Read MATTHAI 1

MATTHAI1

Jesu Khri Thokeinaw

¹Abraham Ccapaw, David Ccapaw Jesu Khri a thokeinaw tuh hynhte nynh thua.

²Abraham ccaaw Isak; Isak ccaaw Jakob; Jakob nynh Judah te a uno hae kha a saah hae;³Judah nynh Perez te Zerah a saah hae (mih nung tuh Tamar nynh thua); te Perez nynh Hezron a saah; Hezron nynh Ram;⁴Ram nynh Amminadab; Amminadab nynh Nahshon a saah; Nahshon nynh Shalmon a saah;⁵Shalmon nynh Boaz a saah (a nung tuh Rahab nynh thua); Boaz ccaaw Obed (a nung tuh Ruth nynh thua); Obed ccaaw Jessi;⁶Jessi ccaaw tuh David Siapharan nynh thua.
David ccapaw tuh Solomon nynh thua (a nung tuh Uriah zu nynh thua);⁷Solomon ccaaw Rehoboam; Rehoboam ccaaw Abijah; Abijah ccaaw Asa;⁸Asa ccaaw Jehoshafat; Jehoshafat ccaaw Joram; Joram ccaaw Uzziah;⁹Uzziah ccaaw Jotham; Jotham ccaaw Ahaz; Ahaz ccaaw Hezekiah;¹⁰Hezekiah ccaaw Manasseh; Manasseh ccaaw Amon; Amon ccaaw Josiah;¹¹Josiah ccaaw Jekoniah te a uno hae; e ccyh loukaw hin nynh Babilon ram lang see lang a cciakhae hae.

¹²Babilon see lang a cciakhae kou hae te Jekoniah nynh Shealtiel a saah; Shealtiel ccaaw Zerubbabel;¹³Zerubbabel ccaaw Abiud; Abiud ccaaw Eliakim; Eliakim ccaaw Azor;¹⁴Azor ccaaw Zadok; Zadok ccaaw Akhim; Akhim ccaaw Eliud;¹⁵Eliud ccaaw Eliezer; Eliezer ccaaw Matthan; Matthan ccaaw Jakob;¹⁶Jakob ccaaw Josef; Josef tuh Messiah a ci hae paw Jesu nung Mary a vawpaw kha nynh thua.

¹⁷Tuhcite Abraham kyate David kyacia she haw lae pali, David kyate Babilon see lang a tangnaw hae cia she haw lae pali, see lang a tangnaw hae te Messiah kyacia she haw lae pali acih.
Jesu Khri Puinaw (Luk 2.1-7)

¹⁸Jesu Khri a puinaw tuh hynhte nynh thua: a nung Mary kha Josef nynh a haaw, thuasalama a umkheih maw hae ze Mary tuh Thyaa Muisaw liate ccaaw a poi.¹⁹A vawpaw Josef tuh adingpaw ccungccaw thua zah Mary kha zapi malang thethyasah lan ry khyh zah aruh lante zya mya lan a tuaku.²⁰Thuasalama tuhcite a tuaku lyakhe a maan kya Bawipaw vaawpaw nynh yn langkuh zah, “David ccapaw Josef, na zu lang Mary hoiku lanpaw kha rih nan. Pawccecize aning nynh a poipaw ccaaw tuh Thyaa Muisaw liate nynh a poi.²¹Aning nynh ccapaw yn saah cih zah Jesu cite min na phu cih, pawccecize a ccungccaw hae kha mih seinaw kyate a khum cih hae,” a cipya.²²Bawipaw nynh profeh kyate a hopaw kha accing nawlan nynh hynh-e balyn hynh acyiku.²³“Dotua, liaccady nynhccaaw yn poi cih zahccapaw yn saah cih, a min tuhImmanuel yn cikuh cih,”(asuilan tuh, “Pachia kae kya a um,” cipaw nynh thua).²⁴Tuinte Josef nynh inaw kyate he yn thaekuh tuh, Bawipaw vaawpaw nynh kaw a pya hawte cyih zah Mary kha a zu lang a hoiku.²⁵Thuasalama ccapaw a pui mawlaezung tuh-e nung tuh ikhae khyh; te Josef nynh Jesu cite min a phu. Nithua langte Mihaw hae

¹Herod siapharan lang a tang lya Judea ram Bethlehem khua kya Jesu a pui koute nithua langte awsi dothya hae paw mihaw hae tuh Jerusalem khua oun thua hae zah,²“Judah siapharan lang a puipaw imua tuh teisangmou a um? Nithua langte yn thuapaw amaw awsi kha kae muih zah amaw beik lan nynh kae thua,” a ci hae.³Herod siapharan nynh e bya kha he a thae tuh a thinphang zah Jerusalem khuaccaaw hae balyn mah mih thinphang.⁴Aning nynh ranpibawi lepaw hae mih balyn te ccungccaw hae kyaze kawbya sazae hae balyn kha pynkheihlan ko hae zah, “Teisangmou Messiah tuh a pui cih?” cite a khia hae.⁵Minmin nynh, “Judea ram Bethlehem khua kya nynh a pui cih; pawccecize profeh nynh hynhte a zei:⁶‘Judah ram umpaw Bethlehem,nang tuh Judah ramkhuapi hae lakuzeadih huapaw na thua khyh;pawccecize na kyateka ccungccaw Israel haetuurintu yn pou cih!’ a ci,” cite a hopya hae.

⁷Tetuh Herod nynh mihaw hae kha aruh lante ko hae zah, hohtuh ccyh kya mou awsi yn langku cite akaw-aleih a khia hae.⁸Tuinte minmin kha Bethlehem lang saw hae zah, “La cceih oh lah imua kha thawte oun ccung oh; amaw kha nae muih oh te, nae hopah bua cih oh, kae mah kae cceih cih zah ka beikbua ccaw,” a cipya hae.⁹Siapharan bya he a thae kou hae te minmin tuh a pou hae; te nithua lang a muih hae paw awsi tuh mih malang khe cceih zah imua a umnaw luki khe a thadyn.¹⁰Awsi a thadynpaw kha a muih hae tuh myaryamaw mih lungtua.¹¹Te inn lungkhu lang tee hae zah imua te a nung Mary kha a muih hae, te ccukharutungte amaw kha a beik hae; minmin nynh mih sisua bawng hae kha hung hae zah sui, frankinsen te mura kha lasung lang a pya hae.¹²Minmin tuh Herod kalan a ki vae khyh nawlan hae Pachia nynh mih maan kya raeringnaw a pya hae keiccuze laanpi ccanglang te mih ram lang a ki hae. Izip lang Ccuekhaenaw

¹³Minmin he a cceih kou hae te, Bawipaw vaawpaw tuh Josef a maan kya yn langkuh zah, “Thokuh lah imua te a nung kha hoei hae lah Izip ram lang ccuekhae hae, bya kae hopya makhia tuin kya la um, pawccecize Herod nynh imua kha chia khylan yn ccung vae cih,” a cipya.¹⁴Josef nynh thokuh zah imua te a nung kha hoei hae zah khuazi khe Izip ram lang a cciakhae hae.¹⁵Herod a chi mawlaezung tuin kya nynh a um. E tuh Bawipaw nynh profeh kyate, “Ka ccapaw kha Izip ram kyate ka ko vae,” cite a hopaw kha accingnawpaw nynh thua.

¹⁶Mihaw hae nynh yn ling vae hae cipaw kha Herod nynh he a nyh tuh myaryamaw a thinria, te mihaw hae nynh a ho hae paw accyh kha a khyase koute ccungccaw saw zah Bethlehem khua te a pepan umpaw, kum ning te akaw lang e pise imua hae balyn kha marya a chiasah hae.¹⁷Tuhcite profeh Jeremiah nynh a la hopaw bya tuh accing vae.¹⁸“Ramah khua kyarawkhuinaw temyarya ccihpawrawnaw roi kha thae athua.Rachel tuh a ccaaw hae hanlanrawkhuite a um;a ccaaw hae tuha um vae khyh hae keiccuzesoihbiaku ry vae khyh.”Izip Ram kyate A Ki hae (Luk 2.39-40)

¹⁹Herod he a chih te, Bawipaw vaawpaw tuh Izip ram kya Josef a maan kya yn langkuh zah,²⁰“Thokuh lah imua te a nung kha hoei hae lah Israel ram lang kikhae ccavae hae, pawccecize imua hiinnaw a ccung hae paw tuh phe chih vae hae,” a cipya.²¹Te Josef tuh thokuh zah imua te a nung kha hoei hae zah Israel ram lang a kikhae hae.²²Thuasalama Arkhelaus nynh a paaw Herod ccelang Judea ram kha a uk cipaw Josef nynh he a thae tuh tuh-e ram lang ccia lan a rih; tuhzemah Pachia nynh a maan kya a hopya thyhte Galilee ram lang a cceih.²³Te Nazareth cikuhpaw khua kyakhe a um. “Aning tuh Nazareth khuapaw cite ko athua cih,” cite profeh hae nynh a ho hae paw kha accingnawpaw nynh thua.
Laanpi Paccynpyanaw (Mar 1.1-8; Luk 3.1-18; Joh 1.19-28)

¹Tuh ccyh lyakhe Baptisma pyatu Johan tuh yn langkuh zah Judea pee ramkaw khe phungho zah,²“Ngaesikuh oh, pawccecize vaawlang peenaw tuh anae vae,” a ci.³Profeh Isaiah nynh,“Ramkaw kya a siapawccungccaw lu kheitpaw roi nynh,‘Bawipaw laanpi kha paccynpah oh,a ccianaw laanpi khalawbabin lan raepah oh,’ a ci,”cite a honuathepaw kha Johan nynh thua.⁴Johan tuh kalauh ming te kuakuhpaw boeining kha lawkuh zah a tae kya saphua taeccia a cciaku; a aepaw tuh tungkhipaw te ramkaw e khoitui nynh thua.⁵Te Jerusalem, Judea pee te Jordan vahue a um hae paw ccungccaw hae balyn tuh Johan kalan oun cceih hae zah,⁶mih seinaw hae kha phykuh hae zah Johan nynh Jordan vaw khe baptisma a pya hae.

⁷Thuasalama baptisma in lan oun thua hae paw Farasi hae te Sadusi hae patae kha Johan nynh he a muih hae tuh minmin kha, “Pou huparepaw ciihan hae, yn thua cih paw thinrianaw kyate ccue lan hum nynh mou raeringnaw ae pya oh?⁸Ngaesikunaw te angaekuhpaw athae kha langsakuh oh;⁹‘Abraham tuh kae paaw nynh thua,’ cite tuakuh nan oh. Pawccecize Pachia tuh hynh-e lung hae kyate Abraham ccaaw hae kha a rae kho cipaw kae hopya oh.¹⁰Te atu mah hae tuh thingku leihpaw kya nungde athua vae; tukeiccuze ahoypaw athae thae leipaw thingku miakaw tuh nge thua zah maee lungkhu lang phung athua.

¹¹“Ngaesikunaw hanlan kae nynh tui kya baptisma kae insah oh; thuasalama kamaw koute yn thua lanpaw aning tuh kae laeze a lesaehua, kae tuh tuh-e paw a phanah ccyngpya lan heize ka ngaekuh khyh; aning nynh nanning kha Thyaa Muisaw kya te maee kya baptisma ae insah cih oh.¹²A kuih kya paraw ccyngkute a huihmin kha thyaapaping lan a cciccae koute a chanvuih kha byng lungkhu lang a ruin cih, thuasalama asipaw kha tuh a chih kho leipaw maee te a u cih,” a ci. Jesu Baptisma Innaw (Mar 1.9-11; Luk 3.21-22)

¹³Te Jesu tuh Galilee kyate Jordan vaw lang Johan kalan baptisma yn pya ccaw cite yn thua.¹⁴Thuasalama Johan nynh, “Kae nynh khaw nang na kya baptisma in lan ka ccan, nang nynh tou ka kalan nae cceih?” cipah zah amaw kha a khee.¹⁵Thuasalama Jesu nynh, “Atu tuh hynhcite cyihkuh hin sah, pawccecize dingnaw balyn marya accing nawlan aening nynh hynhcimawte cyi lanpaw nynh thua,” a cipya. Tetuh Johan tuh a nawccah.¹⁶Te Jesu tuh baptisma a in koute tui kyate yn pou lyakhe vaawlang tuh vaekheihmawte yn hungkuh zah Pachia Muisaw tuh vahu hawte yn rungbung zah a tungvaw yn ccupaw kha a muih.¹⁷Vaawlang te roi nynh, “E paw tuh a tungvaw ka lungryccingpaw, ka sungsahpaw ka Ccapaw nynh thua,” a ci. Jesu Tuhounaw (Mar 1.12-13; Luk 4.1-13)

¹Te Satan nynh a tuhou ccaw cite Muisaw nynh Jesu kha ramkaw lang a cciakhae.²Jesu tuh nin sung pali te zi sung pali looh-ae sung zah myarya a vuelaw.³Te tuhoutu tuh a kalan yn thua zah, “Pachia Ccapaw na thua ze hynh-e lung hae hynh sanlou lang tang lan kawpyatua,” a cipya.⁴Thuasalama Jesu nynh, “Ccathyaa kya,‘Ccungccaw tuhsanlou kyalya te hiin khyh,thuasalama Pachia munglae kyateyn toikuhpaw bya miakawte nynh a hiin,’ cite azeikuh,” a cipya.

⁵Te Satan nynh Jesu kha athyaapaw khuapi lungkhu lang cciakhae zah beikinn ahang huanaw ccukaly kya a umsah.⁶Te Jesu kha, “Nang tuh Pachia Ccapaw na thua ze toiku tua; pawccecize Ccathyaa kya,‘Nang te asekuh lante Pachia nynha vaawccungccaw hae khakaw a pya cih hae zah,lung kya na ccu na thuhku khyh nawlanminmin nynh mih kuih teae hoeilang cih hae,’ cite azeikuh,” a cipya.

⁷Jesu nynh, “Ccathyaa kya, ‘Bawipaw na Pachia kha syntawtua nan,’ cite bua azeikuh,” a cipya.

⁸Tukoute Satan nynh myarya hangpaw mua langkhe kaekhae zah laephi peenaw hae te phu-e lesaenaw balyn kha muihsah zah,⁹“Bakhungte nae beik zetuh hynh-e hae balyn hynh marya kae pya cih,” a cipya.¹⁰Tetuh Jesu nynh, “Satan, cceih ccavae! Pawccecize Ccathyaa kya,‘Bawipaw na Pachia khabeik lah amaw kyalya kharyalawpah,’ cite azeikuh,” a cipya.

¹¹Te Satan nynh Jesu kha a cciataw; te vaaw hae nynh oun thuanua hae zah amaw kha a do-oih hae.
Galilee kya Jesu Ryalaw Thonaw (Mar 1.14-15; Luk 4.14-15)

¹²Johan kha thong a saw hae cipaw Jesu nynh he a thae tuh Galilee pee lang a cceih.¹³Te Nazareth khua kha cciataw zah Zebulun phin te Naftali phin hae ram kya rili kin umpaw Kapernaum khua khe a um.¹⁴Tuh-e acyikupaw tuh profeh Isaiah nynh a hopaw kha accingnawpaw nynh thua. A hopaw tuh:¹⁵“Zebulun ram te Naftali ram,rili kin e laanpi pe,Jordan vaw khuraw,Zenta hae umnaw Galilee ram:¹⁶Mohnaw kya umpawccungccaw hae nynhawnaw alepaw khaa muih vae hae,chinaw mynlyh ram lungkhua um hae paw kyaawnaw yn langkuh vae,” a ci.

¹⁷Tuin ccyh kyate Jesu nynh, “Ngaesikuh oh, pawccecize vaawlang peenaw tuh anae vae,” cite phungho lan a tho takaw vae. Masaty Jesu Zuitu hae Konaw (Mar 1.16-20; Luk 5.1-11)

¹⁸Te Jesu nynh Galilee Rili kin kya a ccia lyakhe Peter a ci hae paw Simon te a neitaw Andru, ngasaw kyngtu hae uno lu ning, rili lungkhu mia a vua hae paw kha a muih.¹⁹Te Jesu nynh minmin kha, “Kae hynh yn zui oh lah ccungccaw kyngtu lang kae rae cih oh,” a cipya hae.²⁰Vaekheihmawte mih mia kha cciataw hae zah amaw kha a zui hae.²¹Tuin kyate cceih zah ccangpaw uno lu ning, Zebedi ccapaw hae James te a neitaw Johan tuh mih paaw Zebedi ryte kohlung kya mih mia a thuekuh hae paw kha muih zah a ko hae.²²Vaekheihmawte kohlung te mih paaw kha cciataw hae zah Jesu kha a zui hae. Ccangpya, Phungho, Dansah (Luk 6.17-19)

²³Jesu tuh Galilee pee balyn khe khua po ccong zah mih sinakok hae kya ccangpah hae zah peenaw thehoypaw bya kha a hopya hae, ccungccaw hae kya-e ccinaw aphuinphuin te ccihawnaw aphuinphuin kha a dansah.²⁴Tukeiccuze a minthaannaw tuh Siria pee balyn po a pazaekuh; ccihawnaw te ccinaw aphuinphuin a teing hae paw, raerangsaro bahkuh hae paw, a dung hae paw te mih kuihccuchih hae paw kha amaw kalan oun cciakhae hae zah minmin kha marya a dansah hae.²⁵Te Galilee pee kyate, Dekapolis pee kyate, Jerusalem kyate, Judea pee kyate, Jordan vaw khuraw langte oun thua hae paw ccungccaw zapi myarya lung hae paw nynh amaw kha a zui hae. Mua Vaw Ccangpyanaw (5.1—7.29)

¹Jesu nynh ccungccaw zapi kha he a muih hae te, mua lang kaethung zah a haung; a zuitu hae tuh amaw kalan oun thua hae.²Te a byaho kha tho zah minmin kha a ccangpya hae:

³Thinlung zakawsangsakuh hae paw tuh lungtua hae paw nynh thua; pawccecize vaawlang peenaw tuh minmin kya-e nynh thua.

⁴A rah a khui hae paw tuh lungtua hae paw nynh thua; pawccecize minmin tuh soihbia athua cih hae.

⁵Lungne hae paw tuh lungtua hae paw nynh thua; pawccecize minmin tuh laephi rho a ccou cih hae.

⁶Dingnaw kha vuelaw tuihaw hawte a ry hae paw tuh lungtua hae paw nynh thua; pawccecize mih rynaw kha ccingsah athua cih.

⁷Ngaethyaumsahnaw a hoi hae paw tuh lungtua hae paw nynh thua; pawccecize minmin tuh ngaethyaumsahnaw kha a mue cih hae.

⁸Thinlung athyaa hae paw tuh lungtua hae paw nynh thua; pawccecize minmin tuh Pachia kha a muih cih hae.

⁹Daenaw raetu hae tuh lungtua hae paw nynh thua; pawccecize minmin tuh Pachia ccaaw hae cite ko athua cih hae.

¹⁰Dingnaw keiccuze tuaasahnaw a ing hae paw tuh lungtua hae paw nynh thua; pawccecize vaawlang peenaw tuh minmin kya-e nynh thua.

¹¹“Kae ka keiccuze nanning kha ae sarya oh, ae tuaa ae sah oh zah ahme lei lante ahoy leipaw hynbya aphuinphuin ae be oh ze, nanning tuh lungtua hae paw nynh na thua oh.¹²Nae lungtua sah lah nae lungpaw sah, pawccecize vaawlang khua kya nae ryalaw mee tuh ale; pawccecize nanning maw e profeh hae kha mah minmin nynh tuhmaminte a tuaa a sah hae. Loi te Awnaw (Mar 9.50; Luk 14.34-35)

¹³“Nanning tuh laephi loi nynh na thua oh; thuasalama loi nynh a enaw kha a zo ze pawcihtemou esah thui kho athua ung cih? Pawpaw elang sanmah hoy vae lan khyh, dae vua lan zah syde lanpaw nynh hung athua vae.

¹⁴“Nanning tuh laephi awnaw nynh na thua oh. Mua vawlan sakpaw khua tuh thuruh kho thua khyh.¹⁵Humhung nynh mah maeekhua kha aw zah ke khung boi khyh, maee awnawpaw vawlan khe nung zah inn lungkhu um hae paw balyn kha awnaw a pya hae.¹⁶Tuhawte nae awnaw kha ccungccaw hae malang khe awsah oh, tuhteze nynh ahoypaw nae ryalaw kha a muih cih hae zah vaawlang umpaw nae Paaw kha a phu-esah cih hae. Kawbya Ccingnaw

¹⁷“Kawbya tuhkhyhze profeh hae bya ro lan nynh kae hynh yn thua cite tua nan oh; kae tuh ro lan kae thua khyh, ccingsah khylan nynh kae thua.¹⁸Pawccecize byaccaccing kae hopya oh, vaaw te lae a um lungkhu tuh kawbya abalynte accing makhia kawbya kya-e ccaw ccangkheit, ccapyh suapaw ccaw kha sanmah roh lan khyh.¹⁹Tukeiccuze humhung zemah hynh-e kawbya hae kyaze adih huapaw ccangkheit kha lawe zah ming hae kha mah tuhcite a ccangpah hae paw tuh vaawlang peenaw kya adih huapaw lang a tang cih; thuasalama humhung zemah tuh-e tuh zui zah ming hae kha a ccangpah hae paw tuh vaawlang peenaw kya alepaw lang a tang cih.²⁰Pawccecize kae hopya oh, nae dingnaw nynh kawbya sazae hae te Farasi hae dingnaw kha a lawe khyh lanze vaawlang peenaw kya papin na tee lan khyh oh. Thinrianaw

²¹“ ‘Ccungccaw na theih lan khyh, humhung zemah ccungccaw a theihpaw tuh byapianaw kalan thuakhae athua cih,’ cite langmawlya e ccungccaw hae a hopya hae paw kha na thae vae oh.²²Thuasalama kae hopya oh, humhung zemah a uno kha a thinrianuapaw tuh byapianaw kalan thuakhae athua cih, te humhung zemah a uno kha, a saryapaw tuh byapianaw kalan thuakhae athua cih, te humhung zemah a uno kha ‘Nang tuh mingaee,’ a cih paw tuh hell maee lungkhu lang ccaw lan angaekuhpaw nynh thua.²³Tukeiccuze silawhang kalan na lasung kha nae ccyng lyakhe na uno nynh na tungvaw a thinriapaw kha na nyku ze,²⁴silawhang malang khe na lasung kha nungsyate la cceih lah, na uno te ccawkunaw na raety koute bua yn cceih lah na lasung kha pya.²⁵Nang ae rawsetupaw ryte tazae zung lang na ccia lya oh khe, arangte ccawkuh oh, tuhkhyhze ae rawsetupaw nynh byapiatu kalan ae ah cih zah byapiatu nynh thong uktu kalan ae ah cih, te nang kha thong ae saw cih hae.²⁶Byaccaccing kae hopya, na rung lanpaw nyathya phuapia kha na pya mawlaezung thonginn kyate na pou lan khyh. Milae Zu Milae Vawpaw Seikhaenaw

²⁷“ ‘Milae zu milae vawpaw kya na sei lan khyh,’ cite a ho hae paw kha na thae vae oh.²⁸Thuasalama kae hopya oh, humhung zemah nopi lu kheit kha seikhae rynaw mit te a do lanze a thinlung kya tuh-e nung kha phe a seikhae vae.²⁹Te na ranglang mit nynh ae seisah ze, poh khoi lah dae vua; pawccecize na pyn balynte hell lungkhu lang vua na thua lae tuh na pyn kya-e hae ccangkhakheit na shungpaw tuh na hanlan ahoyhua.³⁰Te na ranglang kuih nynh ae seisah ze thoh tya lah dae vua; pawccecize na pyn balynte hell lungkhu lang vua na thua lae tuh na pyn kya-e hae ccangkhakheit na shungpaw tuh na hanlan ahoyhua. Zu Myanaw (Mat 19.9; Mar 10.11-12; Luk 16.18)

³¹“ ‘Humhung zemah a zu kha a mya lanze tuh-e nung tuh myakunawpaw ccaw kha pya sah,’ cite a ho vae hae.³²Thuasalama kae hopya oh, humhung zemah ohhuakunaw keiccu thua leite a zu kha a mya ze tuh-e nung kha milae vawpaw kya a seisahpaw nynh thua; te humhung zemah a mya hae paw nopinung kha zu lang a umkhaepaw tuh milae zu a seikhaepaw nynh thua. Byakinkupaw

³³“Tukoute, ‘Ahme leite bya na kinkuh lan khyh, Bawipaw kya bya na kinkupaw kha na cyih ccaccing cih,’ cite langmawlya e ccungccaw hae nynh a hopya hae paw kha na thae vae oh.³⁴Thuasalama kae hopya oh, thyalawkute kharouh byakinkuh nan oh, vaawlang phyate mah byakinkuh nan oh, pawccecize vaawlang tuh Pachia kya-e bawitungkhung nynh thua.³⁵Laephi phyate mah byakinkuh nan oh, pawccecize laephi tuh a ccusy nynh thua; Jerusalem phyate mah byakinkuh nan oh, pawccecize Jerusalem tuh alesaepaw Siapharan kya-e khuapi nynh thua.³⁶Na lu phyate mah byakinkuh nan, pawccecize na sang ccangkheit sanmah na rawsah kho khyh zah na mansah kho khyh.³⁷Thuasalama na hopaw tuh athua ze athua, athua khyh ze thua khyh na ci cih; pawccecize pawpaw bya zemah hynh-e hae laelan tuh ahoy leipaw kyate nynh yn thua. Liarunaw (Luk 6.27-36)

³⁸“ ‘Mit ccangkheit hanlan mit ccangkheit, te haw ccangkheit hanlan haw ccangkheit’ cite a ho hae paw kha na thae vae oh.³⁹Thuasalama kae hopya oh, hoyleinaw a raepaw kha liaru nan oh, lukhakheit nynh na ranglang byaki kha ae bia ze, na voilang byaki kha mah la tuapakuh.⁴⁰Te lukhakheit nynh tazaeccoi ae ry zah na angki kha a lawku ze, na angkile kha mah la lawku bia sah.⁴¹Te lukhakheit nynh me kheit ccia lan ae riase ze amaw ryte me ning la cceih oh.⁴²Lukhakheit nynh nang ae ngiaku ze la pya, te lukhakheit nynh nang ae koii ry ze la kang nan.

⁴³“ ‘Na innpaw kha na sungsah cih zah na rhawpaw kha na hua cih,’ cite a ho hae paw kha na thae vae oh.⁴⁴Thuasalama kae hopya oh, nae rhaw hae kha sungsah oh, nanning ae tuaa ae sah oh paw hanlan sawsangpah oh.⁴⁵Tuhteze nynh vaawlang umpaw nae Paaw a ccaaw hae lang na tang cih oh; pawccecize ahoy leipaw te ahoypaw ccungccaw tungvaw a khuanin kha pawsah zah adingpaw te ading leipaw tungvaw khuaa a rawsah.⁴⁶Pawccecize nanning ae sungsah oh paw kyalya kha na sungsah oh ze amee pawmou na mue cih oh? Ngunto khoi hae paw nynh heize tuhte cyih khyh hae tou?⁴⁷Te na uno hae kyalya kha na beih hae ze ming hae laeze pawmou na cyihua? Zenta hae nynh heize tuhte cyih khyh hae tou?⁴⁸Tukeiccuze vaawlang umpaw nae Paaw tuh accing hawte nanning mah la ccing oh. Pyanaw Kong Ccangpyanaw

¹“Ccungccaw hae nynh yn muih hae sah cite minmin malang ryachi bawmnaw na pya khyh nawlan oh la raeringkuh oh; tuhkhyhze tuh vaawlang umpaw nae Paaw kya-e amee na mue lan khyh oh.

