1 Crónicas
29
/
cuk_nvs
Babse-goled-neg-soblegedga ibmar uklesad
1
Rey-David, bela dulemar-igar-itobukwamaladga sogded: “Bab-Dummad an-machi-Salomón ega arbaed-dummad-imakega nug-imaksad. Degi-inigwele, an-machi amba sapingwasoggua, we-ibmar-dummad-imakegala, amba nue ibmar wissulid. Ar neg-soblegoedi, dulega soblegosulid, ar Bab-Dummadga soblegoed.
2
An Bab-Dummadse-goled-neg-sobega ibmarmar-bukidar-onmakega, an dummad-gar-itonai gusad.
An we-ibmarmar onmaksad:
Ormar, ibmar-orbi-soblegoedga,
manimar, ibmar-manibi-soblegoedga,
esgoro-gordikidmar, ibmar-esgoro-gordikidbi-soblegoedga,
esgoromar, ibmar-esgorobi-soblegoedga,
degi, urgomar, ibmar-urgobi-soblegoedga.
Deginbali, akwa-óniceʼye-nugadmar,
akwamar-yeerdaklegedmar,
akwa-sichigan,
akwamar-akar-akar-daklegedmar,
bela akwamar uniryeerdaklemalad, a yeerdaklemalad
degi, akwa-mármol-bukidar ibmar-soblegoedgi ebulegega an urbisbalid.
3
”An Bab-Dummadse-goled-neg nuekwaa sobedgi an binsasoggua, we-ibmarmar-onmaksad-ukine, an ibmarmar-nuegan-nikadgi, an bela ormar-nikadi, manimar-nikadi, Bab-Dummadse-goled-neggala an ukbalid.
An wemar uked:
4
Ofir-yargi-or-danikid, nibir-milidulataled-ilabo-gaka-dulagwen-aidikue-wilub (220,000) an uked.
Manidi, nibir-milidulataled-ilatar-gaka-dulagwen-aidikue-wilub (520,000) an ukbalid.
We-ormar, degi, we-manimar, negmar-galu-birgi nasikegalad.
5
Deginbali, ormar, orbi-ibmar-soblegoedgarbalid.
Manimar, manibii-ibmar-soblegoedgarbalid.
Bela we-ormar, manimar, dule e-argangi ibmar-akar-akar sobegalad.
Bemarmoga, emi-ibagine, ¿doa-dule Bab-Jehováʼga na binsa e-ibmar-ukmogoe?”
6
Degine, geb gwenadgan-e-dummagan,
Israel-e-wagan-sogambe-gakabogwad-e-dummagan (12),
sorda-milibalid-e-dummagan (1000),
sordamar-dulataled-e-dummagan (100),
degi, reyga-nainu-dakmalad-e-dummagan,
na war-wargwengi e-ibmar uksamarmogad.
7
Bab-Dummadse-goled-neggala, weyob-aidiku we-ibmar uksamalad:
Or, nibir-milidulataled-ilapaa-gaka-dulabake gaka dulataled-ilabo (380,200),
mani, nibir-milidulataled-ilagugle-gaka-dulabo-gakambe (750,000),
esgoro-gordikid, nibir-miyon-gwensak gaka milipaa-gaka-dulabo-gakambe (1,350,000),
degi, esgoro, nibir miyon-gwensak gaka mili-dulataled-ilagugle-gaka-dulabo-gakambe (1,750,000) uksamalad.
8
Dulemar bela akwa-nuegan-gargermalad-nikamalad Gersón-wagwa-Jehielʼga uksamalad. Jehiel, Bab-Jehováʼse-goled-neggi ibmar-gargermalad-akwediid.
9
Deyobi, dulemar na war-wargwengi ibmar-uksamaladba yeer-itosmalad, ar ade, Bab-Jehováʼga bela-bela na weligwaledba uksamalad.
Rey-David Bab-Jehováʼse gochad
10
Degidbali, Rey-David nue-yeer-itosmogad. Geb, David, bela dulemar-danar-bukwad-asabin Bab-Jehová-e-nug-odummonai gualid. Weyob sogded:
“Bab-Jehová, be-nug odummolesun,
be anmar-dad-Israel-e-Bab-Dummadid.
Degisadegu, be-nug odummolesun.
11
Bab-Jehová, bebi gargangued nikad,
begi dule obinmaisulid.
Bebi be emargi obinmaid.
Be-nugbi dummarba-maid,
Bela be neg-gani maid.
Bela-bela be yeerdakle maid.
Ar bela nibneggi-ibmar-nikadi, bela begadbiid.
Ar bela we-napaneggi-ibmar-nikadi, bela begadbiid.
Bab-Jehová, napneg-dirbir-naidgi bela be negdakmaid.
Bee, be bur dummadga maid.
12
Begi bela ibmar-nuegan-gargermalad danikid.
Begi bela nug-dummarba-gued danikid.
Bela be negsemaid.
Beginbi unnila gargangued maid.
Ar be emar-ogannomaid,
ar be dule-odummomaid.
13
Anmar-Bab-Dummadye, agala, anmar bega dog-nuedye sogbalid,
degine, be-nug-dummarbamaidgi anmar be-nug-odummogega namakbalid.
14
”Degi-inigwele, ¿ande doasunna?
¿An-dulamarde, doamarsunna?
Emide, nabir ibmar-bukidar bega ukye soged.
Ar anmardi be-anmarga-ibmar-uksad, gannar anmar bega uknaid.
