Bab-Dummad, Israel-dulemar-susad
1Cristoʼgi napira an soged, an gakansasulid. Degine, Bab-Dummad-Burba-Isligwaled an-ulubgi anga sogbalid, an napira ibmar sogye.2An-Israel-dulemar bela Cristoʼba naisurmarsoggu, a-ular, an nue-bukib-binsadiid. An-gwagegine, nue-nunmak an itodibalid.3Ar an-sunnad an-gwenadgan-ablis-emalad-sabed-ulale, an ukabsales-gudisunnana gadin. Ar sogledibe, amar-abonolegegala, Cristoʼgi be banguergebye, an Cristoʼgi bangusaled, adi, an-gwenadgan nabir abonolegegar.4Ar wemar Israel-dula gumalad. Ar Bab-Dummad, amar na e-mimmiga imaksad. Amar-abargi na e-gangued-yeerdaklegedba gudii gusad. Amarbo, Bab-Dummad igarmar-mesisad. Amarga Moisés-Igar uksad. Bab-Dummad-nug-odummoged-igar ega uksabalid. Degine, amarga sogsabalid, an napira bemarga ibmar ukoye.5Ar Israel-dulamargi anmar-dadgan-gebe-negsesmalad danikid. Geb degine, anmar-Israel-dulemargi Cristo sanar danimogad. We-Cristo Bab-Dummad-sunnadid, degine, bela-ibmarmar-e-dummadga maibalid. Cristo-nug birga-irba degisadegu ogannolesun. Ar deyobdo.6Israel-dulemar Cristo-abingassursoggu, we soglesulid, Bab-Dummad-sunmaksadba we-ibmar gussurdeeye. Ar ade, Israel-dulemar, belagwapa Israel-wagan-sunnadsurmalad.7Deginbali, Abraham-wagan-guedbali soglesulid bela Abraham-waganga guye. Suli. Unnila Bab-Dummad sogsad:“Be-machi-Isaacʼgine be-waganye soglegoye.”Génesis 21:128Weyobsundo: Bab-Dummad-mimmi-guedi, Abrahamʼgi-gwalulesadba Bab-Dummad-mimmi-gudeeye soglesulid. Ar ade, Bab-Dummad Abrahamʼga sogsagusad, machi-wargwen an bega ukoye. A-machigi-danimaladi, amar Abraham-wagwaga gunonimalad.9Ar Bab-Dummad weyob Abrahamʼga sogsad:“Baid-birgase gannar an bese nonibaloed. A-ibagangi, be-ome-Sara bato susugwa-nika gudioed.”Génesis 18:10, 1410Ar webisurdo. Rebeca-machimala-warbogwad na bab-gargwenad nikusmalad. We-bab, anmar-dad-Isaac gued.11Amba yoo masmala-warbogwad gwalulemargua, amba yoo neg-wisgumargua, ibu ibmar-nuedi, ibu ibmar-isgana, Bab-Dummad e-sogedba dule-suedgi bato we-masmala-wargwen susad. Degisoggu, Bab-Dummad dule-ibmar-imakedgi dule-susulid.12Degi-inigwele, Bab-Dummad Rebecaʼga sogsad:“Ia, urba-sogedba nanadii guoed.”Génesis 25:2313Ar igi-Bab-Dummad-Gardagi narmakar naibali:Bab-Dummad sogsad: “Jacob bur an sabgusad.Esaúʼdi an isdar-daksad.”Malaquías 1:2-314Degite, ¿igi an sogmalosunna? ¿Bab-Dummad igar-innikii imaksurye? Suli, gege an degi-sogmalad.15Ar Bab-Dummad Moisésʼga sogsad:“Doa an wiledakbie, an wile dakoed.Degi, an wiledakedba an doa bendakbie, an bendakoed.”Éxodo 33:1916Ar degisoggu, Bab-Dummadse-sulegedi, dule-ibmar-abegedbarsulid, dule-ibmar-imakedbarsurbalid. Bab-Dummad na wile-dule-dakedba dule-sued.17Ar Bab-Dummad-Gardagi narmakar naid, deun Bab-Dummad Faraónʼga sogsagusgu:“A-ulale, dummadga an be-imaksad, adi, begi an-gangued an oyogegar,degine, bela we-napneg-naidgi an-nug ogannomalagar.”