²“Tukeiccuze ryachi bawmnaw na pya vae oh ze thyaruh hae nynh sinakok hae kya te laanpi hae kyakhe ccungccaw hae nynh thehoysahnaw kha ccou khylan a cyi hae hawte nae malang mungkae la tusah nan oh. Byaccaccing kae hopya oh, minmin tuh mih ryalaw mee kha phe a mue vae hae.³Thuasalama ryachi bawmnaw na pya vae oh ze nae ranglang kuih nynh a cyipaw kha nae voilang kuih la nysah nan oh.⁴Tuhteze nynh ryachi bawmnaw na pya oh paw kha hum nynh sanmah nyh lan khyh; te aphirute cyipaw a muihtupaw nae Paaw nynh amee kha ae pya cih oh. Bawipaw Sawsangnaw (Luk 11.2-4)

⁵“Te saw na sang vae oh ze thyaruh hae hawte la cyih nan oh; pawccecize minmin tuh sinakok hae kya te laanpi hae atungkunaw kya ccungccaw hae nynh yn muih hae sah cite thadyn lante sawsang a ry hae. Byaccaccing kae hopya oh, minmin tuh mih ryalaw mee kha phe a mue vae hae.⁶Thuasalama saw na sang vae oh ze nae khaan lungkhu lang tee oh lah nae thuakaw kha khaw oh lah, muih kho leipaw kya a umpaw nae Paaw kalan khe sawsang oh; te aphirute cyipaw a muihtupaw nae Paaw nynh amee kha ae pya cih oh.

⁷“Thuasalama saw na sang vae oh ze Pachia beik lei hae paw nynh a cyi hae hawte accakaepaw bya patae la ho nan oh; pawccecize minmin nynh patae a ho hae liate oun thaepah hua cih cite a tuaku hae.⁸Tukeiccuze nanning tuh minmin hawte cyihbua nan oh; pawccecize nae Paaw nynh nanning elang aho-aboupaw kha na ngia maw oh ze phe a ny vae.

⁹“Tukeiccuze hynhcite sawsang oh:Vaawlang khua umpaw kaening Paaw,na min sawtuanaw um sah.¹⁰Na peenaw thua ccavae sah.Vaawlang khua kyana rynaw rae athua hawtelaephi vawlan mahraebua thua sah.¹¹Nin takyh kae aepawlooh atunin oun pya.¹²Ming hae nynh kae tungvawa sei hae paw khakae ngaethya hae hawtekae seinaw khaoun ngaethyabua.¹³Tuhounaw lungkhu langoun cciasah nan,ahoy leipaw kyateoun khumtua.

¹⁴Nanning nynh ccungccaw hae cyiseinaw kha na ngaethya oh ze vaawlang umpaw nae Paaw nynh mah ae ngaethya cih oh.¹⁵Thuasalama ccungccaw hae cyiseinaw kha na ngaethya khyh oh ze, nae Paaw nynh nae cyiseinaw kha ae ngaethya lan khyh oh. Looh-ae Sungnaw

¹⁶“Looh-ae na sung oh ze, thyaruh hae hawte a ngaethahpaw maesue te la um nan oh; pawccecize minmin tuh looh-ae a sung hae paw kha ccungccaw hae nynh oun nyh hae sah cite mih maesue te a langsaku hae. Byaccaccing kae hopya oh, minmin tuh mih ryalaw mee kha phe mue vae hae.¹⁷Thuasalama nanning tuh looh-ae na sung vae oh ze nae lu kha chitui thuhkuh oh lah, nae maelahkuh oh.¹⁸Tuhteze tuh ming hae nynh looh-ae na sung oh paw kha ae nyh lan khyh oh; thuasalama muih kho leinaw kya a umpaw nae Paaw nynh ae nyh cih oh; te aphirute cyipaw a muihtupaw nae Paaw nynh amee kha ae pya cih oh. Vaawlang kya Sisua (Luk 12.33-34)

¹⁹“Laehaw te chihhang nynh a ronaw hae te miruh hae nynh kiabia hae zah a runaw hae laephi vawlan nae sisua kha ccykuh nan oh.²⁰Laehaw te chihhang nynh a ro leinaw hae, miruh hae nynh mah a kiabia leinaw hae te a ru leinaw hae vaawlang khua khe nae sisua kha ccykuh oh.²¹Pawccecize nae sisua umnaw kya nae thinlung mah a umbua cih. Pyn kya-e Awnaw (Luk 11.33-36)

²²“Mit tuh pyn kya-e maeekhua nynh thua; tukeiccuze na mit tuh ahoy lanze na pyn balyn tuh awnaw te phe beih cih.²³Thuasalama na mit ahoy khyh ze na pyn balyn tuh mohnaw te phe beih cih. Tukeiccuze nang na kya umpaw awnaw tuh mohnaw athua lanze tuh-e mohnaw tuh pawcih baban mou ale! Bawi Lu Ning Ryalawpyanaw (Luk 12.22-34)

²⁴“Hum ccungccaw nynh sanmah bawi lu ning ryalawpah kho khyh; pawccecize bawi lu kheit kha a hua cih zah lu kheit kha a sungsah cih; tuhkhyhze lu kheit kalan a pan cih zah lu kheit kha pawlangria lan khyh. Nanning nynh Pachia rya te phuasui rya parouhte na lah kho khyh oh.

²⁵“Tukeiccuze kae hopya oh, pawmou kae ae cih, pawmou kae neih cih cite nae hiinnaw hanlan nae lungvawsaw nan sah; paw boeining mou kae lawkuh cih cite nae pyn elang nae lungvawsaw nan sah. Hiinnaw tuh looh laeze sunghua khyh tou? Pyn tuh boeining laeze sunghua khyh tou?²⁶Vaawlang e pavaw hae khuh dotua oh! Minmin tuh ccacii vuakuh khyh hae, looh mah rue khyh hae, byng kya mah ruinkuh khyh hae; tuhzemah vaawlang umpaw nae Paaw nynh minmin kha looh a dang hae. Nanning tuh minmin laeze patae na sunghua khyh oh tou?²⁷Nanning lakuze hummou a lungvawsawnaw liate a hiinnaw ccyh kha dyntari san a saesakuh khopaw a um?²⁸Tukeiccuze pawccemou boeining elang nae lungriathae? Ramkaw e lili haetapaw ku hae kha pawcihte nynh a lethung hae cipaw tuatua oh; minmin tuh ryalah khyh hae, laaw mah sukuh khyh hae.²⁹Tuhzemah kae hopya oh, myarya a hoirumpaw Solomon nynh heize lili paw pawkheit tuhte apuithya lan ccaankuh kho khyh.³⁰Tukeiccuze, pou zynnaw a zya hae paw nanning, atunin hiin zah awkhualan takuamaee lungkhu lang phung athuapaw ramkaw e lonua kha heize Pachia nynh tuhcite a ccaan lanze, nanning kha tuhlaeze houh ae ccaan lan khyh oh tou?³¹Tukeiccuze, ‘Pawmou kae ae cih? Pawmou kae neih cih? Paw boeining mou kae lawkuh cih?’ cite nae lungriathae nan sah.³²Pawccecize hynh-e uccaw hae balyn tuh lawki hae nynh a ccung hae paw nynh thua; vaawlang umpaw nae Paaw nynh hynh-e uccaw hae balyn tuh nae hanlan aho cipaw phe a ny.³³Pachia peenaw te a dingnaw kha masaty ccung oh, te hynh-e uccaw hae balyn kha pyachih na thua cih oh.

³⁴“Tukeiccuze awkhualan hanlan nae lungriathae nan sah, pawccecize awkhualan nynh amaw elang a lungriathaekuh cih. Atunin e lungriathaenaw tuh atunin hanlan phe azaw. Ming hae Ccaee Nan (Luk 6.37-38, 41-42)

¹“Nanning tuh byapia na thua khyh nawlan oh ming hae kha bya la pia nan oh.²Pawccecize na pianaw oh paw byapianaw thyhte naemaw kha byapia na thua cih oh; na tounaw oh paw tounawpaw te naemaw kha toupya ru na thua cih oh.³Namaw mit lungkhu umpaw thingthyh kha tuaku leite pawccemou na uno mit lungkhu umpaw athupaw taraw kha na dopya?⁴Namaw mit kya thingthyh phang a um pite, pawtemou na unopaw kha, ‘Na mit kya-e athupaw taraw kha kae la khoipah,’ na ci ngan?⁵Nang thyaruhpaw! Namaw mit lungkhu e thingthyh kha khoikuh ty; tukoute nynh na unopaw mit lungkhu e athupaw taraw kha khoipya khylan ccaerarih lan na muihthya cih.

⁶“Athyaapaw uccaw kha ui hae pya nan oh; nae kya-e palee hae kha voh hae malang sawpah nan oh, tuhte na cyi oh ze mih ccu te a sydehan cih hae, te naemaw kha ae paleihnuakuh cih oh zah ae bou cih oh. Ngia, Ccung, Khua (Luk 11.9-13)

⁷“Ngia oh lah ae pya cih oh; ccung oh lah na muih cih oh; khua oh lah thuakaw kha hungpya na thua cih oh.⁸Pawccecize a ngiapaw miakaw tuh a mue; a ccungpaw miakaw tuh a muih; thuakaw a khuapaw miakaw tuh hungpya athua cih.⁹Nanning lakuze nae ccaaw nynh sanlou ae ngiaku oh ze, lung na pya cih oh tou?¹⁰Ngasaw ae ngiaku oh ze, hupaw na pya cih oh tou?¹¹Ccungccaw hoy leipaw mang na thua oh pite nae ccaaw hae kha lasung hoypaw pya lan na ny oh ze, vaawlang umpaw nae Paaw nynh amaw kalan a ngiakuh hae paw kha uccaw hoypaw tuh houh a pya cih hae! Sui Upadi

¹²“Nae tungvaw kya cyih hae sah cite na ry oh hawte ming hae tungvaw kya la cyih oh; pawccecize hynh-e tuh kawbya ccauh te profeh hae ccauh nynh a ho hae paw nynh thua. Abypaw Sakoih (Luk 13.22-30)

¹³“Abypaw sakoih kyate tee oh; pawccecize ronaw kalan ccianawpaw sakoih tuh ko zah laanpi tuh azoi; tuin kya a teepaw ccungccaw hae tuh patae acih hae.¹⁴Thuasalama hiinnaw kalan ccianawpaw sakoih tuh by zah laanpi tuh aru; tuh-e laanpi a muihkuhpaw tuh azya. Thingku te Athae (Luk 6.43-44)

¹⁵“Tuu phua bongkute nae kalan oun thua hae paw lingthya profeh hae kha la raeringkuh oh; pawccecize minmin tuh alungkhu langte tuh arepaw suizaw hae nynh thua hae.¹⁶Minmin kha mih cyisahnaw khate nae nyh cih oh. Ccungccaw hae nynh misu thae kha taty ku kyate a lo hae tou? Thaeku thae kha hinpaw ku kyate a lo hae tou?¹⁷Tuh-e hawte thingku hoypaw nynh thingthae hoypaw kha a thae, thuasalama thingku hoy leipaw nynh tuh thingthae hoy leipaw kha nynh a thae.¹⁸Thingku hoypaw nynh thingthae hoy leipaw kha thae kho khyh, thingku hoy leipaw nynh mah thingthae hoypaw kha thae kho khyh.¹⁹Thingthae hoypaw a thae leipaw thingku miakaw tuh nge thua zah maee lungkhu lang phung athua.²⁰Tukeiccuze lingthya profeh hae kha mih cyisahnaw khate nae nyh cih oh. Bawipaw, Bawipaw (Luk 13.25-27)

²¹“ ‘Bawipaw, Bawipaw’ cite yn kopaw miakaw nynh vaawlang peenaw lungkhu lang tee lan khyh hae, thuasalama vaawlang umpaw ka Paaw rynaw a raepaw nynh a tee cih.²²Tuh-e nin kya ccungccaw patae nynh kae kha, ‘Bawipaw, Bawipaw, na min te profehbya kae ho khyh tou? Na min te raerangsaro kae dee khyh tou? Na min te ngaeangnaw patae kae rae khyh tou?’ cite yn hopah cih hae.²³Te kae nynh minmin kha, ‘Nanning hynh papin kae nyh boi khyh oh, hoyleinaw a rae hae paw nanning, ka kyate cceih oh,’ ka ci cih hae. Inn Sak hae paw Lu Ning (Luk 6.46-49)

²⁴“Tukeiccuze humhung zemah hynh-e ka bya hynh thae zah a zuipaw tuh lungpi vawlan a inn a sakkuhpaw mihawpaw te nynh a loku.²⁵Khuaa yn rah zah tui yn le, khisan yn zaw zah tuh-e inn tuh a mung; thuasalama tuh-e inn tuh lungpi vawlan sakpaw athua keiccuze pu khyh.²⁶E ka bya hynh thae zah a zui leipaw tuh laesia vawlan a inn a sakkuhpaw mingaeepaw te nynh a loku.²⁷Khuaa yn rah zah tui yn le, te khisan yn zaw zah tuh-e inn tuh a mung, te tuh-e inn tuh phe a pu; khaleih roh lan a pu,” a ci.

²⁸Jesu nynh tuh-e bya hae balyn kha he a ho koute ccungccaw zapi hae tuh a ccangpyanaw kha mih ngaeangthua,²⁹pawccecize aning nynh kawbya sazae hae hawte thua leite kaw a hoipaw lu kheit hawte a ccangpya hae. Vaethyakaepaw A Dansah (Mar 1.40-45; Luk 5.12-16)

¹Mua kyate Jesu he a rungbung tuh myarya lungpaw ccungccaw zapi nynh amaw kha a zui hae.²Te vaethyakaepaw lu kheit yn thua zah amaw malang a ccukharutungte, “Bawipaw, na ry zetuh kae hynh nae thyaasah kho,” a cipya.³Jesu nynh a kuih dyng zah tuh-e paw kha hae zah, “Ka ry, thyaa ccavae!” a cipya. Vaekheihmawte a vaethya ccinaw tuh phe athyaa.⁴Tukoute Jesu nynh, “E konglang hynh humhung kya mah na ho khyh nawlan la raeringkuh; thuasalama ranpibawi kalan la cceih lah la dosakuh; te ccungccaw hae kya na dannawpaw ccaekia lang Moses kawbya thyhte silawnaw kha la rae,” a cipya. Rhawbawipaw Zynnaw (Luk 7.1-10)

⁵Jesu tuh Kapernaum khua lang he a tee tuh, rhawbawipaw lu kheit nynh amaw kalan yn thua zah,⁶“Bawipaw, ka ryalahtupaw tuh kuihccuchite ccih zah innvaw phang a huekuh, myarya a ccih,” cite bawmnaw a ngiaku.⁷Jesu nynh, “Kae cceih cih zah ka dansah cih,” a cipya.⁸Rhawbawipaw nynh, “Bawipaw, nang nynh ka inn lang tee lante kae tuh ka ngaekuh khyh; bya te kyalya kawpya lah ka ryalahtupaw tuh a dan cih.⁹Pawccecize kae mah ka luki e bawi hae kaw te a umpaw ka thua zah ka kuihkaw mah rhawkaw hae a um hae; te lu kheit kha, ‘Cceih,’ ka ci ze a cceih; ccangpaw lu kheit kha, ‘Rang,’ ka ci ze yn thua; te ka ryalahtupaw kha, ‘E hynh cyih,’ ka ci ze a cyih,” cite a hopya.¹⁰Jesu nynh tuh-e bya kha he a thae tuh a ngaeangthua zah amaw a zui hae paw kha, “Byaccaccing kae hopya oh, hynhcih alepaw zynnaw tuh Israel hae kya heize ka muih boi khyh.¹¹Nanning kae hopya oh, ccungccaw patae tuh nithua langte, niccaw langte oun thua cih hae zah vaawlang peenaw kya Abraham, Isak te Jakob ryte a aekheih cih hae.¹²Thuasalama vaawlang peenaw rho a ccou lan hae paw paleih kha tuh atolang mohnaw lungkhu lang vua athua cih hae, tuin kya tuh rawkhuinaw te hawzynaw a um cih,” a cipya hae.¹³Te Jesu nynh rhawbawipaw kha, “La cceih ccavae; na zyn thyhte cyipya thua sah,” a cipya. A ryalahtupaw tuh tuh-e ccyh ccaccei kya phe a dan. Ccungccaw Patae A Dansah hae (Mar 1.29-34; Luk 4.38-41)

¹⁴Jesu nynh Peter inn lungkhu lang he a tee tuh, Peter a zu nung tuh ccih zah a huekupaw kha a muih.¹⁵Te Jesu nynh a kuih kha hae zah a ccinaw tuh phe dan; te aning nynh thokuh zah Jesu kha a do-oih vae.¹⁶Zete he thua tuh ccungccaw hae nynh raerangsaro bahkuh hae paw patae kha Jesu kalan oun cciakhae hae; Jesu nynh a bya kaw kheit te ahoy leipaw muisaw hae kha dee zah ngeccih hae balyn kha a dansah hae.¹⁷Hynh-e hynh profeh Isaiah nynh, “Aning nynh aening vaemaw kha lah zah, aening ccinaw kha a phu,” cite a hopaw bya accing nawlan nynh thua. Jesu A Zui Cih hae paw (Luk 9.57-62)

¹⁸Jesu nynh a pepan e myarya lungpaw ccungccaw zapi kha he a muih tuh khuraw lang ccia lan kaw a pya hae.¹⁹Te kawbya sazae lu kheit tuh amaw kalan yn thua zah, “Sazae, na ccianaw miakaw lang kae zui cih,” a cipya.²⁰Jesu nynh, “Suizaw hae nynh karung hoi hae zah vaawlang e pavaw hae nynh bu a hoi hae; thuasalama Ccungccaw Ccapaw tuh a lu nungnaw sanmah hoi khyh,” a cipya.²¹Ccangpaw a zuitupaw nynh, “Bawipaw, masaty ka la cceih sah lah ka paaw kha ka la uh hin sah,” a cipya.²²Thuasalama Jesu nynh, “Kamaw yn zui, michi hae nynh mih michi hae kha la uh hae sah,” a cipya. Jesu nynh Khise A Daesah (Mar 4.35-41; Luk 8.22-25)

²³Jesu tuh kohlung lungkhu lang tee zah a zuitu hae nynh a zui hae.²⁴Rili kya myarya rupaw khise yn tho zah kohlung tuh tuileih nynh vyavya a vu, thuasalama Jesu tuh marya a ih.²⁵Te a zuitu hae nynh amaw kha ccianuate tho hae zah, “Bawipaw, kaening oun khumtua, aening ah chih vae cih oh!” a cipya hae.²⁶Jesu nynh minmin kha, “Pou zynnaw zya hae paw, pawccemou na ri oh?” a cipya hae. Tuinte thokuh zah khise te tuileih tuh daenaw kaw pya hae zah zya adae hae.²⁷Te minmin tuh mih ngaeangthua zah, “E paw hynh pawcihawpaw ccungccaw mou? Khise te tuileih nynh heize a kaw a ngae hae!” a ci hae. Raerangsaro Bahkuh hae paw (Mar 5.1-20; Luk 8.26-39)

²⁸Jesu tuh rili khuraw lang Gadara ram he a thua te, raerangsaro bahkuh hae paw lu ning nynh shawku kyate oun pou hae zah amaw kha oun tungku hae; minmin tuh ri lan myarya um hae zah humhung nynh mah tuh-e laanpi te cceih ngan khyh hae.²⁹Te minmin nynh vaekheihmawte, “Pachia Ccapaw, nang te kaening tuh pawmou ah sekuh oh? Accyh azaw mawze kaening hynh vawsaw pya khylan tou hynhlang nae thua?” cite a sia hae.³⁰Te minmin kyate eih asaw leinaw khe rampaeekuh hae paw voh phu kheit a um.³¹Te raerangsaro hae nynh, “Nang nynh kaening hynh nae dee ze, voh hae lungkhu lang beih oun teesah,” cite a ngiaku hae.³²Jesu nynh minmin kha, “Cceih oh!” a cipya hae. Tukeiccuze minmin tuh pou hae zah voh hae lungkhu lang a tee hae; voh hae tuh mih balynte apannaw lang thawmawte ccuebung hae zah rili lungkhu lang phungkuh hae zah tui kya pong a chih hae.³³Voh a rintu hae tuh ccue hae zah khua lungkhu lang a tee hae, te raerangsaro bahkuh hae paw kya acyihkuhpaw balyn kha a hopya hae.³⁴Khuaccaaw hae balyn nynh Jesu te tungku lan oun cceih hae zah amaw kha he a muih hae te, mih ram kyate a pou nawlan a ngia hae. Kuihccu Chihpaw A Dansah (Mar 2.1-12; Luk 5.17-26)

¹Jesu tuh kohlung lungkhu lang a tee koute rili khuraw lang po zua zah amaw khua lang a thua.

²Iphae vawlan phang ihpaw a kuihccu chihpaw kha Jesu kalan oun puih hae. Jesu nynh mih zynnaw kha a muih tuh, a kuihccu chihpaw kha, “Ka ccapaw, na thawsia nan sah, na seinaw tuh ngaethya athua vae,” a cipya.³Tetuh kawbya sazae hae abang nynh, “E paw hynh Pachia saryate bya a ho,” cite a hoku hae.⁴Jesu nynh mih tuanaw kha nyh zah, “Pawccemou nae thinlung kya ahoy leipaw kha na tua oh?⁵‘Na seinaw tuh ngaethya athua vae’ cipyapaw tou azoihua? Tuhkhyhze, ‘Thokuh lah cceih,’ cipyapaw tou azoihua?⁶Thuasalama Ccungccaw Ccapaw tuh laephi vawlan seinaw kha ngaethyanaw kaw a hoi cipaw na ny nawlan oh,” ci zah, kuihccu chihpaw kha, “Thokuh, na iphae kha lawkuh lah na inn lang cceih ccavae,” a cipya.⁷Tuh-e paw tuh thokuh zah a inn lang a cceih vae.⁸Ccungccaw zapi nynh tuh-e tuh he a muih hae te, mih ngaeangthua zah tuhcihawpaw kawhoinaw kha ccungccaw hae a pyatupaw Pachia kha the a hoysah hae. Jesu nynh Matthai A Ko (Mar 2.13-17; Luk 5.27-32)

⁹Tuin kyate Jesu tuh po a ccia lyakhe ngunto khoinaw zung kya a dahungpaw Matthai a ci hae paw lu kheit kha muih zah, “Kamaw yn zui,” a cipya. Te aning nynh thokuh zah Jesu kha a zui.

¹⁰Jesu tuh inn kya ae lan ccaboi kya a haung lyakhe ngunto khoi hae paw patae te misei hae tuh oun thua hae zah Jesu te a zuitu hae ryte a dahungkheih hae.¹¹Tuh-e tuh Farasi hae nynh he a muih hae tuh, a zuitu hae kha, “Pawccemou nae sazaepaw hynh ngunto khoi hae paw te misei hae ryte a aekheih hae?” a cipya hae.¹²Jesu nynh tuh-e bya kha he a thae tuh minmin kha, “A dan hae paw nynh sibawi peki khyh hae, thuasalama a ccih hae paw nynh a peki hae.¹³La cceih oh lah, ‘Kae tuh silawkunaw ka ry khyh, ngaethyaumsahnaw nynh ka ry,’ acikuhpaw kha na nythya nawlan oh la ccangkuh oh. Pawccecize kae tuh miding hae ko khylan kae thua khyh, misei hae ko khylan nynh kae thua,” a cipya hae. Looh-ae Sungnaw Kong Byakhianaw (Mar 2.18-22; Luk 5.33-39)

¹⁴Te Johan zuitu hae nynh Jesu kalan oun thua hae zah, “Kaening te Farasi hae tuh atu te atu looh-ae kae sung zah, pawccemou nang na zuitu hae ze looh-ae a sung khyh hae?” a cipya hae.¹⁵Jesu nynh minmin kha, “Zudy ccangvaepaw tuh zudy poi oun too hae paw kya a umbua lungkhu tuh tuh-e ccungccaw hae tuh mih ngaethah cih zawtou? Thuasalama zudy ccangvaepaw kha minmin kyate lawpya ccyh yn thua cih; tetuh minmin tuh looh-ae oun sung vae cih hae.¹⁶Humhung nynh mah arynpaw boeining kha athawpaw boeibia te bia boi khyh, tuhte a bia lanze bianawpaw nynh arynpaw boeining kha po lah zah houh aseiikuh paleih vae.¹⁷Humhung nynh mah athawpaw misutui kha arynpaw misutui-saphuabawng lungkhu lang ruin boi khyh, tuhte a ruin lanze misutui-saphuabawng tuh apaw cih zah misutui tuh azu cih, te misutui-saphuabawng mah aroh cih; thuasalama athawpaw misutui tuh athawpaw misutui-saphuabawng lungkhu lang nynh a ruin hae, tuhteze tuh parouh akhyn hae,” a cipya hae. Jesu Boeirae A Haenung (Mar 5.21-43; Luk 8.40-56)

¹⁸Tuh-e bya tuh Jesu nynh a hopya cciamang lya hae khe, sinakok piccan lu kheit nynh yn thua zah Jesu malang bakhung zah, “Ka ccanung tuh atumaw khe nynh a chi, thuasalama nang nynh yn cceih lah a tungvaw khe na kuih na khang ze aning tuh a hiin cih,” a cipya.¹⁹Jesu nynh thokuh zah tuh-e paw tuh a zui, a zuitu hae mah a zuikuh bua hae.²⁰Tuh lyatuin kum haw lae ning cia chiilua ccinaw a hoipaw nopinung lu kheit tuh Jesu nulang yn thua zah a boeirae kha a hae.²¹Pawccecize a boei sankaw ka hae ze phe ka dan cih cite a lungkaw te a tuaku.²²Thuasalama Jesu nynh maeleihkuh zah tuh-e nung kha he a muih tuh, “Ka ccanung, na thawsia nan sah, na zynnaw nynh ae dansah vae,” a cipya. Tuin ccyh kyate nopinung tuh a dan vae.²³Jesu tuh uktupaw inn lang he a thua te, tyngdaw khua hae paw te a sia a rua hae paw ccungccaw hae kha muih zah,²⁴“Toiku tua hin oh, pawccecize imuanung tuh chih khyh, a ihpaw nynh thua,” cite a hopya hae. Te minmin nynh a nuinse hae.²⁵Thuasalama ccungccaw hae he a pou hae te, Jesu nynh tee zah tuh-e nung kha a kuih te tho zah imuanung tuh po a tho vae.²⁶Tuh-e thongpang tuh tuh-e ram lungkhu balyn po azeihkuh. Mitmoh Lu ning Ngawmuih hae

²⁷Tuin kyate Jesu tuh pou zah a ccia lyakhe mitmoh hae paw lu ning nynh zui hae zah, “David Ccapaw, kaening hynh ngaethya beih oun umsah!” cite a sia hae.²⁸Jesu tuh innthung lang he a thua te, mitmoh hae tuh amaw kalan oun thua hae; Jesu nynh minmin kha, “E hynh a cyih kho cih cite nae zyn oh tou?” a cipya hae. Minmin nynh, “Kae zyn, Bawipaw,” a ci hae.²⁹Tetuh Jesu nynh mih mit kha hae zah, “Nae zynnaw thyhte nae tungvaw cyihkuh sah,” a cipya hae.³⁰Te mih mit hae tuh oun aw vae; Jesu nynh, “E hynh humhung mah la nysah nan oh,” cite tynkaring lan bya a tawsya hae.³¹Thuasalama minmin nynh he a pou hae te, amaw konglang thongpang kha tuh-e ram balyn kya a zeihsaku hae. Byaho Kho leipaw Byaho

