JONAH1
Pachia kyate Ccue lan A Zuaku
1Bawipaw bya tuh Amittai ccapaw Jonah kya yn thua zah:2“Nineveh khuapi kalan khe cceih kangmaw lah, siatua; pawccecize mih hoyleinaw tuh ka malang phe yn thua vae,” a ci.3Thuasalama Janah tuh Bawipaw kyate ccue khylan Tarshish khua lang a thokuh. Joppa khua lang cceihbung zah Tarshish khua lang a cceih cih paw sanphalung ccangkheit kha a muih; sanphalung ccikunaw mee kha pya zah sanphalung vawlan a kae, Bawipaw kyate asawkunaw lang minmin ryte Tarshish khua lang a cceih hae.4Thuasalama Bawipaw nynh myarya rupaw khisan kha rili vawlan zawsah zah, rili vawlan khe athawsaepaw khise tuh tho zah, sanphalung tuh vyavya aroh vae.5Tetuh sanphalung kya ryalahtu hae tuh rih hae zah, mih pachia raveih kalan a sia hae. Sanphalung tuh azawhua ccaw cite a lungkhu e uccaw hae kha rili lungkhu lang a vua hae. Tuh lyatuin Jonah tuh sanphalung alia khaan ane huanaw langkhe rungbung zah zya a ih.6Sanphalung bawipaw nynh yn cceih zah, “Pawccemou thuhbabi lan na i? Thokuh lah, na pachia kalan sawsang! Na pachia nynh aening ah chi khyh nawlan oh tuapyate oun luesah kho khaw,” a cipya.7Sanphalung kya ryalahtu hae nynh, “Rang oh, e vawsawnaw hynh ahum keiccu mou ah tung oh cipaw ny nawlan ccungthyhdung oh sih,” cite a hoku hae. Ccungthyhdung hae zah, Jonah tungvaw accah.8Tetuh minmin nynh Jonah kha, “E vawsawnaw hynh pawccemou aening tungvaw accaw, oun hopya tua. Paw rya mou na law? Tei kyate mou nae thua? Tei ram paw mou na thua? Paw minphuin mou na thua?” a cipya hae.9“Kae tuh Hebru ccungccaw nynh ka thua, rili te laephi a raetupaw vaaw Pachia, Bawipaw kha a beikpaw nynh ka thua,” a cipya hae.10Tetuh minmin tuh myarya rih hae zah, “Pawccemou hynhte na cyi?” cite a khia hae. Pawccecize Jonah nynh Bawipaw kyate a ccuepaw kha a hopya vae hae keiccuze minmin nynh a ny vae hae.11Te rili tuileih tuh houhouh atho keiccuze minmin nynh Jonah kha, “Rili tuileih adae nawlan nang hynh pawtemou kae cyih cih?” a cipya hae.12Jonah nynh minmin kha, “Kae hynh yn hang oh lah, rili lungkhu lang yn vua oh; tetuh rili tuh zya adae vae cih; pawccecize e athawsaepaw khise na tung oh paw hynh kae ka keiccu nynh thua cipaw ka ny,” a cipya hae.13Sanphalung kya ryalahtu hae nynh varang lang a thua ccaw cite sanphalung kha thawte a zaw hae, thuasalama khise tuh houhouh atho keiccuze cyih kho khyh hae.14Tetuh minmin nynh Bawipaw kalan sia hae zah, “Pou Bawipaw , e ccungccapaw hiinnaw keiccuze kaening hynh beih oun theih nan, seinaw a hoi leipaw chiise keiccuze kae tungvaw kya seinaw kha beih khang nan. Pou Bawipaw , nang tuh na ry hawte na cyi, cite saw kae sang,” a ci hae.15Te Jonah kha hang hae zah rili lungkhu lang a vua hae; tetuh rili tuileih tuh zya adae vae.16Te sanphalung kya ryalahtu hae nynh Bawipaw kha houh rih hae zah, Bawipaw kalan silawnaw rae hae zah, byakinkunaw kha a rae hae.17Jonah kha po laang khylan Bawipaw nynh ngasawpi tuh kawpya zah, Jonah tuh ngasaw vue lungkhu khe nin thum te zi thum a um. Jonah Sawsangnaw1Jonah nynh ngasaw vue lungkhu te Bawipaw a Pachia kalan saw a sang:2“Ka vawsawnaw lungkhu teBawipaw kha ka ko zah,aning nynh yn leih;Michi khua lungkhu te ka sia zah,ka roi kha nae thaepya.3Akhunaw, rili ngaelung langkhenae vua zah,tui alepaw nynh kae kha yn koihlu;na tuileih hae te nae tuiphue tuhka vawlan khe popo alua hae.4Tetuh kae nynh, ‘Kae tuhna muihnaw kyate vua ka thua vae;pawtemou na beikinn thyaapaw khabua ka muih ung cih?’ ka ci.5Tui nynh yn husung zah,akhupaw rili nynh yn koihlu;rili lungkhu e lonua hae nynhka lu kha yn voi hae.6Mua hae leihpaw langkheka rungbung zah,a koikua ccong a khawzungzaepaw ram kya ka thua;tuhzemah, pou Bawipaw ka Pachia,ka hiinnaw khaHunghuapi lungkhu kyatepoh nae thuaa.7Ka hiinnaw vyavya athang lyakhe,Bawipaw kha ka liathui;ka sawsangnaw tuh namaw kalan,athyaapaw na beikinn lungkhu lang a thua.8Ccungkia leipaw zohtuh