Romans9
1Gô đnooy varơuq dik đom Lôôk Wơơt Dêh. Gô leh đnooy pa ôôh — xuum klaak gô dơơp xanưk ka gô đom Lôôk Phool Hiel,2đaneq đôôyq dii gô, e varơuq hlu rơu kôt ji ajơ jiq jiêh leh hlơơp đom xuum gô.3Bơyh gô 'miêh trôôch kajoq kadih gô biq karoay axaap, aklah vlôh klơlh Lôôk Wơơt Dêh vii kơq oh ay gô, laa khơl adro takuul takiel ku gô tyauq phon xăk;4kadih oot laa tamooy I-sơ-ra-ên, đơu kaluh varơuq thuôk xuq oot laa jah dơơp koot văch, tađnah tađnaak, kaluh tavek, varơuq kahniq ăm ganuun, varơuq ayuôôt laat, ji kaluh apok tavek;5oot vlôh xing kaluh khơl mo kơy, ji Lôôk Wơơt Dêh vlôh xing oot — (nưq laa tyauq phon xăk) — Kadraq laa Kơy galơh iaq hloay dêq hloay, 'ngưq laa Kơy Plêêk đangq jah vanê ayuôôt dong truh đơơy đơơy. Amen.6Bơh leh e varơuq apok ku Kơy Plêêk heq hlơơp paq ik xung. Vii be aalq dêq hloay khơl leq vlôh xing I-sơ-ra-ên, yôôych nưq laa manih I-sơ-ra-ên.7Kung be aalq dêq hloay koot xau laa adrơơk ku Ap-ra-ham. Bơh laa, “Bơyh I-sak, adrơơk ku koot hnoq jah taayh anơng.”8Iq ji koot xau tyauq xăk xamơk, khơl adro nưq leh aalq laa khơl koot ku Kơy Plêêk. Wih hlê, koot xau ku apok tavek yôôych jah 'yo đaji adrơơk.9Vii neq laa apok tavek: “Muut tuôôy kawat neq, Gô hnoq truh, ji hnoq e muuyq koot kanau deng ka Sa-ra.”10Bơh leh vơ đanưq, đơu Rê-bê-ka kung anưq tuôôy e bonq bơyh muuyq dro, laa I-sak, mo kơy ku haay —11vii đom tuôôy koot koq jah pa iir vlôh, kung koq dơơp varơuq kaxay long varơuq xơk leq, xôq ka iq đinq ku Kơy Plêêk tyauq varơuq rơơlh xok ku Kadraq hnoq ik jư kajưk,12Leh aalq bơyh varơuq dơơp, bơh laa bơyh Kơy taayh tawooyh — varơuq heq jah ăm mo jah xet, nưq laa: “Adro kôt hnoq dơơp xapok ka dro de,”13I đaji varơuq heq jah valơk: “Gô xiaq Ja-kôp, bơh Gô 'yarơ Ê-sau.”14Anưq, haay hnoq đnooy đaleq? Dang aleq e varơuq leh hyioh jăk aduq Kơy Plêêk ih? Varơuq nưq leh xalih vlôh ik.15Vii Kadraq xanoh dii Môi-se, đaneq: “Gô hnoq kahnoq xuum hwêêt dii paq kê kơyq đơu Gô trôôch kahnoq xuum hwêêt, ji Gô hnoq biit angơuq paq kê kơyq đơu Gô trôôch biit angơuq.”16Lunưq be aalq bơyh adro leq ưng trôôch, kung leh aalq kơq adro leq charơơk đnen charơơk kahơ, bơh laa jo thuôk Kơy Plêêk, Kơy kahnoq xuum biit angơuq.17Vii Rahlăp Vah đnooy truh Pha-ra-ôn đaneq: “Vii jơq iq đinq neq Gô heq panưk xăk tok, xôq gamưh xăk Gô hnoq ik ăm hloq da uh qwuyen ku Gô, ji xôq aleq ka yal Gô hnoq ik jah padoh pahêêr loch tol vari.”18Lunưq, Kadraq kahnoq xuum hwêêt đôôyq dii adro leq Kadraq trôôch, bơh Kadraq dơơp găk xuum adro leq Kadraq trôôch.19Anưq