³²Minmin he a pou hae te, raerangsaro bahkuhpaw byaho kho leipaw lu kheit kha Jesu kalan oun thuakhae hae.³³Raerangsaro kha he a deepah koute, byaho kho leipaw tuh bya yn ho vae; te ccungccaw zapi tuh mih ngaeangthua zah, “E tahawpaw hynh Israel ram kya muihkuh boi khyh,” a ci hae.³⁴Thuasalama Farasi hae nynh, “Raerangsaro hae uktupaw liate nynh raerangsaro hae kha a dee hae,” cite a ho hae. Ryalahtu Azya

³⁵Jesu tuh khuapi hae te khua taraw hae balyn kalan khua po ccong zah, mih sinakok hae kyakhe a ccangpya hae, peenaw thehoypaw kha hopah hae zah mih ccinaw miakaw te ccihawnaw miakaw kha a dansah hae.³⁶Jesu nynh ccungccaw zapi kha he a muih hae tuh, ngaethya a umsah hae, pawccecize minmin tuh tuurintu a um leipaw tuu hae hawte lungriathaete um hae zah bawmtu hoi khyh hae.³⁷Tukeiccuze a zuitu hae kha, “Loohrue lanpaw tuh myarya alung, thuasalama ryalahtu hae tuh azya.³⁸Tukeiccuze loohrue lanpaw a hoitu Bawipaw nynh a loohruenaw kalan ryalahtu hae yn saw nawlan sawsang oh,” a cipya hae. Locceihtu Lu Haw Lae Ning A Po (Mar 3.13-19; Luk 6.12-16)

¹Jesu nynh a zuitu hae lu haw lae ning kha amaw kalan ko hae zah athyaa leipaw muisaw hae dee khonaw te ccinaw aphuinphuin te ccihawnaw miakaw dansah khonaw kaw a pya hae.²Locceihtu hae lu haw lae ning min tuh: masaty, Peter cite a ko hae paw Simon, te a neitaw Andru, Zebedi ccapaw James, te a neitaw Johan;³Filip te Bartholomew; Thomas te ngunto khoipaw Matthai; Alfeas ccapaw James te Taddias;⁴Kanaan khuapaw Simon, te Jesu a pheetupaw Judas Iskariot nynh thua hae. Locceihtu Lu haw Lae Ning A Saw (Mar 6.7-13; Luk 9.1-6)

⁵E lu haw lae ning hynh Jesu nynh saw hae zah hynhte kaw a pya hae: “Zenta hae ram lang la cceih nan oh, Samaria hae khua lang mah la tee nan oh.⁶Israel minphuin kyaze azopaw tuu hae kalan palia la cceih oh.⁷Na ccia vae oh ze, ‘Vaawlang peenaw tuh anae vae,’ cite thehoypaw kha la siakhae oh.⁸Ngeccih hae kha la dansah oh, a chih hae paw kha la thoosah oh, vaethyakae hae paw kha la thyaasah oh, raerangsaro hae kha la dee oh. Nanning tuh amee pya leite na mue oh zah, amee lawku leite la pya oh.⁹Nae phuabu kya sui, ngun te sohinphua kha la sangkuh nan oh.¹⁰Khuaccong nawlan sohrae, angki zung ning, phanah hae te hoitang hae mah phukuh nan oh; pawccecize ryalahtupaw tuh looh dang lan accan.¹¹Khuapi lang thuasah, khua taraw lang thuasah na tee vae oh ze, tuin khua kya angaekuhpaw innccong kha la khia oh lah tuin khua kyate na pou mawlaezung oh tuin kya la um oh.¹²Inn lungkhu lang na tee vae oh ze, ‘Nae kya daenaw um sah,’ cite la beih oh.¹³Tuh-e inn tuh angaeku ze nae kya-e daenaw tuh tuh-e innbyn hae kya la um sah; thuasalama angaeku khyh ze, nae kya-e daenaw tuh naemaw kalan la ki sah.¹⁴Te humhung zemah nanning kha innccong ae doih oh zah nae bya kha mah a ngae khyh ze, tuh-e inn, tuhkhyhze tuh-e khuapi kyate he na pou oh te, nae ccu kya-e vuiping kha la khuanua sya oh.¹⁵Byaccaccing kae hopya oh, byapia nin kya tuh-e khuapi hanlan laeze Sodom te Gomorrah khua hanlan ngaesang kho a umhua cih. Tuaasahkunaw A um cih (Mar 13.9-13; Luk 21.12-17)

¹⁶“Ngaetua oh! Suizaw hae laku tuu hae saw hawte nanning kha kae saw oh, tukeiccuze hupaw hawte nae lunghaw sah lah vahu hawte nae lungne sah.¹⁷Ccungccaw hae kha la raeringkuh oh; pawccecize minmin nynh zung lang ae ap cih oh zah mih sinakok hae kya ae bua cih oh.¹⁸Kae ka keiccuze ram uktu hae te siapharan hae malang ae thuakhae cih oh zah, minmin te Zenta hae kya ccaekia lang na tang cih oh.¹⁹Minmin nynh he ae ap vae oh ze, pawmou ka ho cih, pawtemou ka ho cih cipaw nae lungvawsaw nan sah; pawccecize tuh-e ccyh kya na ho lan oh paw kha pya na thua cih oh.²⁰Pawccecize a ho cih paw tuh naemaw thua khyh, nae Paaw Muisaw nynh nanning kyate a ho cih.²¹Uno nynh a uno toulou kha chinaw kalan yn ap cih, paaw nynh a ccaaw kha yn ap cih; ccaaw hae nynh nungpaaw hae kha oun rawse cih hae zah minmin kha oun chisah cih hae.²²Kae ka min keiccuze ccungccaw balyn nynh nanning kha ae hua cih oh. Thuasalama athangnaw cia a tynpaw tuh khum athua cih.²³Khua khuakheit kya ae tuaa ae sah oh ze, khua ccanglang la ccue oh; pawccecize byaccaccing kae hopya oh, Ccungccaw Ccapaw yn thua maw nanning nynh Israel khua miakaw kalan na cceih kou lan khyh oh.

²⁴“Siaimua tuh a sazae laeze thyahua khyh, see mah a bawipaw luki um khyh.²⁵Siaimua nynh a sazae hawte athua ze azaw vae, see mah a bawipaw hawte athua ze azaw vae. Minmin nynh inn hoitu kha Beelzebul cite a ko hae ze a innbyn hae thathy tuh athah huapaw min te khaw a ko vae cih hae! Hummou Ri lan (Luk 12.2-7)

²⁶“Tukeiccuze minmin kha la rih nan oh; pawccecize alangkuh lei lante thuruhpaw miakaw kha langsah athua cih zah, khongpaw miakaw kha hungpya athua cih.²⁷Mohnaw kya kae hopya oh paw kha awnaw kya la ho oh; nae nakaring kya zya na thae oh paw kha innccukaly kyate la ho oh.²⁸Pyn tuh theih kho salamah muisaw a theih kho lei hae paw kha la rih nan oh; muisaw te pyn kha parouhte hell kya a roh khopaw raw kha la rih oh.²⁹Rithya sa ning kha phuapia pia kheit lang zua khyh hae tou? Tuh-e rithya sa kheit sanmah nae Paaw kaw leite laekhu lang ccah lan khyh.³⁰Nae lu kya-e nae sangrua kha heize marya ria athua.³¹Tukeiccuze rih nan oh, nanning tuh rithya patae laeze nae phutehua. Khri Pankhaenaw te Vuanaw (Luk 12.8-12)

³²“Humhung zemah ccungccaw hae malang kae kha ccaekia yn khan zetuh tuh-e paw kha vaawlang umpaw ka Paaw malang ccaekia ka khanru cih.³³Thuasalama humhung zemah ccungccaw hae malang kamaw kha yn vuapaw tuh vaawlang umpaw ka Paaw malang kae nynh mah ka vuaru cih. Daenaw Thua Khyh, Thaloi (Luk 12.51-53, 14.26-27)

³⁴“Laephi vawlan daenaw thuakhae khylan nynh yn thua cite tua nan oh, daenaw thuakhae khylan kae thua khyh, thaloi saw khylan nynh kae thua.³⁵Ccapaw nynh a paaw,ccanung nynh a nung,monung nynh a ninnung kharawsesah khylan nynh kae thua.³⁶Amaw a rhaw hae tuhamaw a innbyn hae toulou khayn thua cih.

³⁷Humhung zemah kae laeze a paaw khyhze a nung a sungsah huapaw tuh kae te ngaekuh khyh; humhung zemah kae laeze a ccapaw khyhze a ccanung a sungsah huapaw tuh kae te ngaekuh khyh.³⁸Humhung zemah amaw a vaelantung kha puihku leite kae yn zuipaw tuh kae te ngaekuh khyh.³⁹A hiinnaw a muihkuhpaw ccungccaw tuh hiinnaw kha a shung cih, kae ka keiccuze a hiinnaw a shungpaw tuh hiinnaw kha a muihkuh cih. Zuitu Do-oihnaw Mee Lasung (Mar 9.41)

⁴⁰“Humhung zemah nanning leh ae khan oh paw tuh kae kha leh yn khanpaw nynh thua, te humhung zemah kae kha leh yn khanpaw tuh kae yn sawtupaw kha leh a khanpaw nynh thua.⁴¹Humhung zemah profeh lu kheit kha profeh athua keiccuze leh a khanpaw tuh profeh kya-e lasung kha a mue cih, te humhung zemah miding lu kheit kha miding athua keiccuze leh a khanpaw tuh midingpaw kya-e lasung kha a mue cih,⁴²byaccaccing kae hopya oh, humhung zemah hynh-e hae kyaze adih huapaw kha ka zuitu athua keiccuze tuikyaa banang nang kheit a pyapaw tuh a ryalaw mee shung lan khyh,” a cipya hae. Johan nynh Jesu A Khiasah hae (Luk 7.18-35)

¹Jesu nynh a zuitu hae lu haw lae ning kha phe thang lan a hopah kou hae te, tuin pepan e khua hae kya ccangpya khylan te phungho khylan tuin kyate a cceih.

²Johan nynh thonginn kyate Khri a ryalawnaw kong kha he a thae te, a zuitu hae kha saw hae zah,³Jesu kha, “Nang hynh yn thua cih paw tuh na thua tou? Tuhkhyhze mingccangpaw tou kae ngaw ung cih?” cite bya a khiasah hae.⁴Jesu nynh minmin kha, “La cceih oh lah na muih oh paw te na thae oh paw kha Johan la hopah oh.⁵Mitmoh hae nynh ngawmuih hae zah ccukhou hae nynh a cceih kho vae hae, vaethyakae hae paw a dan hae, nawpan hae nynh nawthae hae zah michi hae tuh thoosah athua hae, ryachi hae kalan thehoypaw tuh hopya athua.⁶Kae ka keiccuze a lungroh leipaw ccungccaw tuh lungtuapaw nynh thua,” a cipya hae.

⁷Te minmin he a cceih hae te, Jesu nynh Johan konglang kha ccungccaw zapi kya a hopya hae paw tuh: “Nanning nynh paw do khylan mou ramkaw lang na ccia oh? Khisan nynh a hepaw phaeku do khylan tou?⁸Tuhkhyhze paw do khylan mou na ccia oh? Boeining hoypaw a lawkuh hae paw kha do khylan tou? Dotua oh, boeining hoypaw a lawkuh hae paw tuh siapharan inn kya nynh leih a um hae.⁹Tuhkhyhze paw do khylan mou na ccia oh? Profehpaw do khylan tou? Athua, kae hopya oh, profeh lu kheit lae heize alesae huapaw nynh thua.¹⁰Pawccecize Ccathyaa kya,‘Dotua, na malang khena laanpi a paccyn cih pawka zeccuetu khana malang ka saw cih,’cite azeikuhpaw kha hynh-e paw kong nynh thua.¹¹Byaccaccing kae hopya oh, nopi hae kyate a puipaw ccungccaw hae kyaze Baptisma pyatu Johan laeze alesae huapaw lu kheit san langkuh loh khyh; thuasalama vaawlang peenaw kya adih huapaw ccungccaw tuh aning laeze a lesaehua.¹²Baptisma pyatu Johan ccyh kyate tho zah atu cia vaawlang peenaw tuh doukunaw teing zah a doutu hae nynh nangsete a lawkude hae.¹³Pawccecize kawbya ccauh te profeh ccauh hae balyn nynh Johan ccyh kyacia profehbya a ho hae.¹⁴Tuh-e bya tuh na zyn ry oh ze, Johan tuh yn thua cih paw Elijah nynh thua.¹⁵Thaenaw nakaring a hoipaw tuh thae sah!

¹⁶“Atu she e ccungccaw hae hynh pawtemou ka touse cih hae? Kungkunaw hae kya haung hae zah,¹⁷‘Kaening nynh phylykae tupah oh zah na law khyh oh;michi hlawkae sahpah oh zahmahna rah lae khyh oh rei,’cite a hokuh hae paw imua hae te nynh aloku hae.¹⁸Pawccecize Johan tuh ae lei nia leite yn thua zah minmin nynh, ‘Aning tuh raerangsaro bahkuhpaw nynh thua,’ a ci hae.¹⁹Ccungccaw Ccapaw tuh aete niate yn thua zah minmin nynh, ‘Dotua oh, aemohpaw te misuripaw khuh! Ngunto khoi hae paw te misei hae banpaw khuh!’ a ci hae. Thuasalama hawnaw tuh ahme cipaw kha a cyisahnaw nynh a langsah,” a ci. Zynnaw Hoi leipaw Khua hae (Luk 10.13-15)

²⁰Jesu nynh ngaeangnaw alunghua a raenaw khua hae nynh a ngaesiku khyh hae keiccuze hynhte a pe hae:²¹“Khorazin khua, nang na hanlan ngaethya lan kou um! Bethsaida khua, nang na hanlan ngaethya lan kou um! Pawccecize nanning kya rae athuapaw ngaeangnaw hae kha Tair khua te Sidon khua kyakhe rae a la thua ze, minmin tuh buri boeining lawkute buhhaw kya a toukuh cih hae zah khawlya mawte a ngaesikuh vae cih hae.²²Tukeiccuze kae hopya oh, byapianaw nin kya nanning hanlan laeze Tair te Sidon hanlan ngaesang kho a umhua cih.²³Kapernaum khua,nang tuh vaawlang ciahangku na ry tou?Hell kalan sawbung na thua cih.Pawccecize nang na kya rae athuapaw ngaeangnaw hae kha Sodom khua kya rae a la thua ze, atunin cia atyn ung cih paw.²⁴Tukeiccuze nang kae hopya, byapianaw nin kya nang na hanlan laeze Sodom khua hanlan ngaesang kho a umhua cih,” a ci.

²⁵Tuh ccyh lyakhe Jesu nynh tho zah, “Vaaw te laephi Bawipaw, pou Apang, na kalan lungtuabya ka ho; pawccecize e uccaw hae hynh a haw hae paw te a thya hae paw kyate na thuruh zah nosi hae kha na phypya hae.²⁶Tuhmawte nynh athua Apang, pawccecize tuh-e tuh na rynaw nynh thua.²⁷Ka Paaw nynh pawpaw balyn kha marya yn ap vae; Paaw laelan hum nynh sanmah Ccapaw kha nyh khyh; Ccapaw te Ccapaw nynh amaw kong phy lan a popaw ccungccaw laelan hum nynh sanmah Paaw kha nyh khyh.

²⁸“Riathae hae paw te phupaw ri hae paw balyn ka kalan rang oh lah haeungnaw kae pya cih oh.²⁹Ka nanrui hynh lawkuh oh lah vawkuh oh; kamaw hynh yn ccangkuh oh; pawccecize kae tuh a lungnepaw te zakawsangsakunaw thinlung a hoipaw nynh ka thua; nae thinlung kya daenaw na mue cih oh.³⁰Pawccecize ka nanrui tuh nawre um zah ka phupaw tuh azaw,” a ci. Sabbath Bawipaw (Mar 2.23-28; Luk 6.1-5)

¹Tuh ccyh lyakhe Jesu tuh sabbath nin kya loo lungkhu po a cceih; a zuitu hae tuh mih vuelaw zah looh avui kha zukuh hae zah a ae hae.²Tuh-e tuh Farasi hae nynh he a muih hae tuh Jesu kha, “Dotua, sabbath nin kya kawbya nynh cyi lan a ua leipaw kha na zuitu hae nynh a cyi hae,” a cipya hae.³Jesu nynh minmin kha, “David te a umkheih hae paw nynh mih vuelaw lyaze David nynh pawmou a cyi cipaw kha na ria boi khyh oh tou?⁴Pachia inn lungkhu lang tee zah kawbya nynh ranpibawi hae kyalya ae lan ua zah amaw thuasah, amaw te a umkheih hae paw thuasah ae lan a ua leipaw Nungpyapaw sanlou kha a ae hae cipaw na ria boi khyh oh tou?⁵Tuhpiaze ranpibawi hae nynh sabbath nin kya Beikinn lungkhu khe sabbath phung kha a lawe hae zemah seibe thua khyh hae cipaw kha kawbya kya na ria boi khyh oh tou?⁶Byaccaccing kae hopya oh, Beikinn laeze alesae huapaw tuh hein kya a um.⁷‘Silawkunaw tuh ka ry khyh, ngaethyaumsahnaw nynh ka ry,’ acikuhpaw asuilan kha na ny oh ze, seibe lan accan leipaw kha sei na be cih lei oh paw.⁸Pawccecize Ccungccaw Ccapaw tuh sabbath Bawipaw nynh thua,” a cipya hae. A Kuih Chihpaw Ccungccapaw (Mar 3.1-6; Luk 6.6-11)

⁹Jesu nynh tuh-e hmin tuh cciataw zah mih sinakok lungkhu lang a tee.¹⁰Tuin kyakhe a kuih voihawlang achihpaw ccungccapaw lu kheit a la um. Minmin nynh Jesu kha a seinaw kae kyngpya ccaw cite, “Sabbath nin kya dansah lan kawbya nynh a ua tou?” cite a khia hae.¹¹Jesu nynh minmin kha, “Nanning lakuze lukhakheit nynh tuu sa kheit hoi zah, sabbath nin kya hunghua lungkhu lang a ccaw ze tuh-e tuu tuh thuaa leite na um cih oh tou?¹²Tuu laeze ccungccaw tuh pawcihmou houh aphutehua! Tukeiccuze sabbath nin kya hoynaw rae tuh kawbya nynh a uapaw nynh thua,” a cipya hae.¹³Te Jesu nynh ccungccapaw kha, “Na kuih dyngtua,” a cipya. Aning nynh a kuih kha dyng zah voihawlang kuih hawte a dan vae.¹⁴Tetuh Farasi hae tuh cceih hae zah Jesu kha pawtemou chia lan cipaw khua a khanku hae. Pachia Popaw Ryalahtu (Mar 3.7-12)

¹⁵Jesu nynh tuh-e mih khuakhannaw kha he a nyh tuh tuin kyate a cceih. Te ccungccaw zapi nynh amaw kha zui hae zah minmin balyn kha a dansah hae.¹⁶Te amaw kong kha ming hae na nysah lan khyh oh cite kaw a pyasya hae.¹⁷Hynhte a cyipaw hynh profeh Isaiah nynh a hosyapaw bya accing nawlan nynh thua. A hopaw tuh:¹⁸“Ka pokupaw ka ryalahtu tuhhein kya mang um!Ka sungsah zah a tungvawka lungryccing.A tungvaw kheka Muisaw ka nung cih zahaning nynh Zenta hae khabyading kong a hopah cih hae.¹⁹Aning nynh ei lan khyh,sia mah sia lan khyh,hum ccungccaw nynh sanmahlaanpi kya a roi thae lan khyh.²⁰Byading kha taenaw kalana thuakhae makhia aning nynha vaemaw umpaw phaeku khakhya lan khyh zahvyavya chihpaw maeekhua khathe lan khyh.²¹Amaw min khaZenta hae nynha doliakuh cih hae,” a ci.Jesu te Beelzebul (Mar 3.20-30; Luk 11.14-23)

²²Te raerangsaro a bahku keiccuze a mitmoh zah bya a ho kho leipaw lu kheit kha Jesu kalan oun thuakhae hae zah a dansah. Tetuh bya a ho kho leipaw tuh byaho zah ngaw a muih vae.²³Ccungccaw zapi balyn tuh mih ngaeangthua zah, “E paw hynh David Ccapaw thua vema?” a ci hae.²⁴Thuasalama Farasi hae nynh he a thae hae tuh, “E paw nynh raerangsaro hae a dee khopaw hynh raerangsaro hae bawipaw Beelzebul liate nynh thua,” a ci hae.²⁵Jesu nynh mih tuanaw kha nyh zah minmin kha, “Amaw te amaw kha rawsekuh zah aphiakuhpaw peenaw miakaw tuh aroh cih; te amaw te amaw kha rawsekuh zah aphiakuhpaw khuapi thuasah, innbyn thuasah tyn kho lan khyh.²⁶Satan nynh Satan kha a dee lanze, aning tuh amaw te amaw a rawsekuhpaw te a phiakuhpaw nynh thua; pawtemou a peenaw tuh atyn kho cih?²⁷Kae nynh Beelzebul liate raerangsaro hae kha ka dee ze, nae ccungccaw hae nynh hum liate mou minmin kha a dee hae? Tukeiccuze minmin tuh nanning bya ae piatu oh athua cih hae.²⁸Thuasalama kae nynh Pachia Muisaw liate raerangsaro hae kha ka dee ze, Pachia peenaw tuh nae kya a thua ccaccing vae.²⁹Tuhkhyhze ccungccaw lu kheit nynh a thawsaepaw lu kheit kha a khiide ty leite, pawcihtemou tuh-e paw inn lungkhu lang a tee kho cih zah a uccaw hae kha a lua kho cih? A khiide ty ze nynh a inn kha a lua kho cih.³⁰Humhung zemah ka kalan a pan leipaw tuh kae yn rawsepaw nynh thua; ka kalan a sueluakuh bua leipaw tuh a phiakuhpaw nynh thua.³¹Tukeiccuze kae hopya oh, seinaw miakaw te Pachia saryapaw bya hanlan ccungccaw hae tuh ngaethya athua cih hae; thuasalama Thyaa Muisaw saryapaw bya a hopaw ccungccaw hae tuh ngaethya thua lan khyh hae.³²Ccungccaw Ccapaw kha rawsete bya a hopaw miakaw tuh ngaethya athua cih, thuasalama Thyaa Muisaw kha rawsete bya a hopaw tuh, atu she kya mah, malang she kya mah ngaethya thua lan khyh.

³³“Thingku kha ahoy lan rae lah athae ahoy cih, tuhkhyhze ahoy lei lan rae lah athae hoy lan khyh, pawccecize thingku tuh athae liate ny athua.³⁴Pou huparepaw ciihan hae! Nanning tuh na hoy lei oh pite ahoypaw uccaw hae kong kha pawtemou na ho kho cih oh? Pawccecize thinlung kya phe beihpaw kha nynh munglae nynh leih a ho.³⁵Ccungccaw hoypaw nynh thinlung kya-e ahoypaw sisua bawng kya-e ahoypaw uccaw hae kha yn poukhae; te ahoy leipaw ccungccaw nynh ahoy leipaw sisua bawng kya-e ahoy leipaw uccaw hae kha yn poukhae.³⁶Nanning kae hopya oh, raeringku leite bya na ho oh paw miakaw hanlan byapianaw nin kya paw keiccu nynh khahte ka ho cipaw na langsakuh cih.³⁷Pawccecize na bya liate thyaaccousah na thua cih zah na bya liate seibe na thua cih,” a cipya hae. Jonah Muihsahnaw (Luk 11.29-32)

³⁸Te kawbya sazae hae abang te Farasi hae nynh khung hae zah, “Bawipaw, na raepaw muihsahnaw ccangkheit kae muihtua ry,” a cipya hae.³⁹Thuasalama Jesu nynh minmin kha, “Ahoy leipaw te a ohhuakuhpaw ciihan nynh tuh muihsahnaw kha leih a ngia, thuasalama profeh Jonah kya-e muihsahnaw laelan ccangpaw muihsahnaw kha langsahpya thua vae lan khyh.⁴⁰Pawccecize Jonah tuh nin thum te zi thum ngasawpi vue lungkhu a um hawte, Ccungccaw Ccapaw mah nin thum te zi thum laephi lungkhu a um cih.⁴¹Nineveh khuaccaaw hae tuh e she kya-e ccungccaw hae ryte byapianaw kya oun thadyn cih hae zah, e she kya-e ccungccaw hae kha oun seisah cih hae, pawccecize minmin tuh Jonah phunghonaw kya a ngaesikuh hae, te dotua, Jonah laeze alesae huapaw tuh hein kya mang um!⁴²Byapianaw kya Alia lang e siapharannung tuh e she kya-e ccungccaw hae ryte yn thadyn cih zah minmin kha yn seisah cih hae, pawccecize aning tuh laephi athangnaw langte Solomon hawnaw bya kha thae khylan yn thua; te dotua, Solomon laeze alesae huapaw tuh hein kya mang um! Athyaa leipaw Muisaw Kithuinaw (Luk 11.24-26)

⁴³“Athyaa leipaw muisaw nynh ccungccapaw kyate he a pou te, umnaw hmin zahku lan ramrou kalan a khiakuh, thuasalama muihkuh khyh.⁴⁴Tetuh aning nynh, ‘Ka poutawnaw ka inn lang ka ki cih,’ ci zah, he a kithui tuh tuh-e inn tuh phe la phikuh zah ccynmamyh lan a ccawnghanpaw kha a muih.⁴⁵Tetuh aning nynh cceih zah amaw laeze houh athahhua hae paw ccangpaw muisaw lu sari kha a hoeibua hae, te minmin nynh tee hae zah tuh-e paw kya a um hae; te tuh-e ccungccapaw tuh nyalang e a cyisahnaw tuh langmaw a cyisahnaw laeze houh athahhua vae. E ahoy leipaw ciihan kya mah tuh-e hawte yn cyihkuh bua cih,” a cipya hae. Jesu Vaeccaw hae Ccaccing (Mar 3.31-35; Luk 8.19-21)

⁴⁶Jesu nynh ccungccaw zapi kya bya a ho cciamang lyakhe a nung te a neitawpaw hae tuh amaw kha bya hopya lan ry hae zah atolang khe a thadyn hae.⁴⁷Te ccungccaw lu kheit nynh amaw kha, “Dotua, na nung te na neitawpaw hae tuh nang kha bya hopya lan ae ry hae zah atolang phang thadyn hae,” a cipya.⁴⁸Thuasalama Jesu nynh tuh-e bya a hopahpaw kha, “Ka nung tuh hummou? Ka neitawpaw hae tuh hum hae mou?” cite a khung.⁴⁹Te a zuitu hae kha khii hae zah, “E hae hynh ka nung te ka neitawpaw hae nynh thua hae!⁵⁰Pawccecize vaawlang umpaw ka Paaw rynaw a cyihpaw miakaw tuh ka neitawpaw, ka ccianung te ka nung nynh athua hae,” a ci. Ccacii Vuatu Tousenaw (Mar 4.1-9; Luk 8.4-8)

¹Tuin nin kyakhe Jesu tuh inn kyate pou zah rili kin khe a haung.²Myarya lungpaw ccungccaw zapi nynh amaw kalan oun sueluakuh hae keiccuze Jesu tuh kohlung lungkhu lang tee zah a haung; te ccungccaw zapi balyn tuh varang langkhe a thadyn hae.³Te Jesu nynh minmin kha tousenaw phungpaw hae te bya patae a hopya hae. A hopaw tuh: “Ngaetua oh! Ccacii vuatu lu kheit tuh ccacii vua lan a cceih.⁴Ccacii kha vua zah, ccacii abang tuh laanpi pe khe ccah zah pavaw hae nynh oun thuanua hae zah karyh a tuh hae.⁵Abang tuh laephi zya zah lungpyng alungnaw kya accah; laephi thaawkalae a ci khyh keiccuze taloi a po hae.⁶Thuasalama khuanin he yn thua tuh, tharui a saw khyh keiccuze karae arou hae.⁷Abang ccacii tuh hinpaw laku ccah zah hinpaw nynh lethin zah phang a lungde.⁸Thuasalama ccangpaw ccacii hae tuh lae hoy kya ccah hae zah abang tuh leit za kheit, abang tuh leit sung taruh, abang tuh leit sung thum avoi.⁹Thaenaw nakaring a hoipaw tuh thae sah!” a ci. Tousenaw hae Eenaw (Mar 4.10-12; Luk 8.9-10)

¹⁰Te zuitu hae nynh amaw kalan oun cceih hae zah, “Pawccemou tousenaw phungpaw hae te minmin kha na hopya hae?” cite a khia hae.¹¹Jesu nynh khung hae zah, “Pawccecize nanning tuh vaawlang peenaw kya-e byakhupaw nynaw kha pya na thua oh, thuasalama minmin tuh pya thua khyh hae.¹²Pawccecize a hoipaw ccungccaw kha pyachih athua cih zah patae a hoi cih; thuasalama a hoi leipaw ccungccaw tuh a hoi thypaw maw kha lawpya athua cih.¹³Tukeiccu nynh minmin kha tousenaw phungpaw hae te ka hopya hae; pawccecize minmin tuh a do hae zemah muih khyh hae, a ngae hae zemah thae khyh hae, thae mah thaethya khyh hae.¹⁴Te Isaiah nynh a la hopaw bya tuh minmin kya accing vae; a la hopaw tuh:‘Ngae tuh na ngae cih oh zahkharouh na thaethya lan khyh oh;do tuh na do cih oh zahkharouh na muih lan khyh oh.¹⁵Pawccecize hynh-e ccungccaw haethinlung tuh marae aping,mih nakaring tuh phe apan,kae mit te kae muih khyh ccaw citephang masi hae.Tuhkhyhze tuh mih nakaring nynh a thae cih zah,mih lung nynh a nyhthya cih,te ka kalan oun maekuh cih hae zahminmin kha phe ka dansah cih hae paw,’ a ci.