Éxodo 9:1618Degisoggu, Bab-Dummad ar doa wile dakbie, a-wile-dakodo. Degine, doa uayasuli imakbie, a-uayasuli-imakodo.19Ar dule anga sogele: “Degite, ¿ibiga Bab-Dummad anmar-isgudiidba amba anmargi atakosunna? ¿Ar doa Bab-Dummad-e-ibmar-imaked-abegedgi gwisguosunna?”20An we-dulega weyob sogoed: ¿Ar doa na be itoge, emide, be Bab-Dummad-abin-imaknagu?“Ar napsa-metega-sobaled, dule-e-sobsadga sogosi:‘¿Wede ibiga deyob be an-sobsa?’ ”Isaías 29:16; 45:921¿Ar dule-napsa-sobed, wede na e-itolegedba geg napsa-imaksi? Ar sunna we-napsa-mete-ibmar-nued-ebulegega sobed, degine, sunna napsa-mete-ibmar-baisurmalad-ebulegega sobbalid.22Deyobi, Bab-Dummad e-sogedba ibmar imaksamogad. Bab-Dummad dulemar-sabsur-odurdakoye-sogsad-oyogegala, degi, e-gangued-sabsur-oyobaligala, dulemar-odurdaklegoenadgi mer e-urwed-oyogegala, na bargaagwar gudii gusad. ¿Doa Bab-Dummadga sogosunna, mer deyob imakye?23Deginbali, Bab-Dummad e-gangued-yeerdakleged-yaisur-nikad-oyogega, degi, e-sabgued-dummarba-nikadi, anmargi ise-oyoar imaksad. Ar Bab-Dummad, iduakwaa wile anmar-daksad, degine, guakwaa anmar-urbisad, adi, eba-gudii gumalagar.24We-dulemarse Bab-Dummad-gochadi, sogleged, anmarse-gochaye. Unnila anmar-Judíoʼmarsebi gochasulid, Judíoʼsurmaladse gochamogad.25Ar Bab-Dummad Oseas-gardagi, deyob sogsad:“An-dulasurmaladse, an-dulamarye an gornonikoed.An sabed-egi-niksulidse, an-sabesailadye an goloed.”Oseas 2:2326Deginbali, Oseas-gardagi sogbalid:“Bia e-annik soglesa, ‘an-neggwebursulidye,’agine, ‘Bab-Dummad-dula-maid-e-mimmiganye’ bilenonikoed.”Oseas 1:1027Amba Isaías Israel-dulemargi sogmogad:“Ar Israel-dulemar ukub-demar-gakaba-naidyob merguen-inigwele,unnila ichee wis gwabgumaloedbi abonolemaloed.28Ar Bab-Dummad e-igar-nabogedgi e-Igar-Mesedi,we-napneggi gwae-gwaegwadgi bela imakedsegad.”Isaías 10:22-2329Degine, Isaías idu weyob sogsagusbalid:“Ar Bab-Dummad-Bela-Gangued-Nikad, anmarga anagan-obessulina,Sodoma-dulemaryob anmar gumogoenad,Gomorra-dulemaryob anmar obelolemogoenad.”Isaías 1:9Israel-dulemar Babgi-bengusmalad
30Degite, ¿igi an sogmalosunna? Ar Judíoʼsurmalad, Bab-Dummad-isgussuliyob-e-daked-amidisurmalanadi, degite, amismalad. Jesucristoʼgi-bensulidba Bab-Dummad-isgussuliyob-e-daked aminonimalad.31Israel-dulemardi, Moisés-Igar-Maid-imakedba Bab-Dummad-isgussuliyob-e-daked-amidigusmalanad, gwen egi isgussuliyob-dakleged-igar amissurgusmalad.32¿Ar ibiga amissurgusmarsunna? Ar Bab-Dummadgi-bensulidgi amissurmalad. Ar Moisés-Igar-Maid-imakedgi amidii gusmalad. Degisoggu, akwamur-idu-siidgi yoledapmarsundo. We-akwa obaredi, we Cristoʼdo.33Ar weyob Bab-Dummad-Gardagi narmakar naid:Bab-Dummad soged: “¡Be dakmala!Siónʼgi akwamur-dule-egi-gowarmaked an sied,we-akwa-dummad-dule-egi-aimukued an sied.Ar dule we-akwagi bensurgunonikile, egi gwen bingeguosulid.”Isaías 28:16