khaa beik hae paw nynh tuhahmepaw mih lungzinaw kha a vua hae.9Thuasalama kae nynh tuhlungtuanaw roisawte,namaw kalan silawnaw ka rae cih;pya lan bya ka kinku vae paw kha ka pya cih.Luenaw tuh Bawipaw kya-enynh thua!” a ci.10Tetuh Bawipaw nynh ngasaw kha hopah zah, ngasaw nynh Jonah kha laerou kyakhe moh a lua vae.Nineveh Lungpaleihkunaw1Bawipaw bya tuh Jonah kalan vae ningnaw yn thua zah,2“Thokuh lah, Nineveh khuapi kalan cciatua, kae hopyapaw bya kha siakhae tua,” a cipya.3Tukeiccuze Jonah tuh Bawipaw bya thyhte Nineveh khua lang a cceih. Nineveh tuh myaryamaw alepaw khuapi thua zah, a lungkhu kya nin thum laanccia acih.4Jonah tuh khuapi lungkhu lang tee zah, nin kheit he a cceih te, “Nin sung pali aro koute Nineveh khuapi tuh aroh cih!” cite a sia.5Nineveh khuaccaaw hae tuh Pachia a zyn hae; looh-aesung lanpaw kha thaesakuh hae zah, adih ale ccungccaw miakaw nynh buriboei kha a zingku hae.6Tuh-e bya tuh Nineveh siapharan nynh he a thae te, a bawitungkhung kyate thokuh zah a angkiccua kha a khahku, buriboei kha zingkuh zah buhhaw kya a haung.7Tetuh aning nynh Nineveh khua kya thaesahnaw rae zah: “Nineveh siapharan te a kuihkaw e bawi hae nynh kaw a tho hae paw tuh: Ccungccaw nynh thuasah, sahiin nynh thuasah, vaetua phu, tuuphu nynh thuasah looh papin ae lan khyh. Looh na ae lan khyh oh, tui mah na neih lan khyh oh.8Ccungccaw te sahiin hae nynh buriboei na zingkuh cih oh zah, Pachia kalan thawte saw na sang cih oh. Nanning balyn nynh ahoy leipaw nae ziazae kyate thuasah, puathote rya na law oh paw kyate thuasah na paleihkuh cih oh.9Aening ah chi khyh nawlan oh, Pachia tuh a tuanaw paleihkuh zah myarya a thinrianaw kha adae kho, dae kho khyh cipaw hummou a nyh kho?” a ci.10Minmin nynh ahoy leipaw mih ziazae kyate paleihkuh hae zah a cyi hae paw kha Pachia nynh he a muih te, minmin tungvaw thuasah lan a ho vae paw vawsawnawpi kong kha Pachia nynh a lungpaleihkuh zah, tuh-e tuh cyih vae khyh. Jonah Thinrianaw1Tetuh Jonah tuh myarya a lunghoy khyh zah a thinria.2Bawipaw kalan sawsang zah, “Pou Bawipaw , ka ram kya ka um lya mawte, ka hopaw kha e hynh thua khyh tou? Atakaw lya Tarshish khua lang ka ccuepaw kha hynh-e keiccu nynh thua; nang tuh thawccih thyapaw Pachia, ngaethyaumsah thyapaw, a lungsaepaw, atynpaw sungsahnaw a hoipaw te detah lanpaw kyate a lungpaleihkuh thyapaw nynh na thua cipaw ka ny.3Tukeiccuze, pou Bawipaw , ka hiinnaw hynh beih yn lawtua, ka hanlan hiin laeze chi ahoyhua,” a cipya.4Te Bawipaw nynh, “Na thinriapaw hynh ahmepaw thua zawtou?” a cipya.5Tetuh Jonah tuh khuapi kyate toikuh zah khuapi nithua langkhe a haung, te tuin kyakhe bu kha a sakku. Tuh-e bu mynlyh kaw khe haung zah, khuapi tuh pawtemah yn cyiku cipaw muih khylan phang a ngaw.6Bawipaw Pachia nynh Jonah kha a lungdae ccaw cite a lu luki kya mynzia umsah khylan tui-ung ku kha Jonah luki khe a umsah; tetuh tuh-e tui-ung ku liate Jonah tuh myarya a lungtua.7Thuasalama awkhualan awkhua takaw khe, Pachia nynh tuh-e tui-ung ku tuh ripaw aesah zah baleih anaan.8Khuanin he yn thua te, Pachia nynh nithua lang e asopaw khisan kha zawsah zah, Jonah lu kha khuanin nynh a e keiccuze a thawbang zah a chi nawlan a ngiaku. Jonah nynh, “Ka hanlan hiin laeze chi tuh ahoyhua,” a ci. Jonah kha Thuiheite Penaw9Thuasalama Pachia nynh Jonah kha, “Tui-ung ku keiccuze na thinriapaw hynh ahmepaw athua zawtou?” a cipya. Te Jonah nynh, “Athua, phe chi lan cia mawte ka thinria,” a cipya.10Tetuh Bawipaw nynh, “Nang nynh tui-ung ku te asekuhte thawbangte rya na lah khyh zah na lesah thung kho khyh; zi kheit lungkhu yn um zah zi kheit lungkhu arohpaw tui-ung ku kha na thindae.11Mih ranglang kuih te mih voilang kuih alaenaw san a nyhthya lei hae paw ccungccaw cciing kheit thong kuin lae te sahiin patae nynh mah a umnaw hae paw Nineveh khuapi kong kha kae nynh thindae lan ccan khyh tou?” a cipya.
Bible Society of Myanmar