¹⁶Thuasalama nanning tuh nae mit nynh ngawmuih zah nae nakaring nynh naw a thae keiccuze lungtua hae paw nynh na thua oh.¹⁷Byaccaccing kae hopya oh, profeh hae patae te adingpaw ccungccaw hae nynh na muih oh paw uccaw hae hynh muih a ry hae zemah muihbua khyh hae; na thae oh paw hynh thae a ry hae zemah thaebua khyh hae. Ccacii Vuatu Ccaesahnaw (Mar 4.13-20; Luk 8.11-15)

¹⁸“Tukeiccuze ccacii vuatupaw tousenaw phungpaw kong hynh ngaetua oh.¹⁹Lukhakheit nynh peenaw kong hopaw bya kha he a thae tuh thaethya khyh, te mihoy leipaw nynh yn thua zah a thinlung kya vuapaw ccacii kha dae a lawpya. Tuh-e tuh laanpi pe vuapaw ccacii kha nynh thua.²⁰Lung alungnaw kya vuapaw ccacii tuh thehoypaw bya kha thae zah vaekheihmawte lungtuate a lawkuhpaw kha nynh thua.²¹Tuhzemah aning tuh tharui hoi khyh zah sosoh rou nynh atyn; thehoypaw bya keiccuze vawsawnaw te tuaasahkunaw he yn um tuh a lung palou thang.²²Hinpaw hae laku vuapaw ccacii tuh thehoypaw bya kha thae salamah laephi vawlan thinphangnaw te hoirum rynaw nynh tuh-e bya tuh phang lungde zah athae thae kho vae khyh.²³Thuasalama lae hoypaw kya vuapaw ccacii tuh thehoypaw bya kha thae zah a thaethyapaw ccungccaw nynh thua; athae kha thae zah abang tuh leit za kheit, abang tuh leit sung taruh, abang tuh leit sung thum a pousahpaw ccungccaw kha nynh thua,” a ci. Looh te Lonua Tousenaw

²⁴Jesu nynh ccangpaw tousenaw phungpaw a hopya hae paw tuh: “Vaawlang peenaw tuh a loo kya ccacii hoypaw a vuapaw ccungccaw te nynh aloku.²⁵Ccungccaw hae a i lya hae khe a rhawpaw nynh yn cceih zah looh hae kyakhe lonua mung hae kha vua zah a cciataw.²⁶Thuasalama looh tuh yn po zah avui he yn pou tuh lonua hae mah oun langkuh bua hae.²⁷Tukeiccuze inn hoitu a see hae nynh a kalan oun cceih hae zah, ‘Bawipaw, na loo kya ccacii hoypaw khaw na vua? Paw kyate mou lonua hae hynh oun pou hae?’ cite a khia hae.²⁸Tuh-e paw nynh, ‘Rhaw lu kheit nynh e hynh a cyih,’ a cipya hae. See hae nynh, ‘Tuhteze kaening nynh kae la ccianua sah lah, lonua hae kha kae la khaee ze na ry tou?’ a ci hae.²⁹Thuasalama aning nynh, ‘Tuhte thua khyh, lonua hae na khaee lya oh khe, looh kha na khaeebia sei cih oh.³⁰Loohrue ccyh azaw makhia pynkheihlan lekheih hin hae sah; loohrue ccyh kya loohruetu hae kha, Nanning nynh lonua hae kha khaee ty oh lah maee te soi khylan tung oh, te looh kha ka byng lungkhu lang ruin oh,’ ka cipah cih hae,” a cipya hae. Mungngia Cii Tousenaw (Mar 4.30-32; Luk 13.18-19)

³¹Jesu nynh ccangpaw tousenaw phungpaw a hopya hae paw tuh: “Vaawlang peenaw tuh ccungccapaw lu kheit nynh mungngia cii kha lah zah a loo kya a vuapaw te nynh aloku.³²Mungngia cii tuh ccacii hae balyn kyaze adih huapaw nynh thua; thuasalama tuh-e nynh he yn le vae tetuh enaw-eho hae lakuze ale huapaw lang te thingku lang phe a tang; te vaawlang e pavaw hae nynh oun zou hae zah tuh-e aran hae kyakhe bu a luaku hae,” a ci. Ransi Tousenaw (Luk 13.20-21)

³³Ccangpaw tousenaw phungpaw a hopya hae paw tuh: “Vaawlang peenaw tuh ransi te nynh aloku; nopi lu kheit nynh ransi kha lah zah vaepoi ke kethum kya phing zah, tuh-e vaepoi phe a thosahpaw ransi te nynh aloku,” a ci.

³⁴E akonglang hae balyn hynh Jesu nynh ccungccaw zapi kha tousenaw phungpaw hae te a hopya hae; tousenaw phungpaw leite minmin kha bya hopah khyh hae.³⁵Tuh-e tuh profeh nynh,“Ka khalang ka aw cih zahtousenaw phungpaw hae khaka ho cih, laephi tho takaw kyatethuruhpaw uccaw hae khaka ho cih,”cite a hopaw bya accing nawlan nynh thua. Lonua Tousenaw Ccaesahnaw

³⁶Jesu nynh ccungccaw zapi kha cciataw hae zah inn lungkhu lang a tee; a zuitu hae nynh amaw kalan oun thua hae zah, “Loo kya-e lonua hae tousenaw phungpaw kong kha asuilan beih oun hopya tua,” a cipya hae.³⁷Jesu nynh, “Ccacii hoypaw a vuatupaw tuh Ccungccaw Ccapaw nynh thua.³⁸Loo tuh laephi nynh thua; ccacii hoypaw tuh peenaw ccaaw hae nynh thua; lonua hae tuh mihoy leipaw ccaaw hae nynh thua.³⁹Tuh-e lonua mung hae a vuapaw rhaw tuh Satan nynh thua; loohrue ccyh tuh laephi she athangnaw nynh thua; te loohruetu hae tuh vaaw hae nynh thua hae.⁴⁰Tukeiccuze lonua hae tuh suelua hae zah maee kya a soi hae hawte laephi she athangnaw kya acyikuh bua cih.⁴¹Ccungccaw Ccapaw nynh a vaawccungccaw hae kha yn saw cih hae zah ccungccaw seinaw a raesah hae paw te hoyleinaw a rae hae paw balyn kha a peenaw kyate oun suelua cih hae.⁴²Te minmin kha maeephupi lungkhu lang a phung cih hae, tuin kya rawkhuinaw te hawzynaw a um cih.⁴³Te adingpaw ccungccaw hae tuh mih Paaw peenaw kya khuanin hawte a paw vae cih hae. Thaenaw nakaring a hoipaw tuh thae sah! Thurupaw Sisua Tousenaw

⁴⁴“Te vaawlang peenaw tuh loo kya thuruhpaw sisua te nynh aloku; tuh-e tuh ccungccapaw nynh he a muih tuh zya a thuruh, te tuh-e elang lungtuanaw te cceih zah a hoipaw balyn kha zua zah tuh-e loo tuh a re. Palee Tousenaw

⁴⁵“Vaawlang peenaw tuh myarya ahoypaw palee hae a ccungkuhpaw kungkupaw te nynh aloku.⁴⁶Tuh-e paw nynh myarya aphutepaw palee kha he a muih tuh, cceih zah a hoipaw balyn kha zua zah tuh-e palee tuh a re. Mia te Ngasaw Tousenaw

⁴⁷“Te vaawlang peenaw tuh: rili lungkhu lang vua hae zah ngasaw aphuinphuin a kyngpaw mia te nynh aloku.⁴⁸Ngasaw te he abeih tuh ngasaw kyngtu hae nynh mia kha varang langkhe a sue hae, te haung hae zah ahoypaw ngasaw hae kha shua lungkhu lang sang hae zah ahoy leipaw kha a vua hae.⁴⁹Tuh-e hawte laephi she athangnaw kya athua cih; vaaw hae nynh oun rung cih hae zah ccungccaw hoylei hae paw kha miding hae laku kyate thoh a phia cih hae.⁵⁰Minmin kha maeephupi lungkhu lang a vua cih hae; tuin kya rawkhuinaw te hawzynaw a um cih,” a ci.

⁵¹Jesu nynh, “E bya hae balyn hynh na thaethya oh tou?” cite zuitu hae kha a khia hae. Minmin nynh, “Kae thaethya,” a ci hae.⁵²Te Jesu nynh, “Tukeiccuze vaawlang peenaw kong ccangpya athua vae paw kawbya sazae miakaw tuh amaw a sisua bawng lungkhu te athawpaw te arynpaw uccaw hae yn thuakhaepaw inn hoitupaw te nynh aloku,” a cipya hae.⁵³Jesu nynh tuh-e tousenaw phungpaw hae kha he a ho koute tuin kyate a pou. Nazareth kya Jesu A Vua hae (Mar 6.1-6; Luk 4.16-30)

⁵⁴Te amaw a khua lang he a thua tuh a khuaccaaw hae kha mih sinakok kyakhe a ccangpya hae; minmin tuh myarya mih ngaeangthua zah, “E paw nynh paw kyate mou hynh-e hawnaw te e ngaeangnaw rae khonaw hynh a mue?⁵⁵E paw tuh lehccamapaw ccapaw thua khyh tou? A nung tuh Mary ci hae paw thua khyh tou? A neitaw hae tuh James, Joses, Simon te Judas thua khyh hae tou?⁵⁶Te a ccianung hae tuh mih balynte aening ryte a um hae paw kha thua khyh tou? Tuhteze paw kyate mou e paw nynh e uccaw hae balyn hynh a mue?” a ci hae.⁵⁷Tuhcite minmin nynh amaw kha a vua hae. Thuasalama Jesu nynh minmin kha, “Profeh hae tuh mimaw khua te mih innbyn kya holeite tuh sawtua leite um khyh hae,” a cipya hae.⁵⁸Minmin nynh a zyn khyh hae keiccuze Jesu nynh tuin kya ngaeangnaw patae rae khyh. Baptisma Pyatu Johan Chinaw (Mar 6.14-29; Luk 9.7-9)

¹Tuh-e ccyh lyakhe Galilee ram uktupaw Herod nynh Jesu thongpang kha thae zah,²a ryalawpatu hae kha, “E paw hynh Baptisma pyatu Johan thua zah chinaw kyate yn hiinthuipaw nynh athua cih; tukeiccu nynh e ngaeangnaw hae hynh a rae kho,” a cipya hae.³Pawccecize Herod nynh a neitaw Filip zu Herodias keiccuze Johan kha kyng zah a he koute thonginn kya a saw.⁴Pawccecize Johan nynh Herod kha, “Herodias kha na dyku lan ccan khyh,” a la cipya.⁵Aning nynh Johan kha chia lan a ry zemah ccungccaw zapi raw kha a rih. Pawccecize minmin nynh Johan kha profeh lu kheit hawte a tua hae paw nynh thua.⁶Herod a pui nin khe Herodias ccanung nynh ccungccaw hae malang khe he yn law tuh Herod kha a lungrythuasah.⁷Tukeiccuze Herod nynh tuh-e nung kyakhe, “Nae ngiakupaw miakaw kae pya cih,” cite thyalawkute bya a kinpyaku.⁸Te a nung nynh a hopya thyhte, tuh-e nung nynh, “Baptisma pyatu Johan lu kha pakephepaw te hynhlang hin yn pya,” a ci.⁹Siapharan tuh a ngaethah; tuhzemah thyalawkupaw keiccu te a ko hae paw ccungccaw hae keiccuze tuh-e nung nynh a rypaw kha raepya lan kaw a pya hae.¹⁰Tukeiccuze thonginn lungkhu e Johan lu kha a paesah hae.¹¹Johan lu kha pakephepaw te oun ccyng hae zah nopinung taraw kha a pya hae, te aning nynh tuh-e tuh a nung kalan a ccyng.¹²Johan zuitu hae oun thua hae zah a rhua kha lah hae zah a ccy hae, te cceih hae zah Jesu kha a hopya hae. Thong Pangaw Looh A Dang hae (Mar 6.30-44; Luk 9.10-17; Joh 6.1-14)

¹³Jesu nynh Johan kong he a thae tuh tuin kyate a makhaete ramkaw lang kohlung te a cceih; ccungccaw hae nynh tuh-e tuh he a thae hae tuh khua kyate mih ccu te amaw kha a zui hae.¹⁴Jesu tuh varang lang thua zah ccungccaw zapi kha he a muih tuh, ngaethyaumsah hae zah mih ngeccih hae kha a dansah hae.¹⁵Zete he yn thua tuh a zuitu hae nynh amaw kalan oun thua hae zah, “E kya tuh ramkaw thua zah khuanin phe anae vae, tukeiccuze ccungccaw zapi hynh saw hae lah khua hae kalan la cceih hae sah lah, looh la rekuh hae sah,” cite a hopya hae.¹⁶Thuasalama Jesu nynh, “Cceih nan hae sah, nanning nynh minmin kha ae lanpaw hankhakheit khangpah oh,” a cipya hae.¹⁷Minmin nynh, “E kya sanlou phe pangaw te ngasaw zaw ning rou nynh kae hoi,” a cipya hae.¹⁸Jesu nynh, “Tuh-e tuh hynhlang ka kalan oun ccyng oh,” a ci.¹⁹Te ccungccaw zapi kha lonua vawlan haung lan kaw a pya hae, te sanlou phe pangaw te ngasaw zaw ning kha lah zah vaawlang dothung zah lungtuabya a ho, te eih zah sanlou kha zuitu hae a pya hae, te zuitu hae nynh ccungccaw zapi kha a nee hae.²⁰Mih balyn te ae hae zah phe byn hae; te alaepaw a eihpaw kha khuin hae zah kee haw lae ning phe abeih.²¹Tuh-e a ae hae paw tuh nopi hae te imua hae riabia leite pise ccite thong pangaw loukaw acih hae. Jesu Tui vawlan A Cceih (Mar 6.45-52; Joh 6.15-21)

²²Jesu nynh ccungccaw zapi a cciasah lya hae khe, zuitu hae kha kohlung kalan palou teesah hae zah rili khuraw lang a cciasah lalo hae.²³Te ccungccaw zapi kha he a cciasah kou hae te, a makhaete sawsang lan mua vawlan a kaethung; khuanin nae cia tuin kya a makhaete a um.²⁴Varang te asawnaw lang a thua vae paw kohlung tuh khise yn tho keiccuze tuileih nynh vyavya a buleih.²⁵Khuadae dyn khe Jesu tuh rili vawlan khe zuitu hae kalan a cceih.²⁶Te zuitu hae nynh amaw rili vawlan yn cciapaw kha he a muih hae tuh siikuh hae zah, “Muisaw nynh thua!” a ci hae; te minmin tuh a ri hae keiccuze thawte a sia hae.²⁷Thuasalama Jesu nynh minmin kha hopah kangmaw hae zah , “Nae thinphang nan sah, kamaw nynh ka thua, rih nan oh,” a cipya hae. Zynnaw Zyapaw

²⁸Tetuh Peter nynh, “Bawipaw, namaw na thua ze, tui vawlan te na kalan ccianaw kaw beih yn pya,” a cipya.²⁹Te Jesu nynh, “Rang,” a cipya. Tukeiccuze Peter tuh kohlung kyate sahkuh zah tui vawlan te Jesu kalan a cceih.³⁰Thuasalama khisan arupaw kha he a muih tuh a rih vae, te tui lungkhu lang he yn ccahbung zah, “Bawipaw, yn khum!” cite a sia.³¹Jesu nynh vaekheihmawte a kuih kha dyng zah a kyng koute, “Na zynnaw eih zya kaesy! Pawccemou na lung ahiin?” a cipya.³²Minmin nynh kohlung lungkhu lang he oun thua hae tuh khisan phe adae.³³Te kohlung kya a um hae paw nynh oun cceih hae zah, “Nang tuh Pachia Ccapaw ccaccing nynh na thua,” ci hae zah amaw kha a beik hae. Genesaret kya A Dansah hae (Mar 6.53-56)

³⁴Minmin nynh khuraw lang zua hae zah Genesaret ram a thua hae.³⁵Tuin kya-e ccungccaw hae nynh amaw kha he a nyh hae tuh tuin pepan balyn kalan khe byataw hae zah ngeccih hae balyn kha amaw kalan oun cciakhae hae.³⁶Te minmin nynh a boei dung sankaw hae lan amaw kha a ngiaku hae; te a hae paw miakaw tuh marya a dan hae. Anungsikuhpaw Uccaw hae (Mar 7.1-23)

¹Te Jerusalem khua e kawbya sazae hae te Farasi hae tuh Jesu kalan oun thua hae zah,²“Pawccemou na zuitu hae nynh langmaw e piccan hae phung kha a lawe hae? Pawccecize minmin nynh looh a ae maw hae mih kuih singkuh khyh hae,” a cipya hae.³Jesu nynh minmin kha, “Pawccemou nanning so nae phung keiccuze Pachia kawbya kha na lawe oh?⁴Pawccecize Pachia nynh, ‘Na paaw te na nung kha sawtua hae; humhung zemah a nung thuasah, a paaw thuasah thya a lawpaw tuh chia thua sah,’ a ci.⁵Thuasalama nanning nynh, humhung zemah a paaw thuasah, a nung thuasah, ‘Pawpaw zemah kamaw liate na mue lanpaw bawmnaw tuh Pachia uccaw nynh thua,’ a ci ze,⁶a paaw thuasah, a nung thuasah sawtua ho vae khyh, na ci oh. Tuhcite naemaw phung keiccuze Pachia bya kha pawlang na ria khyh oh.⁷Thyaphe hae! Nanning konglang hynh Isaiah nynh hmerarih lan a la hoty vae. A hopaw tuh:⁸‘E ccungccaw hae nynhmih munglae te saw oun tua hae;thuasalama mih thinlung tuhka kyate asawkuh.⁹Ccungccaw phung khaPachia phung langa ccangpya hae keiccuzekae yn beik hae paw tuhaccakaepaw nynh thua,’ a ci,” cite a hopya hae.

¹⁰Te Jesu nynh ccungccaw zapi kha ko hae zah, “Ngae oh lah thaethya oh:¹¹Khalang lungkhu lang a teepaw nynh ccungccaw kha thusah khyh; thuasalama khalang kyate yn poupaw nynh ccungccaw kha a thusah,” a cipya hae.¹²Te a zuitu hae nynh a kalan oun naekuh hae zah, “Na hopaw bya he a thae hae te, Farasi hae tuh mih thinria cipaw na nyh tou?” a cipya hae.¹³Thuasalama Jesu nynh, “Vaawlang umpaw ka Paaw nynh a lin leipaw aku miakaw tuh marya khaee athua cih.¹⁴Minmin tuh khamawte um hae sah; minmin tuh mitmoh hae a cciakhaetu hae mitmoh hae nynh thua hae. Te mitmohpaw nynh mitmohpaw kha a cciakhae ze parouhte hunghua lungkhu lang a ccah cih hae,” a ci.¹⁵Peter nynh, “E tousenaw phungpaw hynh kaening oun ccaesahpya tua,” a cipya.¹⁶Jesu nynh, “Nanning so thaethya leite tou na um ung oh?¹⁷Khalang lungkhu lang a teepaw miakaw tuh vue lungkhu lang cceih zah atolang po a toikuh cipaw na nyh khyh oh tou?¹⁸Thuasalama khalang lungkhu te yn poupaw uccaw tuh thinlung kyate yn poupaw thua zah, tuh-e nynh ccungccaw kha a thusah.¹⁹Pawccecize ahoy leipaw tuanaw hae, ccungccaw chianaw, milae zu milae vawpaw seikhaenaw, ohhuakunaw, ahme leipaw ccaekiakhannaw, runaw te milae thethya honaw tuh thinlung kyate nynh yn pou.²⁰E uccaw hae hynh nynh ccungccaw kha a thusah; thuasalama kuih singku leite aepaw nynh tuh ccungccaw kha thusah khyh,” a ci. Kanaan Nopinung Zynnaw (Mar 7.24-30)

²¹Te Jesu tuh tuin kyate pou zah Tair te Sidon ram lang a cceih.²²Tuin ram kya umpaw Kanaan nopinung lu kheit nynh yn thua zah, “Pou Bawipaw, David Ccapaw, kae hynh ngaethya yn umsah; ka ccanung tuh raerangsaro nynh vawsawnaw myarya a pya,” cite a sia.²³Thuasalama Jesu nynh bya kaw kheit san khung khyh. A zuitu hae nynh a kalan oun cceih hae zah, “E nung hynh po dee, pawccecize ah nulang te oun zui zah palei a sia,” cite a ngia hae.²⁴Jesu nynh, “Israel hae kyaze azopaw tuu hae kalan rou nynh kae hynh yn saw,” a ci.²⁵Te tuh-e nung nynh yn cceih zah a malang bakhung zah, “Bawipaw, beih yn bawm!” a cipya.²⁶Jesu nynh, “Ccaaw hae looh kha law lan zah ui hae kha vuapya lan ccan khyh,” a cipya.²⁷Te tuh-e nung nynh, “Bawipaw, na hopaw tuh ahme, tuhzemah ui hae nynh mih bawi hae ccaboi kyate accahpaw loohmoi kha a ae hae khaw,” a ci.²⁸Tetuh Jesu nynh, “Pou nopinung, na zynnaw tuh ale raria! Na ry hawte na kya cyihkuh sah,” a cipya. A ccanung tuh tuin ccyh kyate phe dan vae. Ccungccaw Patae A dan hae

²⁹Jesu tuh tuin kyate cceih zah Galilee Rili pe lang a thua; te mua langkhe kaethung zah tuin kya a haung.³⁰Te myarya lungpaw ccungccaw zapi nynh a mitmohpaw, a ccukhoupaw, byaho kho leipaw, a kuihccu khyn leipaw te ccangpaw ngeccih patae kha oun thuakhae hae zah Jesu cculeihpaw khe a nung hae, te Jesu nynh minmin kha a dansah hae.³¹Tuhcite byaho kho leipaw nynh bya yn ho, kuihccu khyn leipaw nynh yn dan, ccukhoupaw nynh laanpi cceih zah mitmohpaw nynh ngaw a muihpaw kha ccungccaw zapi nynh he a muih hae tuh mih ngaeangthua; te minmin nynh Israel Pachia kha a phu-esah hae. Thong Pali Looh A Dang hae (Mar 8.1-10)

³²Jesu nynh a zuitu hae kha amaw kalan ko hae zah, “Ccungccaw zapi hynh thaw ka ccih hae, pawccecize minmin tuh kamaw kya nin thum um vae hae zah ae lanpaw hoi vae khyh hae, minmin hynh ae leite ka cciasah ry khyh hae, tuhte cciasah lan hae ze laanpi kya a bawsei cih hae,” a cipya hae.³³A zuitu hae nynh, “Hynhzeih ccungccaw zapi dang lanpaw looh tuh phe zaw lan ramkaw kyahin paw kyate mou kae mue cih?” a ci hae.³⁴Jesu nynh minmin kha, “Sanlou hohzeihmou na hoi oh?” cite khia hae zah minmin nynh, “Phe sari te ngasaw taraw beihtaraw nynh kae hoi,” a ci hae.³⁵Tetuh Jesu nynh ccungccaw zapi kha laekhu kya haung lan kaw a pya hae.³⁶Te aning nynh sanlou phe sari te ngasaw hae kha lah zah lungtuabya a ho koute tuh-e hae tuh eih zah a zuitu hae kha a pya hae, te zuitu hae nynh ccungccaw zapi kha a nee hae.³⁷Mih balynte ae hae zah a byn hae; minmin nynh a eihpaw alaepaw kha khuin hae zah kee sari phe abeih.³⁸A aepaw tuh nopi hae te imua hae riabia leite pise hae thong pali acih hae.³⁹Jesu nynh ccungccaw zapi kha a cciasah kou hae te kohlung kha ccikuh zah Magadan ram lang a cceih. Muihsahnaw A Ngiaku hae (Mar 8.11-13; Luk 12.54-56)

¹Farasi hae te Sadusi hae nynh oun thua hae zah Jesu kha syntawtua khylan, vaawlang e muihsahnaw kha minmin kya langsahpya lan a ngia hae.²Jesu nynh, “Zete ccyh kya nanning nynh, ‘Vaawlui ase ze khuaa ahoy cih,’ na ci oh.³Te awkhua ccyh kya, ‘Vaawlui se zah mae-ui keiccuze atunin tuh khuaarah cih,’ na ci oh. Nanning nynh vaawlui kha dote khuaa nincce kha na ny kho oh; thuasalama accyh muihsahnaw tuh na nyh kho khyh oh.⁴Ahoy leipaw te a ohhuakuhpaw ciihan nynh muihsahnaw kha a ngia hae zemah profeh Jonah kya-e muihsahnaw laelan pawpaw muihsahnaw mah langsahpya thua vae lan khyh,” a ci. Te minmin kha po a cciataw vae hae. Farasi hae te Sadusi hae Ransi (Mar 8.14-21)

⁵Te a zuitu hae nynh khuraw lang he a thua hae tuh sanlou phuku lanpaw kha phe a ning hae.⁶Jesu nynh minmin kha, “Farasi hae te Sadusi hae ransi kha raeringkute la sibia oh,” a cipya hae.⁷Minmin nynh, “Aening nynh sanlou ah phuku khyh oh keiccu nynh e bya hynh a ho,” cite mimaw te mimaw a hoku hae.⁸Jesu nynh tuh-e tuh he a nyh te, minmin kha, “Zynnaw a zyn hae paw nanning, pawccemou sanlou na hoi khyh oh paw tuh palei na ho oh?⁹Na thaethya loh khyh oh tou? Sanlou phe pangaw kha ccungccaw thong pangaw nynh ae hae zah kee hohzeihmou na khuin oh cipaw na nyh vae khyh oh tou?¹⁰Sanlou phe sari kha ccungccaw thong pali nynh ae hae zah kee hohzeihmou na khuin oh cipaw so na nyh vae khyh oh tou?¹¹Kae hopya oh paw hynh sanlou kong thua khyh cipaw kha pawccemou na thaethya khyh oh? Farasi hae te Sadusi hae ransi kha raeringkuh oh!” a cipya hae.¹²Tetuh zuitu hae nynh sanlou kya-e ransi kha raeringku lan oun hopya rypaw thua leite, Farasi hae te Sadusi hae ccangpyanaw kong nynh oun hopya ry cipaw kha a thaethya vae hae. Peter nynh Jesu Kong Phynaw (Mar 8.27-30; Luk 9.18-21)

¹³Jesu tuh Sisaria Filipi ram lang he a thua te a zuitu hae kyakhe, “Ccungccaw hae nynh Ccungccaw Ccapaw kae hynh hum yn ci hae mou?” cite a khia hae.¹⁴Minmin nynh, “Ccungccaw abang nynh Baptisma pyatu Johan ae ci hae; abang nynh Elijah ae ci hae; abang nynh Jeremiah khyhze profeh lukhakheit nynh thua ae ci hae,” cite a khung hae.¹⁵Jesu nynh minmin kha, “Nanning nynh so kae hynh hum nae ci oh mou?” cite a khia hae.¹⁶Simon Peter nynh, “Nang tuh a hiinpaw Pachia Ccapaw Messiah nynh na thua,” a ci.¹⁷Tetuh Jesu nynh, “Johan ccapaw Simon, nang tuh hythua a ccoupaw nynh na thua! Pawccecize chii te saw nynh e hynh nang ae phypyapaw thua khyh, vaawlang umpaw ka Paaw nynh ae phypyapaw nynh thua.¹⁸Te nang tuh Peter nynh na thua cipaw kha kae hopya; e lungtung vawlan hin ka khriccaawbuu kha ka thadynsah cih zah, Michi khua e koikua hae nynh tae kho lan khyh.¹⁹Vaawlang peenaw toh hae kha nang kae pya cih; nang nynh laephi vawlan na khiidepaw miakaw tuh vaawlang zemah khiide athua cih; te laephi vawlan na supyapaw miakaw tuh vaawlang zemah supya athua cih,” a cipya.²⁰Te Jesu nynh a zuitu hae kha aning tuh Messiah nynh thua cite humhung kya mah a hopya khyh nawlan hae tynkaring lan kaw a pya hae. A Chi lanpaw A Hoty (Mar 8.31—9.1; Luk 9.22-27)

²¹Tuin ccyh kyate Jesu nynh Jerusalem lang a ccia lanpaw, piccan hae, ranpibawi lepaw hae te kawbya sazae hae kuih kya patae a teing lanpaw, a chia lan hae paw, te nin thumnaw kya a thoothui lanpaw kong kha a zuitu hae kya a langsahpya hae.²²Peter nynh Jesu kha ccanglang cciakhae zah, “Bawipaw, tuh-e tuh Pachia nynh khee vae sah; na tungvaw kya tuh-e tuh cyihkuh nan sah!” cite a hopya.²³Thuasalama Jesu nynh Peter kha maenuakuh zah, “Satan, ka nulang cceih! Nang tuh kae yn khawtu nynh na thua; pawccecize na tuanaw hynh Pachia kyate yn thuapaw thua khyh, ccungccaw kyate yn thuapaw nynh thua,” a cipya.