Ar bela be ibmar-e-ibedid.
15
Ar anmar be-asabinni, we-napneggi negsuli an gudimalad,
anmar-dadgan-nanadii gusmaladyob, yar-obak-obak an gudimalad.
We-napneggine, anmar-ibagan burwa-nasayob unnila sikwas-nasdaed,
gwen bendakleged nikasulid.
16
Anmar-Bab-Dummad-Jehováʼye, be-nug-islidikidga neg-sobegala,
bela ibmar-bukidar-an-onmaksamaladi, begi danikid,
ar be e-ibedid.
17
Anmar-Bab-Dummadye, an wisi be anmar-wilubdaked,
degi, dule-innikidaed be nue-abeged.
Agala, an gwage-islidikidgi bela an bega ibmarmar uksad.
Emide an daked, dulemar ibiyobi ulubgi weligwaledba bega ibmar uksamala.
18
”Bab-Jehová, anmar-dadgan-Abraham-e-Bab-Dummad, Isaac-e-Bab-Dummad, Israel-e-Bab-Dummad:
Bitigi be, be-dulamar-weyob-binsaed, degi, weyob-ibmar-imakedi, mer osulogena gadin.
Deginbali, be-dulamar bela-bela bebina-soged, mer bergubalina gadin.
19
Deyopira, be an-machi-Salomónʼgala, gwage-nued be uksamogana gadin,
adi, Be-Igar-Mamaidba nanaega,
degi, Be-Igar-Mesismaladba nanabaligar.
Deginbali, an bese egisbalid,
bitigi an-machi-Salomón, an-ibmarmar-onmaksadgi, bese-goled-neg-sobed-obelogega be imaksabalina gadin.”
20
Degine, geb David bela-dulemar-bukwadga sogded: “Be-dadgan-e-Bab-Dummad-Jehová-e-nug be odummomarsun.” Degidgi, bela-dulemar-bukwad, e-dadgan-e-Bab-Dummad-Jehová-e-nug odummosmalad. Agine, Bab-Jehová-asabin, degi, rey-asabin napase dulluu imaksamalad.
Salomón reyga megnonikid
21
Neg-oibosadgine, Israel-dulemar-nuggine, Bab-Jehováʼga we-ibmar-durgan oburgwismalad, degi, ega ogumakar uksamarbalid:
Moli-bebe-nikad-machergan, miligwen (1,000),
sibad-wawaad-machergan, miligwen (1,000),
sibad-wawaad-sapingana, miligwen (1,000),
degi, vinoʼse-bakar, Bab-Jehováʼga uksamalad.
Deyob, Israel-dulemar-ular ibmar-bukidar Bab-Jehováʼga uksamalad.
22
A-ibagine, Israel-dulemar, Salomón-e-nonogine olivo-gwallu eosmalad, adi, Salomón David-sorba reyga megegar. Deyob Sadocʼgi olivo-gwallu eosmarbalid, dule-irwa-Bab-Dummadse-goledga onug-imakmalagar. Israel-dulemala, wese-ilabogus deyob Salomón-imakdanimalad, adi, oyogega reyga gunoniye. Degidbali, bela weligwaledba Bab-Jehová-asabin gobsamalad, degi, mas-guchamarbalid.
23
Degine, Salomón, e-bab-David-sorba Bab-Jehová-gangi reyga signonisunnad. Degidgine, Salomón bela-bela nasgusad. Israel-dulemar belagwable Salomón-sogedba bela ibmar-imakbukwa gusmalad.
24
Bela dule-dummagan, dule-gandikmalad, degi, Rey-David-e-masmala, Salomón-reyga-megisad yeerdaksamalad, eba nanadii gusmalad.
25
Degi, Bab-Jehová, Israel-dulemar-asabin bela-bela Salomón-e-nug odummosad, e-yar-semaid bela-bela ogannosbalid. Salomón-iduale, rey-baid Salomónʼyobid gandikidba-yeerdaklege Israel-yargi yar-semai gussulid.
Rey-David-burgwisad
26
Isaí-machi-David, bela-Israel-dulemarga yar-semai-gusad.
27
Israel-yargi bela birga-dulabo (40) yar-sesad. Hebrón-neggweburgi birgagugle (7) yar-sesad, degi, Jerusalén-neggweburgi birga-dulagwen-gakambe-gakapaa (33) yar-sesad.
28
David nue-selebagusadgi burgwisad. Ibmar-nuegan-bukidar-nika, degi, nug-dummarba-nika burgwisad. Geb a-sorbali, e-machi-Salomón yar-seega megnonikid.
29
Bela-Rey-David-gebe-ibmar-imakded, degi, napi-ibmar-imaksadse, Bab-Dummad-negburgan-daked-Samuel neggusad-gardagi narmakar maid, degi, Bab-Dummad-gayaburba-barsoged-Natán neggusad-gardagi narmakar maibalid, degi, Bab-Dummadgi-negburgan-daked-Gad neggusad-gardagi narmakar maibalid.
30
Bela Rey-David-e-negsesad, e-gangu-megisad, e-gudigusad, degi, Israel-dulemargi-ibmar-gusmalad, bela yar-baigangi neg-gusmarbalidi, we-gardamargi narmakar nanaid.
Powered by Seed Bible API
expand_more
Search
All books
Old Testament
New Testament
chevron_left
Previous Chapter
Books
search
Search
explore
Discover
share
Share
chevron_right
Next Chapter