Bab-Dummad E-Igar-Sogambegwad (10) uksad 1 Bab-Dummad sunmakded, weyob sogded: 2 “Ani an be-Bab-Dummad-Jehová gued. Bemar Egipto-yargi maiga-wilebukmargu, ani an bemar-onosadid. 3 Melle bab-dummad-baid an-asabin be nikumalo. 4 Melle be ibmar-wilubgan sobmalo, nibneggi ibmar-nikad-wilubgandibe, napneggi ibmar-nikad-wilubgandibe, demargi ibmar-nikad-wilubgandibe. 5 A-ibmar-wilubgan-asabin dulluu be imakosurmalad, degine, Bab-Dummadyob ese be golosurmalad. Ar ade, ani an be-Bab-Dummad-Jehová gued. An be-Bab-Dummad gadi-nobguedid. Ar an dule-isganamar-isdarsunna-dakmalad sabsur-odurdakedid. Degi, e-mimmigan, e-wagan, e-wagan-yokorbarmaladsega an sabsur-odurdakbalidid. 6 Ar dulemar-an-sabmaladdi, dulemar-an-Igarmar-Mamaidba-nanamaladdi, an bela-e-waganmar-danimaloed e-ibe nue-sabguedid. 7 Melle be-Bab-Dummad-Jehová-nug yogasaar be obaro. Ar dule yogasaar Bab-Dummad-nug obarisale, a-dule, Bab-Dummad-Jehováʼse sabsur-odurdaklegedsegad. 8 Obunnoged-ibagi be obunnogo, adi, a-ibagi, be Bab-Dummad-e-nug odummogegar. Igi be-Bab-Dummad-Jehová bega Igar-uksa, aba be imako. 9 Ibanergwa (6) be arbaoed. A-ibagangi bela ibmar-imakbied be imakoed. 10 Ibagugledgindi (7), obunnoleged-ibad, be-Bab-Dummad-Jehová-e-nug-odummolegedid. A-ibagi bipisaale be arbaosulid. Be-machi, be-bunagwa, bega-arbaed-machered, bega-arbaed-ome, be-moli-bebe-nikad-alugwasualed, be-moli-uayasuid, be-ibdurgan, a-ibagi, arbaosurmarmogad. Deginbali, dule-be-yarginedsulid be-negyagi-gudiid, a-ibagi, arbaosurmarmogad. Ar obunnoged-ibagi igi be obunnomoga, beyobi bega-arbaed-machered, degine, bega-arbaed-ome, obunnomarmogoed. 11 Ar ade, Bab-Jehová ibanergwa (6) arbasad. A-ibagangi we-ibmarmar obinnisad: Nibneg obinnisad, napneg obinnisad, demar obinnisad, degi, bela agi ibmarmar-bukwadi obinnisbalid. Geb degi, ibagugledgindi (7), Bab-Jehová obunnosad. A-ulale, Bab-Jehová, ibagugledgi (7) ise-nued-binsasad. A-ibagi sogsad, we-iba, iba-islidikidye. 12 Be-daedbali, be-bab-nug-odummodii, degi, be-nan-nug-odummodii be nanamalo. Adi, be-Bab-Dummad-Jehová we-napneg-bega-uknaidgi sereddii be megegar, degi, bela bega ibmar-nueganbi gubaligar. 13 Melle be dule-oburgo. 14 Melle be be-abirginsulid-ebo galagwensuli nanao. 15 Melle be ibmar-atursao. 16 Melle be gakansaar aimargi sunmako. 17 Melle be dule-baid-ibmarbina be sogo: Dule-baid-negbina, dule-baid-omebina, dule-baid-mai-macheredbina, dule-baid-mai-omebina, dule-baid-moli-bebe-nikad-alugwasualedbina, dule-baid-moli-uayasuidbina. Bipisaale dule-baid-ibmarbina be sogosulid.” Israel-dulemar Bab-Dummad-dobee-itosmalad 18 Bela Israel-dulemala e-sunnagwad mar-gollomakmaid itosmargua, degine, gar-trompeta-binnasur-goled itosmarbargua, deginbali, mar-dakarmakmaid daksamarbargua, degi, yar waa-moodo-siid daksamarbargua, Israel-dulemar nue-dobee itodmalad, wawanmakdemalad. Degisoggu, yargi bannabaa ambikusmalad. 19 Agi, Moisésʼga sogdemalad: —Be anmarga sunmake, anmar be-itogoed. Bab-Dummaddi melle anmarga sunmako, abakale, anmar burgwialile. 20 Moisés Israel-dulemar-abin sogded: —Melle be dobgumar. Bab-Dummad bemar-wilubdakega bemarse nonikid, adi, bemar, degisadegu Bab-Dummad-dobee nanamalagar, adi, melle be isgumalagar. 21 Israel-dulemardi, Moisés mogir-guduregedgi-Bab-Dummad-maidse-nadedi bannabaa dakbuk gusad. Bab-Dummadga-ibmar-ogumakar-ukleged-aila-igar 22 Bab-Jehová Moisésʼga sogded: “Israel-dulemarga weyob be soge: ‘Nibneg-akale an bemarbo sunmaksad bato be daksamalad. 23 Melle bemar orgi-ibmar-sobaled, manigi-ibmar-sobaleddibe, be-bab-dummadga anyob be imakmalo. 24 ” ’Bab-Dummadga-ibmar-ogumakar-ukleged-aila-sobega, anga be napa sobmaloed. A-ailagi be we-ibmarmar ukmaloed: Be-sibad-wawaadmar, sibadmar, degi, be-moli-bebe-nikamalad, anga be ogumakar ukmaloed. A-ailagi be anga ibmarmar-ukmaloedi, dulemar-e-isgued-eliedga uklegoed. Deginbali, a-ailagi be anga ibmarmar-ukmaloedi, bemar-anbogwa gwenatigwar-gudii gumalaga, degi, bemar na gwenatigwar-gudii gumalaga uklebaloed. ” ’Bia an-nug ebinsalebi an abegoe, ase an nonikoed, agi ise-nued an begi binsanonikoed. 25 Ar bemar anga ibmar-ogumakar-ukleged-aila-akwa be sobbiele, unnila be akwamar-sobarsulid urbe-urbe be imakmalo, ar ade, bemar, akwa esgorogi sobdele, wede bar ibmar-ogumakar-ukleged-aila-nuedga guosulid. 26 Degine, anga ibmar-ogumakar-ukleged-aila melle arsan-nika imako. Ar bemar agi nakwialile, be-abgan daklego-itole.’ ”