²⁴Jesu nynh a zuitu hae kha, “Lukhakheit nynh kae kha yn zui ry ze amaw te amaw kha vuakuh sah lah a vaelantung kha puihkute yn zui sah.²⁵Pawccecize humhung zemah a hiinnaw kha a khumkuh rypaw tuh a hiinnaw kha a shung cih; thuasalama humhung zemah a hiinnaw kha kae ka keiccuze a shungpaw tuh a hiinnaw kha a mue cih.²⁶Pawccecize ccungccaw lu kheit nynh laephi pynpi hynh pong a ccou zeso a hiinnaw kha a shung ze, a hanlan pawmou athane? Tuhkhyhze a hiinnaw kha paw uccaw te mou a shawkhawkuh kho cih?

²⁷“Pawccecize Ccungccaw Ccapaw tuh a Paaw phu-enaw kya a vaawccungccaw hae ryte yn thua cih; ccungccaw miakaw kha mih ryalawnaw thyhte ryalaw mee oun pya cih hae.²⁸Byaccaccing kae hopya oh, Ccungccaw Ccapaw nynh a peenaw te yn thuapaw kha a muih hae cia a chih cih lei hae paw abang tuh hein kya a thadyn hae,” cite a hopya hae. Jesu Muinsan Rulaekunaw (Mar 9.2-13; Luk 9.28-36)

¹Nin taruh acih koute Jesu nynh Peter, James te a neitaw Johan kha hoeibua hae zah mih makhaete ahangpaw mua lang a kae hae.²Mih malang khe Jesu tuh a muinsan yn rulaekuh; a mae tuh khuanin hawte phaephae ak zah a boeining tuh lahlah ak lan araw.³Moses te Elijah tuh vaekheihmawte mih kya oun langkuh hae zah Jesu ryte bya a hokuh hae.⁴Tetuh Peter nynh Jesu kha, “Bawipaw, hein kya um tuh ah hanlan ahoy, na ry ze hein kya kae nynh bu buthum kae sak sah, nang na hanlan bu kheit, Moses hanlan bu kheit, Elijah hanlan bu kheit,” a cipya.⁵Tuhte a ho cciamang lyakhe a awpaw maeking nynh minmin kha pong zithin hae zah maeking kyate roi nynh, “E paw tuh ka lungry kou yn tungpaw, ka sungsahpaw ka Ccapaw nynh thua, amaw bya kha la ngae oh!” a ci.⁶Zuitu hae nynh tuh-e roi tuh he a thae hae te, myarya rih hae zah a bakhung hae.⁷Jesu nynh yn cceih zah minmin kha hae hae zah, “Thokuh oh, rih nan oh,” a cipya hae.⁸Minmin nynh he a dothung hae tuh Jesu kyalya muih hae zah tuhlaepaw hum sanmah muih vae khyh hae.

⁹Minmin nynh mua kyate oun rungbung lya hae khe Jesu nynh, “Ccungccaw Ccapaw tuh a chih hae paw kyate a thoothui mawlaezung na muih oh paw vizin hynh hum kya sanmah la ho nan oh,” cite zuitu hae kha kaw a pya hae.¹⁰Zuitu hae nynh Jesu kha, “Pawccemou kawbya sazae hae nynh Elijah tuh yn thuaty cih a ci hae?” cite a khia hae.¹¹Jesu nynh, “Elijah tuh yn thuaty ccaccing cih zah pawpaw balyn kha a paccyn ty cih.¹²Thuasalama kae hopya oh, Elijah tuh phe thua vae, tuhzemah ccungccaw hae nynh amaw kha nyh khyh hae zah, a tungvaw mih rythyte a cyi hae. Tuhawte Ccungccaw Ccapaw mah minmin kuih kya yn teingbua cih,” a cipya hae.¹³Tetuh zuitu hae nynh Baptisma pyatu Johan kong nynh a ho cipaw a thaethya vae hae. Imuapaw A Dansah (Mar 9.14-29; Luk 9.37-43)

¹⁴Ccungccaw zapi kya he a thua hae te, ccungccapaw lu kheit tuh Jesu kalan yn thua zah a malang khe a ccukharutung zah,¹⁵“Bawipaw, ka ccapaw hynh ngaethya beih umsah, pawccecize aning tuh dungpaw ccinaw hoi zah myarya a teing; accyhccyh vae ze maee lungkhu lang phungkuh zah accyhccyh vae ze tui lungkhu lang a phungkuh.¹⁶Na zuitu hae kalan ka cciakhae zahmah dansah kho khyh hae,” a cipya.¹⁷Jesu nynh, “Pou zynnaw hoi lei hae paw te a ccouseikuh hae paw ciihan hae, hohseciamou nae kya ka um ung cih? Hohseciamou kae ngaesangpah ung cih oh? Imuapaw kha ka kalan oun cciakhae oh,” a cipya hae.¹⁸Jesu nynh raerangsaro kha kawpya zah imuapaw lungkhu te a pou; te imuapaw tuh tuin ccyh kyate palou a dan vae.¹⁹Tetuh zuitu hae nynh mih makhaete Jesu kalan oun cceih hae zah, “Pawccemou raerangsaro kha kae dee kho khyh?” cite a khia hae.²⁰Te Jesu nynh, “Nae zynnaw azya keiccu nynh thua. Pawccecize byaccaccing kae hopya oh, mungngia mung cia zynnaw na hoi oh zetuh e mua hynh, ‘E kyate khuhlang khuin nuekuh,’ na ci oh ze a nuekuh cih; na cyi kho lei oh paw pawpaw mah um lan khyh.²¹Tuhzemah e tahawpaw raerangsaro tuh looh-ae sungnaw te sawsangnaw kyalya nynh a dee kho,” a cipya hae. A Chi lanpaw Bua A Hoty (Mar 9.30-32; Luk 9.44-45)

²²Galilee kya zuitu hae ryte a umkheih lya hae khe Jesu nynh, “Ccungccaw Ccapaw tuh ccungccaw hae kuih kalan apnaw ccyh anae vae,²³minmin nynh oun theih cih hae zah nin thumnaw kya yn thoothui cih,” a cipya hae. Minmin tuh myaryamaw mih ngaethah. Beikinn Ngunto Khoinaw

²⁴Minmin Kapernaum khua he a thua hae tuh beikinn ngunto a khoi hae paw nynh Peter kalan oun thua hae zah, “Nae sazaepaw hynh beikinn ngunto pya khyh tou?” cite a khia hae.²⁵Peter nynh, “A pya,” a ci. Peter nynh innthung lang he yn tee tuh Jesu nynh cciadue zah, “Simon, pawtemou na tua? Laephi siapharan hae nynh hum hae kya-e mou ngunto kha a lawku hae? Mimaw mih ccaaw hae kya-e tou? Tuhkhyhze milae hae kya-e tou?” cite a khia.²⁶Peter nynh, “Milae hae kya-e nynh a lawku hae,” a ci. Jesu nynh, “Tuhteze ccaaw hae tuh a lue hae.²⁷Tuhzemah minmin tuh aening keiccuze a cyisei khyh ccaw hae, rili kalan la cceih lah ngasaw la baw, te na baw typaw ngasaw kha a khalang la kei lah phua shekel ccangkheit na la muih cih, tuh-e phua tuh la lah lah, namaw te kamaw hanlan la pya hae,” a cipya. Hummou A Lesaehua? (Mar 9.33-37; Luk 9.46-48)

¹Tuh ccyh lyakhe zuitu hae nynh Jesu kalan oun thua hae zah, “Vaawlang peenaw kya hummou a lesaehua?” cite a khia hae.²Jesu nynh imua taraw lu kheit kha a kalan ko zah minmin ngaelaku khe nung zah,³“Byaccaccing kae hopya oh, nanning nynh na rulaeku khyh oh zah imua taraw hawte na thua khyh oh ze, vaawlang peenaw lungkhu lang papin na tee lan khyh oh.⁴Tukeiccuze humhung zemah e imua hawte zakaw a sangsakuhpaw tuh vaawlang peenaw kya a lesae huapaw nynh thua.⁵Humhung zemah e tahawpaw imua lu kheit kha ka min te leh a khanpaw tuh kae kha leh yn khanpaw nynh thua. Seinaw kalan Tuhounaw (Mar 9.42-48; Luk 17.1-2)

⁶“Humhung zemah kae yn zynpaw e imua taraw lukhakheit kha seinaw a raesahpaw tuh a nging kya mianawpaw lung kha sae lan zah rili akhunaw kya phung lanze amaw hanlan ahoyhua.⁷Zynnaw kyate cciasahseinaw a um keiccuze laephi hanlan ngaethya lan kou um! Zynnaw kyate cciasahseinaw tuh solei a um cih; thuasalama tuhcite cciasahseinaw a umsahpaw hanlan ngaethya lan kou um!

⁸“Na ccu nynh thuasah, na kuih nynh thuasah ae seisah ze, thoh tya lah dae vua; ccukhou te tuhkhyhze kuihccu ccing leite hiinnaw lungkhu lang tee lanpaw tuh kuih voi ning, ccu voi ning te zungzae aruapaw maee lungkhu lang vuaku lanpaw laeze na hanlan ahoyhua.⁹Na mit nynh ae seisah ze poh khoi lah dae vua; mit voi ning te hell maee lungkhu lang vuaku laeze mit voi kheit te hiinnaw kalan teepaw tuh na hanlan ahoyhua. Tuu Azopaw Tousenaw (Luk 15.1-7)

¹⁰“E imua taraw hae hynh lu kheit sanmah na dothatheih khyh nawlan oh raeringkuh oh; pawccecize kae hopya oh, imua hae a thungkhawtu vaaw hae nynh vaawlang umpaw ka Paaw mitmae kha tyty a muih hae.¹¹Pawccecize Ccungccaw Ccapaw tuh a zopaw kha khum khylan nynh yn thua.¹²Pawtemou na tua oh? Ccungccaw lu kheit nynh tuu za kheit hoi zah tuh-e hae kyaze sa kheit tuh laanpi a vaesei ze, sung takua sa takua kha mua vawlan a cciataw cih zah tuh-e laanpi a vaepaw tuu sa kheit kha ccung khylan cceih lan khyh tou?¹³Byaccaccing kae hopya oh, tuh-e tuu kha he a muih lan thua ze, laanpi a vae lei hae paw sung takua sa takua tungvaw laeze tuh-e tuu sa kheit kya a lungtuahua.¹⁴Tuhawte vaawlang umpaw nae Paaw nynh e imua taraw hae kyaze lu kheit sanmah zosah ry khyh. A Seipaw Uno Thuiheinaw

¹⁵“Na uno nynh na tungvaw a cyisei ze, cceih lah nae makhae kyakhe a cyiseinaw kha hopah; aning nynh ae ngaepya lanze na uno kha bua na muethui.¹⁶Thuasalama aning nynh ae ngaepya khyh ze, lu kheit khyhze lu ning la hoeikuh hae, tuhteze nynh ccaekia lu ning khyhze lu thum hae liate na hopaw bya miakaw tuh atyn cih.¹⁷Aning nynh minmin bya kha a ngae khyh ze khriccaawbuu kya na ho cih; khriccaawbuu bya kha bua a ngae vae khyh ze amaw kha lawkipaw te ngunto khoipaw hawte la tua ccavae.¹⁸Byaccaccing kae hopya oh, pawpaw zemah laephi vawlan na khiide oh paw tuh vaawlang kya khiide athua cih, te pawpaw zemah laephi vawlan na supya oh paw tuh vaawlang kya supya athua cih.¹⁹Nanning kha bua kae hopya oh, laephi vawlan hin nanning kyaze ccungccaw lu ning nynh lunglokute uccaw hankhakheit kha a ngia hae ze, vaawlang umpaw ka Paaw nynh a pya cih hae.²⁰Pawccecize lu ning khyhze lu thum nynh ka min te a sueluakunaw hae kyakhe kae mah minmin kya ka umbua,” a cipya hae. Ngaethyakunaw A Hoi leipaw See

²¹Peter nynh Jesu kalan yn cceih zah, “Bawipaw, ka uno lukhakheit nynh ka tungvaw a sei ze, vae hohzeihmou ka ngaethya cih? Vae sari cia tou?” cite a khia.²²Jesu nynh, “Vae sari cia kyalya thua khyh; vae sung sari leit sari cia na ngaethya cih, kae cipya.

²³“Tukeiccuze vaawlang peenaw tuh a see hae te asekuhpaw phua ccazing a do rypaw siapharanpaw lu kheit te nynh aloku.²⁴Ccazing he a lah tuh talent thong haw laebah umpaw lu kheit kha amaw kalan oun thuakhae hae.²⁵Tuh-e paw nynh laebah sang lanpaw a hoi khyh keiccuze a bawipaw nynh amaw ry, a zu a ccaaw hae ryte a hoipaw balyn kha zua sah lah laebah kha sang sah cite kaw a pya.²⁶Tukeiccuze tuh-e see nynh bakhungte amaw kha beik zah, ‘Bawipaw, beih yn ngaethya hin, laebah tuh marya kae sang cih,’ a cipya.²⁷A bawipaw nynh ngaethya a umsah keiccuze a laebah kha ngaethya zah phe a luesah.²⁸Tuh-e see tuh po cceih zah amaw nynh denari phua za kheit laebah a umsahpaw a banpaw see lu kheit kha a muih; te tuh-e paw tuh kyng zah a lotharue kha meih zah, ‘Laebah na umpaw kha yn pya ccavae,’ a cipya.²⁹A banpaw nynh a cculeihpaw bakhung zah, ‘Yn ngaethya hin, laebah tuh marya kae sang cih,’ cite a ngiaku.³⁰Thuasalama aning nynh ngaethya ry khyh; te cceih zah lae a sang makhia thong a saw.³¹Tuhte a cyipaw tuh ccangpaw a ban hae see hae nynh he a muih hae tuh myarya mih ngaethah, te cceih hae zah acyikuhpaw balyn kha mih bawipaw kya a hopya hae.³²Tetuh a bawipaw nynh tuh-e see tuh ko zah, ‘Pou see thyapaw! Nae soihbiakuh zah na laebah balyn kha marya kae ngaethya.³³Kae nynh na tungvaw ngaethya kae umsah hawte na banpaw see tungvaw kya ngaethya na umsah lan ccan khyh tou?’ a cipya.³⁴A bawipaw tuh a thinria zah tuh-e paw nynh laebah marya a sang kou mawlaezung thong kya a saw.³⁵Tuhawte nanning nynh nae uno hae mih cyiseinaw kha nae thinlung te na ngaethya khyh oh ze vaawlang umpaw ka Paaw nynh mah tuhcite ae cyihbua cih oh,” a cipya hae. Zu Myanaw (Mar 10.1-12; Luk 16.18)

¹Jesu nynh tuh-e bya he a ho koute Galilee kyate pou zah Jordan vaw khuraw lang umpaw Judea ram kya a thua.²Ccungccaw zapi nynh amaw kha zui hae zah tuin kya minmin kha a dansah hae.

³Farasi hae abang nynh amaw kalan oun thua hae zah amaw kha syntawtua khylan, “Pisepaw nynh a zu kha pawpaw kong zemah mya lan kawbya nynh a ua tou?” cite a khia hae.⁴Te Jesu nynh, “Atakaw lyaze raetu nynh ‘pise te nopi kha a rae hae,⁵hynh-e keiccuze pise nynh a paaw te a nung kha a cciataw cih zah a zu te a umkheih cih hae, minmin lu ning tuh pyn pynkheit lang a tang cih hae,’ acikuhpaw kha na ria boi khyh oh tou?⁶Tukeiccuze minmin tuh lu ning thua vae khyh hae, pyn pynkheit nynh athua vae hae. Tukeiccuze Pachia nynh a suelua vae paw kha humhung nynh mah phia nan sah,” a ci.⁷Minmin nynh, “Tuhteze pawccemou Moses nynh zu te vaw myakunawpaw ccaw kha pya lan zah zu kha mya lan cite kaw oun pya?” a cipya hae.⁸Jesu nynh, “Nae thinlung akhung keiccuze Moses nynh nae zu hae kha mya lan ae ua oh; thuasalama atakaw lya tuh tuhte thua khyh.⁹Te kae hopya oh, humhung zemah ohhuakunaw keiccu thua leite a zu kha mah zah ccangpaw zu a hoipaw tuh milae zu a seikhaepaw nynh thua; te humhung zemah a mya hae paw nopi kha a zu lang a hoikuhpaw tuh milae zu a seikhaepaw nynh thua,” a cipya hae.

¹⁰A zuitu hae nynh, “Zu te vaw kong hynh tuhcite athua ze, zu hoi leite um lanze ahoyhua,” a cipya hae.¹¹Thuasalama Jesu nynh, “E ccangpyanaw hynh ccungccaw miakaw nynh lawkuh kho khyh hae; tuh-e tuh mih hanlan pya athua hae paw rou nynh a lawkuh kho hae.¹²Pawccecize abang tuh a pui takaw hae mawte akuchihpaw a um hae; abang tuh ccungccaw hae nynh tinria hae paw a um hae; vaawlang peenaw keiccuze mimaw te mimaw tinreihkuh hae paw a um hae. E bya hynh a lawkuh khopaw nynh lawkuh sah,” cite a hopya hae. Jesu te Imua hae (Mar 10.13-16; Luk 18.15-17)

¹³Imua hae tungvaw kya Jesu nynh a kuih khangte saw a sangpya ccaw hae cite amaw kalan oun cciakhae hae zah, a zuitu hae nynh minmin kha a pe hae.¹⁴Thuasalama Jesu nynh, “Imua hae kha ka kalan oun cceih hae sah, khee nan oh; pawccecize vaawlang peenaw tuh hynhcihawpaw ccungccaw hae elang nynh thua,” a ci.¹⁵Imua hae tungvaw kya a kuih a khang koute tuin kyate a cceih. Mihoi Ccangvaepaw (Mar 10.17-31; Luk 18.18-30)

¹⁶Ccungccapaw lu kheit nynh Jesu kalan yn thua zah, “Sazae, zungzae hiinnaw ka hoi nawlan paw uccaw hoypaw mou ka cyih cih?” cite a khia.¹⁷Jesu nynh, “Pawccemou uccaw hoypaw kong tuh nae khia? Pachia lu kheit kyalya nynh a hoypaw a um; hiinnaw lungkhu lang na tee ry zetuh kawbya hae kha la zui,” a cipya.¹⁸Aning nynh, “Paw kawbya hae kha mou?” cite a khia. Jesu nynh, “Ccungccaw na theih lan khyh, milae zu milae vawpaw kya na sei lan khyh, na ruh lan khyh, ahme leipaw ccaekia lang na tang lan khyh,¹⁹na paaw te na nung kha sawtua, na innpaw kha namaw na sungsaku hawte na sungsah cih, cikuhpaw kha,” a cipya.²⁰Ccangvaepaw nynh, “E hae balyn tuh pong ka zui vae; pawmou ka bou ung?” a cipya.²¹Jesu nynh, “Accingpaw ccungccaw lang na tang ry ze, cceih lah na hoipaw kha zua lah, ryachi hae kha la pya hae; tetuh vaawlang khua kya sisua na hoi cih, te yn cceih lah kae hynh yn zui,” a cipya.²²Ccangvaepaw nynh tuh-e bya tuh he a thae te ngaethyate a cceih, pawccecize aning tuh uccaw patae a hoi keiccu nynh thua.

²³Te Jesu nynh a zuitu hae kha, “Byaccaccing kae hopya oh, mihoipaw hanlan vaawlang peenaw kalan tee lanpaw tuh kou aru.²⁴Te bua kae hopya oh, mihoipaw nynh Pachia peenaw kalan tee lae tuh kalauh nynh phynbang khu kya tee nynh azoihua,” a cipya hae.²⁵A zuitu hae nynh tuh-e bya he a thae hae tuh myaryamaw mih ngaeangthua zah, “Tuhteze hummou khumnaw tuh a mue kho cih?” a ci hae.²⁶Thuasalama Jesu nynh minmin kha do hae zah, “Ccungccaw hanlan tuh hynh-e hynh thua kho khyh, thuasalama Pachia hanlan tuh pawpaw balyn athua kho,” a ci.

²⁷Tetuh Peter nynh, “Dotua, kaening tuh pawpaw balyn kae cciataw zah namaw kha kae zui vae, tukeiccuze pawmou kae mue cih?” a cipya.²⁸Jesu nynh, “Byaccaccing kae hopya oh, atyn-are balyn bua raethuinaw ccyh kya Ccungccaw Ccapaw nynh a phu-enaw bawitungkhung kya he yn haung te kae nae zui oh paw nanning mah bawitungkhung haw lae ning kya nae haungbua cih oh zah, Israel phin haw lae ning kha bya nae pia cih oh.²⁹Te ka min keiccuze inn hae, uno hae, ccianung hae, paaw, nung, zu, ccaaw hae, loo hae, tuh-e hae hankhakheit kha a cciatawpaw tuh leit za kheit a mueru cih zah zungzae hiinnaw rho a ccou cih.³⁰Thuasalama masaty e ccungccaw patae tuh nyathyakou athua cih hae zah nyathyakou e patae tuh masaty athua cih hae. Misu Khokhu Ryalahtu hae

¹“Pawccecize vaawlang peenaw tuh a misu khokhu elang ryalahtu hae hoh lan cite awkhua takaw te a cceihpaw khokhu hoitupaw te nynh aloku.²Aning nynh nin kheit ze denari kia kheit pya lante ryalahtu hae ryte nawccawnaw kha rae zah minmin kha a misu khokhu lang a saw hae.³Awkhua suimilan ccangtakua loukaw khe pou zah kungkunaw kya paw ryalaw leite a thadyn hae paw mingccang hae kha a muih.⁴Te minmin kha, ‘Nanning mah misu khokhu lang la cceihbua oh lah accan thyhte kae pya cih oh,’ a cipya hae. Te minmin mah a cceihbua hae.⁵Ninthuccynglyn loukaw te zete suimilan ccangthum loukaw khe bua cceih zah tuhcih maminte bua a cyi.⁶Te suimilan ccangpangaw loukaw khe bua cceih zah, paw ryalaw leite a thadyn hae paw mingccang hae kha muih zah, ‘Pawccemou hein kya ryalaw leite ninlang na thadyn oh?’ cite a khia hae.⁷Minmin nynh, ‘Hum nynh sanmah oun paw khyh hae keiccu,’ a ci hae. Aning nynh, ‘Nanning mah misu khokhu lang la cceih oh lah accan thyhte na mue cih oh,’ a cipya hae.⁸Zete he yn thua tuh misu khokhu hoitupaw nynh a ryaccinkhanpaw kyakhe, ‘Ryalahtu hae kha ko hae lah nyathyakou a teepaw kyate masaty a teepaw kyacia mih ryalaw mee kha pya hae,’ a cipya.⁹Te suimilan ccangpangaw loukaw kya ryalaw a tee hae paw tuh oun thua hae zah denari kia kheit cci a mue hae.¹⁰Masaty ryalaw a tee hae paw he oun thua hae tuh mimaw tuh alunghua kae mue cih cite a tuaku hae; thuasalama minmin mah denari kia kheit cci nynh a mue hae.¹¹Tuh-e tuh a lawkuh kou hae te minmin nynh khokhu hoitupaw kha ccoh hae zah,¹²‘E hae nyathyakou oun tee hae paw tuh suimilan ccangkheit kyalya nynh ryalaw hae, khuaninso teingte ninlang rya kae lahpaw kaening te minmin kha phe na losaku bua hae,’ a cipya hae.¹³Thuasalama aning nynh minmin kyaze lukheitpaw kha, ‘Ka ban, na kya ka cyihsei khyh, denari kia kheit te ryalaw lan na nawccah khyh tou?¹⁴Na ccanpaw hynh lawkuh lah la cceih ccavae; hynh-e nyathyakou e paw hynh nang te phe lokuh lan ka pya ry.¹⁵Ka uccaw te ka cyi rypaw cyinaw kaw ka hoi khyh tou? Tuhkhyhze hysahnaw ka hoi keiccuze nang tuh na eiung tou?’ a cipya.¹⁶Tukeiccuze nyathyakou e hae tuh masaty athua cih hae zah masaty e hae tuh nyathyakou athua cih hae; ccungccaw patae tuh ko athua hae, thuasalama beihtaraw nynh po athua hae,” a ci. A Chi lanpaw Bua A Hoty (Mar 10.32-34; Luk 18.31-34)

¹⁷Jesu nynh Jerusalem lang a cciathung lyaze zuitu hae lu haw lae ning kha mih makhaete ccanglang cciakhae hae zah,¹⁸“Ngaetua oh, aening tuh Jerusalem lang ah cceihthung oh, te Ccungccaw Ccapaw tuh ranpibawi lepaw hae te kawbya sazae hae kalan oun ap cih hae zah chia lan sei oun be cih hae.¹⁹Amaw kha sarya khylan, bua khylan te khiade khylan Zenta hae kuih kalan oun pya cih hae; te nin thumnaw kya bua yn thoothui cih,” a cipya hae. Johan Nung nynh Ngianaw (Mar 10.35-45)

²⁰Te Zebedi ccaaw hae mih nung tuh a ccaaw hae ryte Jesu kalan oun thua hae, a malang khe bakhung zah thawccinaw a ngiaku.²¹Jesu nynh, “Pawmou na ry?” cite a khia. Nopinung nynh, “E ka ccaaw hae lu ning nynh na peenaw kya na ranglang lu kheit, na voilang lu kheit a haungbua nawlan hae bya beih yn kinpakuh,” a cipya.²²Jesu nynh, “Paw nynh kae ngia cipaw na nyh khyh oh. Ka nia lanpaw banang hynh na neih kho cih oh zawtou? Kae nynh baptisma ka in lanpaw kha na inbua kho cih oh zawtou?” cite a khia hae. Minmin nynh, “Kae cyih kho cih,” a ci hae.²³Jesu nynh minmin kha, “Nanning nynh ka banang kha na neih ccaccing cih oh zah baptisma ka in lanpaw kha na inbua cih oh; thuasalama ka ranglang te ka voilang haungnaw kaw kha kae nynh ka pya kho khyh, tuh-e dahungnaw tuh ka Paaw nynh a paccynpya hae paw hanlan nynh thua,” a cipya hae.

