.
Bible Society of Myanmar