JOB30cuk_nvs

Job, e-wilenaidba bukib-binsaed

1“Emisgindi, sapingan-burwigana anga alliardamalad.Ar we-sapingan-e-babgana an-achu-sibad-wawaad-edarbemalad-edarbega an imaksasuliled.2Ar anga-arbamarye-sogele, ¿ar ibu wis anga imaksamalale?Ar bar gargangued nikasurmalad.3We-dulemar, neg-mutikidba negsulidganba gaamakdidamalad,ukudmaada gudidamalad, boniganba galitodidamalad.4We-dulemar ibmar-gunnegala, gagan-moododba ibmar-gwag wedidamalad,gagan-e-malimarse-bakale, gundii damarbalid.5Neggweburginbela isdar we-dulemar-dakdamalad,atursamaladye gin sogdamalad.6Agala, we-dulemar dian-dinnaganaba gudidamalad,akwa-yaba, degi, ibegan-imbaba gudii damarbalid.7Moli-uayasuid-goledyobi gagan-bulaba gormakdidamalad,degine, ikoganba doge-doge gudidamarbalid.8We-dulemar dule-abelesurmaladid,agala, neggweburgi ononnolesmalad.
9”Emisgindi, aka we-sapinganga an dodogedga gued,amar-oalledga an gued.10Ima an-dakdemalad, deyob-an-dakedbali angi bangudmalad,angi wii-minanai gusdamalad.11Emidi, Bab-Dummad bela-bela mesagwar an-imaksasoggu, dule-an-bendaked-satesoggu,anga bela-bela sabsur-ibmar sognanaid.12Dule-isganamar an-argan-nuedsiki angi noarmalad,an-oitogegala, an-idu dukuar ambikusmalad.Angi-gwisguegala, napa-nakwemai sobsamalad.13An-obelogegala, an-iduar gwisgunonimalad.Dule-bargaed-sate, an-obelononimalad.14Igi bila-onomalad igar-ollo-imaksamaladba danidae,degi, galumar-ese-ailasmalad-birgi danidae,deyobi angi gwisgunonimalad.15Ise an gwayale gusad,an nug-nika bar an itonadsulid,an-bendakleged mogirmar-yoggudeyob berguded.
16”Emisgindi, nue an-san bergudani an itoged,nunmaked-dummad-ibagan an-wionaid.17An-garmarse-bakale, nunumaker an itogusad.Abali, an mutikidba galitomaidaed.Nunmaked gwen anga bergu an itosulid.18Bab-Dummadi dukarba-an-gasagunaiyob an-wionaid.Akus-akus-bunnonaiyob an-imaknaid.19Bab-Dummad olligangi an-barmeted,ukubyobi, degi, buruyobi an-imaksad.
20”Bab-Dummad, an bese gornainad, gwen be an-itosulid.Be-asabinni an gwisgunonikinad, gwen be an-daksulid.21Bab-Dummad, gwen-sabe be an-imaksulid,be-gangued-nikadba be an-baregindiid.22Igi ibmar burwaba-seleddae, deyobi, be an-imaksad.Burwa-oored-dummad-abarse be an-barmeted.23Bab-Dummad, neg-uan-urba be an-semaid an nue-wisid.Dule-burgwisar-seleddaedse be an-semaid.
24”Dule-galakusmaidi, geg be bar sarsoged,dule-suli-suli-itogedgi-bendakleged-egisnaidi, geg be bar wioged.25¿Dule-boniba-galitodimaladba an bonai gussursi?¿Dule-wilemalad an wiledaksasursi?26Anga-ibnued-gued an edarbediidgine, aka ibmar-isgana anga gunonikid.Ibagan-nuegan an edarbediidgine, aka ibagan-isgana anga nagunonikid.27Bane-bane sulibinsa an itodiid,gwen baisur-itoge an gudisulid.Unnila boniganba bane-bane an galitodiid.28An wile-itodiid, an bodiidbiid.Aisaar an, an-dulemarse bendakleged egisnaidaenad,degi, an bendakleged abenaidaenad,gwen an-bendaksurdamalad.29Emide, achu-sapur-e-gwenadganayob an gunonisunnad,irmon-senigan-e-gwenadganayob an gunonisunnad.30An-ukamar bela gudure naded, an-ukamar an-ibe yaas-yaas naded.Uellegedbali an-uka-diopisuli an itoged.31An-gar-arpa-goledi, wilesakwaa gorgusad,an-gar-gammu-goledi, wilesakwaa gorgusbalid.”
expand_more
Search