²⁴Zuitu lu haw nynh tuh-e tuh he a thae hae tuh uno lu ning tungvaw mih thinria.²⁵Thuasalama Jesu nynh minmin kha ko hae zah, “Zenta hae a uktu hae nynh tuh uknaw kaw khate a uk hae, te a lesae hae paw nynh kawhoinaw kha a mang hae cipaw na ny oh.²⁶Tuhzemah nanning kya tuh tuhte thua lan khyh, thuasalama nanning laku a lesaepaw lang a tang rypaw tuh nae ryalahtu lang a tang hahe cih.²⁷Humhung zemah nanning lakuze lupihua lang a tang rypaw tuh nae see lang a tang hahe cih.²⁸Tuhawte Ccungccaw Ccapaw tuh rya lawpyaku khylan yn thua khyh; ming hae rya kha lawpya khylan te ccungccaw patae shawkhaw nawlan a hiinnaw kha pyaku khylan nynh yn thua,” cite a hopya hae. Mitmoh hae Lu Ning A Dansah (Mar 10.46-52; Luk 18.35-43)

²⁹Jesu te a zuitu hae nynh Jeriko khua te he a pou hae tuh ccungccaw zapi nynh amaw kha a zui hae.³⁰Laanpi pe a haung hae paw mitmoh hae lu ning nynh Jesu po a cceih cipaw he a thae hae tuh, “Bawipaw, David Ccapaw, kaening hynh ngaethya beih oun umsah!” cite a sia hae.³¹Te ccungccaw zapi nynh minmin kha zya a dae ccaw hae cite a sianua hae; thuasalama minmin nynh, “Bawipaw, David Ccapaw, kaening hynh ngaethya beih oun umsah!” cite houh a sia hae.³²Jesu nynh a thadyn lante minmin kha ko hae zah, “Nae hanlan pawmou nae cyisah ry oh?” cite a khia hae.³³Minmin nynh, “Bawipaw, kae mit hynh ngaw oun muih sah,” a ci hae.³⁴Tukeiccuze Jesu nynh ngaethyaumsah hae zah mih mit kha a hae, te vaekheihmawte mih mit tuh ngawmuih zah amaw kha a zui hae. Jesu Jerusalem lang A Tee (Mar 11.1-11; Luk 19.28-40; Joh 12.12-19)

¹Jesu te a zuitu hae nynh Jerusalem lang naekuh hae zah Oliv Mua leihpaw Bethfeih khua he a thua hae tuh Jesu nynh zuitu lu ning kha saw hae zah,²“Nae malang umpaw khua langkhe la cceih oh lah, a khii hae paw lann pinung te lann taraw kha ccahe na la muih cih oh; tuh-e lann hae kha oun supah oh lah ka kalan oun sue oh.³Lukhakheit nynh ae khia oh ze, ‘Bawipaw nynh a peki,’ nae cipah cih oh; tetuh tuh-e paw nynh palou ae sawpah vae cih oh,” a cipya hae.⁴Hynh-e tuh profeh nynh a la hosyapaw kha accing nawlan nynh thua; a hosyapaw tuh:⁵“Dotua, na siapharan tuhna kalan yn cceih cciamang;aning tuh a lungnepaw thua zah,lann kha yn ccikuh,lann taraw kha yn ccikuh, citeZion ccanung khahopah oh,” acikuh.

⁶Zuitu hae nynh cceih hae zah Jesu nynh kaw a pya hae hawte a cyi hae.⁷Lann pinung te lann taraw kha oun thuakhae hae zah lann hae tungvaw khe mih boei hae kha de hae zah tuh-e vawlan khe Jesu nynh a cciku.⁸Myarya lungpaw ccungccaw zapi nynh mih uccaw hae kha laanpi kya a phaepya hae; mingccang hae nynh thingku kya-e thingnge hae kha bae hae zah laanpi kya a phaepya hae.⁹Jesu malang a cceih hae paw te a nulang a zuikuh hae paw zapi hae nynh,“David Ccapaw, Hosanna!Bawipaw min te yn thuapaw tuhhythuaccou sah!Ahang huanaw kyaHosanna thua sah!”cite a sia hae.¹⁰Jesu nynh Jerusalem lang he a tee tuh, khualae balyn tuh ngaluin-ngaluin ccae zah, “E paw hynh hummou athua?” a ci hae.¹¹Ccungccaw zapi nynh, “E paw tuh Galilee ram e Nazareth paw profeh Jesu nynh thua,” a ci hae. Jesu nynh Beikinn A Ccikan (Mar 11.15-19; Luk 19.45-48; Joh 2.13-17)

¹²Jesu nynh Pachia beikinn lungkhu lang tee zah beikinn kya a zuatu hae te a retu hae balyn kha a dee hae; phuaru hae paw mih ccaboi te vahu zua hae paw kya-e dahungnaw hae kha dawleihpah hae zah,¹³“Ccathyaa kyaze,‘Ka inn tuh sawsangnaw innci athua cih,’ cite azeikuh;thuasalama nanning nynhmiruh hae karung langna rae oh,” a cipya hae.

¹⁴Te mitzu hae te ccukhou hae nynh beikinn lang amaw kalan oun thua hae zah minmin kha a dansah hae.¹⁵Jesu nynh a raepaw ngaeangnaw hae te imua hae nynh beikinn kya, ‘David Ccapaw kya Hosanna thua sah,’ cite a sia hae paw kha, ranpibawi lepaw hae te kawbya sazae hae nynh he muih hae tuh mih thinria zah,¹⁶Jesu kha, “E imua hae nynh a ho hae paw tuh na thae tou?” a cipya hae. Jesu nynh, “Ou, ka thae;‘Imua hae te matei zu hae pawnosi hae munglae kyatenamaw thehoysahnaw khana paccyn vae,’acikuhpaw kha na ria boikhyh oh tou?” a cipya hae.

¹⁷Te minmin kha cciataw hae zah khualae te pou zah Bethani khua lang a cceih; te tuin kya a rya. Thaeku Ku Thyalawnaw (Mar 11.12-14, 20-26)

¹⁸Awkhua khe khualae lang he a ki tuh a vuelaw vae.¹⁹Laanpi pe khe thaeku ku kha muih zah a ccianua, thuasalama a naw laelan paw sanmah muih khyh; tukeiccuze thaeku ku kha, “Papinmaw athae la thae boi nan vae!” a cipya. Te vaekheihmawte thaeku ku tuh karae arou.²⁰Tuh-e tuh zuitu hae nynh a muih hae tuh mih ngaeangthua zah, “Thaeku ku hynh vaekheihmawte karae arou kangmaw rei!” a ci hae.²¹Jesu nynh minmin kha, “Byaccaccing kae hopya oh, lunghiinnaw hoi leite zynnaw na hoi oh ze, thaeku ku kya acyihkuhpaw kyalya thua leite, e mua hynh, ‘Nuekuh lah rili lungkhu lang phungkuh,’ na ci oh ze a phungkuh cih.²²Na zyn oh ze sawsang te na ngia oh paw miakaw kha na mue cih oh,” a cipya hae. Jesu Kawhoinaw A Khia hae (Mar 11.27-33; Luk 20.1-8)

²³Jesu nynh beikinn lungkhu lang tee zah a ccangpya lya hae khe, ranpibawi lepaw hae te piccan hae nynh a kalan oun cceih hae zah, “E uccaw hae hynh paw kawhoinaw te mou na cyi? E kawhoinaw hynh hum nynh mou ae pya?” cite a khia hae.²⁴Jesu nynh khung hae zah, “Kae mah bya kaw kheit kae khia cih oh, aphi nae hopya oh ze, kae mah e uccaw hae hynh paw kawhoinaw te nynh ka cyi cipaw kae hopah ru cih oh:²⁵Johan kya-e baptisma hynh paw kyate mou yn thua? Vaawlang tetou? Tuhkhyhze ccungccaw kyate tou?” cite a khia hae. Mimaw te mimaw bya eikuh hae zah, “Aening nynh, ‘Vaawlang kyate,’ ah ci oh ze, aning nynh, ‘Tuhteze pawccemou Johan kha na zyn khyh oh,’ oun ci cih.²⁶‘Ccungccaw hae kyate,’ ah ci oh ze, ccungccaw hae rawri lan a um; pawccecize ccungccaw balyn nynh Johan tuh profeh lu kheit hawte a tua hae paw nynh thua,” a ciku hae.²⁷Tukeiccuze minmin nynh Jesu kha, “Kae nyh khyh,” cite a khung hae. Jesu nynh, “Kae mah paw kawhoinaw te nynh e uccaw hae hynh ka cyi cipaw kae hopah lan khyh oh. Ccapaw Lu Ning Tousenaw

²⁸“Nanning pawte na tua oh? Ccungccapaw lu kheit nynh ccapaw lu ning a hoi; aning nynh atawccapaw kalan cceih zah, ‘Ka ccapaw, atunin misu khokhu lang la cceih lah rya la lah,’ a cipya.²⁹A ccapaw nynh, ‘Ka cceih lan khyh,’ a ci; thuasalama khuekheih acih te ngaesikuh zah a cceih.³⁰Te mih paaw nynh asoipaw kalan cceih zah, tuh-e hawte bua a hopya. Aning nynh, ‘Ka la cceih vae sah, apang,’ a cipya, thuasalama cceih khyh.³¹Tuh-e lu ning hae kyaze hum tuh mou a paaw rynaw a cyih?” cite a khia hae. Minmin nynh, “Atawccapaw,” a ci hae. Jesu nynh minmin kha, “Byaccaccing kae hopya oh, ngunto khoi hae paw te ohhuanung hae nynh Pachia peenaw lungkhu lang nae malang te ae teetaw vae cih oh.³²Pawccecize Johan nynh dingnaw laanpi kha zuite nae kalan yn thua zah na zyn khyh oh; thuasalama ngunto khoi hae paw te ohhuanung hae nynh amaw kha a zyn hae; te nanning nynh tuh-e tuh mang na muih oh pite nae lung na paleihkuh khyh oh zah zyn mah na zyn khyh oh. Ryalahtu hae Tousenaw (Mar 12.1-12; Luk 20.9-19)

³³“Ccangpaw tousenaw phungpaw hynh ngaetua oh: loram a hoipaw lu kheit nynh misu khokhu kha rae zah hohung po a koih, te misu mianaw khu kha karouh zah buhang ccangkheit a sak, te khokhu kha a hohtu hae kalan hohsakuh hae zah ramccang lang a cceih.³⁴Misu thae lo yn zaw te, a mue lanpaw kha law khylan a see hae kha a hohtu hae kalan a saw hae.³⁵Khokhu a hohtu hae nynh a see hae kha kyng hae zah lu kheit kha a bua hae, lu kheit kha a chia hae, lu kheit kha lung te a deih hae.³⁶Aning nynh masaty e see hae laeze alunghua lante ccangpaw see hae kha bua a saw hae; minmin nynh tuh-e hae tuh langmaw hawte bua a cyi hae.³⁷Nyathyakou tuh, ‘Minmin nynh ka ccapaw tuh saw a tua cih hae,’ ci zah a ccapaw kha minmin kalan a saw.³⁸Thuasalama khokhu a hohtu hae nynh a ccapaw kha he a muih hae tuh, ‘E paw hynh rhoccoutu nynh thua, rang oh, amaw hynh theih oh sih lah a rho kha lawkuh oh sih’ cite a hoku hae.³⁹Te tuh-e paw tuh kyng hae zah misu khokhu akhung lang vua hae zah a chia hae.⁴⁰Tukeiccuze misu khokhu a hoitupaw he yn thua te, khokhu a hohtu hae kha pawtemou a cyih cih hae?” cite a khia hae.⁴¹Minmin nynh, “Tuh-e ccungccaw hoylei hae paw kha myarya ccih lante a theih cih hae; te a misu khokhu kha athae lo ccyh kya athae hoyte a pya cih hae paw ccangpaw khokhu a hohtu hae kalan a hohsakuh cih hae,” a ci hae.

⁴²Jesu nynh minmin kha, “Ccathyaa kyaze,‘Inn sak hae paw nynha nuee hae paw lung tuhinn saknaw kya abyapi huapawapaki lang e lung langyn tang, hynh-e tuh Bawipaw nynha cyipaw thua zah,aening muihnaw kyangaeang lan umpaw nynh thua,’cite azeikuhpaw kha na ria boi khyh oh tou?⁴³Tukeiccuze kae hopya oh, Pachia peenaw tuh nae kyate lawpya athua cih zah tuh-e peenaw thae a thaepaw minphuin kalan pya athua cih.⁴⁴Humhung zemah tuh-e lung vawlan a ccahpaw tuh phe akingkuh cih; humhung zemah tuh-e lung nynh a ccawphupaw tuh palae tui cih,” a cipya hae.

⁴⁵Te ranpibawi lepaw hae te Farasi hae nynh tuh-e tousenaw phungpaw hae kha he a thae hae tuh kaening kong nynh oun honua cipaw a nyku hae.⁴⁶Minmin nynh Jesu kha kyng lan a ry hae zemah ccungccaw zapi raw kha a rih hae; pawccecize ccungccaw hae nynh Jesu tuh profeh cite a tua hae paw nynh thua. Zudy Poi Tousenaw (Luk 14.15-24)

¹Jesu nynh ccungccaw hae kha tousenaw phungpaw hae te bua a hopya hae. A hopaw tuh:²“Vaawlang peenaw tuh a ccapaw hanlan zudy poi a tuapaw siapharanpaw te nynh aloku.³Zudy poi kalan thuabua lan a ko hae paw kha kosah lan hae a see hae kha a saw hae; thuasalama minmin tuh oun thua ry khyh hae.⁴Ccangpaw a see hae kha bua saw hae zah, ‘Kopaw ccungccaw hae kha hynhte la hopah oh: Dotua oh, ka loohdangkunaw tuh ka paccyn kou vae, ka tangnuapaw hae te athopaw sahiin hae kha phe ka chia vae, pawpaw balyn tuh paccyn athua vae, zudy poi loohdangkunaw kalan rang ccavae oh,’ cite a hosahpya hae.⁵Thuasalama minmin nynh tuh-e tuh pawlangria leite mih rynaw lang a cceih hae, lukheitpaw nynh a loo lang cceih zah ccangpaw lu kheit nynh a kungkunaw lang a ccia.⁶Te tuhlae hae nynh tuh-e see hae kha kyng hae zah sarisarya zuenah hae zah a chia hae.⁷Thuasalama siapharan tuh myarya a thinria zah a rhawkaw hae kha saw hae zah tuh-e ccungccatheih hae kha a chiasah hae, te mih khuapi kha maee te a soipya hae.⁸Tukoute a see hae kha, ‘Zudy poi tuh paccyn phe athua vae, thuasalama ko hae paw tuh ngaekuh vae khyh hae.⁹Tukeiccuze nanning nynh laanluepi hae kalan la cceih oh lah na muih oh paw ccungccaw miakaw kha zudy poi kalan oun ko oh,’ cite a hopya hae.¹⁰Tukeiccuze tuh-e see hae tuh laanluepi hae kalan cceih hae zah, a muih hae paw ccungccaw miakaw kha athah ahoy ci leite pum hae zah zudy poi tuh mikhia hae ryte phe abeih vae.

¹¹“Siapharanpaw nynh mikhia hae do lan he yn tee tuh zudy poi boeining a lawkuh leipaw ccungccaw lu kheit kha he a muih tuh,¹²‘Ka ban, pawccemou zudy poi boeining lawku leite hynhlang nae tee?’ a cipya. Tuh-e paw nynh yccae khyh.¹³Tetuh siapharanpaw nynh a see hae kyakhe, ‘A kuih te a ccu kha he oh lah, rawkhuinaw te hawzynaw a umnaw atolang mohnaw kalan khe vua oh,’ a cipya hae.¹⁴Pawccecize kopaw tuh alung, thuasalama popaw tuh azya,” a ci. Pachia Uccaw te Sizar Uccaw (Mar 12.13-17; Luk 20.20-26)

¹⁵Farasi hae nynh cceih hae zah Jesu nynh a hopaw kya pawtemou kaangsyakhaw lan cipaw khua a khanku hae.¹⁶Minmin nynh Herod pati hae ryte mimaw zuitu hae kha Jesu kalan saw hae zah, “Sazae, nang tuh ahmepaw nynh na thua, Pachia laanpi kha hmerarih lan na ccangpah hae zah mirymihua na tua khyh; pawccecize nang tuh ccungccaw hae mae na do khyh cipaw kae ny.¹⁷Tukeiccuze na tuanaw kha oun hopya tua. Sizar kalan ngunto pya lan accan tou, ccan khyh tou?” cite a khiasah hae.¹⁸Jesu nynh a thyaruhnaw hae kha phe nyh zah, “Thyaruh hae, pawccemou kae hynh nae syntawtua oh?¹⁹Ngunto lang pya lanpaw phua tuh yn dosah tua oh,” a ci. Te minmin nynh denari kia kheit kha oun ccyngpya hae.²⁰Jesu nynh minmin kha, “E hynh hum muinsan te hum min mou?” cite a khia hae.²¹Minmin nynh, “Sizar muinsan te min,” a ci hae. Te Jesu nynh, “Tukeiccuze Sizar uccaw kha Sizar kalan pya oh lah, Pachia uccaw kha Pachia kalan pya oh,” cite a khung hae.²²Minmin nynh tuh-e bya he a thae hae tuh mih ngaeangthua; te amaw kha po cciataw hae. Thoothuinaw Kong Byakhianaw (Mar 12.18-27; Luk 20.27-40)

²³Tuin nin khe thoothuinaw um khyh a cih hae paw Sadusi hae tuh Jesu kalan oun thua hae zah hynhte a khia hae:²⁴“Sazaepaw, ‘Ccungccapaw lu kheit nynh ccaawsaah leite a zu kha a chitaw ze, tuh-e paw a neitawpaw nynh tuh-e zu tuh a umkhae cih zah a upaw elang ccaaw a saahpah cih,’ cite Moses nynh a la ho.²⁵Atu kaening laku kya uno lu sari a umbua hae; atawccapaw tuh zu hoi zah ccaawsaah leite phe a chih, a zu kha a neitawpaw nynh zu lang a hoi.²⁶Tuhawte lu ningnaw nynh zu lang bua a hoi, te lu thumnaw kyate lu sarinaw kyacia tuhcite a cyihkuh.²⁷Nyathyakou tuh tuh-e nopinung mah a chihbua.²⁸Tukeiccuze thoothuinaw kya tuh-e nung tuh lu sari hae kyaze hum zu lang mou a tang cih? Pawccecize tuh-e nung tuh mih balyn zu lang phe a tang vae,” a ci hae.

²⁹Jesu nynh minmin kha, “Nanning tuh na mesei oh; Ccathyaa thuasah, Pachia thungnaw thuasah na ny khyh oh keiccu nynh thua.³⁰Pawccecize thoothuinaw kya tuh zuvaw tang ci um vae khyh, zu dypyaku ci mah um vae khyh, minmin tuh vaawlang e vaaw hae hawte nynh athua vae hae.³¹Thuasalama a chih hae paw thoothuinaw konglang te Pachia nynh ae hopya oh paw kha na ria boi khyh oh tou? A hopaw tuh:³²‘Kae tuh Abraham Pachia, Isak Pachia te Jakob Pachia nynh ka thua,’ a ci. Pachia tuh a chih hae paw Pachia thua khyh, a hiin hae paw Pachia nynh thua,” cite a hopya hae.³³Ccungccaw zapi nynh tuh-e bya he a thae hae tuh a ccangpyanaw kha mih ngaeangthua. Abyapi huapaw Kawbya (Mar 12.28-34; Luk 10.25-28)

³⁴Jesu nynh Sadusi hae kha zya a daesah hae cipaw kha Farasi hae nynh a thae hae tuh pynkheihlan a tungkuh hae.³⁵Minmin kyaze kawbya sazae lu kheit nynh Jesu kha syntawtua khylan hynhte bya a khia:³⁶“Sazaepaw, kawbya kyaze paw kawbya mou alehua?” cite a khia.³⁷Jesu nynh, “ ‘Bawipaw na Pachia kha na thinlung balyn te, na hiinnaw balyn te, na tuanaw balyn te na sungsah cih,’ acikuh.³⁸E hynh ale huapaw te abyapi huapaw kawbya nynh thua.³⁹Ccangningnaw tuh tuh-e te alokuh. ‘Na innpaw kha namaw toulou hawte na sungsah cih,’ acikuh.⁴⁰Kawbya balyn te profeh ccauh hae balyn tuh hynh-e kawbya ccangning kyahin marya akyngkuh,” a cipya. Messiah Kong Byakhianaw (Mar 12.35-37; Luk 20.41-44)

⁴¹Farasi hae tuh pynkheihlan a pumku lya hae khe Jesu nynh,⁴²“Messiah hynh pawtemou na tua oh? Aning tuh hum ccaaw mou athua?” cite a khia hae. Minmin nynh, “David Ccapaw nynh thua,” a ci hae.⁴³Jesu nynh, “Tuhteze pawccemou David nynh Muisaw liate amaw kha Bawipaw a ci. David nynh,⁴⁴‘Bawipaw nynh ka Bawipaw kha,“Na rhaw hae kha na ccu kaw kyaka nung mawlaezung tuhka ranglang khehaung,” a cipya,’ a ci.

⁴⁵David nynh Messiah kha Bawipaw cite a ko lanze, pawtemou Messiah tuh David Ccapaw athuathya cih?” cite a khia hae.⁴⁶Te bya kaw kheit a khung khopaw hum sanmah um khyh; tuh-e nin kyate hum nynh sanmah byakhia ngan vae khyh hae. Kawbya Sazae hae te Farasi hae (Mar 12.38-40; Luk 20.45-47)

¹Te Jesu nynh ccungccaw zapi te a zuitu hae a hopya hae paw bya tuh:²“Kawbya sazae hae te Farasi hae nynh tuh Moses tungkhung kya nynh a haung hae.³Tukeiccuze minmin nynh ae ccangpya oh paw miakaw kha zui oh lah cyih oh; thuasalama a cyi hae hawte la cyihbua nan oh, pawccecize minmin tuh ho hae zah cyih khyh hae.⁴Minmin nynh phupaw aripaw te phu arupaw kha tung hae zah ccungccaw hae raw vawlan a khang hae, thuasalama mimaw tuh mih kuihdung te sanmah nue ry khyh hae.⁵Thuasalama rya a law hae paw balyn kha ccungccaw hae nynh muih hae sah cite leih a law hae. Mih terui kya te mih kuihbaw kya a khiibiaku hae paw Ccathyaa zeikuhpaw bawngtaraw kha kosah hae zah mih angkile adung kha a ccuasaku hae.⁶Poi kya ahoy huanaw hmin kha ry hae zah sinakok hae kya ahoy huapaw haungnaw hae kya haung lan a ry hae.⁷Kungkunaw hae kya sawtuate byabeihku ry hae zah ccungccaw hae nynh, ‘Sazae, Sazae’ cite koku kha a ry hae.⁸Thuasalama nanning tuh ‘Sazae’ cite la kokuh ry nan oh; pawccecize nanning nynh sazae lu kheit rou nynh na hoi oh; nanning balyn tuh siaimua hae nynh na thua oh.⁹Laephi vawlan hum sanmah ‘Apang’ cite ko nan oh; pawccecize vaawlang umpaw nae Paaw lu kheit rou nynh Paaw na hoi oh.¹⁰‘Lupi’ cite mah la kokuh ry nan oh; pawccecize lupi lu kheit kyalya na hoi oh zah amaw tuh Messiah nynh thua.¹¹Nanning lakuze ale huapaw tuh nae ryalahtu lang a tang cih.¹²Humhung zemah amaw te amaw a hangsakuhpaw tuh sawbung athua cih; amaw te amaw zakaw a sangsakuhpaw tuh hangthung athua cih.

¹³“Thuasalama kawbya sazae hae te Farasi hae, thyaruh hae, nae hanlan ngaethya lan kou um! Pawccecize vaawlang peenaw thuakaw kha ccungccaw hae elang phe na khaw oh, naemaw mah na tee khyh oh zah a tee ry hae paw mah na uapah khyh oh.¹⁴Kawbya sazae hae te Farasi hae, thyaruh hae, nae hanlan ngaethya lan kou um! Pawccecize nomae hae inn kha na luade oh zah cyisakuthya nawlan saw kha khaw cia na sang oh; tukeiccuze ale huapaw detahnaw kha na teing cih oh.¹⁵Kawbya sazae hae te Farasi hae, thyaruh hae, nae hanlan ngaethya lan kou um! Pawccecize ccungccaw lu kheit a beiknaw paleih khylan rili te laephi kya khua na ccong oh, he yn paleihkuh tuh tuh-e paw kha naemaw laeze leit ning hell kalan ccawsah lan rya na law oh.