yôôych oh ay hnoq đnooy dii gô: “Anưq, aleq Kadraq măn trek kưq? Vii kơyq tachơơl hlê iq đinq ku Kadraq ik?”20Nee dro hơq, tol dong dik yôôych ay laa kơyq đơu aklơ ka'lăk Kơy Plêêk? Dang aleq vâk kajoq jah vlêêt vlôh hnoq đnooy dii adro heq vlêêt vlôh ni: “Aleq kơy heq dơơp vlôh gô tyauq đaji luneq” ư?21Long laa manih thơq gôômq be e qwuyen tol vari dik, xôq dơơp vlôh muuyq vlong đôô xing kung muuyq đum vari, tyauq apoop neq deng ka varơuq kôt lơyq, bơh thư hơq deng ka varơuq lêq iaq?22Măn atoh Kơy Plêêk, vii xung ăm hloq đơơt tôq dayh ku Kadraq ji kahnoq vlôh taay yaak ku Kadraq, heq chiuq uunq đom varơuq atuq xuum thier kôt đôôyq dii kaluh valong đôô deng ka đơơt tôq dayh, heq jah ralauq 'miêh ka varơuq kaxêêt hlơơp dêq;23ji xôq Kadraq hnoq ik kahnoq vlôh varơuq karoh e ku tađnah tađnaak Kadraq tol kaluh valong đôô deng ka varơuq biit angơuq đơu Kadraq heq ralauq 'miêh ka varơuq tađnah tađnaak —24hloay ka haay laa khơl adro đơu Kadraq heq taayh tawooyh, leh vơ xing manih Jo Thaiq, đơu măn xing kaluh tamooy daak kadrơy, yôôych aleq?25Đaji Kadraq kung xanoh đom rahlăp Ô-sê, đaneq: “Gô hnoq taayh adro leh aalq tamooy Gô, laa ‘tamooy Gô’, ji adro be jah xiaq laa ‘adro xung xiaq’.26Ji varơuq xalih vlôh hnoq e ka aduq đơu apok heq jah padoh ka oot, đaneq: ‘Khơl êêp be aalq tamooy Gô’, yôôych jơq aduq nưq, oot hnoq jah taayh laa ‘khơl koot kanau ku Kơy Plêêk hloay riirh.’”27Bơh Ê-sai pariau tok truh tamooy I-sơ-ra-ên, đaneq: “Long sôôq koot xau ku tamooy I-sơ-ra-ên hnoq ik laa đaji choah tahli, bơh vơ muuyq phon măn soot hlê hnoq jah wơơt,28Vii Lôôk hnoq dưk dơơp apok Kadraq tol vari, payôôch ji dayh talăng.”29Ji đaji Ê-sai heq đnooy adroyq: “Atoh Lôôk ku kaluh đaauq kuun heq leh xôq hlê ka haay muuyq adrơơk, yôôych heq đol haay heq biq vlôh jêêk đaji theng Sô-đôm, ji kajưk laa heq biq dơơp ăm dang đaji theng Gô-mô-rơ.”30Anưq, haay hnoq đnooy đaleq? Nưq laa khơl tamooy daak kadrơy, 'ngưq laa khơl adro leh hooy tyauq varơuq hyioh jăk, yôôych heq jah ik varơuq hyioh jăk, bơh varơuq hyioh jăk nưq bơyh xuum tuôq.31Măn manih I-sơ-ra-ên, tuôôy hooy tyauq ganuun ku varơuq hyioh jăk, yôôych heq leh varơyh truh ganuun nưq.32Vii kakơq kajoq? Nưq laa vii leh bơyh xuum tuôq, bơh đaji bơyh varơuq dơơp. Oot heq xatôôlh jôôk muut kuk phơu ku varơuq klơl hlê,33đaji heq jah valơk: “Dayh 'yo nee, Gô xôq aduq Si-ôn muuyq kuk phơu ku varơuq klơl hlê ji kuk phơu ku varơuq xatôôlh lôp, dro leq tuôq aduq phơu nưq hnoq leh biq kamưưl.”
FAR EAST BROADCASTING COMPANY