¹⁶“Cciakhaetu hae mitmoh hae, nae hanlan ngaethya lan kou um! Nanning nynh ‘Humhung zemah beikinn phyate thyalawku ze pawtua-ung khyh; thuasalama humhung zemah beikinn kya-e sui phyate thyalawku ze atyn,’ na ci oh.¹⁷Nanning mingaee hae te mitmoh hae! Sui tou abyapihua, tuhkhyhze sui a thyaasahpaw beikinn tou abyapihua? Pawtuhmou abyapihua?¹⁸Te ‘Humhung zemah silawhang phyate thyalawku ze pawtua-ung khyh, thuasalama humhung zemah silawhang vawlan umpaw lasung phyate thyalawku ze atyn,’ na ci oh.¹⁹Nanning mingaee hae te mitmoh hae! Silawhang vawlan e lasung tou abyapihua, tuhkhyhze lasung a thyaasahpaw silawhang tou abyapihua? Pawtuhmou abyapihua?²⁰Tukeiccuze silawhang phyate thya a lawku ze silawhang ry, a vawlan umpaw lasung balyn ryte thya a lawde vae.²¹Beikinn phyate thya a lawku ze beikinn te tuin kya umpaw Pachia kha thya a lawde vae.²²Te vaawlang phyate thya a lawku ze Pachia kya-e bawitungkhung phyate thyalawkuhpaw thua zah, tuh-e vawlan a haungpaw Pachia phyate thyalawkuhpaw nynh thua vae.

²³“Kawbya sazae hae te Farasi hae, thyaruh hae, nae hanlan ngaethya lan kou um! Pawccecize nanning nynh hangmae, pucinan te khanmuin kha pumhaw pumkheit na pya oh zah kawbya kyaze akhincci huapaw atazanaw, ngaethyaumsahnaw te lungzinaw tuh pawlang na ria khyh oh; ccangpaw kha mah sawphah leite hynh-e hae hynh na cyi lan oh paw nynh thua.²⁴Cciakhaetu hae mitmoh hae, na nia lan oh paw tui kya-e maseih khaze na kihbia oh zah kalauh khaze po na due oh.

²⁵“Kawbya sazae hae te Farasi hae, thyaruh hae, nae hanlan ngaethya lan kou um! Pawccecize nanning nynh banang te pake kha avawlan kyalya na sing oh, thuasalama alungkhu tuh luadenaw te karankunaw khate phe abeih.²⁶Farasi mitmoh hae, pakekhupaw te banang alungkhu kha singty oh, tuhteze nynh tuh-e hae avawlan kha mah athyaabua cih.

²⁷“Kawbya sazae hae te Farasi hae, thyaruh hae, nae hanlan ngaethya lan kou um! Pawccecize nanning tuh asi rawpaw a thuh hae paw shawku te nynh na loku oh; avawlan tetuh kou puithya salamah alungkhu tuh michi hae ru te athupaw aphuinphuin te phe abeih.²⁸Tuhawte nanning mah avawlan tetuh ccungccaw hae malang adingpaw hawte nynh na langku oh, thuasalama nae lungkhu tuh thyaruhnaw te hoyleinaw te nynh phe abia.

²⁹“Kawbya sazae hae te Farasi hae, thyaruh hae, nae hanlan ngaethya lan kou um! Pawccecize profeh hae shawku kha na raepah oh zah miding hae lungbing kha na ccaan oh.³⁰Nanning nynh, ‘Kae minpaaw hae she lyakhe kae la hiinbua ze, profeh hae chiise luasahnaw kya kae umbua lan khyh,’ na ci oh.³¹Tukeiccuze nanning tuh profeh hae a la theih hae paw ciihan hae nynh kae thua cipaw kha naemaw toulou nynh ccaekia na khanku vae oh.³²Tukeiccuze nae minpaaw hae kya-e cyisahnaw tounawpaw kha phe biasah lalae oh.³³Nanning hupaw hae, huparepaw ciihan hae! Pawtemou hell kalan ccawnaw kyate na lue kho cih oh?³⁴Tukeiccuze profeh hae, mihaw hae te kawbya sazae hae kha nae kalan kae saw hae; te minmin lakuze abang kha nae theih cih oh zah nae khiade cih oh; abang kha nae sinakok hae kya nae bua cih oh zah khua khuakheit kyate khuakheit kalan nae dee cih oh.³⁵Tukeiccuze adingpaw Abel chiise kyate, beikinn te silawhang laku na chia oh paw Berakhiah ccapaw Zekhariah chiise kyacia laephi vawlan aluapaw miding hae chiise balyn tuh nae tungvaw accah cih.³⁶Byaccaccing kae hopya oh, e uccaw hae balyn hynh atu she e ccungccaw hae tungvaw yn ccah cih. Jerusalem elang Jesu A Rah (Luk 13.34-35)

³⁷“Pou Jerusalem, Jerusalem, nang nynh profeh hae kha na theih hae zah na kalan oun saw hae paw ccungccaw hae kha lung te na deih hae; awpinung nynh a taw hae kha a sake kaw a khong hae hawte na ccaaw hae kha pynkheihlan suelua lan palei ka ry, thuasalama na ry khyh!³⁸Na inn tuh vuasya thua zah ccungccaw phe adae vae.³⁹Pawccecize kae hopya oh, ‘Bawipaw min te yn thuapaw Ccungccaw tuh hythua ccoupaw nynh thua,’ cite na ho mawlaezung oh, atu te nae muih vae lan khyh oh,” a ci. Athangnaw Kong Muihsahnaw (Mar 13.1-2; Luk 21.5-6)

¹Jesu nynh beikinn kyate pou zah a ccia lyakhe a zuitu hae nynh a kalan oun cceih hae zah beikinn kya-e inn hae kha a muihsah hae.²Jesu nynh, “E hae balyn hynh na muih khyh oh tou? Byaccaccing kae hopya oh, hein kyahin lung ccangkheit vawlan ccangkheit a khangthykuh lei lan ciate khaleih tingsah bung athua cih,” a cipya hae.

³Jesu tuh Oliv Mua vawlan a haung lyakhe zuitu hae nynh mih makhaete a kalan oun thua hae zah, “E uccaw hae hynh hohtuhmou yn cyihkuh cih? Nae thuanaw lanpaw te laephi she athangnaw lanpaw hynh muihsahnaw pawmou yn langkuh cih? Kaening hynh oun hopah bua,” a ci hae.⁴Jesu nynh, “Humhung nynh mah ae ling khyh nawlan oh la raeringkuh oh.⁵Pawccecize ccungccaw patae nynh ka min te oun thua cih hae zah, ‘Kae tuh Messiah nynh ka thua,’ oun ci cih hae zah ccungccaw patae kha oun ling cih hae.⁶Nanning nynh rhawtukkunaw kong te rhawtho lanpaw kong kha nae thae cih oh; tuhzemah nae thinphang nan sah; pawccecize hynh-e uccaw hae balyn tuh oun cyihkuh hahe cih, thuasalama athangnaw tuh thua loh khyh.⁷Pawccecize minphuin phuin kheit te phuin kheit, ram kheit te ram kheit oun rhawkuh cih hae; ram takyh kya ccakan yn ccih cih zah innry yn suekuh cih.⁸E hae balyn tuh neitangia accih takawpaw hawte nynh thua.

⁹“Te ccungccaw hae nynh nanning kha vawrivawsaw nung khylan ae ap cih oh zah ae theih cih oh; ka min keiccuze minphuin hae balyn nynh ae hua cih oh.¹⁰Te ccungccaw patae nynh mih zynnaw kha oun vua cih hae, lu kheit te lu kheit yn pheekuh cih hae zah lu kheit te lu kheit yn huakuh cih hae.¹¹Lingthya profeh hae patae oun langkuh cih hae zah ccungccaw patae kha oun ling cih hae.¹²Hoyleinaw alung keiccuze ccungccaw patae kya-e sungsakunaw tuh yn zyabung cih.¹³Thuasalama athangnaw cia atynpaw tuh khum athua cih.¹⁴E peenaw thehoypaw hynh minphuin hae balyn kalan ccaekia lang laephi pynpi kya oun ho cih hae; tukoute athangnaw tuh yn thua cih.

¹⁵“Tukeiccuze profeh Daniel nynh a la ho hawte, luathua-ae-ui lan umpaw rohtupaw nynh athyaapaw hmin kya a thadynpaw kha he nae muih oh te (Ccathyaa a riapaw nynh thaethya sah),¹⁶Judea ram kya um hae paw nynh mua lang ccue hae sah.¹⁷Inn tungvaw a umpaw nynh inn lungkhu e uccaw kha law lan rungbung nan vae sah.¹⁸Loo kya a umpaw nynh a boeining lawku khylan ki nan vae sah.¹⁹Tuin ccyh kya tuh ccaaw a poipaw nopi hae te matei zupaw nosi a hoipaw nopi hae hanlan ngaethya lan kou um!²⁰Nanning na ccue ccyh oh tuh khuaccih ccyh te sabbath nin athua khyh nawlan saw la sang oh.²¹Pawccecize laephi athotakaw te atu cia a la um boi leipaw, nyalang mah a um vae cih leipaw myarya ccihpaw teingnaw tuh yn thua cih.²²Tuh-e accyh tuh dynsah khyh lanze humhung mah lue lan khyh, thuasalama popaw ccungccaw hae hanlan tuh-e accyh tuh dynsah athua cih.²³Lukhakheit nynh, ‘Dotua! Hein kya nynh Messiah tuh a um!’ tuhkhyhze ‘Khuin kya nynh a um!’ ae cipya oh ze la zyn nan oh.²⁴Pawccecize lingthya messiah hae te lingthya profeh hae oun langkuh cih hae zah athua kho ze alepaw muihsahnaw te ngaeangnaw kha oun langsakuh cih hae; ou khate popaw ccungccaw hae kha heize oun ling cih hae.²⁵Ngae oh, nanning kha kae hopya ty vae oh.²⁶Tukeiccuze minmin nynh, ‘Dotua! Messiah tuh ramkaw nynh a um,’ ae cipya oh ze la cceih nan oh. ‘Dotua! Aning tuh akhaan lungkhu nynh a um,’ ae cipya oh ze la zyn nan oh.²⁷Pawccecize khozaw tuh nithua langte yn laekuh zah niccaw lang cia a aw hawte Ccungccaw Ccapaw tuh yn thua cih.²⁸Michi rhua a umnaw miakaw kya lantaw hae oun pumkuh cih hae. Ccungccaw Ccapaw Thuanaw (Mar 13.24-27; Luk 21.25-28)

²⁹“Tuin ccyh kya-e teingnaw koutevaekheihmawte khuanin tuhyn moh cih zah sawpaw mahyn aw vae lan khyh,te awsi hae tuh vaawlui kyateoun ccah cih hae zahvaawlang e thungnaw hae balyn tuhoun hy vae cih hae.

³⁰Tetuh Ccungccaw Ccapaw kya-e muihsahnaw kha vaawlang kya yn langkuh cih; laephi vaw e minphuin hae balyn tuh oun rah oun khui cih hae, te Ccungccaw Ccapaw tuh thungnaw te alesaepaw phu-enaw ryte vaawlang e maeking kya yn rungpaw kha oun muih vae cih hae.³¹Te myarya ccaepaw mungkae roi ryte a vaaw hae kha yn saw cih hae zah amaw nynh a po hae paw kha minmin nynh laephi ki kipali kyate, vaawlang athangnaw san kheit kyate san kheit kyacia oun pum cih hae. Thaeku Ku Tousenaw (Mar 13.28-31; Luk 21.29-33)

³²“Thaeku ku kya-e tousenaw phungpaw hynh atu ccangku tua oh; aran tuh notazyh lan yn cih zah anaw he yn toih tuh hawnin anae vae cipaw na ny oh.³³Tuhawte nanning nynh e uccaw hae balyn hynh he nae muih vae oh ze Ccungccaw Ccapaw yn thuanaw lanpaw tuh anae vae, thuakaw kin cia yn naekuh vae cipaw la nyh ccavae oh.³⁴Byaccaccing kae hopya oh, e uccaw hae balyn acyiku kou makhia atu she e ccungccaw hae hynh zo lan khyh hae.³⁵Vaaw te laephi tuh azo cih, thuasalama ka bya tuh zo lan khyh. Nin te Ccyh Ny Thua Khyh (Mar 13.32-37; Luk 17.26-30, 34-36)

³⁶“Thuasalama tuh-e nin te ccyh tuh hum nynh sanmah nyh khyh, vaawlang umpaw vaaw hae nynh mah nyh khyh hae, Ccapaw nynh mah nyh khyh, Paaw rou nynh a nyh.³⁷Noah she lya hawte nynh Ccungccaw Ccapaw yn thuanaw ccyh tuh yn cyihkuh cih.³⁸Pawccecize tuipayn a ynku maw, Noah nynh sanphalung lungkhu lang a tee nin cia, ccungccaw hae tuh aete, niate, zudykute, zudypyakute a um hae.³⁹Tuipayn nynh a lou maw hae cia pawte nynh yn cyihkuh cih cipaw nyh khyh hae; tuhawte nynh Ccungccaw Ccapaw yn thua ccyh mah yn cyihkuh cih.⁴⁰Tuin ccyh kya tuh loo kya um hae paw lu ning kyaze lu kheit kha law athua cih zah lu kheit tuh cciataw athua cih.⁴¹Sungsuh hae paw nopi hae lu ning kyaze lu kheit kha law athua cih zah lu kheit tuh cciataw athua cih.⁴²Tukeiccuze nae Bawipaw tuh hohtuh nin nynh yn thua cih cipaw kha na ny khyh oh keiccuze paccynkute la ngaw oh.⁴³Thuasalama e hynh nyh oh; inn hoitupaw nynh miruh yn thua lanpaw accyh kha a ny ze, miruh nynh a inn kha a kiabia khyh nawlan phang a ngaw cih.⁴⁴Tukeiccuze nanning mah raeringkute um oh, pawccecize na tua khyh oh ccyh lyakhe Ccungccaw Ccapaw tuh yn thua cih. See Phuin Ning (Luk 12.41-48)

⁴⁵“Tuhte athua lanze inn hoitupaw nynh a inn kya-e ccungccaw hae kha a uktu lang te accyh azaw vae ze looh a pyatu lang a nungpaw a lungzipaw te a hawpaw see tuh hummou athua?⁴⁶Tuhte rya a lawpaw kha a bawipaw nynh yn thua zah a muihpyapaw see tuh lungtuapaw nynh thua.⁴⁷Byaccaccing kae hopya oh, a bawipaw nynh tuh-e see kha a uccaw balyn a do-oihtu lang a nung cih.⁴⁸Thuasalama see hoy leipaw nynh, ‘Ka bawipaw yn thuanaw ccyh tuh aro ung cih,’ cite a lungkaw te tua zah,⁴⁹a ban hae see hae kha a bua hae, te a neih hae paw ryte aete niate a um vae.⁵⁰Tuh-e see nynh a tua khyh ccyh te a ny khyh ccyh lyakhe a bawipaw tuh mang yn thua cih.⁵¹A bawipaw nynh tuh-e see tuh palae tui lan a pae cih zah thyaruh hae ryte a nungkheih cih hae; tuin kya rawnaw te hawzynaw a um cih. Liaccaw Lu Haw Tousenaw

¹“Vaawlang peenaw tuh zudy ccangvaepaw kha cciadue lan mih maeekhua kha ccyngkuh hae zah a cceih hae paw liaccaw lu haw te nynh aloku.²Minmin kyaze lu pangaw tuh haw hae zah lu pangaw tuh a ngaee hae.³A ngaee hae paw nynh mih maeekhua kha ccyngkuh hae zah zine ccyngku bia khyh hae.⁴Thuasalama a haw hae paw nynh mih maeekhua ryte abawng kya zine kha a ccyngku bia hae.⁵Zudy ccangvaepaw tuh khaw yn ro keiccuze minmin balyn tuh mih ngawthua zah a ihtheih hae.⁶Ziraccyng khe, ‘Dotua oh! Zudy ccangvaepaw yn thua vae; amaw kha cciadue khylan oun toikuh ccavae oh,’ cite roi accae.⁷Tetuh tuh-e liaccaw hae balyn tuh tho hae zah mih maeekhua kha a paccynku hae.⁸A ngaee hae paw nynh a haw hae paw kha, ‘Nae zine abang kha oun pyabua oh, pawccecize kae maeekhua tuh achih vae cih,’ a cipya hae.⁹Thuasalama a haw hae paw nynh, ‘Tuhte thua khyh! Kae hanlan te nae hanlan zaw lan khyh, a zua hae paw kalan la cceih oh lah la rekuh oh,’ a cipya hae.¹⁰Te minmin nynh zine reku lan a ccia lya hae khe, zudy ccangvaepaw tuh yn thua vae; paccynkute um hae paw tuh amaw ryte zudy poi kalan tee hae zah thuakaw kha phe a khaw vae hae.¹¹Tukoute ccangpaw liaccaw hae tuh mah oun thua hae zah, ‘Bawipaw, bawipaw, kaening mah oun hungpah bua!’ a ci hae.¹²Thuasalama aning nynh, ‘Byaccaccing kae hopya oh, nanning kha kae nyh khyh oh,’ cite a khung hae.¹³Tukeiccuze nanning nynh Ccungccaw Ccapaw yn thuanaw lanpaw nin te ccyh kha na ny khyh oh keiccuze phang la ngaw oh. Ryalahtu Lu Thum Tousenaw (Luk 19.11-27)

¹⁴“Vaawlang peenaw tuh ccungccaw lu kheit nynh asawnaw ram lang khuaccong lan noukuh zah a see hae kha ko hae zah a uccaw hae kha a rinsah hae paw hawte nynh athua.¹⁵Mih cyi khonaw ciate a pyasya hae, lu kheit kha talent ccangpangaw a pya, lu kheit kha ccangning a pya, lu kheit kha ccangkheit a pya; tukoute khuaccong lan a cceih.¹⁶Talent ccangpangaw a muepaw nynh cceih kangmaw zah kungku zah ccangpaw talent ccangpangaw amia a mue.¹⁷Tuhawte talent ccangning a muepaw nynh mah ccangpaw talent ccangning amia a mue.¹⁸Thuasalama talent ccangkheit a muepaw nynh cceih zah laephi kha thae zah a bawipaw phua kha zya a thuruh.¹⁹“Ccyh khaw aro koute tuh-e see hae mih bawipaw tuh yn thua zah minmin ryte ccazing a tua hae.²⁰Phua talent ccangpangaw a muepaw nynh yn thua zah ccangpaw talent ccangpangaw kha yn ccyngbia zah, ‘Bawipaw, kae kha talent ccangpangaw nae pya; dotua, amia talent ccangpangaw ka mue chih,’ a cipya.²¹A bawipaw nynh tuh-e paw tuh, ‘Ahoy, a lungzipaw see hoypaw, uccaw beihtarawpaw kya na lungzi keiccuze uccaw patae a rintu lang kae nung cih, na bawipaw kya-e lungtuanaw lungkhu lang teebua,’ a cipya.²²Talent ccangning a muepaw mah yn thua zah, ‘Bawipaw, kae kha talent ccangning nae pya; dotua, ccangpaw talent ccangning amia ka mue,’ a cipya.²³A bawipaw nynh, ‘Ahoy, a lungzipaw see hoypaw, uccaw beihtarawpaw kya nang tuh na lungzi keiccuze uccaw patae a rintu lang kae nung cih; na bawipaw kya-e lungtuanaw lungkhu lang teebua,’ a cipya.²⁴Te talent ccangkheit a muepaw nynh yn thua zah, ‘Bawipaw, nang tuh myarya a reipaw ccungccaw, na ccouku leinaw kya na ruekuhpaw te ccacii na vuaku leinaw kya na ruekuhpaw nynh na thua cipaw ka ny.²⁵Tukeiccuze ka rih, te ka cceih zah na phua kha laephi kya ka thuruh; dotua, na uccaw tuh hein kya phang a um,’ a cipya.²⁶A bawipaw nynh, ‘Seethya seeruhpaw te thawnawpaw! Ka ccouku leinaw kya ka ruekupaw te ccacii ka vua leinaw kya ka ruepaw kha na nyh tou?²⁷Tukeiccuze nang nynh ka phua kha ban kya na nung lan accan, tuhteze tuh he kae thua te ka phua tuh ato ryte ka mue cih.²⁸Tukeiccuze phua kha a kyate lah oh lah phua talent ccanghaw a hoipaw kha pya oh.²⁹Pawccecize a hoipaw ccungccaw miakaw kha pyachih athua cih zah patae a hoi cih; thuasalama a hoi leipaw ccungccaw kya-e a hoi thypaw kha heize lawpya athua cih.³⁰Nanning nynh ccungkia leipaw see kha rawnaw te hawzynaw a umnaw atolang mohnaw lungkhu lang dae vua oh,’ a cipya hae. Tuu te Miaa

³¹“Ccungccaw Ccapaw tuh a vaaw hae balyn ryte a phu-enaw te he yn rung te, a phu-enaw bawitungkhung kya yn haung cih.³²Te minphuin hae balyn kha a malang khe yn pum cih hae; tuurinpaw nynh a tuu hae kha miaa hae kyate a phia hawte aning nynh minmin kha yn phia cih hae.³³Tuu hae kha a ranglang yn nung cih hae zah miaa hae kha a voilang yn nung cih hae.³⁴Tukoute siapharan nynh a ranglang um hae paw kha, ‘Ka Paaw kya-e lungtua hae paw nanning, rang oh; laephi athonaw aleihpaw kyate nae hanlan paccynpaw peenaw rho hynh ccou oh.³⁵Pawccecize ka vuelaw lya looh nae dang oh, ka tuihaw lya tui nae niasah oh, mikhia lang ka tang lya innccong nae ua oh;³⁶Ka sasete ka um lya boeining nae pya oh, ka cci lya nae do-oih oh, thonginn ka um lya nae via oh,’ yn cipah cih hae.³⁷Miding hae nynh, ‘Bawipaw, hohtuh lya mou na vuelawpaw kae muih zah looh kae dang; na tuihawpaw kae muih zah nia lanpaw kae pya?³⁸Hohtuh lya mou mikhia lang na tangpaw kha kae muih zah kae inn kae thuasah; na sasete na um zah boeining kae pya?³⁹Hohtuh lya mou na ccipaw te thonginn na umpaw kha kae muih zah kae via?’ cite oun khung cih hae.⁴⁰Siapharan nynh, ‘Byaccaccing kae hopya oh, e ka uno hae kyaze adih huapaw lu kheit tungvaw na cyi oh paw miakaw tuh ka tungvaw na cyi oh paw nynh thua,’ a cipah cih hae.⁴¹Te a voilang um hae paw kha mah, ‘Thyalaw athua hae paw nanning, ka kyate cceih oh lah, Satan te a vaaw hae hanlan paccynpyapaw zungzae aruapaw maee lungkhu langkhe cceih oh.⁴²Pawccecize ka vuelaw lya looh nae dang khyh oh, ka tuihaw lya nia lanpaw nae pya khyh oh.⁴³Mikhia lang ka tang lya nae inn nae thuasah khyh oh; ka sasete ka um lya boeining nae pya khyh oh; ka cci lya te thonginn ka um lya nae via khyh oh,’ cite yn ci cih hae.⁴⁴Tetuh minmin nynh, ‘Bawipaw, hohtuh lya mou na vuelawpaw, na tuihawpaw, mikhia lang na tangpaw, sasete na umpaw, na ccipaw, thonginn na umpaw kha kae muih zah do-oih leite kae um?’ cite oun khung cih hae.⁴⁵Tetuh siapharan nynh, ‘Byaccaccing kae hopya oh, e hae lakuze adih huapaw lu kheit tungvaw na cyi khyh oh paw miakaw kha ka tungvaw na cyi khyh oh paw nynh thua,’ cite yn khung cih hae.⁴⁶E hae tuh zungzae detahnaw lungkhu lang a cceih cih hae, thuasalama miding hae tuh zungzae hiinnaw lungkhu lang a cceih cih hae,” a ci. Jesu Chia lan Pheenaw (Mar 14.1-2; Luk 22.1-2; Joh 11.45-53)

¹Jesu nynh e bya hae balyn hynh a ho koute a zuitu hae kha,²“Nin ning koute Kawtaw Poi a um cih cipaw na ny oh, Ccungccaw Ccapaw tuh vaelantung kya khiade khylan ap athua cih,” a cipya hae.

³Tetuh ranpibawi lepaw hae te piccan hae tuh Kaiafas a ci hae paw ranpibawi lupi inn kya oun tungkuh hae zah,⁴Jesu kha aruh lante kyng lan zah chia lan cite khua a khanku hae.⁵Thuasalama, “Ccungccaw hae oun pokuh sei cih hae, poi nin tuh chia lei lan,” a ci hae. Bethani kya Zimuin A Thuh hae (Mar 14.3-9; Joh 12.1-8)

⁶Jesu tuh Bethani khua kya vaethyakaepaw Simon inn kya a um lyakhe,⁷nopinung lu kheit nynh myarya amee rupaw zimuin alabasta lung rawpaw bu kheit kha Jesu kalan yn ccyng zah ae lan cite a haung lyakhe a lu kya a bu.⁸A zuitu hae nynh a muih hae tuh mih thinria zah, “Pawccemou e hynh alakaw lan a tangsah han?⁹Pawccecize e zimuin hynh phua patae lang zuate ryachi hae kha pya lanpaw,” a ci hae.¹⁰Tuh-e tuh Jesu nynh he a nyh tuh minmin kha, “Pawccemou nopinung kha vawsaw na pya oh? Aning nynh ka tungvaw ahoypaw rya kha a law vae.¹¹Pawccecize ryachi hae tuh nae kya zungzae a um hae, thuasalama kae tuh nae kya zungzae ka um lan khyh.¹²Pawccecize ka pyn kya hynh-e zimuin yn bupaw tuh ka rhua ccynaw elang a paccynpaw nynh thua.¹³Byaccaccing kae hopya oh, laephi pynpi kya hynh-e thehoypaw a honaw hae miakaw kya hynh-e nopinung nynh a cyipaw hynh amaw liathui nawlan hobia athua cih,” a cipya hae. Judas Iskariot nynh A Nawccaw (Mar 14.10-11; Luk 22.3-6)

¹⁴Zuitu lu haw lae ning kyaze lu kheit athuapaw, Judas Iskariot a ci hae paw nynh ranpibawi lepaw hae kalan cceih zah,¹⁵“Jesu kha nae kalan kae ap oh ze pawmou nae pya cih oh?” cite a khia hae. Minmin nynh ngunphua sung thum kha ria hae zah a pya hae.¹⁶Tuin ccyh kyate Judas nynh Jesu phee lanpaw ccyhhoy kha a ccung vae. Bawipaw Zerya (Mar 14.12-21; Luk 22.7-13, 21-23; Joh 13.21-30)

¹⁷Ransi phing leipaw Sanlou Poi masaty nin khe zuitu hae nynh Jesu kalan oun cceih hae zah, “Kawtaw Poi na ae nawlan pawkyamou kae la paccynpah cih?” cite a khia hae.¹⁸Jesu nynh, “Khua lungkhu lang la cceih oh lah ccungccapaw lu kheit kha, ‘Sazaepaw nynh ka ccyh anae vae, ka zuitu hae ryte na inn kya Kawtaw Poi kae mang cih, a ci,’ cite la hopah oh,” a cipya hae.¹⁹Jesu nynh a hopya hae hawte zuitu hae nynh cyih hae zah Kawtaw Poi zerya kha a paccyn hae.

²⁰Zete ccyh yn thua te Jesu tuh lu haw lae ning ryte ae lan a haung hae.²¹A ae lya hae khe Jesu nynh, “Byaccaccing kae hopya oh, nanning laku e lu kheit nynh kae hynh yn phee cih,” a ci.²²Tetuh minmin tuh myaryamaw mih ngaethah zah, “Bawipaw, tuh-e paw tuh kae ka thua khyh khaw?” cite lu kheit koute lu kheit nynh a khia hae.²³Jesu nynh, “Kae te pake kya kae pukheihpaw nynh yn phee cih.²⁴Ccathyaa kya amaw kong azeiku thyhte Ccungccaw Ccapaw tuh a chih cih; thuasalama Ccungccaw Ccapaw a pheetupaw hanlan ngaethya lan kou um! Tuh-e paw tuh a la pui khyh ze amaw hanlan ahoyhua cih paw,” a cipya hae.²⁵Te amaw a pheetu Judas nynh, “Sazae, kamaw tou ka thua?” a ci. Jesu nynh, “Phe na ho vae latu,” a cipya.

²⁶Zete zerya a mang lya hae khe Jesu nynh sanlou kha lah zah lungtuabya a ho koute eih zah a zuitu hae kha a pya hae; te, “Lawkuh oh lah ae oh, e tuh ka pyn nynh thua,” a cipya hae.²⁷Tukoute banang kha lah zah lungtuabya a ho koute minmin kha pya hae zah, “Nae balynte e hynh neih oh;²⁸pawccecize e tuh ccungccaw patae seingaethyanaw hanlan ka laepaw, byakin thawpaw te asekuhpaw ka chiise nynh thua.²⁹Nanning kha kae hopya oh, ka Paaw peenaw kya nanning ryte misutui thawpaw ah niakheih mawlaezung oh, hynhcihawpaw misutui hynh ka neih boi vae lan khyh,” a ci.

³⁰Hlaw hlakheit a sah kou hae te Oliv Mua lang a cceih hae. Peter nynh A Vua lanpaw A Hoty (Mar 14.27-31; Luk 22.31-34; Joh 13.36-38)

³¹Jesu nynh minmin kha, “Atu khuazi kya nae balynte nae ccuetaw cih oh; pawccecize Ccathya kyaze,‘Tuurinpaw kha ka bua cih zahtuuphu kya-e tuu hae tuhpong a phiakuh cih hae,’ cite azeikuh.

³²Thuasalama ka thoothui koute nae malang Galilee lang ka la cceih ty cih,” a cipya hae.³³Peter nynh Jesu kha, “Ming hae balyn nynh ae ccuetaw hae zemah kae tuh kharouh kae ccuetaw lan khyh,” a cipya.³⁴Jesu nynh Peter kha, “Byaccaccing kae hopya, atu khuazi aw a khua mawze vae thum nae vua cih,” a cipya.³⁵Peter nynh, “Nang te chikheih lan accan zemah nang kha kae vua lan khyh,” a cipya. Tuh-e hawte zuitu hae balyn nynh mah a cibua hae. Kethsemane kya Jesu Sawsang (Mar 14.32-42; Luk 22.39-46)

³⁶Jesu tuh zuitu hae ryte Kethsemane a ci hae paw hmin kya thua hae zah minmin kyakhe, “Khuhlang khuin ka la cceih cih zah saw ka sang loukaw hein kya la haung hin oh,” a cipya hae.³⁷Peter te Zebedi ccaaw hae lu ning kha a hoeibua hae; te a ngaethah zah a lungvawsaw takaw vae.³⁸Minmin kyakhe, “Chikhaeku lan ciate myaryamaw ka lungriathae; hein kya um oh lah kamaw ryte ngaw oh,” a cipya hae.³⁹Te takyh asawnaw lang a cceih koute laekhu kya bakhung zah, “Pou ka Paaw, athua kho ze e banang nynh kae hynh yn kawtaw sah; thuasalama kae ka ry hawte thua nan sah, na ry hawte thua sah,” cite saw a sang.⁴⁰Te zuitu hae kalan thua zah a ih hae paw kha a muih, te Peter kha, “Pawte! Suimilan ccangkheit san nae ngaw kho khyh oh tou?⁴¹Tuhounaw lungkhu lang na ccaw khyh nawlan oh sawsangte ngaw oh; thinlung nynh tuh a ry ccaccing, thuasalama pynsaw tuh a thawzya,” a cipya.⁴²Vae ningnaw bua cceih zah, “Ka Paaw, hynh-e banang hynh kae nynh nia leite athua kho khyh ze na rynaw hawte cyihkuh sah,” cite saw a sang.⁴³Tukoute a zuitu hae kalan bua yn thua zah mih mit tuh daekuh vae khyh zah a ih hae paw kha a muih.⁴⁴Minmin kha bua cciataw hae zah a cceih koute sawsang zah a homaepaw kha bua aho.⁴⁵Tukoute a zuitu hae kalan yn thua zah minmin kha, “Na ih ung oh zah na haeung ung oh tou? Dotua oh, Ccungccaw Ccapaw tuh misei hae kuih kalan pyanaw ccyh yn thua vae.⁴⁶Tho oh, cceih ccavae oh sih; dotua oh, kae yn pheepaw tuh yn thua vae,” a cipya hae. Jesu Kyngnaw (Mar 14.43-50; Luk 22.47-53; Joh 18.3-12)

⁴⁷Jesu nynh bya a ho cciamang lyakhe lu haw lae ning kyaze lu kheit athuapaw Judas tuh ranpibawi lepaw hae te piccan hae nynh oun saw hae paw ccungccaw zapi ryte thaloi te tungbang ccyngkute oun thua vae hae.⁴⁸Te amaw a pheetupaw nynh syntawnaw pya hae zah, “Kae nynh kae myngpaw tuh na kyng ry oh paw ccungccaw kha thua zah nae kyng cih oh,” cite a hopya hae.⁴⁹Judas tuh Jesu kalan palou yn cceih zah, “Sazae, na tungvaw daenaw um sah!” cite byabeih zah a myng.⁵⁰Jesu nynh, “Ka ban, cyi lan na paccynkupaw kha cyih ccaleih,” a cipya. Te minmin nynh oun thua hae zah Jesu kha kyng hae zah a he hae.⁵¹Tetuh Jesu te a umkheih hae paw lu kheitpaw nynh a thaloi kha thuaakuh zah ranpibawi lupi seepaw kha a nakua thoh pae lan a bae.⁵²Jesu nynh tuh-e paw kha, “Na thaloi kha a bu lungkhu lang sang; pawccecize thaloi a kyngpaw balyn tuh thaloi te a chih cih hae.⁵³Ka Paaw nynh vaaw hae kha rhawkawphu haw lae ning lae alung lan palou yn sawpya nawlan ka Paaw kalan ngiakuh kho lan khyh cite tou na tua?⁵⁴Thuasalama tuhte a la thua lanze, Ccathyaa nynh, ‘Hynhte acyikuh cih,’ a cipaw kha pawtemou accing vae cih?” a cipya.⁵⁵Tuin ccyh kyakhe Jesu nynh ccungccaw zapi kha, “Kae hynh miruh hawte kyng khylan thaloi te, tungbang te nae ccianua oh tou? Beikinn kya ka haung zah nin takyh kae ccangpya lya oh ze nae kyng khyh oh.⁵⁶Thuasalama profeh hae kya-e Ccathyaa accing nawlan nynh hynh-e balyn hynh acyiku,” a cipya hae. Tetuh zuitu hae balyn nynh amaw kha cciataw hae zah a ccuetaw vae hae. Ranpibawi Lupi malang Jesu (Mar 14.53-65; Luk 22.54-55, 63-71; Joh 18.13-14, 19-24)

⁵⁷A kyngtu hae nynh Jesu kha kawbya sazae hae te piccan hae a sueluakunaw hae ranpibawi lupi Kaiafas kalan a cciakhae hae.⁵⁸Peter nynh ranpibawi lupi maepaw kyacia asawnaw te amaw kha a zui; maepaw langkhe teebua zah nyathyakou pawtemah yn cyiku cipaw muih khylan rhawviatu hae kyakhe a haungbua.⁵⁹Ranpibawi lepaw hae te kungsi hae balyn nynh Jesu kha chia khylan ahme leipaw ccaekia kha a ccungpya hae,⁶⁰thuasalama muih khyh hae; ahme leipaw ccaekia patae oun thua hae zemah a seinaw kha muih khyh hae. Nyathyakou kya ahme leipaw ccaekia lu ning oun thua hae zah,⁶¹“E paw nynh, ‘Pachia beikinn hynh ka phou cih zah nin thum lungkhu ka sakthui kho cih,’ a ci,” cite a ho hae.⁶²Ranpibawi lupi nynh thadyn zah Jesu kha, “Kaw kheit san na khung khyh hae rei, ccaekia ae khangnua hae paw hynh pawtemou athua?” a cipya.⁶³Thuasalama Jesu tuh yccae khyh. Te ranpibawi lupi nynh, “A hiinpaw Pachia min phyate thyalawkute bya na kinkuh cih; nang hynh Pachia Ccapaw Messiah na thua tou, na thua khyh tou oun hopya tua,” a cipya.⁶⁴Jesu nynh, “Nang nynh phe na ho vae latu. Thuasalama kae hopya oh,Atu koute Ccungccaw Ccapaw tuhAlesaepaw a ranglanga haungpaw te vaawlang emaeking kyate yn rungpaw khanae muih cih oh,” a cipya.

⁶⁵Te ranpibawi lupi nynh a boeining kha seii zah, “Pachia saryanaw bya kha a ho vae! Ccangpaw ccaekia ho vae khyh. Pachia saryanaw bya a hopaw kha atu phe na thae vae oh.⁶⁶Pawte na tua oh?” a cipya hae. Minmin nynh, “Aning tuh chi lan accan,” a ci hae.⁶⁷Te a mae kha thoi hae zah a thung hae, abang nynh mih kuihphe te bia hae zah,⁶⁸“Messiah, hummou ae bia? Profehbya te oun hopya tua!” a ci hae. Peter nynh Jesu A vua (Mar 14.66-72; Luk 22.56-62; Joh 18.15-18, 25-27)

⁶⁹Peter tuh atolang maepaw kya a haung lyakhe ryalawpahtunung lu kheit nynh a kalan yn cceih zah, “Nang hynh mah Galilee paw Jesu ryte na umkheih oh paw khaw?” a cipya.⁷⁰Thuasalama Peter nynh mih balyn malang khe pheikuh zah, “Paw kong nynh na ho cipaw ka nyh khyh,” a cipya.⁷¹Te Peter tuh maepaw sakoih kalan he a cceih te, ccangpaw ryalawpahtunung nynh muih zah tuin kya a um hae paw kyakhe, “E paw hynh Nazareth paw Jesu ryte a umkheih hae paw nynh thua,” cite a hopya hae.⁷²Thuasalama Peter nynh thyalawkute, “Tuh-e paw tuh ka nyh khyh,” cite bua a pheiku.⁷³Sosoh acih te tuin kya a thadyn hae paw nynh Peter kalan oun thua hae zah, “Thanccingte nang hynh mah minmin kya a mungkuh buapaw lu kheit nynh na thua, pawccecize na byange nynh phe ae phy,” a ci hae.⁷⁴Peter nynh, “Tuh-e paw tuh ka nyh khyh,” cite thyalawkuh zah bya a kinku. Tuh ccyh lyakhe aw yn khua vae.⁷⁵Jesu nynh, “Aw a khua mawze vae thum cia nae vua cih,” cite a hopyapaw bya kha Peter nynh a liathui vae. Te atolang pou zah thawmawte a rah. Pilat kalan Jesu Cciakhaenaw (Mar 15.1; Luk 23.1-2; Joh 18.28-32)

¹Awkhua takaw khe ranpibawi lepaw hae te piccan hae balyn nynh Jesu kha chia lante khua a khan hae.²Jesu kha a he kou hae te cciakhae hae zah ram uktu Pilat kalan a pya hae. Judas nynh Amaw A Chiaku

³Jesu a pheetupaw Judas nynh Jesu kha chia lan seibe vae hae cipaw he a nyh tuh ngaesikuh zah ngunphua sung thum kha ranpibawi lepaw hae te piccan hae kalan bua ccyng zah,⁴“Seinaw a hoi leipaw ccungccaw chii kha ka pheepaw tuh phe ka sei vae,” a cipya hae. Minmin nynh, “Tuh-e tuh kaening te pawmou asekuh? Na ry hawte la cyih,” a ci hae.⁵Judas nynh ngunphua tuh beikinn lungkhu dae vua zah a cciataw; te cceih zah amaw te amaw a nging okuh zah a chih.⁶Te ranpibawi lepaw hae nynh ngunphua kha khuin hae zah, “E phua hynh chiise mee athua keiccuze Beikinn sisua ccynaw kya nung lan ccan khyh,” a ci hae.⁷Minmin nynh khuakhan hae zah ramccang hae uu nawlan cite ang raetupaw loo kha tuh-e phua te a re hae.⁸Tukeiccuze tuh-e loo tuh, ‘Chii Loo’ cite atunin cia a ko hae.⁹Tuhcite profeh Jeremiah nynh, “Israel ccungccaw hae nynh amee a khya hae paw ccungccapaw mee ngunphua sung thum kha lah hae zah,¹⁰Bawipaw nynh kaw yn pya thyhte tuh-e phua tuh ang raetupaw loo mee lang a pya hae,” cite a hopaw bya tuh yn ccing vae. Pilat malang Jesu (Mar 15.2-5; Luk 23.3-5; Joh 18.33-38)

¹¹Jesu tuh ram uktu malang thadyn zah ram uktu nynh, “Nang hynh Judah hae Siapharan na thua tou?” cite a khia. Jesu nynh, “Na ho hawte nynh thua,” a cipya.¹²Thuasalama ranpibawi lepaw hae te piccan hae nynh amaw kha seibe hae zah kaw kheit san khung khyh hae.¹³Pilat nynh, “Minmin nynh seinaw patae ae be hae paw tuh na thae khyh tou?” a cipya.¹⁴Jesu nynh bya kaw kheit san khung khyh, tukeiccuze ram uktu tuh myarya a ngaeangthua. Jesu Chia lan Byapia hae (Mar 15.6-15; Luk 23.13-25; Joh 18.39—19.6)

¹⁵Kawtaw Poi vae ze ccungccaw zapi nynh pousah lan a ry hae paw thongccahpaw lu kheit kha ram uktu nynh leih a sawpya hae.¹⁶Tuh ccyh lyakhe Barabbas a ci hae paw a minthaanpaw thongccahpaw lu kheit a um.¹⁷Tukeiccuze ccungccaw zapi tuh he oun pumkuh hae te Pilat nynh minmin kha, “Nanning nynh hummou nae sawsah ry oh? Barabbas tou, tuhkhyhze Messiah cikuhpaw Jesu tou?” cite a khia hae.¹⁸Pawccecize ranpibawi lepaw hae nynh mih eiung keiccu nynh Jesu kha a ap hae cipaw Pilat nynh phe a ny.¹⁹Pilat tuh byapianaw tungkhung vawlan he a haung tuh, a zu nynh ccungccaw yn saw zah, “Khah-e midingpaw kha pawpaw mah la cyih nan; pawccecize khah-e paw keiccuze atazi ka maan kya myarya ka teing,” cite bya a taw.²⁰Ranpibawi lepaw hae te piccan hae nynh Barabbas a lue nawlan ngia lan zah Jesu kha chiasah lan cite ccungccaw zapi kha a hyy hae.²¹Ram uktu nynh, “Hynh-e lu ning hae kyaze hum hynh mou nae hanlan nae sawsah ry oh?” cite minmin kha a khia hae. Minmin nynh, “Barabbas,” a ci hae.²²Pilat nynh, “Tuhteze Messiah cikuhpaw Jesu hynh pawtemou ka cyih cih?” cite a khia hae. Minmin balyn nynh, “Aning tuh vaelantung kya khiade thua sah,” a ci hae.²³Te ram uktu nynh, “Pawccemou, paw seinaw mou a rae?” cite a khia hae. Thuasalama minmin nynh, “Aning tuh vaelantung kya khiade thua sah,” cite houh a sia hae.

²⁴Pilat nynh pawpawte mah ka tae kho vae lan khyh hae, keisukeilae houh yn um vae cih hae cipaw kha he a muih tuh tui kha lawkuh zah ccungccaw zapi malang a kuih kha singkuh zah, “E midingpaw chiise kyahin kae tuh ka thyaa, e tuh naemaw nynh cyih oh,” a ci.²⁵Ccungccaw balyn nynh, “E paw chiise tuh kae tungvaw te kae ccaaw hae tungvaw kya ccah vae sah,” a ci hae.²⁶Te Pilat nynh Barabbas kha mih kalan a sawpya hae. Jesu kha buasah hae zah vaelantung kya khiade lan a ap vae. Rhawkaw hae nynh A Sarya hae (Mar 15.16-20; Joh 19.2-3)

²⁷Te ram uktu a rhawkaw hae nynh Jesu kha ram uktu inn langkhe cciakhae hae zah rhawkawphu phu kheit kha abalynte Jesu pe khe a pum hae.²⁸A boeining kha phae hae zah boei sepaw kha a zingsaku hae.²⁹Hinpaw kha lukhung lang a khepah kou hae te a lu vawlan a khungsah hae, a ranglang kuih kya phaeku kha a ccyngsah hae; a malang khe mih ccukharutung hae zah, “Judah hae Siapharan tuh a she sae vae sah!” cite a sarya hae.³⁰Mih tuing te a thoi hae, phaeku kha lawkuh hae zah a lu kha a bua hae.³¹Jesu kha a sarya kou hae te boei sepaw kha khah hae zah amaw a boeining kha bua a lawsahku hae, te vaelantung kya khiade lan a cciakhae hae. Jesu Khiadenaw (Mar 15.21-32; Luk 23.26-43; Joh 19.17-27)

³²Minmin nynh a ccia lya hae khe Sairen khuapaw Simon cikuhpaw kha he muih hae tuh Jesu vaelantung kha puih lan a riase hae.³³Luru Hmin a ci hae paw Golgotha cikuhpaw hmin kya he a thua hae te,³⁴akhahpaw te apykuhpaw misutui ariapaw kha nia lan a pya hae; Jesu nynh taangtua zah neih ry khyh.³⁵Jesu kha vaelantung kya a khiade kou hae te, a boeining kha ccungthydungte a neeku hae;³⁶tukoute tuin kya haung hae zah Jesu kha phang a ngaw hae.³⁷“E paw tuh Judah hae Siapharan Jesu nynh thua,” cite sei a benaw hae paw ccaw kha zei hae zah a lu luki khe a taw hae.

³⁸Damiah hae lu ning kha Jesu ryte a ranglang lu kheit, a voilang lu kheit vaelantung kya a khiade hae.³⁹Laanpi kya a cceih bungthung hae paw nynh amaw kha a sarya hae, mih lu thuhpah hae zah,⁴⁰“Beikinn kha phou zah nin thum lungkhu a sakthuipaw nang, namaw te namaw kha khumku tua! Pachia Ccapaw na thua ze vaelantung kyate yn rungtua!” a ci hae.⁴¹Tuhawte kawbya sazae hae, piccan hae te ranpibawi lepaw hae nynh mah sarya hae zah,⁴²“Aning nynh ming hae ze khum hae zah amaw ze khumkuh kho khyh. Aning tuh Israel Siapharan nynh thua; atumaw vaelantung kyate yn rungtua sah lah amaw kha kae zyn cih.⁴³Aning tuh Pachia kha a doliakuh, Pachia nynh a ry ze atumaw luesah tua sah; pawccecize, ‘Kae tuh Pachia Ccapaw nynh ka thua,’ a ciku,” a ci hae.⁴⁴Amaw ryte vaelantung kya a khiade hae paw damiah hae nynh mah tuhawte a saryabua hae. Jesu A Chih (Mar 15.33-41; Luk 23.44-49; Joh 19.28-30)

⁴⁵Ninthuccynglyn kyate zete suimilan ccangthum cia ram balyn tuh pong amoh.⁴⁶Zete suimilan ccangthum loukaw khe Jesu nynh, “Eli, Eli, lama sabakthani,” cite thawte a sia. Asuilan tuh, ‘Ka Pachia, ka Pachia, pawccemou nae vua?’ cipaw nynh thua.⁴⁷Tuin kya a thadyn hae paw abang nynh tuh-e tuh thae hae zah, “E paw nynh Elijah kha a ko,” a ci hae.⁴⁸Minmin lakuze lu kheit nynh ccue kangmaw zah boeipuepaw kha lah zah misutui ariapaw kyakhe a dung koute ccungngue dung khe heede zah nia lan a pya.⁴⁹Tuhlae hae nynh, “Umtua hin, e paw khum khylan Elijah tuh yn thua ta, yn thua khyh ta dotua hin oh sih,” a ci hae.⁵⁰Jesu tuh thawte bua a sia koute a hy athang vae.⁵¹Tuh ccyh lyatuin beikinn lungkhu a zo hae paw boei tuh alu te alia cia zung ning lang aseiikuh. Innrysuekuh zah lungpi hae akoi.⁵²Shaw hae hungkuh zah a ih hae paw mithyaa hae pyn patae tuh a thoo hae.⁵³Jesu a thoothui koute shaw hae kyate oun pou hae zah khua thyaapaw lungkhu lang tee hae zah ccungccaw patae kya a langkuh hae.⁵⁴Jesu a rin hae paw rhawbawipaw te a umkheih hae paw nynh innry asuekupaw te acyihkuhpaw balyn kha he a muih hae tuh myarya rih hae zah, “E paw tuh Pachia Ccapaw ccaccing nynh thua,” a ci hae.

⁵⁵Galilee ram kyate Jesu kha bawm hae zah a zui hae paw nopi hae patae mah tuin kya umbua hae zah arua te a dobua hae.⁵⁶Tuh-e hae kyakhe Magdala khuanung Mary, James te Josef mih nung Mary te Zebedi ccaaw hae mih nung mah a umbua hae. Jesu Rhua Ccynaw (Mar 15.42-47; Luk 23.50-56; Joh 19.38-42)

⁵⁷Zetesang tuh Arimathea khuapaw a min Josef a ci hae paw mihoipaw yn thua, aning tuh Jesu zuitupaw nynh athuabua.⁵⁸Tuh-e paw nynh Pilat kalan cceih zah Jesu rhua kha a ngia; Pilat nynh Jesu rhua kha Josef kalan pya lan kaw a pya hae.⁵⁹Josef nynh Jesu rhua kha lawkuh zah athyaapaw boei rawpaw nebaleihpaw te a lung,⁶⁰amaw shaw lang cite lung a karynkupaw shaw thawpaw kyakhe a uu; tukoute myarya lepaw lung kha tounua zah athuhfu lang a hu koute a cciataw.⁶¹Te Magdala khuanung Mary te ccangpaw Mary tuh shaw te ahawiliakuh lante tuin kya a haung hae. Shaw Rhawvia hae

⁶²Paccynku nin koute, awkhualan nin kya ranpibawi lepaw hae te Farasi hae tuh Pilat malang sueluakuh hae zah,⁶³“Bawipaw, e mihynpaw nynh a hiin lyaze, ‘Nin thum koute ka thoothui cih,’ cite a hopaw kha kae syntaw.⁶⁴Tukeiccuze nin thum abia makhia shaw kha varyng rin lan kawpya hae, tuhkhyhze tuh a zuitu hae nynh khuazi khe oun cceih cih hae zah phe oun ruh cih hae, te ccungccaw hae kha, ‘Aning tuh chinaw kyate phe thoo vae,’ oun cipah cih hae; tukeiccuze nyathyakou e hynbya tuh masaty e laeze houh yn seihua vae cih,” cite a hopya hae.⁶⁵Pilat nynh, “Rhawviatu rhawkaw hae phang na hoi oh, la cceih oh lah na cyi kho oh thyhte shaw kha la khynsah oh,” a cipya hae.⁶⁶Tukeiccuze cceih hae zah lung kha tazeih a khia kou hae te rhawviatu hae kha nungsya hae zah shaw kha a ngawsah hae. Jesu Thoothuinaw (Mar 16.1-10; Luk 24.1-12; Joh 20.1-10)

¹Sabbath nin koute lonaw naw kheit kyaze masaty nin awkhua khuadaetakaw khe Magdala khuanung Mary te ccangpaw Mary tuh shaw do lan a cceih hae.²Vaekheihmawte myarya rupaw innry yn suekuh; pawccecize Bawipaw vaawpaw nynh vaawlang te yn rung zah shaw athuhfu kha a nue koute a vawlan khe a haung.³A muinsan tuh khozaw te lokuh zah a boeining tuh vuiraw hawte araw.⁴Shaw a rintu hae tuh tuh-e paw raw a ri hae keiccuze thyngkuh hae zah, kharouh chihpaw hawte nynh athua hae.⁵Vaawpaw nynh nopi hae kha, “Rih nan oh, nanning nynh a khiade hae paw Jesu kha nynh na ccung oh cipaw ka ny.⁶Aning tuh hein kya um vae khyh, a ho hawte a thoothui vae. Rang oh lah a ccynaw hae hmin hynh oun dotua oh.⁷Arangte la cceih oh lah a zuitu hae kyakhe, ‘Aning tuh chinaw kyate a thoothui vae; Galilee ram lang nae malang phe cceih vae cih, tuin kya amaw kha na la muih cih oh,’ cite la hopah oh. Nanning kha kae hopya vae oh,” a cipya hae.⁸Tukeiccuze nopi hae tuh ri biate, lungtuanaw alepi te shaw kyate rangsakute cceih hae zah a zuitu hae kha hopya khylan a ccue hae.⁹Tualeipite Jesu nynh minmin kha yn tungkuh hae zah, “Nae kya daenaw um sah!” a cipya hae. Minmin nynh amaw kalan cceih hae zah a ccu kha pom hae zah a beik hae.¹⁰Jesu nynh minmin kha, “Rih nan oh; cceih oh lah ka uno hae kha Galilee lang ccia lan la hopah oh, tuin kya minmin nynh kae kha yn muih cih hae,” cite a hopya hae. Shaw Rintu hae kyate Thaesahnaw

¹¹Tuh-e nopi hae a ccia lya hae khe, shaw rintu hae abang nynh khuapi lungkhu lang cceih hae zah acyihkuhpaw balyn kha ranpibawi lepaw hae kya a hopya hae.¹²Ranpibawi lepaw hae tuh piccan hae ryte tungkuh hae zah khua a khan kou hae te, rhawkaw hae kha phua patae pya hae zah,¹³“Nanning nynh, ‘Khuazi marya kae itheih lyakhe a zuitu hae nynh oun cceih hae zah a rhua kha phe ru hae,’ nae ci cih oh.¹⁴E kong hynh ram uktu nynh yn thae ze kaemaw nynh kae soihbia cih zah vawsaw kae tungsah lan khyh oh,” cite a hopya hae.¹⁵Tukeiccuze minmin nynh phua kha lawkuh hae zah a hopya hae thyhte a cyi hae; e kong hynh Judah hae nynh atunin cia a ho ung hae. Zuitu hae Ryalaw Nawnaw (Mar 16.15-18)

¹⁶Zuitu hae lu haw lae kheit tuh Jesu nynh a hopya sya hae paw Galilee ram e mua langkhe a cceih hae.¹⁷Amaw kha he a muih hae te a beik hae; thuasalama abang tuh lunghiinnaw a hoi hae.¹⁸Jesu nynh yn thua zah, “Vaawlang te laephi vawlan e kawhoinaw balyn tuh kamaw kalan pya athua vae.¹⁹Tukeiccuze la cceih oh lah minphuin hae balyn kha zuitu lang la rae oh, Paaw, Ccapaw te Thyaa Muisaw min te baptisma la pya oh.²⁰Kaw kae pya oh paw balyn kha a zui nawlan hae la ccangpah oh; laephi she athang cia nae kya tyty ka um,” cite a zuitu hae kha a hopya hae. Amen.

Bible Society of Myanmar

https://app.library.bible/content/1a340f5ae072b2f4